Yehova Mbwaakashitilisha Jeoshafati

Jeoshafati mwaami wa bene Juda, wakanyonyoola shipaililo shakwe Baali a shibumbwabumbwa shoonse mucishi coonse. Wakalinga kusuni ayi bantu bashibe milawo yakwe Yehova. Aboobo wakatuma banaabaami abene Lefi mucishi coonse ca Juda kuya mukwiisha bantu milawo yakwe Yehova.

Bantu bamushishi shakalinga pafwiifwi a bene Juda, bakalinga kuloonda kubalwana mukwiinga bakalinga kucishi ayi Yehova wakalinga abantu bakwe. Bakaleta ashipo ku Mwaami Jeoshafati. Sombi bene Moabu, bene Amoni abaabo bakalinga kulubasu lwa Siya bakesa mukulwana bene Juda. Jeoshafati wakeshiba ayi wakalinga kuyandika lucafwo lwakwe Yehova. Wakabunganya basankwa, banakashi, alimwi abaana pomwi ku Jelusalemu. Wakeemikana kunembo lya bantu boonse akupaila ayi: ‘Yehova, inga tatucikoonshi kukoma nkondo iyi kwakubula lucafwo lwanu. Twasenga amutulwite shakucita.’

Yehova wakakumbula mupailo wabo kwiinda mukwaamba ayi: ‘Utaloondi. Ndaakukucafwa. Mwebo mwiimikanebo akubona mbweshi mupulushe.’ Ino Yehova wakabapulusha buyani?

Bushiku bwakakonkelawo macuunsa, Jeoshafati wakasala beshikwiimba akubabika kunembo lya likoto lya masoja. Bakeenda kuswa ku Jelusalemu kuya mukushika ku Tekowa nkobakalinga kulwanina nkondo.

Beshikwiimba ndyebakalinga kulumbaisha Yehova mulwiimbo calusangalalo, Yehova wakabalwanina nkondo bantu bakwe. Wakalengesha bene Amoni a bene Moabu kupilingana akutalika kucayana beene abeene, alimwi taakuwo nabi womwi wakapuluka. Sombi Yehova wakashitilisha bene Juda, masoja, abapailishi. Bantu bamushishi shakalinga pafwiifwi abene Juda bakanyumfwa Yehova nshaakacita. Alimwi bakalinga kucishi ayi Yehova acishitilisha bantu bakwe. Ino Yehova alabapulusha buyani bantu bakwe? Alabapulusha munshila shiinji. Taayandiki lucafwo kuswa kubantu kwaamba ayi acikoonshe kucita boobo.