Sheenga Shatucafwa Kushimikila Kabotu—Kushimikila Mumisena ya Makwebo

Mulandu Ncociyandikila: Mukwiinga bantu baanji balatola ciindi cilaamfu kuncito, aboobo nshila ibotu yakubashimikila makani a Bwaami, nkuya kumusena nkobasebensela. Kushimikila mumisena yamakwebo kulasangalasha alimwi kulicite mpindu, mukwiinga bantu balacanika alimwi beshimakwebo balatambula bantu cabulemu kuyeeya ayi mpashi besa mukula makwebo abo. Kwaamba ayi bantu batatongooki ncito yesu, tulyeelete kusebensa camaano alimwi akufwala kabotu. (2 Koli. 6:3) Aboobo, mutangilili wa ncito ulyeelete kubikila maano kushiba misena yamakwebo yeelete kusebensekwa alimwi abeshikushimikila basebenselaamo.

Nsheenga Twacita:

• Amulibambile shakwaamba shiniinibo. Na twatoola ciindi cilaamfu kwaamba ababo bali pancito, na twaboolelako inga bakaka kubandikabo.

• Amuye paciindi ndyebatacite shiinji shakucita, mbuli macuunsa bantu kabatana kufula.

• Amutaangune kwaamba amunene wa pancito. Amwaambe abo cabulemu alimwi calusangalalo. Inga mwaamba ayi, “Tutobandika abantu kumisena nkobasebensela kwaciindi ciniinibo mukwiinga baanji tatubacani kumaanda.” Amwaambe paniinibo, alimwi akumupa ka tilakiti, mamagazini, na libuku limwi ndyemucite. Kwaamba ayi batatuboni anga mbantu bamakwebo, cili kabotu kutaamba sha maali apekwa mukuliyandila sombibo na wepusha mbotucana maali acafwa ncito yesu.

• Na munene wa pancito uli kabotu, amumusenge kwaamba ayi mwaambeko paniinibo abasebenshi bamwi. Mumisena imwi, inga caba kabotu kwiipusha na inga mwashiiya shakubelenga mumusena wakulitaamo na kookesha.

• Kamutana kwaamba amuntu amuyeeye kabotu nsheenga mwacita, akubona na inga cakonsheka. Mucikoshanyo, na musebenshi utokwaamba amuntu utookula nabi utooboneka ayi ulicite shiinji shakucita, amulindile kushikila waba aciindi lyalo ndyeenga mwaambakwe.

Amweeleshe Kucita Sheshi mu Mweenshi Uno:

• Ndyemutoocita Kulambila Kwamumukwashi amweeleshe kucita citondesho ca nsheenga mwaamba shiniinibo na kamushimikila mumisena yamakwebo.