Makani Akusebensesha amu Kabuku Kamabungano Abuumi Alimwi Anciito
APRIL 2-8
BUBONI BUCANIKA MUMASWI AKWE LESA | MATEYO 26
“Pasika a Ciibalusho—Mboshikoshenye Alimwi Amboshipusene”
(Mateyo 26:17-20)
nwtsty Shakweebela
Cakulya ca Pasika
1 Cakulya ca Pasika cakalinga kuyandika shintu mbuli: kuyoka mwanaambelele (tebakalinga kweelete kupwaya shifuwa sha nyama) (1); cimaande citacite cimena (2); alimwi abucisa bulula (3). (Ku. 12:5, 8; Shakube. 9:11) Kweelana aba Juda, bucisa bulula bulyeelete bwakalinga bobulya bwiitwa ayi lettuce, chicory, pepperwort, endive, na dandelion, ubo cakutatoonsha bwakeebalusha bene Isilaeli sha mapensho ngobakeendaamo ndyebakalinga mubusha ku Ijipiti. Yesu wakasebensesha cimaande citacite cimena kwiimikaninaako mubili wakwe usalalite. (Mate. 26:26) Mutumwi Paulo wakeeta Yesu ayi “mwanaambelele wesu wa Pasika.” (1 Koli. 5:7) Kushika muciindi ca mwaanda wakutaanguna, waini (4) awalo wakalinga kupekwa paciindi ca cakulya ca Pasika. Yesu wakasebensesha waini kwimikanina bulowa bwakwe, ubo bwakalinga kusa mukutilwa mbuli mulambu.—Mate. 26:27, 28.
(Mateyo 26:26)
nwtsty makani acafwa kwiiya pali Mate. 26:26
ulemikanina: Liswi lyamuci Giliki e·stinʹ (ilyo lisansululwa ayi “ngu”) lilaamba “kwimikaninaako”; na cikoshanyo.” Batumwi balyeelete bakalinga kucishi Yesu nshakalinga kusansulula ndyakaamba maswi aya, mukwiinga paciindi ici Yesu wakalinga ambabo mumubili wakwe usalalite bweenka mbuli cimaande citacite cimena ncebakalinga kusuni kulya. Aboobo, cimaande tecakalinga mubili wakwe wiine. Liswi lyeenka ili lyamuci Giliki lilacanika apa Mate. 12:7, alimwi busansulushi bwa ma Baibo aanji bulasebensesha liswi lyakwaamba ayi “ulemikanina.”
(Mateyo 26:27, 28)
nwtsty makani acafwa kwiiya pali Mate. 26:28
bulowa bwa cipangano: Cipangano cipya pakati ka Yehova aBeneklistu bananikitwe, cakatalika kusebensa kwiinda mumulambu wakwe Yesu. (Ebu 8:10) Yesu wakasebensesha maswi Mose alakwe ngwakasebensesha ciindi ndyaakalinga kusebensa mbuli shikukala pakati andyakapekwa cipangano ca Mulawo abene Isilaeli paKalundu ka Sinayi. (Ku. 24:8; Ebu. 9:19-21) Bweenka mbuli bulowa bwa bacende ampongo mbobwakapa kwaamba ayi Mulawo wa cipangano ube ankusu pakati kakwe Lesa abene Isilaeli, Bulowa bwakwe Yesu bwakapa nkusu cipangano cipya Yehova ncakalinga kusa mukupanga abene Isilaeli bakumushimu. Cipangano ici cakatalika kusebensa pa Pentekositi mu 33 C.E.—Ebu. 9:14, 15.
Kulangoola Buboni Bwakumushimu
(Mateyo 26:17)
nwtsty makani acafwa kwiiya pali Mate. 26:17
Pabushiku butaanshi bwa cimaande Citacite Cimena: Kusekelela uku kwakalinga kutalika pa Nisani 15, bushiku bwakalinga kwisa pesule lya Pasika (Nisani 14), alimwi kwakalinga kutola nshiiku 7. (Amubone Makani Aayungizyidwe. B15.) Nacibi boobo, muciindi cakwe Yesu, Pasika yakalinga kucatene abuumbi akusekelela kwa bushiku bwa Cimaande Citacite Cimena cakwaamba ayi nshiiku 8 shoonse, kwiilikaawo a Nisani 14, cimwi ciindi shakalinga kwiitwa ayi “Kusekelela kwa Cimaande Citacite Cimena.” (Luka 22:1) Mumakani aya, maswi akwaamba ayi “Pabushiku butaanshi bwa” inga alembwa ayi “Bushiku bwa Cimaande Citacite Cimena kabutana kushika.” (Amweelanishe a Joni 1:15, 30, apo mpotucana maswi aci Giliki akwaamba ayi “butaanshi” [proʹtos] alaambwa ayi “kabutana” bweenka maswi ngobalemba ayi, “wakalingaako nebo kantana” [proʹtos]) Aboobo kweelana aci Giliki, alimwi amulawo wabene Juda, maswi aya inga atondesha ayi bashikwiiya bakwe Yesu bakeepusha mwiipusho ulya pa Nisani 13. Bakatalika kulibambila sha Pasika ciindi camalumwi pa Nisani 13, iyo yakesa mukutalika “Ndipakashiyashiyabo,” Nisani 14 ndyeyakalinga kutalika.—Maako 14:16, 17.
(Mateyo 26:39)
nwtsty makani acafwa kwiiya pali Mate. 26:39
kaapu iyi aiswe kulindime: Mu Baibo, liswi lyakwaamba ayi “kaapu” lilasebenseshekwa munshila yacikoshanyo, lilemikanina kuyanda kwakwe Lesa, na ‘lubasu muntu ndwapekwa,’ kucita. Inga tatutoonshi kwaamba ayi Yesu wakalinga kubikite maano abuumbi kukulenshekwa nsoni kwakalinga kweelete kusa kuli Lesa ceebo ca lufu lwakwe mbuli muntu ngobakoombolosha ayi takalinga kulemeka Lesa alimwi wakalinga kupikisha beendeleshi, ico cakamupa kupaila ayi “kaapu” iyi aiswe kulindime.
Kubelenga Baibo: (Mateyo 26:1-19)
APRIL 9-15
BUBONI BUCANIKA MUMASWI AKWE LESA | MATEYO 27-28
“Kamuya Mukaiishe—Ceebonshi, Kuli, Alimwi Munshila Nshi?”
(Mateyo 28:18)
w04 7/1 8 pala. 4
‘Kamuya Mukaiishe Bantu Kuba Bashikwiiya’
4 Yesu alicite nkusu palibungano lyakwe, alimwi wakapekwa nkusu pa Bwaami bwakwe Lesa bupya bwakabikwa mu 1914. (Bene Kolose 1:13; Ciyubululo 11:15) Ngo munene pa baanjelo aboobo ngotanjilila shuulu ashuulu shamakoto abaanjelo kwiculu. (1 Bene Tesalonika 4:16; 1 Pita 3:22; Ciyubululo 19:14-16) Baishi bakamupa nkusu shakunyonyoola “mfulumeende shoonse abweendeleshi boonse ankusu shoonse” shipikisha njiisho shakwe shiluleme. (1 Bene Kolinto 15:24-26; Bene Efeso 1:20-23) Yesu tacitebo nkusu pa boomi. Sombi “ngumoomboloshi wa boomi abafu” alimwi Lesa wakamupa nkusu shakubusha baabo bakafwa. (Milimo 10:42; Joni 5:26-28) Aboobo cintu ciyandika abuumbi kukonkela mulawo wakapekwa amuntu ucite nkusu shiindaawo. Nceceeco, tulatondesha bulemu akusumina kukonkela mulawo Klistu ngwakatupa ayi ‘kamuya mukaiishe bantu.’
(Mateyo 28:19)
nwtsty makani acafwa kwiiya pali Mate. 28:19
kwaamba ayi babe bashikwiiya: Liswi lyaci Giliki ma·the·teuʹo inga lyasansulula “kwiisha” amuyeeyo wakucafwa muntu kuba shicikolo na shikwiiya. (Amweelanishe a Mate. 13:52, iyo yaamba ayi “kwiishikwa.”) Maswi akwaamba ayi “mukababombeke” alimwi “akunobaiisha” alatondesha ayi mulawo uyo uleelikawo kwiisha bantu “kuba bashikwiiya.”
bantu bamishobo yoonse: Kweelana mboyakalembwa ilasansulula “shishi shoonse,” ono sombi na mwabona makani oonse atotondesha kwaamba ayi maswi aya alasansulula bantu kuswa mishobo yoonse, mukwiinga liswi lyamuci Giliki “lyakubabombeka” mumaswi akwaamba ayi mukababombeke ili muliina lyacisankwa alimwi ilaamba bantu, kuteshi “shishi,” mumushobo waci Giliki njacisankwa. Mulawo uyu wakushimikila “bantu bamishobo yoonse” wakalinga upya. Yesu katana kutalika ncito yakushimikila, Malembo alatondesha kwaamba ayi bantu bakunsengwe bakalinga kutambulwa kubene Isilaeli na besa mukusebensela Yehova. (1 Baami 8:41-43) Nacibi boobo kweelana amulawo uyu, Yesu wakalwiita bashikwiiya bakwe kushimikila bantu boonse kuteshibo kubene Juda, kutondesha kwaamba ayi incito ya Beneklistu yakwiisha bantu kuba bashikwiiya ilaakushika nsengwe yoonse.—Mate. 10:1, 5-7; Ciyu. 7:9.
(Mateyo 28:20)
nwtsty makani acafwa kwiiya pali Mate. 28:20
mukabeeishe: Muci Giliki liswi lyakwaamba ayi “kwiisha” lileelikaawo kupa shakucita, kusansulula, kutondesha shintu kwiinda mukupikisha, akupa bumboni. Kubeeisha kukonkela shintu shoonse Yesu nshakaamba teshi ncito ya bushiku bomwi alimwi ici inga ceelikaawo kubaiisha nshakaiisha, kukonkela nshakaiisha, akukonkela cakubonenaako cakwe.—Joni 13:17; Efe. 4:21; 1 Pita 2:21.
Kulangoola Buboni Bwakumushimu
(Mateyo 27:51)
nwtsty makani acafwa kwiiya pali Mate. 27:51
cisani cakalinga kushitilisha: Cisani cibotu ici cakalinga kupansaanya Musena Wiindaawo Kusalala aMusena Usalalite mu tempele. Makani akale kale abene Juda alatondesha kwaamba ayi cisani cakalinga cilemu cilampa mamita ashika ku 18, mulifumo cakalinga mamita 9, alimwi ama inci 2.9 kukomena. Kukwamuka kwa cisani uku kwakatondesha kwaamba ayi Yehova wakalala ceebo ca baabo bakacaya mwanaakwe alimwi cakalinga citondesho cakwaamba ayi mulyaango wakunjila kwiculu wacaluka ano.—Ebu. 10:19, 20; Amubone Bupanduluzi Bwamabala Aamu Bbaibbele.
musena usalalite: Maswi amuci Giliki aamba ayi na·osʹ alasansulula musena unene umo mwakalinga Musena Usalalite alimwi a Usalalite Wiindaawo.
(Mateyo 28:7)
nwtsty makani acafwa kwiiya pali Mate. 28:7
mukalwiite bashikwiiya bakwe ayi, ‘wabushikwa: Banakashi aba tebakalinga bashikwiiya bataanshi kulwiitikwa ayi Yesu wabushikwa sombi mbobakalwitikwa kuya mukulwitako bashikwiiya bamwi. (Mate. 28:2, 5, 7) Kweelana amulawo wa bene Juda, kooti ya milawo tayakalinga kusumina kutambula bumboni bwaswa kumwanakashi. Ono mubupusano, munjelo wakwe Yehova wakapa bulemu banakashi kwiinda mukubapa ncito isangalasha iyi.
Kubelenga Baibo: (Mateyo 27:38-54)
APRIL 16-22
BUBONI BUCANIKA MUMASWI AKWE LESA | MAAKO 1-2
“Shibiibi Shako Shalekelelwa”
(Maako 2:3-5)
jy 67 mapa 3-5
“Shibiibi Shako Shalekelelwa”
Yesu ndyaakalinga kwiisha muŋanda mwakalinga kuswite bantu, basankwa bone bakaleta muntu ufwite mubili kalete pamacila. Bakalinga kusuni kwaamba ayi Yesu amoleshe mubyaabo. Ono ceebo cakufula kwa bantu, bakaalilwa “kumwiinsha kuli Yesu.” (Maako 2:4) Amuyeeyebo mbobakatyompwa. Bakatanta peculu paciluli ca ŋanda cipapalete akupanga bulyango. Mpeeke bakamwiinsha akumuleleesha pamacila kushikila panshi.
Ono sa Yesu wakabakalalila? Sobwe! Wakakankamana alushomo lwabo lyalo wakalwita musankwa uyo wakalinga kufwite mubili ayi: “Shibiibi shako shalekelelwa.” (Mateyo 9:2) Ono sa Yesu wakalinga kucite nkusu shakulekelela shibiibi? Balembi aba Falisi bakatalika kumupikisha, kabaamba ayi: “Ino uyu muntu utokwaambilanshi bobulya? Nkucobola Lesa uku. Ngani weenga walekelela shibiibi? Sa te nguLesa eenkabo?”—Maako 2:7.
Ndyakeshiba nshebakalinga kuyeeya mumyoyo yabo, Yesu wakaamba ayi: “Ino mutoyeyeelanshi shintu sha mushobo uyu mumyoyo yanu? Ncili cuubu kwaambila muntu uyu ayi, ‘Shibiibi shako shalekelelwa’, nabi kwaamba ayi, ‘Nyamuka, bwesa macila ako unooya’?” (Maako 2:8, 9) Ncakwiila, Yesu wakalinga kucite nkusu shakulekelela shibiibi sha musankwa ulya ceebo ca mulambu ngwakalinga kusa mukupa mukuya kwaciindi.
(Maako 2:6-12)
nwtsty makani acafwa kwiiya pali Maako 2:9
Ncili cuubu: Inga caba cuubu muntu kwaamba ayi inga walekelela shibiibi, mukwiinga taakuwo bumboni buyandika kwaamba ayi muntu ashinishe ayi inga wacita boobo. Ono kwaamba ayi, Nyamuka . . . weende kwakalinga kuyandika cankaamiko ceenga catondesha bantu boonse kwaamba ayi wakalinga kucite nkusu shakulekelela shibiibi. Makani aya a Isa. 33:24 alatondesha ayi malwashi akesa ceebo cakutasalala kwesu.
Kulangoola Buboni Bwakumushimu
(Maako 1:11)
nwtsty makani acafwa kwiiya pali Maako 1:11
liswi lyakanyumfwika kuswa kwiculu: Ciindi cakutaanguna pa mankanda otatwe mu Makani Abotu ngotucana mumaswi akwe Yehova akanyumfwika kubantu.
Ndiwe Mwanaangu: Mbuli cilengwa cakumushimu, Yesu wakalinga Mwanaakwe Lesa. (Joni 3:16) Bweenka mbuli Adamu mbwakalinga katana kubisha, Yesu wakalinga “mwanaakwe Lesa” kuswabo ciindi ndyakashalwa mbuli muntu. (Luka 1:35; 3:38) Nacibi boobo, citoboneka kwaamba ayi maswi akwe Lesa apa tatokwaambabo ayi tushibe Yesu. Kwiinda mukwaambilisha uku kwakeelikaawo akutilwa kwa mushimu wakwe Lesa, Lesa wakatondesha kwaamba ayi Yesu wakalinga wakushalwa eenkabo mbuli Mwanaakwe wakumushimu, uyo “wakashalwa alimwi” abulindilishi bwakuboolela kwiculu akunanikwa amushimu wakwe Lesa kwaamba ayi abe Mwaami a Mupailishi Munene wakasalwa.—Amweelanishe a Joni 3:3-6; 6:51; Luka 1:31-33; Ebu. 2:17; 5:1, 4-10; 7:1-3.
pali ndiwe ndikondetwe abuumbi: Maswi aya alacanika apa Mate. 12:18, iyo icite maswi akaswa palilembo lyakwe Isa 42:1 yaamba pali Mesiya wakashomeshekwa na Klistu. Kusa kwa mushimu usalashi amaswi Lesa ngakaambilisha pali Mwanaakwe shakalinga citondesho cakutatoonsha kwaamba ayi Yesu wakalinga ngo Mesiya wakashomeshekwa
(Maako 2:27, 28)
nwtsty makani acafwa kwiiya pali Maako 2:28
Mwaami . . . wa Sabata: Yesu wakalinga kulyaamba mwiine mumaswi aya (Mate. 12:8; Luka 6:5), kutondesha kwaamba ayi wakalinga kucite nkusu shakucita ncito Baishi bakwiculu njebakamupa nabi pa bushiku bwa Sabata. (Amweelanishe Joni 5:19; 10:37, 38.) Yesu wakacita shaankamiko shimwi shinene nabi pabushiku bwa Sabata, ishi shakeelikaawo akushilika balwashi. (Luka 13:10-13; Joni 5:5-9; 9:1-14) Ici cakalinga citondesho ca shintu nshaakalinga kusa mukucita kunembo mubulelo bwa Bwaami, ubo bweshi bukabe mbuli bushiku bwakookesha bwa Sabata.—Ebu. 10:1.
Kubelenga Baibo: (Maako 1:1-15)
APRIL 23-29
BUBONI BUCANIKA MUMASWI AKWE LESA | MAAKO 3-4
“Koolesha Bushiku bwa Sabata”
(Maako 3:1, 2) Lyalo Yesu wakaboolela alimwi mu sinagogi, umo mwakalinga musankwa wakalinga kuyuminite lyaansa. 2 Bamwi bantu bakalingaawo, bakalinga kusuni kucana cilubo muli Yesu. Bakalinga kumulangilisha ayi baboneshe na inga wamushilika pabushiku bwa Sabata, kwaamba ayi bamupe mulandu.
jy 78 mapa. 1-2
Nciinshi Cisuminishikwa Pabushiku bwa Sabata?
Pabushiku bumwi bwa Sabata, Yesu wakaya ku sinagogi, mpashi ku Galili. Wakacana musankwa umwi wakalinga mulema lyaansa lyakululyo. (Luka 6:6) Balembi abaFalisi bakalinga kumulangishisha Yesu. Ino nceebo nshi? Bakatondesha shakalinga mumyoyo yabo ndyebakeepusha ayi: “Sa cilasuminishikwa kushilika muntu pabushiku bwa Sabata?”—Mateyo 12:10.
Bamatanjilili babupailishi bwa bene Juda balashoma ayi cilasuminishikwabo kushilika muntu pabushiku bwa Sabata na buumi bwakwe buli mumapensho. Kucakubonenaako, bakalinga kushoma ayi nkupwaya mulawo kucafwa muntu watyoka nabi kwaanga bandeci uyo walicisa, na inga tafwi ceebo cakulicisa uko. Cakutatoonsha balembi abaFalisi tebakalinga kwiipusha mwiipusho Yesu paceebo cakwaamba ayi bakanyumfwila nkumbu musankwa ulya wakalinga kupenga. Bakalinga kwiipusha kwaamba ayi bacane pakumupeta mulandu.
(Maako 3:3, 4)
jy 78 pala. 3
Nciinshi Cisuminishikwa Pabushiku bwa Sabata?
Nacibi boobo, Yesu alishi miyeeyo yabo itabete kabotu. Alicishi kwaamba ayi balicite miyeeyo itabete kabotu, iyo iteendelani amalembo ncaamba pa kupwaya mulawo uyo ukasha kusebensa pabushiku bwa Sabata. (Kulonga 20:8-10) Teshi ceensu kulinguwe kwaamba ayi bamucanina mulandu ceebo cakucita ncito ibotu. Aboobo Yesu wacana coolwe cakubaambilila limwi kwiinda mukulwita musankwa uyo wakalinga mulema lyaansa ayi: “Nyamuka, koosa pakati.”—Maako 3:3.
(Maako 3:5)
nwtsty makani acafwa kwiiya pali Maako 3:5
cabukali, akubicilwa abuumbi: Maako eenkabo ngowakalemba sha kukalala kwakwe Yesu ndyakabona kubica myoyo kwa bamatanjilili babupailishi paciindi ici. (Mate. 12:13; Luka 6:10) Mpashi Pita mwiine ngowakaamba makani aya a Yesu mbwakalinyumfwa.—Amubone “Vidyo ya Shitocanika Mulibuku lyakwe Maako.”
Kulangoola Buboni Bwakumushimu
(Maako 3:28, 29)
nwtsty makani acafwa kwiiya pali Maako 3:29
kucobola Mushimu Usalashi: Kucobola Mushimu Usalashi cilaamba kwaamba maswi atabete kabotu pali Lesa na shintu shisalalite. Mukwiinga mushimu usalashi ulaswa kuli Lesa mwiine, kupikisha na kukaka kweendeleshekwa anguwo cakuliyandila, ncomwibo akucobola Lesa. Bweenka mbuli shatondeshekwa pa Mate. 12:24, 28 a Maako 3:22, bamatanjilili babupailishi bwa bene Juda bakabona mushimu wakwe Lesa mbowakalinga kusebensa pali Yesu kwiinda mushaankamiko nshakalinga kucita; Sombi balo bakalinga kwaamba ayi nkusu shakwe shakaswa kuli Satana.
mulandu wacibiibi citamaani: Maswi aya atoboneka alaamba kucita shibiibi kashanga uko kuleta mapensho amuyayaya; taakuwo mulambu weenga walubula muntu kububiibi bwa mushobo uyu.
(Maako 4:26-29)
w14 12/15 mape. 12-13 mapa. 6-8
Sa ‘Mulanyumfwisha Kabotu Ncaamba Malembo’?
6 Nshiinshi nsheenga tweeya kucikoshanyo ici? Citaanshi, tulyeelete kwiibaluka kwaamba ayi teshi ndiswe tupa kwaamba ayi shikwiiya Baibo aye panembo. Kwiibaluka citente ici inga kwatucafwa kutakakatisha shikwiiya kuya panembo nabi kubatishikwa. Ncancine kwaamba ayi tulyeelete kucafwa shikwiiya kuya panembo, sombi tulyeelete kwiibaluka kwaamba ayi shikwiiya ngoweelete kulyaaba mwine kuli Yehova. Alyeelete kulyaaba mukuliyandila mwine ceebo ca lusuno lwakwe pali Lesa. Na twamukakatisha Yehova inga takondwiwo.—Kulu. 51:12; 54:6; 110:3.
7 Cabili, kunyumfwisha makani Yesu ngakalinga kwaamba mucikoshanyo ici kulakutucafwa kutolelela kushimikila nabi twabona ayi bantu mbotutoshimikila tabatooya panembo. Tulyeelete kukalika moyo. (Jemu. 5:7, 8) Nabi kwaamba ayi imbuto taitoshala shisepo, na twacita shoonse nsheenga twacikonsha kucafwa shikwiiya, tatweelete kulipa mulandu ayi mpashi ndiswe twakaalilwa kusebensa kabotu. Yehova eenkabo ngoopa kwaamba ayi cancine cikule mumoyo wa muntu uyo usuni kwaalula buumi bwakwe. (Mate. 13:23) Aboobo teshi kuyabo panembo kwabaabo mbotushimikila kweshi kutondesha kwaamba ayi tutosebensa kabotu ncito yakushimikila sobwe. Yehova tabonibo ayi tutosebensa kabotu ncito yakushimikila na abo mbotushimikila kabaya panembo. Sombi alalumba abuumbi kusebensa kwesu cankusu muncito iyi nabi bantu baye panembo na sobwe.—Amubelenge Luka 10:17-20; 1 Bene Kolinto 3:8.
8 Catatu, teshi lyoonse ndyeenga twabona kwaamba ayi uyu muntu atooya panembo. Kucakubonenaako, beebene bobilo bakalinga kwiiya amishonali bakamulwiita ayi balisuni kuba beshikushimikila batana kubombekwa. Mishonali wakabalwita ayi balyeelete kucileka kufweba fwaka na balisuni kuba beshikushimikila. Mishonali uyu wakakankamana ndyebakamulwita ayi peenda myeenshi iinji kuswa ciindi ndyebakacileka kufweba. Ino nciinshi cakabapa kucileka kufweba fwaka? Bakaamba ayi bakesa mukushiba kwaamba ayi Yehova wakalinga kubabona ndyebakalinga kufweba alimwi alipatite bantu bataciti nshebaamba. Aboobo bakasala ayi balyeelete kucileka kufweba na kufweba mishonali kababona. Ono mukwiinga bakalinga kusuni Yehova bakasala kucileka kufweba. Bakaya panembo lwakumushimu nabi kwaamba ayi mishonali taakwe kushiba ayi bakalinga kuya bwaalula mibo yabo.
Kubelenga Baibo: (Maako 3:1-19a)
APRIL 30–MAY 6
BUBONI BUCANIKA MUMASWI AKWE LESA | MAAKO 5-6
“Yesu Alicite Nkusu Shakubusha Bayandwa Besu Bakafwa”
(Maako 5:38)
(Maako 5:39-41)
nwtsty makani acafwa kwiiya pali Maako 5:39
taafwite, uliletebo: Baibo liinji ileelanisha lufu akoona. (Kulu. 13:3; Joni 11:11-14; Mili. 7:60; 1 Koli. 7:39; 15:51; 1 Tesa. 4:13) Yesu wakalinga kusa mukubusha mwanakashi wacanike, aboobo alyeelete wakaamba maswi aya mukwiinga wakalinga kutondesha ayi muntu na wafwa inga wabushikwa alimwi bweenka mbotubusha muntu na woona tulo twakufwa. Yesu wakakusha nkusu shakubusha mulindu ulya kuswa kuli Baishi, “babusha bantu kuswa kubafu akwaamba shintu shitana kucitika anga shacitika kale.”—Loma. 4:17.
(Maako 5:42)
jy 118 pala. 6
Mwaana Mwanakashi Wabushikwa!
Cimwi ciindi munshiku shakwisule, Yesu wakalwiita bantu mbakashilika ayi tabeelete kulwiitaako uli woonse, alimwi ishi nshakalwita Jailosi amukaakwe. Nacibi boobo, bashali aba pomwi abantu bamwi bakakondwa abuumbi makani aya ‘akaya mpuwo cishi coonse.’ (Mateyo 9:26) Sa amwebo inga tamukondwi kulwitako bamwi na muyandwa wanu wabushikwa kuswa kubafu? Ili ndyabili ano Baibo ndyoyaamba makani akwaamba ayi Yesu wakabusha muntu kuswa kubafu.
Kulangoola Buboni Bwakumushimu
(Maako 5:19, 20)
nwtsty makani acafwa kwiiya pali Maako 5:19
ukabaambile: Mubupusano alyoonse Yesu ndyaakalinga kukasha bantu kutola mpuwo ya shaankamiko shakwe (Maako 1:44; 3:12; 7:36), wakalwiita musankwa uyu ayi kooya ukalwite beshikamukowa bako shakucitikila. Yesu wakacita boobo mukwiinga bakamulwiita ayi asweeko kumusena uko aboobo nakwiinga taakwe kubalwita mwiine; alimwi cakalinga kweelete kucafwa bantu kushiba shancine shakacitika kwaamba ayi nkumba shilya shisoweke.
(Maako 6:11)
nwtsty makani acafwa kwiiya pali Maako 6:11
mukalipaampe lusuko kushimpanta: Kucita boobo kwakalinga kutondesha ayi baswaamo mukupekwa mulandu pasheesho sheshi shikacitikile bantu abo bakaka kunyumfwa. Tulacana maswi eenka mbuli aya pa Mate. 10:14; Luka 9:5. Maako a Luka bakanungaawo akwaamba ayi kwaamba ayi bukabe bumboni bwakubacenjesha. Paulo a Banabasi abalo bakakonkela sheshi ciindi ndyebakalinga ku Pisidya yaku Antyoki (Mili. 13:51), alimwi Paulo ndyaakalinga ku Kolinto wakacita boobo kwiinda mukupaampa shakufwala shakwe, akwaamba maswi akwaamba ayi: “Bulowa bwanu abube pamitwi yanu. Nebo nshicite mulandu.” (Mili. 18:6) Bashikwiiya bakwe balyeelete bakalinga kucishi kale ncocaamba kucita boobo; kabatana kuboolela mumushi wabo, bene Juda bakalinga kulyabite kubupailishi bwabo abo bakalinga kweenda mishinso mumisena ya bantu bakunsengwe bakalinga kulipaampa lusuko kuswa kushimpanta mukwiinga bakalinga kuyeeya ayi talusalalite. Nacibi boobo, ncakutatoonsha kwaamba ayi uyu teshi ngomulandu Yesu ngwakalwitila bashikwiiya bakwe kulipaampa lusuko kushimpanta.
Kubelenga Baibo: (Maako 6:1-13)