Makani Akusebensesha amu Kabuku Kamabungano Abuumi Anciito
JUNE 3-9
BUBONI BUCANIKA MUMASWI AKWE LESA | BENE GALATIYA 4-6
Makani “‘Acikoshanyo’ Asuniki Abuumbi Kuli Ndiswe”
(Bene Galatiya 4:24, 25) Makani aya ali anga ncikoshanyo. Banakashi bobilo aba baleemikaninaako shipangano shobilo. Umwi ulaswa kuKalundu ka Sinayi, nkokwaamba ayi Aga alimwi bana bakwe mbasha. 25 Aga uleemikanina Kalundu ka Sinayi kali mucishi ca Alebya, alimwi ulikoshenye andabala inene ya Jelusalemu ya pacecino ciindi, mukwiinga yalo abantu bekalaamo bali mubusha.
it-1-E 1018 pala. 2
Aga
Kweelana ashakalemba mutumwi Paulo, Aga alemikaninaako mushobo wabene Isilaeli, abo bakalinga kukonkela cipangano ca Mulawo, uyo Lesa ngwakabapa pa Kalundu ka Sinayi, mucipangano ici mwakalinga “bana bali mubusha.” Bene Isilaeli bakaalilwa kukonkela cipangano ici ceebo cakwaamba ayi bakatolelela kucita shibiibi. Mucipangano ici, bene Isilaeli tabana kuba baangulukite sombi bakalinga kweelela kufwa ceebo cakubisha; aboobo bakalinga basha. (Joni 8:34; Loma. 8:1-3) Muciindi cakwe Paulo, ndabala ya Jelusalemu yakalinga anga ngu Aga, aboobo Jelusalemu mbuli ndabala inene yabene Isilaeli, yakesa mukuba mubusha pomwi abana bakwe. Munshiku shino, Beneklistu bananikitwe mbaana ba “Jelusalemu ya kwiculu” na mwanakashi wakwe Lesa wacikoshanyo. Bweenka mbuli Saala, mwanakashi wangulukite, Jelusalemu iyi taikwe kubawo kale mubusha. Sombi bweenka mbuli Isaki mbwakalinga kupenshekwa kuli Ishimaeli, abalo baana ba Jelusalemu yakwiculu, abo bakesa mukuba baangulukite ceebo cakwaangululwa aMwaana, bakalinga kupenshekwa kubaana ba Jelusalemu yakalinga mubusha. Nacibi boobo, Aga amwanaakwe musankwa bakatandwa, kweelana aYehova nshaakacita kumushobo wa bene Isilaeli.—Gala. 4:21-31; amubone a Joni 8:31-40.
(Bene Galatiya 4:26, 27) Sombi Jelusalemu ya kwiculu iyo yaangulukite, ngonyinawesu.Mukwiinga mumalembo akwe Lesa mulilembetwe ayi: “Kondwa webo oŋumba! Tangala akoolobesha cakusangalala, webo notakwe kunyufwawo shicisa pakushala. Mukwiinga baana bamwanakashi wakashiyikwa aibaye, mbaanji, kwiinda baabo bamwanakashi uli aibaye.”
w14-CG 10/15 pe. 10 pala. 11
Amube Alushomo Luyumu mu Bwaami
11 Nabi kwaamba ayi cipangano cakwe Abulaamu cakakumanishikwa ciindi bene Isilaeli ndyebakenjila mucishi cakashomeshekwa, Malembo alatondesha ayi cipangano ici cilaakukumanishikwa alimwi lwakumushimu. (Gala. 4:22-25) Kweelana amutumwi Paulo nshaakaamba, mukukumanishikwa uku, lubasu lwakutaanguna lwa lunyungu lwakwe Abulaamu luleemikaninaako Klistu, lyalo lubasu lwabili luleemikaninaako Beneklistu bananikitwe ba 144, 000. (Gala. 3:16, 29; Ciyu. 5:9, 10; 14:1, 4) Mwanakashi utoshala mwaana ngu ‘Jelusalemu wa kwiculu’—lubasu lwa kwiculu lwa libunga lyakwe Lesa, nkokwaamba ayi shilengwa shakumushimu shishomeka. (Gala. 4:26, 31) Kweelana aLesa nshaakashomesha mucipangano cakwe Abulaamu, bantu balaakucana shoolwe ceebo ca lunyungu lwa mwanakashi.
(Bene Galatiya 4:28-31) Ono mwebo nobamakwesu, muli bana bakwe Lesa kwiinda mukushomesha kwakwe, bweenka bwakalinga Isaki. 29 Paciindi ico, mwaana uyo wakashalwa mbuli baana boonse, wakalinga kupensha wooyo wakashalwa munkusu sha Mushimu Usalashi. Bweenka ubo mbocibete acecino ciindi. 30 Sombi Malembo akwe Lesa alaamba ayi nshi? “Alaamba ayi, “Tanda mwanakashi musha alimwi amwanaakwe musankwa mukwiinga mwaana wa mwanakashi musha inga taabwesiko buboni bwa baishi pantu pomwi amwaana wa mwanakashi waangulukite.” 31 Paceebo ceeco nobamakwesu, swebo tatwishi baana ba mwanakashi musha, sombi tuli baana ba mwanakashi waangulukite.
Kulangoola Buboni Bwakumushimu
(Bene Galatiya 4:6) Ono mukwiinga tuli bana bakwe, Lesa wakatuma Mushimu wa Mwanaakwe mumyoyo yesu. Walo ngoolengesha kwaamba ayi katwiita ayi, “Aba!” nkokwaamba ayi, “Ta!”
w09-CG 4/1 pe. 13
Sa Mulishi?
Ino Nceebonshi Yesu Ndyaakalinga Kupaila Wakeeta Yehova ayi “Aba, Ta”?
Liswi lya ciAramaic lyakwaamba ayi ‘abaʹ’ inga lyasansulula ayi “Ta” na “Noba Ta.” MuBaibo liswi ili lilacanika mankanda otatwe alimwi lilasebenseshekwa mumupailo ciindi ndyebatokwaamba pali Ishiwesu wa kwiculu, Yehova. Ino liswi ili lilasansulula nshi?
Libuku lya The International Standard Bible Encyclopedia lilaamba ayi: “Muciindi cakwe Yesu, liswi lyakwaamba ayi ‘aba’ liinji ndiswi baana ndyebakalinga kusebensesha abuumbi kwiita bamaishiwabo cabulemu alimwi calusuno.” Lyakalinga liswi litondesha lusuno alimwi lyakalinga pamaswi akutaanguna ayo mwaana ngaakalinga kushiba ndyatokwiiya kwaamba. Yesu wakasebensesha liswi ili ndyaakalinga kupaila kuli Baishi kuswa panshi lya moyo. Yesu ndyaakalinga mumuunda wa Getisemani, mawoola aniinibo kaatana kucaikwa, wakeeta Yehova amaswi akwaamba ayi ‘Aba, Ta’ ndyaakalinga kupaila.”—Maako 14:36.
Libuku ili lilatolelela akwaamba ayi, “muciindi cabweendeleshi ca baGiliki abaLoma, liinji liswi lyakwaamba ayi ‘Aba’ talyakalinga kucanika mumabuku abaJuda mukwiinga bakalinga kubona ayi nkubula bulemu kwiita Lesa kusebensesha liswi ili.” Nacibi boobo, “Yesu wakasebensesha liswi ili mumupailo kwaamba ayi atondeshe ayi ulanyumfwana abuumbi a Lesa.” Liswi lyakwaamba ayi Aba lilacanika alimwi mumabuku obilo amuBaibo akalembwa a mutumwi Paulo kutondesha ayi Beneklistu bamuciindi ca batumwi abalo bakalinga kulisebensesha liswi ili pakupaila.—Bene Loma 8:15; Bene Galatiya 4:6.
(Bene Galatiya 6:17) Kuswa sunu, kutabi muntu nabi omwi umpensha, mukwiinga pamubili wangu pali mibata ibonesha ayi ndi musebenshi wakwe Yesu.
w10-CG 11/1 pe. 15
Sa Mulishi?
Ino mutumwi paulo wakalinga kusansululanshi ndyakaamba maswi akwaamba ayi pamubili wangu “pali mibata ibonesha ayi ndi musebenshi wakwe Yesu”?—Bene Galatiya 6:17.
▪ Abo bakalinga kumukutika Paulo balyeelete bakayeeya shintu shipusenepusene ndyakaamba maswi aya. Kucabonenaako, kale kale, kanshimbi kalungula abuumbi kakalinga kusebenseshekwa kubika mibata abo bakatolwa mubusha pesule lya kukomwa munkondo, bakalinga kwiipa shintu mutempele, alimwi abasha bakacica kumishaabo. Kuba amibata yamushobo uyu, cakalinga cintu cilensha nsoni.
Nacibi boobo, teshi lyoonse muntu ucite mibata ndyaakalinga kubonwa munshila itabete kabotu. Munshiku shakale kale baanji bakalinga kubikwa mibata kutondesha mushobo nkobaswa na bupailishi bwabo. Libuku lya Theological Dictionary of the New Testament lilaamba ayi, “bene Asiliya bakalinga kulibika mibata pa lyaansa na panshingo mbuli cishibilo cakwaamba ayi balapaila balesa beetwa ayi Hadad a Atargatis . . . Abo bakalinga kukonkela lesa wiitwa ayi Dionysus bakalinga kubikwa mubata uboneka anga nditewu lya cisamu ciitwa ayi ivy.”
Munshiku shino baanji baamba pamakani aya balaamba ayi Paulo wakalinga kwaamba pamibata njaakalinga kucite ceebo cakuumwa ciindi ndyaakalinga kucita ncito yabumishonali. (2 Bene Kolinto 11:23-27) Inga caba kwaamba ayi Paulo wakalinga kwaamba pabukaalo bwake bwakalinga kutondesha ayi ngu Mwineklistu kuteshi pa mibata muntu njaabaayo.
Kubelenga Baibo: (Bene Galatiya 4:1-20)
JUNE 10-16
BUBONI BUCANIKA MUMASWI AKWE LESA | BENE EFESO 1-3
“Bweendeleshi Bwakwe Yehova Ancito Njebusebensa”
(Bene Efeso 1:8, 9) Wakatutondesha luse lwakwe luunji abuumbi akutupa busongo boonse alushibo 9 mukwiinga wakalinga kusuni ayi tushibe bushishi bwa kuyanda kwakwe. Bushishi ubo buleendelana ashintu shimusangalasha alimwi ashintu nshaasuni mumoyo wakwe mwiine
it-2-E 837 pala. 4
Bushishi
Bwaami Bwabu Mesiya. Paulo nshaakalemba shilatuyubulwita kabotu makani aamba pabushishi bwakwe Klistu. Pa lilembo lya Bene Efeso 1:9-11, wakaamba sha kushibisha “bushishi” bwakuyanda kwakwe ayi: “Bushishi ubo buleendelana ashintu shimusangalasha alimwi ashintu nshaasuni mumoyo wakwe mwiine, muyeeyo uyu Lesa ngweshi akacite ciindi ceelete caakushikila, nkuleta shilengwa shoonse sha panshi akwiculu pantu pomwi mubweendeleshi bwakwe Klistu. Shoonse shintu shilacitwa kweelana amiyeeyo yakabamba Lesa alimwi akuyanda kwakwe. Aboobo Lesa wakatusala ayi tube bantu bakwe muli Klistu, nkokwaamba ayi ncaakatusalila kweelana ambwaakabamba kuswa kumatalikilo.” “Bushishi” ubu buleelikawo Bwaami bwabu Mesiya bwakwe Lesa. ‘Shilengwa sha kwiculu’ nshaatokwaambawo Paulo mbananikitwe abo bacite bulindilishi bwakweendelesha a Klistu mu Bwaami ubo. ‘Shilengwa sha panshi’ mbaabo beshi bakanokweendeleshekwa. Yesu ndyakabalwiita bashikwiiya bakwe ayi: “Mwebo mwakapekwa lushibo lwa shintu shishisitwe sha Bweene bwakwe Lesa,” wakatondesha ayi bushishi ubu bulaamba pa Bwaami.—Maako 4:11.
(Bene Efeso 1:10) Muyeeyo uyu Lesa ngweshi akacite ciindi ceelete caakushikila, nkuleta shilengwa shoonse sha panshi akwiculu pantu pomwi mubweendeleshi bwakwe Klistu
w12-CG 7/15 mape. 27-28 mapa. 3-4
“Yehova Mwaami eenkabo” Atobunganya Mukwashi Wakwe
3 Mose wakalwiita bene Isilaeli ayi: ‘Yehova Lesa wesu ngu Yehova eenkabo.’ (Duto. 6:4) Shintu shoonse Yehova nshaacita shileendelana akuyanda kwakwe. Aboobo, ‘ndyecakashika ciindi ceelete,’ wakabika ‘bweendeleshi’—na bubaambo bwakucatanya shilengwa sha kwiculu a shapacishi capanshi. (Amubelenge Bene Efeso 1:8-10.) Bubaambo ubu bulicite mbasu shobilo. Lubasu lwakutaanguna ndwakucafwa bananikitwe kulibambila buumi bwakwiculu, uko nkweshi bakanokweendelesha a Klistu mbuli mutanjilili wabo. Lubasu ulu lwakatalika pa Pentekositi mu 33 C.E. ciindi Yehova ndyaakatalika kubunganya baabo beshi bakanokweendelesha a Klistu kwiculu. (Milimo 2:1-4) Ceebo ca cilubula cakwe Klistu, Lesa alabona bananikitwe kuba baluleme alimwi beelela kupekwa buumi ubu. Balishi kwaamba ayi bakasalwa kuba “bana bakwe Lesa.”—Loma. 3:23, 24; 5:1; 8:15-17.
4 Lubasu lwabili, ndwakubunganya baabo beshi bakekale mu Paladaiso pacishi, ciindi Bwaami bwa buMesiya ndyeshi bukanokweendelesha. “Bamulikoto linene” mbeshi bakataangune kukala mupaladaiso. (Ciyu. 7:9, 13-17; 21:1-5) Mubweendeleshi bwa myaaka 1000, bantu baanji balaakubushikwa kwaamba ayi abalo bakekale muPaladaiso. (Ciyu. 20:12, 13) Kutambula bakafwa kulaakutupa coolwe ca kutondesha alimwi kwaamba ayi tulicatene! Kumamanino a myaaka 1000, shintu sha pacishi na bantu beshi bakekale pacishi, balaakwiinda mubweelesho bwakweelaako. Abo beshi bakatolelele kushomeka balaakuba bana bakwe Lesa bapacishi.”—Loma. 8:21; Ciyu. 20:7, 8.
Kulangoola Buboni Bwakumushimu
(Bene Efeso 3:13) Aboobo, ndamusenga kwaamba ayi mutatyongooki pakubona mboontoomupengela, mukwiinga ishi shilaakumuletela bulemu.
w13-CG 2/15 pe. 28 pala. 15
Mutasuminishi Cilicoonse Kumukasha Kutambula Bulemu
15 Na twatolelela kucita kuyanda kwakwe Yehova tulacafwa bamwi kutambula bulemu. Mutumwi Paulo wakalembela libungano lya kuEfeso ayi: “Aboobo, ndamusenga kwaamba ayi mutatyongooki pakubona mboontoomupengela, mukwiinga ishi shilaakumuletela bulemu.” (Efe. 3:13) Ino mapensho Paulo ngaakalinga kwiindaamo ‘akabaletela buyani bulemu’ bene Efeso? Kutolelela kwakwe Paulo kusebensela Yehova nabi kwaamba ayi wakalinga kwiinda mumapensho apusene pusene, kwakacafwa bene Efeso kushiba kwaamba ayi kuba Mwineklistu ncintu cicindeme abuumbi. Nakwiinga Paulo wakaboolela mwisule ndyaakalinga kwiinda mumapensho, Bene Efeso nakwiinga bakabona ncito yakushimikila, bushicibusa bwabo aYehova alimwi abulindilishi mbobakalinga kucite kuba shintu shitacite mpindu. Kuliyumya kwakwe Paulo kwakayuminisha Beneklistu alimwi akubatondesha ayi kuba shikwiiya ncintu ciyandika abuumbi kwiinda kulyaaba kulikoonse nkweenga twaciita.
(Bene Efeso 3:19) akushiba lusuno lwakwe Klistu lwiinda pamaano oonse, kwaamba ayi musushikwe ashintu shoonse nshaapa Lesa.
cl-CG pe. 299 pala. 21
“Kushiba Lusuno Lwakwe Klistu”
21 Liswi lya ciGiliki lyakwaamba ayi “Kushiba” lilasansulula ‘kushiba munshila icafwa, kwiinda mushintu shicitikila muntu.’ Na katutondesha lusuno kweelana aYesu mbwaakacita—kulyaaba camoyo woonse kwaamba ayi tucafwe bamwi, kubanyumfwila nkumbu na babulilwa shintu shimwi, kubalekelela kuswa panshi lya moyo, lyalo ndyeenga twashiba kabotu Yesu mbwaakalinga kulinyumfwa. Kwiinda mukucita boobo, tulesa “mukushiba lusuno lwakwe Klistu lwiinda pamaano oonse.” Alimwi tutaluubi kwaamba ayi kukonkela cakubonenaako cakwe Yesu, kulaakutucafwa kusena pafwiifwi aYehova Lesa wesu shilusuno uyo Yesu ngwaakakosha.
Kubelenga Baibo: (Bene Efeso 1:1-14)
JUNE 17-23
BUBONI BUCANIKA MUMASWI AKWE LESA | BENE EFESO 4-6
“Amufwale Shakulwanisha Shoonse Shiswa Kuli Lesa”
(Bene Efeso 6:11-13) Amufwale shilwanisho shoonse shiswa kuli Lesa kwaamba ayi mucikoonshe kwiimikana cakutatenkaana ndyemutolwana bucenjeshi bwakwe Satana;Mukwiinga tatutolwana abantu bacite mubili wanyama abulowa sobwe, sombi amfulumende, beendeleshi, beshi kweendelesha cishi bali mumunshiinshe uyu, amishimu ibiibi ili mumisena yakwiculu. Ncakwiila tutolwana nkondo amishimu ibiibi.Paceebo ceeco amufwale shakulwanisha isho Lesa nshaamupa, kwaamba ayi mucikoonshe kulwana cakutaboola pesule pabushiku bwa kushikilwa bubi. Mwaakumanisha kulwana mulaakushimpa.
w18-CG.05 pe. 27 pala. 1
Nobacanike—Amumulwane Satana Cakuyuma
MUTUMWI Paulo wakakoshanisha buumi bwesu bwa Bwineklistu kubuumi bwa bashilumamba beshi kulwana nkondo. Ncakwiila, inkondo njetutolwana njakumushimu kuteshi yakumubili. Nabi kwaamba ayi inkondo yesu njakumushimu, balwani besu mbancinencine. Satana abashikaswa mbashilumamba bacishi kabotu kulwana nkondo alimwi balicite lushibo abuumbi. Makani aya inga atupa kulinyumfwa anga inga tatucikoonshi kukoma munkondo iyi. Bunene bunene Beneklistu bacanike balaboneka anga inga tabacikoonshi kulwana Satana abashikaswa bakwe. Ino bacanike inga bacita buyani kwaamba ayi bacikoonshe kulwana Satana abashikaswa bakwe abo bacite nkusu abuumbi? Cisangalasha ncakwaamba ayi inga bakoma nkondo iyi, alimwi ncebatoocita apacecino ciindi! Ino nceebonshi ncetwaambila boobo? Mukwiinga balatolelela ‘kuyuma mu Mwaami Lesa kwiinda munkusu shakwe shiindaawo.’ Sombi kuli ashimwi nshobacita. Bweenka mbuli shilumamba wakayiishikwa kabotu, bacanike abalo ‘balafwala shakulwanisha shoonse shiswa kuli Lesa.’—Amubelenge Bene Efeso 6:10-12.
(Bene Efeso 6:14, 15) Aboobo amuyume, mufwale lushinisho anga ngulaamba mubukome. Amufwale bululami anga ncakufwala ca ceela pacaamba. 15 Kulibambila kwanu kwa kushimikila makani abotu aluumuno kube anga ninsapato nshemufwala.
w18-CG.05 mape. 28-29 mapa. 4, 7, 10
Nobacanike—Amumulwane Satana Cakuyuma
4 Bweenka mbuli shakufwala shankondo mboshakalinga kushitilisha shilumamba, acalo cancine ncotwiiya kuswa mu Maswi akwe Lesa cilatushitilisha kunjisho shakubeca. (Joni 8:31, 32; 1 Joni 4:1) Na twatolelela kusuna cancine cakwe Lesa, cilaakuba cuubu kufwala ‘ceela cesu capacaamba,’ nkokwaamba ayi kukala buumi bweendelana anjiisho shakwe Lesa shiluleme. (Kulu. 111:7, 8; 1 Joni 5:3) Kwiilikaawo, na twanyumfwishisha njiisho shiswa mu Maswi akwe Lesa, tulaakucikonsha kushitilisha cancine kubaabo beshi kupikisha.—1 Pita 3:15.
7 Cakubonenaako ici ncibotu abuumbi, mukwiinga cilatondesha njiisho shiluleme shakwe Lesa mboshishitilisha moyo wesu wacikoshanyo! (Tus. 4:23) Bweenka mbuli shilumamba mbwaatakoonshi kufuula ceela ca pacaamba akufwala citeshi ciyumu, aswebo inga tatukoonshi kushiya njiisho shakwe Lesa shitucafwa kushiba cibotu acibiibi akutalika kukonkela sheesho nshetubona ayi shili kabotu. Kwiinda mubusongo bwesu sobeene inga tatucikoonshi kulishitilisha. (Tus. 3:5, 6) Aboobo lyoonse tulyeelete kushinisha kwaamba ayi moyo wesu wacikoshanyo ulishitilishitwe kabotu anjiisho shakwe Yehova.
10 Bweenka nsapato mboshakalinga kushitilisha bashilumamba babene Loma kunkondo, ashalo nsapato shacikoshanyo isho shifwala Beneklistu shilabacafwa kushimikila makani aluumuno. (Isa. 52:7; Loma. 10:15) Nacibi boobo, Mwineklistu taeelete kuloonda kwaamba ayi acikoonshe kushimikila makani abotu. Bo, ucite myaaka 20 wakaamba ayi, “Ndakalinga kuloonda kushimikila baabo mbondakalinga kwiiya abo. Ndakalinga kucite nsoni abuumbi, alimwi nshicishiiwo ncendakalinga kunyumfwila boobo. Ano pacecino ciindi, ndikondetwe abuumbi kushimikila babyaanji.”
(Bene Efeso 6:16, 17) Kwiilikaawo, amunyamune lushomo anga ndiyawo ndyeenga mwashimishako mifwi inyaka mulilo iyo iwaala Satana. 17 Alimwi amunyamune lupulusho anga ncimpompo cakumutabilishaako alimwi mutambule maswi akwe Lesa kuswa kuMushimu Usalashi ayo eshi abe anga ngumupeeni.
w18-CG.05 mape. 29-31 mapa. 13, 16, 20
Nobacanike—Amumulwane Satana Cakuyuma
13 Mifwi imwi “inyaka mulilo” iyo Satana njaawala kuli ndimwe, nkwaamba makani akubeca pali Yehova—ayi tatusuniiwo alimwi taatubikili maano. Ida ucite myaaka 19 alicite lipenshi lyakulinyumfwa anga ngumuntu utacite mpindu. Wakaamba ayi, “liinji ndalinyumfwa anga Yehova taabete pafwiifwi andime alimwi taasuniiwo kuba shicibusa wangu.” Ino nciinshi cimucafwa kukoma lipenshi ili? Ida wakaamba ayi “mabungano ngoancafwa abuumbi kuyumya lushomo lwangu. Lyoonse ndakalinga kucanika kumabungano sombi nshindakalinga kukumbulawo, ceebo cakuyeeya ayi taakuwo weenga wasuna kunyumfwa nsheenga ndaamba. Ano pacecino ciindi ndalibambila mabungano alimwi akukumbulawo mankanda obilo nabi otatwe. Teshi cuubu, sombi ndanyumfwa kabotu na ndakumbulawo. Bamakwesu abenankashi abalo balanjuminisha abuumbi. Lyoonse na kanswa kumabungano ndalinyumfwa ayi Yehova alinsuni.”
16 Bweenka mbuli cimpompo mbocakalinga kushitilisha boongo bwakwe shilumamba, abwalo bulindilishi mbotucite bwa “lupulusho” bulashitilisha miyeeyo yesu. (1 Tesa. 5:8; Tus. 3:21) Bulindilishi mbotucite bulatucafwa kubikila maano kushishomesho shakwe Lesa alimwi akubona mapensho ngotwiindamo munshila yeelete. (Kulu. 27:1, 14; Milimo 24:15) Ano kwaamba ayi “cimpompo” citushitilishe, tulyeelete kucifwala kumutwi, kuteshi kucinyamuna kumaansa.
20 Paulo wakakoshanisha maswi akwe Lesa kumupeeni ngwaakatupa Yehova. Ano tulyeelete kushiba bwakuusebensesha kabotu kwaamba ayi tucikoonshe kushitilisha nshetushoma, akwaalula mbotuyeeya. (2 Koli. 10:4, 5; 2 Timo. 2:15) Ino nshiinshi nsheenga mwaciita kwaamba ayi mushibe bwakusebensesha kabotu maswi akwe Lesa? Sebastian, ucite myaaka 21, wakaamba ayi: “lyoonse ndyentobelenga Baibo, ndalemba vesi yomwi kuswa mucapita ili yoonse njendabelenga. Ndalemba mavesi ansangalasha abuumbi. Ici cilancafwa kubona shintu bweenka mbwashibona Yehova.” Daniel, ngotwaambawo kale wakaamba ayi: “Ndyentobelenga Baibo, ndasala mavesi ngoombona ayi inga acafwa bantu mboncana muncito yakushimikila. Ndakabona kwaamba ayi bantu baanji balakutika na babona kwaamba ayi tulasangalala amakani acanika muBaibo alimwi tulasebensa cankusu kubacafwa.”
Kulangoola Buboni Bwakumushimu
(Bene Efeso 4:30) Alimwi mutalengeshi Mushimu Usalashi wakwe Lesa kuungumana, mukwiinga ncecishibilo cakwe Lesa cakwaamba ayi muli bantu bakwe kushikila pa bushiku bwa lupulusho.
it-1-E 1128 pala. 3
Kusalala
Mushimu usalashi. Mushimu wakwe Yehova uleendeleshekwa anguwe alimwi lyoonse ulakumanisha nshaasuni. Mushimu uyu ulisalalite alimwi Lesa alausebensesha kukumanisha shintu nshaasuni. Aboobo uleetwa ayi “mushimu usalashi.” (Kulu. 51:11; Luka 11:13; Loma. 1:4; Efe. 1:13) Mushimu usalashi ulacafwa muntu kucita shintu shisalalite. Kucita shintu shibiibi na shitabete kabotu kulalengesha mushimu “kuungumana.” (Efe. 4:30) Nabi kwaamba ayi teshi muntu, mushimu usalashi ulatondesha mibo isalalite yakwe Lesa, aboobo inga ‘woongumana.’ Kucita shibiibi inga kwalengesha ayi “mushimye mulilo wamushimu.”-nwt (1 Tesa. 5:19) Na muntu watolelela kucita shibiibi, ‘alakalasha’ mushimu usalashi wakwe Lesa, alimwi ici inga calengesha ayi Lesa atalike kubona muntu ucita shibiibi kuba mulwani wakwe. (Isa. 63:10) Muntu ulengesha mushimu kuungumana inga waucobola. Yesu wakaamba ayi muntu ucobola mushimu teshi akalekelelwewo mubweende bwashintu buno nabi ubo bweshi bukese kunembo.—Mate. 12:31, 32; Maako 3:28-30; amubone SPIRIT.
(Bene Efeso 5:5) Mulyeelete kushiba cancinencine ayi takuuwo mufuule, uyo ucita shitaluleme, nabi shikukumbwa camunyono shintu shabamwi weshi akatambuleko bwaami bwakwe Klistu alimwi a Lesa.
it 1-E 1006 pala. 2
Lunkumbwa
Lulabonekela Kwiinda Mumicito. Lunkumbwa lulabonekela patuba kwiinda mushintu muntu nshaacita isho shitondesha shili mumoyo wakwe shitabete kabotu. Shikulemba Baibo Jemusi wakaamba ayi na lunkumbwa lwa muntu lwakomena lulashala cibiibi. (Jemu. 1:14, 15) Aboobo muntu ucite lunkumbwa ulashibikwa kwiinda mushintu nshaacita. Mutumwi Paulo wakaamba ayi kuba alunkumbwa kulibo anga ngumuntu upaila shibumbwabumbwa. (Efe. 5:5) Lunkumbwa ulu lulamulengesha kubona cintu ncaasunishishi kuba anga ngulesa akucibika panembo mubuumi muciindi cakusebensela akulambila Lesa.—Loma. 1:24, 25.
Kubelenga Baibo: (Bene Efeso 4:17-32)
JUNE 24-30
BUBONI BUCANIKA MUMASWI AKWE LESA | BENE FILIPI 1-4
“Mutanoolisukama Pacintu Nabi Comwi”
(Bene Filipi 4:6) Mutanoolisukama pacintu nabi comwi, sombi mumipailo yanu yoonse amusenge shintu shoonse nshemutacite kuli Lesa. Kamusenga amoyo wakulumba lyoonse.
w17-CG.08 pe. 10 pala. 10
“Luumuno Lwakwe Lesa . . . Luleendaawo Pabusongo Boonse”
10 Ino nciinshi ceenga catucafwa kwaamba ayi tutanoolisukama pacintu nabi comwi akwaamba ayi tube “aluumuno lwakwe Lesa”? Maswi akwe Paulo ayo ngaakalembela bene Filipi alatutondesha ayi mupailo ncecintu ciyandika ceenga catucafwa na twalisukama. Aboobo na twalisukama, tulyeelete kumulwiita Lesa shintu shitusukamika kwiinda mumupailo. (Amubelenge 1 Pita 5:6, 7.) Ndyemutopaila kuli Yehova mulyeelete kushoma kwaamba ayi alamubikila maano. Amumusenge “amoyo wakulumba akuyeeya pashoolwe nshaakamupa. Lushomo lwesu mulinguwe lulaakuyuma na lyoonse katuyeeya ayi “ulakonsha kucita shiinda pasheesho nsheenga twasenga nabi kuyeeya.”—Eph. 3:20.
(Bene Filipi 4:7) aboobo luumuno lwakwe Lesa ulo lwiinda pabusongo bwa bantu boonse lulaakulama myoyo yanu alimwi amiyeeyo yanu muli Klistu Yesu.
w17-CG.08 pe. 10 pala. 7
“Luumuno Lwakwe Lesa . . . Luleendaawo Pabusongo Boonse”
7 Cakutatoonsha, bamakwesu kuFilipi ndyebakabelenga nkalata Paulo njaakabatumina, bakeebaluka shakamucitikila aYehova mbwaakamucafwa munshila yakuteengashila. Ino Paulo wakalinga kubaiisha nshi? Wakalinga kubaiisha ayi tabeelete kulisukama. Balyeelete kupaila, lyalo balaakutambula luumuno lwakwe Lesa. Paulo wakabalwiita ayi “luumuno lwakwe Lesa . . . luleendaawo pabusongo boonse.” Ino ici cilaamba nshi? Basansulushi bamwi bakasansulula maswi aya ayi nduumuno “lwiinda pashintu shoonse nsheenga twayeeyawo” na “shintu shoonse nsheenga twasuna kucita.” Munshila imwi Paulo wakalinga kwaamba ayi, “luumuno lwakwe Lesa” ndubotu abuumbi kwiinda cilicoonse nceenga twayeeyawo. Aboobo, nabi kwaamba ayi cimwi ciindi, swebo sobantu inga tatushibi shakucita ndyetutokwiinda mumapensho, Yehova lakwe inga watucafwa munshila yakuteengashila.—Amubelenge 2 Pita 2:9.
w17-CG.08 pe. 12 pala. 16
“Luumuno Lwakwe Lesa . . . Luleendaawo Pabusongo Boonse”
16 Ino mbubotu nshi mbweenga twacana na twaba “aluumuno lwakwe Lesa ulo lwiinda pabusongo boonse”? Malembo alakumbula akwaamba ayi ‘lulaakulama myoyo yesu alimwi amiyeeyo yesu muli Klistu Yesu.’ (Fili. 4:7) MuciGiliki, liswi lyakwaamba ayi “kulama” bakalinga kulisebensesha kwaamba pa bashilumamba bakapekwa ncito yakushitilisha ndabala. Aboobo, bantu bakalinga kukala mundabala yabene Filipi tabakalinga kulisukama na boona, mukwiinga bakalinga kucishi ayi bashilumamba bakalinga kushitilisha milyaango ya ndabala. Aswebo na twaba a “luumuno lwakwe Lesa,” tatulisukamiwo nabi paniini. Tulishi kwaamba ayi Yehova ulatulama alimwi alisuni kwaamba ayi shintu shinotweendela kabotu. (1 Pita 5:10) Kushiba makani aya kulatucafwa kwaamba ayi tutanoolisukama nabi kulefuka.
Kulangoola Buboni Bwakumushimu
(Bene Filipi 2:17) Nabi na bulowa bwangu butootilwa anga ncipo ca cakunwa pantu pomwi acipo ico lushomo lwanu ncelutobenga kuli Lesa, ndasangalala akusekelela pantu pomwi amwebo noonse.
it 2-E 528 pala. 5
Milambu
Cipo ca cakunwa. Shipo sha shakunwa shakalinga kubengwa pomwi amilambu imwi, bunene bunene bene Isilaeli ndyebakenjila mucishi cakashomeshekwa. (Shaku. 15:2, 5, 8-10) Cipo ici cakalinga ngu waini (“na cakunwa cikola”) alimwi wakalinga kutilwa pacipaililo. (Shaku. 28:7, 14; amubone a Kulo. 30:9; Shaku. 15:10.) Mutumwi Paulo wakalembela Beneklistu baku Filipi ayi: “na bulowa bwangu butootilwa anga ncipo ca cakunwa pantu pomwi acipo ico lushomo lwanu ncelutobenga kuli Lesa, ndasangalala.” Paulo wakasebensesha cikoshanyo ca cipo ca cakunwa kwaamba mbwakalinga kulibambite kwaaba buumi bwakwe ceebo ca Beneklistunyina. (Fili. 2:17) Ndyekwakacalabo ciindi ciniini kaatana kufwa, wakalembela Timoti ayi: “Ndatalika kale kutilwa pacipaililo mbuli cipo ca cakunwa, alimwi ciindi cangu cakwaamba ayi ŋangululwe casena pafwiifwi.”— 2 Timo. 4:6-nwt
(Bene Filipi 3:11) kwaamba ayi na kacikonsheka nkabe mububuke bwakutaanguna kuswa kubafu.-nwt
w07-CG 1/1 mape. 26-27 pala. 5
“Bubuke Bwakutaanguna”—Butoocitika Pacecino Ciindi!
5 Lyalo, beneklistu bananikitwe na “Isilaeli wakwe Lesa” balyeelete kuya mukukumana aMwaami wabo Yesu Klistu mwiculu, uko nkweshi bakanookala “aMwaami Yesu lyoonse alyoonse.” (Bene Galatiya 6:16; 1 Bene Tesalonika 4:17) Uku nkokubuka uko Baibo nkoiita ayi ‘bubuke bwakutaanguna.’ (Bene Filipi 3:10, 11; Ciyubululo 20:6) Kubuka uku kwaakumana, ciindi cilaakushika ano cakwaamba ayi bantu baanji bakabushikwe pa cishi ca panshi akulangila kuba abuumi butamaani muPaladaiso. Aboobo, inga caba kwaamba bulindilishi bwesu mbwakuya kwiculu na kukala pacishi, sombi soonse tulisunishishi kushiba pamakani ‘abubuke bwakutaanguna.’ Ino bubuke ubu mbwa buyani? Ino bulaakucitika lili?
Kubelenga Baibo: (Bene Filipi 4:10-23)