Makani Akusebensesha amu Kabuku Kamabungano Abuumi Anciito
SEPTEMBER 2-8
BUBONI BUCANIKA MUMASWI AKWE LESA | BENE EBULU 7-8
“Mupailishi Wamuyayaya Bweenka Mbuli Melikisedeki”
(Bene Ebulu 7:1, 2) Uyu Melikisedeki wakalinga mwaami wa kuSalemu alimwi wakalinga mupailishi wakwe Lesa wa kwiculu Wiindaawo. Ono Abulaamu ndyaakalinga kuswa kunkondo uko nkwaakakoma bamaami bone, Melikisedeki wakamukumanya akumupa coolwe. 2 Mpomunyaawo Abulaamu wakapa Melikisedeki calikumi pashintu shoonse nshaakanyaya baabo mbwaakakoma. Busansulushi bwakutaanguna bwa liina lya Melikisedeki mbwakwaamba ayi “Mwaami wa Bululami.” Alimwi wakalinga Mwaami wa Salemu nkokwaamba ayi “Mwaami wa Luumuno.”
it-2-E 366
Melikisedeki
Wakalinga mwaami waku Salemu alimwi “mupailishi wakwe Lesa Wiindaawo,” Yehova. (Mata. 14:18, 22) Ngo mupailishi wakutaanguna waambwa mu Malembo; alimwi wakaba mupailishi mwaaka wa 1933 B.C.E kautana kushika. Mukwiinga wakalinga mwaami wa kuSalemu iyo isansulula luumuno, mutumwi Paulo wakeeta Melikisedeki ayi “Mwaami wa Luumuno,” alimwi kweelana aliina lyakwe, wakamwiita ayi “Mwaami wa Bululami.” (Ebu. 7:1, 2) Citooboneka ayi ndabala yakalekale ya Salemu nje ndabala yakesa mukwiitwa ayi Jelusalemu, alimwi nkokwakaswa aliina lya Jelusalemu, cimwi ciindi iitwa ayi “Salemu.”—Kulu. 76:2.
Pesule lyakwaamba ayi Abulaamu wakoma Cedalaoma abamaami mbaakalinga kusebensaabo, wakaya kucinyika ca Shafe na “cinyika ca mwaami.” Melikisedeki wakaleta “shinkwa a waini” akupa coolwe Abulaamu, lyalo wakamwaambila ayi: “Lesa wakwiculu Wiindaawo, uyo wakalenga liculu acishi capanshi, ape coolwe Abulaamu. Aalumbwe Lesa wakwiculu Wiindaawo uyo wakakupa nkusu shakukoma beshinkondonyoko!” Lyalo Abulaamu wakapa mwaami uyo alimwi mupailishi “calikumi pashintu shoonse nshaakapilusha” ndyaakalwana baami abo bakalinga kumulwana.—Mata. 14:17-20; Ebu. 7:4.
(Bene Ebulu 7:3) Mukwiinga taacite baishi abanyina, taacite mulongo walishalane mwaakashalilwa, alimwi taacite matalikilo anshiku shakwe nabi mamanino abuumi bwakwe, sombi ulibo anga nguMwanaakwe Lesa, alatolelela kuba mupailishi lyoonse.
it-2-E 367 pala. 4
Melikisedeki
Ino Melikisedeki taakalinga kucite ‘matalikilo anshiku shakwe nabi mamanino abuumi bwakwe’ munshila nshi?
Paulo wakaamba pamakani ayandika pali Melikisedeki ndyaakaamba ayi: “Mukwiinga taacite baishi abanyina, taacite mulongo walishalane mwaakashalilwa, alimwi taacite matalikilo anshiku shakwe nabi mamanino abuumi bwakwe, sombi ulibo anga nguMwanaakwe Lesa, alatolelela kuba mupailishi lyoonse.” (Ebu. 7:3) Mbuli muntu uliwoonse, Melikisedeki wakashalwa akufwa. Nacibi boobo, meena abashali bakwe taashibikitwe, alimwi bamulishalane lyakwe abalo tabashibikitwe alimwi mu Malembo tapuwo palembetwe bushiku ndyaakashalwa nabi bushiku ndyaakafwa. Aboobo Melikisedeki aleelela kwiimikaninaako Yesu Klistu, uyo utolelela kuba mupailishi lyoonse. Mukwiinga Melikisedeki taakuwo ngwaakapyana kwaamba ayi abe mupailishi nabi wakamupyana, alakwe Yesu taakuwo ngwaakapyana alimwi Baibo ilatondesha ayi taakuwo weshi akamupyaane. Kwiilikaawo, nabi kwaamba ayi Yesu wakashalilwa mulishalane lyakwe Defedi mumushobo wabene Juda, lishalane lyakwe lyakumubili talikumiwo bupailishi bwakwe alimwi taakwe kuba mupailishi amwaami ceebo ca lishalane ili. Ishi shakacitika ceebo cakwaamba ayi Yehova wakamushomesha.
(Bene Ebulu 7:17) Mukwiinga Malembo akwe Lesa alaamba ayi: “Ulaakunoolibo mupailishi lyoonse, bupailishi bweenka mbuli bwakalinga kucite Melikisedeki.”
it-2-E 366
Melikisedeki
Cakalinga Kwiimikaninaako Klistu Mbuli Mupailishi. Maswi abushinshimi bwabu Mesiya, Yehova ngaakashomesha cakulumbila ku “Mwaami” wakwe Defedi, ngakwaamba ayi: Ulakunoolibo mupailishi lyoonse, bweenka mbuli bwakalinga Melikisedeki!” (Kulu. 110:1, 4) Ceebo ca maswi aya, bene Ebulu bakashoma ayi Mesiya wakashomeshekwa ngowakalinga kweelete kuba mupailishi amwaami. Munkalata Paulo njaakalembela bene Ebulu, wakabacafwa kushoma cakutatoonsha ayi uyo wakashomeshekwa ngu Yesu, ndyaakaamba ayi, “Yesu uyo waba Mupailishi Munene wamuyayaya, bweenka mbuli Melikisedeki.”—Ebu. 6:20; 5:10.
Kulangoola Buboni Bwakumushimu
(Bene Ebulu 8:3) Mupailishi munene uliwoonse ulasalwa kwaamba ayi anoopa shipo alimwi amilambu, aboobo cakalinga kuyandika kuli wooyo alakwe kwaamba ayi abe acintu cakupa.
w00-CG 8/15 pe. 14 pala. 11
Milambu Yakasangalasha Lesa
11 Mutumwi Paulo wakaamba ayi, “Mupailishi munene uliwoonse ulasalwa kwaamba ayi anoopa shipo alimwi amilambu.” (Bene Ebulu 8:3) Amubone kwaamba ayi Paulo wapansaanya shipo shakalinga kupa mupailishi munene kuli Yehova mumbasu shobilo, “shipo” a “milambu” na “milambu ceebo ca shibiibi.” (Bene Ebulu 5:1) Liinji bantu balapa shipo kutondesha lusuno lwabo akulumba, alimwi akwaamba ayi babe abeshicibusa, bacitilwe shibotu na kwaamba ayi batambulwe. (Matalikilo 32:20; Tushimpi 18:16) Ashalo shintu shiinji shilembetwe mumulawo isho nshebakalinga kupa, shakalinga anga “nshipo” kuli Lesa kwaamba ayi abatambule akubalekelela. Kubisha ceebo ca kutakonkela mulawo kwakalinga kweelete kululamikwa, alimwi kwaamba ayi shintu shibe kabotu, “milambu ceebo ca shibiibi” yakalinga kupekwa. Mabuku akutaanguna osanwe, bunene bunene libuku lya Kulonga, Bene Lefi, a Shakubelenga, mulacanika makani aanji aamba pa milambu ashipo shakalinga kupekwa. Nabi kwaamba ayi inga catuyumina kushiba akwiibaluka makani akupa milambu, kuli makani amwi anene ngotweelete kubikila maano.
(Bene Ebulu 8:13) Kwiinda mumaswi akwaamba ayi, “Cipangano Cipya,” Lesa walengesha ayi cipangano citaanshi cibule ncito. Ono na cintu coonse cabula ncito alimwi cakubuluka, ingayi cili pafwiifwi kuloba.
it-1-E 523 pala. 5
Cipangano
Ino cipangano ca Mulawo “cakamana” buyani ncito?
Nacibi boobo, cipangano ca Mulawo cakamana ncito Lesa ndyaakambilisha kwiinda mu mushinshimi wakwe Jelemiya ayi, kulaakuba cipangano cipya. (Jele. 31:31-34; Ebu. 8:13) Mu 33 C.E. cipangano ca Mulawo cakamana ncito ceebo ca lufu lwakwe Klistu ulo ndwaakafwa pacisamu cakupenshesha (Kolo. 2:14), lyalo cipangano cipya ncocakatalika kusebensa.—Ebu. 7:12; 9:15; Mili. 2:1-4.
Kubelenga Baibo: (Bene Ebulu 7:1-17)
SEPTEMBER 9-15
BUBONI BUCANIKA MUMASWI AKWE LESA | BENE EBULU 9-10
“Cimfule ca Shintu Shibotu Shitoosa”
(Bene Ebulu 9:12-14) Klistu ndyaakenjila muMusena Usalalite Wiindawo, taakwe kutola bulowa bwa mpongo nabi bwa bacende ayi ape kuli Lesa. Sombi lakwe wakatola bulowa bwakwe mwiine akutubambila lupulusho lutamaani. 13 Bulowa bwa mpongo, bwa bacende alimwi amilota ya moombe shilasanseelwa pabantu batasalalite kweelana aMilawo. Ishi shilabasalasha kuswa kububi boonse kweelana aMilawo. 14 Ncakwiila, bulowa bwakwe Klistu bwalo buleendawo nkusu. Bulakonsha kutucitila shiindaawo. Kwiinda mumushimu utamaani, wakalibenga kuli Lesa anga ngumulambu utacite kampenda. Bulowa bwakwe bulasalasha myoyo yesu kumicito itacite ncito, kwaamba ayi tusebensele Lesa muumi.
it-1-E 862 pala. 1
Kulekelela
Kweelana amulawo Lesa ngwaakapa bene Isilaeli, muntu wabishisha Lesa na kubishisha umwi, liinji wakalinga kweelete kutaanguna kululika cibiibi ncaacita, kwiinda mukupa cipo ca bulowa kuli Yehova, lyalo ndyeenga walekelelwa. (Lefi 5:5–6:7) Aboobo, Paulo ncaakalembela ayi: “Ncakwiila, kweelana aMulawo, shintu shiinji shilasalashikwa abulowa alimwi shibiibi tashilekelelwi kwakubula bulowa kutilwa.” (Ebu. 9:22) Cancine ncakwaamba ayi, bulowa bwa shinyama tabwakalinga kukushawo shibiibi muntu nshaacita akumupa njeelacaamba isalalite. (Ebu. 10:1-4; 9:9, 13, 14) Mubupusano, cipangano cipya cakapa bantu coolwe cakulekelelwa shibiibi shabo kwiinda mucilubula cakwe Yesu Klistu. (Jele. 31:33, 34; Mate. 26:28; 1 Koli. 11:25; Efe. 1:7) Yesu ndyaakalinga pacishi, wakatondesha ayi alicite nkusu shakulekelela shibiibi kwiinda mukushilika musankwa wakalinga kuyuminite mubili.—Mate. 9:2-7.
(Bene Ebulu 9:24-26) Mukwiinga Klistu taakwe kwiinjila mumusena Usalalite wakayaka bantu, ulibo cikoshanyo ca wooyo wa kwiculu. Sombi wakenjila mwiculu mwiine mwiine uko nkwaatwiimikaninaako kuli Lesa. 25 Mupailishi munene wa baaJuda ulenjila mumusena usalalite wiindaawo linkanda lyomwi pamwaaka, akutola bulowa bwa munyama, buteshi bwakwe. Sombi Klistu taakwe kwiinjila ayi anoolibenga lyoonse, 26 mukwiinga ubo naakalinga kupenshekwa lyoonse, kuswa kumalengelo a cishi. Sombi wakabonekabo linkanda lyomwi kwiimikanina boonse mulishalane lino lya mamanino, kwaamba ayi akushe shibiibi kwiinda mukulibenga kwakwe.
cf-CW pe. 183 pala. 4
‘Tolelela Kunkonkela’
4 Malembo taambiwo shintu mboshakalinga Yesu ndyaakabolela kwiculu alimwi alusangalalo lwakalingaako ndyaakabonana abaIshi. Nacibi boobo, Baibo yakaambila limwi shintu shakalinga kweelete kucitika Yesu ndyaakabolelabo kwiculu. Kwamyaaka iinda 1500, baJuda bakalinga kucita kusekelela kulibetele mwaaka uliwoonse. Bushiku bomwi mumwaaka, mupailishi munene wakalinga kwinjila mumusena Usalalite Wiindaawo kwaamba ayi asanseele bulowa bwakubenga milambu pafwiifwi a libokoshi lya cipangano kwaamba ayi shibiibi shabantu shilekelelwe. Shakalinga kucita mupailishi munene pabushiku ubu, shakalinga kwiimikaninaako shintu shakesa mukucita Mesiya. Yesu ndyaakaboolela kwiculu, wakakumanisha shintu shakalinga kucitika pabushiku bwakusekelela. Wakacita sheeshi linkanda lyomwibo. Ndyaakaya kwiculu kuli Yehova kumusena usalalite kwiindaawo, wakatola buumi bwakwe kuli baIshi kwaamba ayi ube mulambu wacilubula. (Bene Ebulu 9:11, 12, 24) Ano sa Yehova wakautambula mulambu uyu?
(Bene Ebulu 10:1-4) Mukwiinga Milawo teshi nsheshoolwe shancinencine, sombi ileemikaninaako shoolwe isho shitoosa. Milambu yamushobo womwi ilabengwa mwaaka amwaaka. Sombi milawo taikoonshi kusalasha bantu besa kuli Lesa kwiinda mumilambu iyo. 2 Bantu abo balambila Lesa nebakasalashikwa cancinencine kuswa kushibiibi shabo, naakwiinga taboongumani mumyoyo ceebo ca shibiibi shabo alimwi naakwiinga bakacileka akubenga milambu yoonse. 3 Sombi kweelana ambocibete, milambu ileebalusha bantu shibiibi shabo mwaaka amwaaka. 4 Mukwiinga bulowa bwa bacende alimwi abwa mpongo tabukushi shibiibi sha bantu.
it-2-E 602-603
Bubotu
Bubotu bwa Mulawo wakwe Mose. Mulawo wakapekwa kubene Isilaeli kwiinda muli Mose, wakeelikawo abubaambo bwakuba amupailishi munene alimwi akubenga milambu ya shinyama shipusenepusene. Kweelana ashakalemba mutumwi Paulo, bupailishi nabi milambu tashakalinga kulengesha baabo bakalinga kukonkela Mulawo kuba basalalite, nabi kwaamba ayi Mulawo uyu wakaswa kuli Lesa alimwi wakalinga usalalite. (Ebu. 7:11, 19; 10:1) Muciindi cakubangulula kububi alufu, Mulawo wakalinga kulengesha bantu kushiba bubi. (Loma. 3:20; 7:7-13) Nacibi boobo, bubaambo ubu boonse Lesa mbwaakabika bwakakumanisha shintu nshaakalinga kusuni; Mulawo wakalinga kutanjilila bantu kuli Klistu, aboobo wakalinga anga “ncimfule ca shintu shibotu shitoosa.” (Gala. 3:19-25; Ebu. 10:1) Aboobo, Paulo ndyaakaamba ayi “ico ncowakaalilwa kucita mulawo ceebo cakwaamba ayi tawakalinga kucite nkusu ceebo cakutasalala kwa bantu” (Loma. 8:3), cakutatoonsha wakalinga kwaamba pa kwaalilwa kwa mupailishi munene wa baJuda, (uyo wakalinga kusalwa kweelana amulawo kwaamba ayi anokweendelesha bubaambo bwa kubenga milambu alimwi akunjila mu Musena Usalalite kwiindaawo pa bushiku bwakusekelela kulekelelwa shibiibi) kwaamba ayi ‘apulushe cakumaninina’ abo mbaakalinga kusebensela, kweelana a lilembo lya Bene Ebulu 7:11, 18-28 mbolyaamba. Nabi kwaamba ayi milambu yakalinga kubengwa kwiinda mubupailishi bwakwe Aloni yakalinga kucafwa bantu kuba baluleme pameenso akwe Lesa, sombi taikwe kubaangulula cakumaninina kuswa kumapensho esa ceebo cabubi. Paulo ndyaakalinga kwaamba pamakani aya, wakaamba ayi milambu ya kulekelelwa kwa shibiibi taikoonshi kusalasha bantu abo besa kuli Lesa. (Ebu. 10:1-4; amweelanishe a Ebu. 9:9.) Mupailishi munene taakalinga kucikonsha kubenga mulambu weenga waangulula bantu cakumaninina kuswa kushibiibi. Mulambu wakwe Klistu weenkabo ngowakacikonsha kukusha shibiibi sha bantu cakumaninina.—Ebu. 9:14; 10:12-22.
Kulangoola Buboni Bwakumushimu
(Bene Ebulu 9:16, 17) Ono pamakani a nkalata yakupyana buboni, cilayandika kutondesha ayi mwine buboni wafwa. 17 Ceebo nkalata yakupyana buboni taicite ncito na mwine buboni ucili muumi, sombibo na wafwa.
w92-CW 3/1 pe. 31 mapa. 4-6
Miipusho Kuswa Kubeshikubelenga
Paulo wakaamba ayi lufu lwakalinga kuyandika kwaamba ayi shipangano pakati kabantu a Lesa shisebense. Cakubonenaako cibotu ngu Mulawo wacipangano. Mose ngowakalinga shikwiimikana pakati wa cipangano ico Yehova ncaakapangana abene Isilaeli bakumubili. Mose wakalinga kucite mukuli ulibetele alimwi wakasebensela pomwi abene Isilaeli ciindi ndyebakalinga kutalika cipangano ici. Aboobo Mose wakalinga kubonwa anga ngowakacita cipangano ici Yehova ncaakatalika. Ano sa Mose wakalinga kweelete kucaikwa kwaamba ayi Mulawo wa cipangano utalike kusebensa? Sobwe. Shinyama nsheshakalinga kucaikwa, aboobo bulowa bwanshisho mbobwakapyana bulowa bwakwe Mose.—Bene Ebulu 9:18-22.
Ino ngani wakalinga shikwiimikana pakati wa cipangano cipya ico Yehova ncaakapanga a Isilaeli wakumushimu? Yesu ngowakalinga shikwiimikana pakati. Nabi kwaamba ayi Yehova ngowakatalika cipangano ici, Yesu wakalinga kucite mukuli unene. Alimwi Yesu wakasebensa pomwi abaabo bakataanguna kunjila mucipangano ici. (Luka 22:20, 28, 29) Kwiilikaawo, wakalinga kweelela kubenga mulambu kwaamba ayi cipangano ici citalike kusebensa. Wakabenga mulambu wa buumi bwakwe busalalite kuteshi bwa shinyama. Nceceeco Paulo ncakaambila pali Klistu ayi wakalinga ngo muntu wakatalika cipangano cipya. Cipangano cipya cakatalika kusebensa pesule lya kwaamba ayi ‘Klistu wanjila . . . mwiculu mwiine mwiine, uko nkwaatwiimikaninaako kuli Lesa.—Bene Ebulu 9:12-14, 24.
Paulo ndyakaamba pali Mose a Yesu ayi bakalinga bantu bakatalika shipangano, taakalinga kusansulula ayi mbobakatalika shipangano isho, sombi ngu Lesa mwiine wakashitalika. Nacibi boobo, basankwa bobilo aba bakaabanamo lubasu mukukumanisha shipangano ishi mbuli beshikwiimikana pakati. Mu shipangano shoonse shobilo, lufu lwakalinga kuyandika—shinyama muciindi cakwe Mose, a Yesu ndyakaaba buumi bwakwe ceebo cabaabo bakenjila mu cipangano cipya.
(Bene Ebulu 10:5-7) Aboobo ndyaakesa pacishi capanshi wakaambila Lesa ayi “‘tewakalinga kusuni milambu ashipo shimwi shoonse, sombi wakambambila mubili. 6 Tookwe kukondwa mumilambu ya banyama bakalinga kutentwa pacipaililo nabi milambu yakukusha shibiibi sha bantu.’ 7 Mpomunyawo ndakaamba ayi: ‘Bona! Ndesa (bweenka mbuli maswi mbwaamba pali ndime mulibuku lya milawo) kwaamba ayi ncite kuyanda kwako OLesa.’”
it-1-E 249-250
Kubombekwa
Luka wakaamba ayi Yesu wakalinga kupaila ndyaakalinga kubombekwa. (Luka 3:21) Kwiilikaawo, mulembi wa nkalata yabene Ebulu wakaamba ayi Yesu Klistu ndyaakesa “mucishi” (nkokwaamba ayi, ndyaakaya kwaamba ayi abombekwe akutalika ncito yakushimikila, kuteshi ciindi ndyaakashalwa kaatana kwiiya kwaamba nabi kubelenga) wakalinga kwaamba kweelana amaswi ngotucana pa Kulumbaisha 40:6-8 (LXX): “Tewakalinga kusuni milambu ashipo shimwi shoonse, sombi wakambambila mubili. . . Bona! Ndesa (bweenka mbuli maswi mbwaamba pali ndime mulibuku lya milawo) kwaamba ayi ncite kuyanda kwako OLesa.” (Ebu. 10:5-9) Yesu wakashalilwa mumukowa wa baJuda abo bakalinga mu cipangano ca Mulawo a Lesa. (Kul. 19:5-8; Gala. 4:4) Aboobo Yesu wakalinga kale mu cipangano a Yehova Lesa, ciindi ndyakaya mukubombekwa kuli Joni. Paciindi ici, Yesu wakalinga kucita cintu cisuniki abuumbi kwiinda kucitabo sheesho shakalembwa mu Mulawo. Wakalinga kulyaaba kuli Yehova kwaamba ayi acite “kuyanda” kwa baIshi uko kwakeelikaawo akwaaba buumi bwakwe kwaamba ayi bantu bacileeke kubenga milambu yabanyama iyo yakaambwa mu Mulawo. Mutumwi Paulo wakaamba ayi: ‘Ceebo ca “kuyanda” kwa baIshi, twakasalashikwa kwiinda mukubenga mubili wakwe linkanda lyomwibo.’ (Ebu. 10:10) Kulyaaba kucita kuyanda kwa baIshi uko Yesu nkwaakacita, kwakeelikawo akucita ncito sha Bwaami. (Luka 4:43; 17:20, 21) Yehova wakasumina kulyaaba uku kwa Mwanaakwe, akumusala kwiinda mukusebensesha mushimu usalashi ndyakaamba ayi: “Ndiwe mwanaangu ngoonsuni abuumbi. Pali ndiwe ndikondetwe abuumbi.”—Maako 1:9-11; Luka 3:21-23; Mate. 3:13-17.
SEPTEMBER 16-22
BUBONI BUCANIKA MUMASWI AKWE LESA | BENE EBULU 11
“Lushomo Ncoluyandikila”
(Bene Ebulu 11:1) Kushoma nkutatoonsha mushintu nshetutoolangila alimwi akushinisha ayi shintu nshetutaboni nkoshili cancinencine.
w16-CW.10 pe. 27 pala. 6
Amutondeshe Lushomo Mushishomesho Shakwe Yehova
6 Tulacana busansulushi bwa liswi lya lushomo muBaibo palilembo lya Bene Ebulu 11:1. (Amubelenge) Lushomo lulaamba shintu shobilo nshetutakoonshi kubona: (1)“Shintu nshetutoolangila.” Ishi shileelikawo shintu isho Lesa nshaakatushomesha isho shitana kucitika, shintu mbuli cishi cipya alimwi akukushikwa kwa shintu shoonse shibiibi. (2)“Shintu nshetutaboni nkoshili cancinencine.” Palilembo ili, liswi lya ciGiliki lya kwaamba ayi “kushinisha” lilasansulula kuba abumboni bwancinencine bwashintu nshetutakoonshi kubona mbuli, kushoma kwaamba ayi Yehova Lesa nkwaali, Yesu Klistu, banjelo alimwi aBwaami bwakwiculu. (Ebu. 11:3) Ino inga twatondesha buyani ayi tulicite lushomo mushintu nshetutaboni shilembetwe mumaswi akwe Lesa? Inga twacita boobo kwiinda mushintu nshetwaamba anshetucita—kwaalilwa kucita boobo kulatondesha ayi tatucitewo lushomo.
(Bene Ebulu 11:6) Taaku muntu weenga wasangalasha Lesa kaatacite lushomo, mukwiinga uyo woonse usuni kusena kuli Lesa ulyeelete kushoma ayi Lesa nkwaali alimwi ayi ulapa shilambu kubantu abo bamuyandoola camoyo woonse.
w13-CW 11/1 pe. 11 mapa. 2-5
“Shikupa Shilambu Kubaabo Bamuyandoola Camoyo Woonse”
Ino inga twacita buyani kwaamba ayi tunoosangalasha Yehova? Mutumwi Paulo wakalemba ayi, “Taaku muntu weenga wasangalasha [Lesa] kaatacite lushomo.” Mulilembo ili Paulo taana kwaamba ayi nciyumu kusangalasha Lesa na katutacite lushomo. Sombi wakaamba ayi inga tatusangalashi Lesa na katutacite lushomo. Aboobo, lushomo ncintu ciyandika abuumbi kwaamba ayi tusangalashe Lesa.
Ino nshintunshi shobilo nshotweelete kushiba kwaamba ayi tusangalashe Yehova? Cakutaanguna tulyeelete kushoma ayi nkwaali. Mukwiinga na katutashomi ayi Lesa nkwaali inga tatukoonshi kumusangalasha. Nacibi boobo, kuba, alushomo lwancinencine teshi kushibabo ayi Yehova nkwaali, mukwiinga abalo bashikaswa balicishi ayi Lesa nkwaali. (Jemusi 2:19) Na tulashoma ayi Lesa nkwaali tulyeelete kunoocita shintu nshaasuni.—Jemusi 2:20, 26.
Cabili, ‘tulyeelete kushoma’ ayi Lesa “ulapa shilambu.” Muntu ucite lushomo luyumu uleshiba ayi Lesa alaakumupa cilambu ceebo cakusebensa cankusu kucita shintu shibotu. (1 Bene Kolinto 15:58) Ino inga twasangalasha buyani Yehova na katutashomi ayi inga watupa cilambu? (Jemusi 1:17; 1 Pita 5:7) Aboobo muntu waamba ayi Lesa taatubikiliiko maano, akwaamba ayi taalumbiiwo pancito nshetumusebensela alimwi ayi taacite nkumbu, nkokwaamba ayi taamushiwo Lesa wancinencine.
Ino mbantu bamushobo nshi Yehova mbaapa shilambu? Paulo wakaamba ayi, ‘Mbaabo bamuyandoola camoyo woonse.’ Libuku limwi ilyo basansulushi ba Baibo ndyebasebensesha lilaamba ayi, liswi lya ciGiliki lya kwaamba ayi ‘bamuyandoola camoyo woonse’ talisansululi ayi muntu ‘ulyeelete’ kwiiyabo pali Lesa camana, sombi alyeelete kubikaako maano abuumbi ‘akupaila Lesa.’ Libuku limwi lilaamba ayi liswi ili lya mu ciGiliki lilatondesha ayi muntu alyeelete kusebensa cankusu kwaamba ayi asangalashe Lesa. Yehova alapa shilambu abo bacite lushomo luyumu mukwiinga lulabalengesha kusebensa cankusu ndyebatoocita kuyanda kwakwe akumupaila camoyo woonse.—Mateyo 22:37.
(Bene Ebulu 11:33-38) Kwiinda mulushomo, bantu aba bakalwana shishi alimwi akukoma. Bakacita shiluleme, mpeeke alakwe Lesa wakabapa nshaakabashomesha. Bakalengesha milomo ya nkalamu kutacaluka, 34 bakakoma nkusu sha mililo yakalinga kunyaka abuumbi, bakapulushikwa kukucaikwa amipeeni. Nakubi kwaamba ayi tebakalinga kucite nkusu, bakabaasho. Bakaba bashilumamba bayumu abuumbi, akukoma bashilumamba bakalinga kubalwana. 35 Kwiinda mulushomo, banakashi bakatambula beshikamukowa babo bakalinga bafwa. Ono bamwi bakakaka kwaangululwa, ceebo bakalinga kusuni kwaamba ayi bakabushikwe mubuumi bubotu bwiindaawo. 36 Bamwi alimwi bakawelulukwa akukwipwa, abalo bamwi bakaangwa ncetani akuwaalwa mujeele. 37 Bamwi bakalinga kucaikwa kwiinda mukuumwa mabwe, bamwi bakalinga kupasulwa pakati, abalo bamwi bakalinga kucaikwa amipeeni. Bamwi bakalinga kweenda kabafwete shipaya sha mbelele nabi sha mpongo, bakalinga bakandu akupenshekwa alimwi akushupikwa. 38 Cishi ca panshi tecakalinga kubeeleteewo! Bakalinga kusubyaangilabo mumayanga alimwi amutulundu akunookalabo mushimfweengo alimwi amushilingo shapacishi capanshi.
w16-CW.10 pe. 23 mapa. 10-11
Amutolelele Kuyumya Lushomo Lwanu Mushintu Nshemutoolangila
10 Mulilembo lya Bene Ebulu capita 11, mutumwi Paulo wakaamba pa meelesho ayo basebenshi bamwi bakwe Lesa ngobakeendaamo. Kucakubonenaako, mutumwi wakaamba pa banakashi bakalinga kucite lushomo abo bakafwitwa bana babo basankwa sombi mbobakatambula pesule lyakubushikwa. Kuswa waawo wakaamba pa bamwi ‘bakakaka kwaangululwa ceebo bakalinga kusuni kwaamba ayi bakabushikwe mubuumi bubotu bwiindaawo.’ (Ebu. 11:35) Nabi tatucishiwo bantu Paulo mbaakalinga kwaambawo, bamwi mbuli Naboti a Sekaliya bakoomwa mabwe kushikila bafwa ceebo cakunyumfwila Lesa akucita kuyanda kwakwe. (1 Baami 21:3, 15; 2 Maka. 24:20, 21) Danyelo ababye nakwiinga bakacileka kushomeka kwaamba ayi baangululwe, sombi mukwiinga bakalinga kucite lushomo luyumu muli Yehova, tabakwe kucita boobo, aboobo inga twaamba ayi “bakalengesha milomo ya nkalamu kutacaluka” a ‘kukoma nkusu shamulilo.’—Ebu. 11:33, 34; Danye. 3:16-18, 20, 28; 6:13, 16, 21-23.
11 Ceebo calushomo ndobakalinga kucite, bashinshimi mbuli Mikaya a Jelemiya bakawelulukwa akukwipwa . . . akuwaalwa mujeele. Bamwi mbuli Elija, “bakalinga kusubyaangilabo mumayanga alimwi amutulundu akunookalabo mushimfweengo alimwi amushilingo shapacishi capanshi.” Boonse bakatolelela kuliyumya ‘ceebo ca kushoma mushintu nshebakalinga kulangila.’—Ebu. 11:1, 36-38; 1 Baami 18:13; 22:24-27; Jele. 20:1, 2; 28:10, 11; 32:2.
Kulangoola Buboni Bwakumushimu
(Bene Ebulu 11:4) Kwiinda mulushomo, Abelo wakapa mulambu weelete kuli Lesa kwiinda wakwe Kaini. Ceebo ca lushomo, Lesa wakabanda Abelo ayi uliluleme mukwiinga Lesa mwiine wakakondwa pamulambu wakwe. Lushomo ndomunya ulo ndolulengesha ayi Abelo anoocaamba kuli ndiswe, nakubi kwaamba ayi ulifwite.
it-1-E 804 pala. 5
Lushomo
Shakubonenaako sha Baabo Bakalinga Kucite Lushomo. Uli woonse ‘wabakamboni baanji’ Paulo mbakaambawo (Ebu. 12:1) bakalinga kucishi ayi nshebashoma shilaakucitika. Kucakubonenaako, Abelo cakutatoonsha wakalinga kucishi cishomesho ‘calunyungu’ ulo lwakalinga kusa mu kupwaya ‘nsoka’ kumutwi. Alimwi wakabona bumboni buunji kabukumanishikwa ubo Yehova mbwakaambila limwi pa bashali bakwe mu Edeni. Ndyebakaswa mumuunda wa Edeni, Adamu alimwi amukwashi wakwe, bakalinga kuyuwa kwaamba ayi bacane shakulya mukwiinga bulongo bwakashinganishikwa alimwi bwakalinga kumena myuumfwa ansaku. Abelo alyeelete wakabona Efa mbwaakalinga kusuni ibaye ambwaakalinga kweendeleshekwa anguwe. Cakutatoonsha banyina balyeelete bakaambawo sha mapenshi ngobakalinga kwiindaamo na bamita. Alimwi Abelo alyeelete wakabona mulyaango wa muunda wa Edeni mbowakalinga kushitilishikwa a bakelebu alimwi amupeeni wakalinga kunyaka mulilo. (Mata. 3:14-19, 24) Shoonse ishi shakaba ‘bumboni bushinishitwe,’ bwakashomesha Abelo kwaamba ayi lupulusho lulaakusa kwiinda ‘mulunyungu lwakashomeshekwa.’ Aboobo kwiinda mulushomo, “wakapa mulambu weelete kuli Lesa,” kwiinda wakwe Kaini.—Ebu. 11:1, 4.
(Bene Ebulu 11:5) Kwiinda mulushomo Enoki wakalonshekwa kwaamba ayi ataboni lufu, alimwi taana kucanikwa kuli koonse mukwiinga Lesa wakamuloonsha; ceebo kaatana kulonshekwa wakacitilwa bumboni bwakwaamba ayi wakasangalasha Lesa.
wp17-CW.1 mape. 12-13
“Wakasangalasha Lesa”
Ino Enoki “wakalonshekwa” buyani kwaamba ayi “ataboni lufu”? Yehova alyeelete wakalengesha Enoki kufwa kwaamba ayi atanyumfwi kucisa kwalufu kuli koonse. Sombi kaatana kulonshekwa “wakacitilwa bumboni bwakwaamba ayi wakasangalasha Lesa.” Ino Lesa wakatondesha buyani ayi wakakondwa ashintu Enoki nshaakacita? Ndyekwakacaalabo ciindi ciniini kwaamba ayi Enoki afwe, Lesa alyeelete wakamutondesha cili anga nciloto, ico cakalinga kutondesha buumi bwa mupaladaiso. Enoki wakafwa, pesule lyakubona bumboni ubu bwakatondesha ayi Yehova alimusuni. Mutumwi Paulo, wakaamba pali Enoki alimwi abasankwa abanakashi bamwi ayi: “Bantu aba boonse bakafwabo kabashoma muli Lesa.” (Bene Ebulu 11:13) Kuswa waawo balwani bakwe balyeelete bakatalika kulangoola mubili wakwe, sombi tabana kuucanaawo kuli koonse, mpashi mukwiinga Yehova wakaubika, kwaamba ayi bataunyonyooli nabi kuusebensesha kutola panembo kulambila kwa bubeshi.
Kubelenga Baibo: (Bene Ebulu 11:1-16)
SEPTEMBER 23-29
BUBONI BUCANIKA MUMASWI AKWE LESA | BENE EBULU 12-13
“Yehova Alatondesha Lusuno—Kwiinda Mukutululika”
(Bene Ebulu 12:5) Sa mwalubaako maswi alya akumuyumya Lesa ngaakamwaambila anga mbana bakwe? Wakaamba ayi: ‘Mwanaangu, koonyumfwila Yehova na kaakulwiita, alimwi utanoolefuka na wakulwiita cilubo cako;
w12-CG 3/15 pe. 29 pala. 18
Mutalangi ‘Pashintu Sha Kwisule’
18 Na Twalulikwa. Cimwi ciindi inga catucisa na twayeeya pa kululikwa nkotwakapekwa. Inga twalinyumfwa cibiibi abuumbi alimwi akulinyumfwa ‘kulefuka.’ (Ebu. 12:5) Cimwi ciindi inga twakaaka kusumina kululikwa nabi kucileka kukonkela kululikwa. Ishi inga shalengesha kwaamba ayi kululika kutatucaafwi. Sombi inga cabota na twakonkela maswi akaamba Solomoni ayi: ‘Catisha kululika, utakuleeki. Ukulame kabotu, ceebo mbobuumi bwako.’ (Tus. 4:13) Bweenka muntu weensha motoka mbwaabikila maano kushitondesho sha munshila, aswebo tulyeelete kusumina kululikwa, kucita nshetwalwiitikwa, akutolelela kuya panembo.—Tus. 4:26, 27; amubelenge Bene Ebulu 12:12, 13.
(Bene Ebulu 12:6, 7) Ceebo Yehova ulalulamika muntu woonse ngwaasuni, alimwi ulalulika muntu uli woonse ngwaatambula kuba mwanaakwe.’ 7 Mulyeelete kuliyumya mumapensho anu oonse mukwiinga ninshila yomwi yakululikwa kwanu. Lesa utoomubona ayi muli bana bakwe. Mukwiinga ino ngu mwaana wamushobo nshi utalulikwi abaishi?
w12-CW 7/1 pe. 21 pala. 3
‘Lyoonse Ndyemutoopaila, Munokwaamba ayi, ‘Ta’’
Mushali ucite lusuno pabana bakwe ulabalulika mukwiinga alisuni kwaamba ayi bakakule kabotu. (Bene Efeso 6:4) Mushali wamushobo uyu, ulalulika mwaana na wabisha, sombi kuteshi cabukali. Ishiwesu wakwiculu alakwe mbwaabete, cimwi ciindi inga wabona ayi tulisuniki kululikwa. Ulatululika calusuno kuteshi cabukali. Yesu alakwe wakakosha baIshi, taakalinga kululika bashikwiiya bakwe cabukali nabi cimwi ciindi bakalinga kucelwa kusebensela pashintu nshaakalinga kubalwiita.—Mateyo 20:20-28; Luka 22:24-30.
(Bene Ebulu 12:11) Ncakwiila taaku kululikwa kusangalasha ciindi ndyekwapekwa, sombi kulacisa, nacibi boobo, kulaleta luumuno abululami kuli baabo bakaishikwa ankuko.
w18-CW.03 pe. 32 pala. 18
“Munoonyumfwa Kululikwa Kwaamba ayi Mube Basongo”
18 Ncakwiila kululika kulacisa, sombi mapensho esa ceebo cakukaka kululikwa alacisa abuumbi kwiinda kululikwa. (Ebu. 12:11) Kwaamba ayi tunyumfwishe makani aya, atubandike pashakubonenaako shobilo, cakwe Kaini aca Mwaami Sedekiya. Kaini ndyaakanyumfwila munyono Abelo cakuyanda kumucaya, Lesa wakamwiipusha ayi: ‘Ino wakalala nshi? Ino ciwa citooboneka buyani kushundumana? Ano na waaluka akutalika kucita shibotu, sa inga tooluumbwi? Sombi na utaaluki akutalika kucita kabotu, shiba kwaamba ayi cibiibi citookulindilila pamulyaango alimwi cilisuni kukweendelesha. Sombi sa ulaakucikoma?’ (Mata. 4:6, 7) Kaini taakwe kunyumfwila Lesa aboobo cibiibi cakamukoma. Kaini wakaliletela mapensho! (Mata. 4:11, 12) Mapensho ngaakacana akamucisa abuumbi kwiinda kululikwa nkwaakapekwa aYehova.
Kulangoola Buboni Bwakumushimu
(Bene Ebulu 12:1) Ono mukwiinga aswebo tuli abakamboni baanji batushingulukite, aswebo atushisowe shoonse shitulemena alimwi ashibiibi shoonse isho nshetucita lyoonse. Lyalo tucice cankusu lubilo ulu ndotucite.
w11-CW 9/15 mape. 17-18 pala. 11
Amucice Cakuliyumya
11 Likoto linene lya bakamboni telyakalingabo likoto lyakalinga kweebelabo bamwi ndyebatoocica. Sombi abalo bakalinga kucica mulubilo ulu lwakupingana kushikila akumamanino. Nabi pacecino ciindi balifwite, sombi nshakubonenaako shibotu kubaabo bakatalika coonoono kucica mulubilo ulu. Amuyeeyebo mbweenga walinyumfwa muntu utoocica mulubilo ulu, na washiba kwaamba ayi kuli abamwi bakacicaako lubilo ulu akupekwa shilambu. Ici nga calengesha ayi acice cakuliyumya. Likoto ili lya bakamboni bakalekale, lilatondesha ayi nabi tweenda mumapensho aanji buyani, inga twacikonsha kuswiitilila akutambula cilambu. Aboobo kuyeeya pacakubonenaako ici calikoto linene lya bakamboni, kwakacafwa bene Klistu ba ciEbulu kucica cakuliyumya’—kuyeeya pa shakubonenaako ishi, inga kwatucafwa aswebo munshiku shino.
(Bene Ebulu 13:9) Mutasumini kwaamba ayi njiisho sheensu shipusenepusene ayi shimukushe munshila iluleme. Ncibotu kwaamba ayi luse lwakwe Lesa luyumye myoyo yesu kuteshi shakulya, ceebo tashicafwi baabo bashicite.
w89-CN 12/15 pe. 22 pala. 10
Amupe Milambu Isangalasha Yehova
10 Bene Ebulu bakalinga kweelete kuleya “njiisho sheensu shipusenepusene” isho shakalinga kwiisha baJuda. (Bene Galatiya 5:1-6) Aboobo luse lwakwe Lesa ndolwakalinga kweelete kuyumya myoyo yabo kwaamba ayi batolelele kuba mucancine kuteshi njiisho sha baJuda. Mukwiinga Paulo wakaamba ayi myoyo yabo inga taikoonshi kuyuma kwiinda mu shakulya ceebo tashakalinga kucafwa baabo bakalinga kushicite. Aboobo bamwi balyeelete bakalinga kupikishanya pamakani ashakulya alimwi apamakani akubenga milambu. Kusebensela Lesa alimwi akulumba ceebo cacilubula ncaakatupa, nkokupa muntu kucana shoolwe shakumushimu kuteshi kulisukama abuumbi pa shakulya nabi kulemeka nshiku shimwi. (Bene Loma 14:5-9) Kwiilikaawo, mulambu wakwe Klistu, wakapa kwaamba ayi milambu yakalinga kubenga bene Lefi icileeke kusebensa.—Bene Ebulu 9:9-14; 10:5-10.
Kubelenga Baibo: (Bene Ebulu 12:1-17)
SEPTEMBER 30–OCTOBER 6
BUBONI BUCANIKA MUMASWI AKWE LESA | JEMUSI 1-2
“Nshila Itola ku Cibiibi Akulufu”
(Jemusi 1:14) Sombi muntu woonse uleeleshekwa na wayungoolwa akucenjeekwa alunkumbwa lwakwe mwiine.
g17-CW.4 pe. 14
Kweeleshekwa
Kweeleshekwa, cilaamba kusunkwa kwaamba ayi muntu acite cintu ncaakumbwa, bunene bunene cibiibi. Kucakubonenaako, ndyemutokuula shintu inga mwakuumbwa cintu comwi akuyeeya ayi na mwaciipa, beene inga tabamuboniiwo. Nacibi boobo, njeelacaamba inga yamukasha, akucileka kuyeyaawo. Na mwacita boobo, nkokwaamba ayi mwakoma lisunko lya kweeleshekwa.
BAIBO NSHOYAAMBA
Na mweeleshekwa tacaambi ayi muli bantu babiibi. Baibo ilaamba ayi soonsebo tuleeleshekwa. (1 Bene Kolinto 10:13) Nshetucita na tweeleshekwa, nsheshilengesha kwaamba ayi tube bantu bali kabotu nabi sobwe. Bamwi balatolelela kuyeeya pashintu nshebakumbwa, aboobo mukuya kwa ciindi balabisha. Nacibi boobo, bamwi na babona ayi nshebatoyeeya nshibiibi, balacileka kuyeeya pashintu isho mpomunyaawo.
‘Sombi muntu woonse uleeleshekwa na wayungoolwa akucenjeekwa alunkumbwa lwakwe mwiine.’—Jemusi 1:14.
(Jemusi 1:15) Ono lunkumbwa na lwakula, lulashala cibiibi, alimwi cibiibi na cakula cilashala lufu.
g17-CW.4 pe. 14
Kweeleshekwa
Baibo ilasansulula shilengesha muntu kubisha. Lilembo lyakwe Jemusi 1:15 lilaamba ayi: “Ono lunkumbwa na lwakula, lulashala cibiibi.” Bweenka mbociba na mwanakashi wamita kwaamba ayi abe amwaana, aswebo mbociba na twatolelela kuyeeya pashintu shibiibi, inga twaalilwa kulikasha kushikila twaciita cintu cibiibi. Sombi cilakonsheka kuleya shintu shibiibi ishi.
Kulangoola Buboni Bwakumushimu
(Jemusi 1:17) Shipo shoonse shibotu shitacite kampenda shilaswabo kwiculu kuli Lesa Mulengi wa mimuni yoonse ili mwiculu. Ngu Lesa utapilooki mbuli shimfule shilongalonga.
it-2-E 253-254
Mumuni
Yehova ngu Lesa wa “mimuni yoonse ili mwiculu.” (Jemu. 1:17) ‘Mwaami Lesa taakwe kulengabo lisuba ayi kalipa mumuni malumwi, na kulenga mweenshi anyenyeenshi ayi kashipa mumuni mashiku’ (Jele. 31:35) sombi ulatumunikila lwakumushimu kwiinda mukutwiisha. (2 Koli. 4:6) Milawo yakwe, milasho, amaswi akwe, ngumumuni kubaabo beendeleshekwa anshisho. (Kulu. 43:3; 119:105; Tus. 6:23; Isa. 51:4) Shikulumbaisha wakaamba ayi: “Ceebo ca mumuni wanu tulakonsha kubona mumuni.” (Kulu. 36:9; amweelanishe a Kulu. 27:1; 43:3.) Bweenka mbuli mumuni wa kumuyamaca uyo uya ciindaawo kutuba “kushikila lisuba lyaswa,” aboobo nshila ya baluleme ayalo ilaya bumunikilwa a busongo bwakwe Lesa. (Tus. 4:18) Kwaamba ayi tukonkele Yehova nshatulwiita tulyeelete kweenda mu mumuni wakwe. (Isa. 2:3-5) Ano na muntu utokweenda mu munshinshe wakumushimu ushiya mbi, ulabona shintu munshila itabete kabotu na kuba amiyeeyo ibiibi. Kweelana a Yesu mbwaakaamba ayi: “Sombi na meenso anu katabete kabotu nkokwaamba ayi mubili woonse ulaba mumunshinshe. Ono na mumuni waba munshinshe, ingayi munshinshe uyo ulaakubabo mbi!”—Mate. 6:23; amweelanishe a Duto. 15:9; 28:54-57; Tus. 28:22; 2 Pita 2:14.
(Jemusi 2:8) Na ncakwiila mulakonkela mulawo wakwe Lesa ulembetwe muMalembo akwe ayi, “Suna mubyo bweenka mboolisuni omwiine,” ingayi mulacita kabotu.
it-2-E 222 pala. 4
Mulawo
“Mulawo wa Mwaami.” ‘Mulawo wa mwaami’ ulayandika alimwi uleendawo pa milawo imwi iyo bantu njebakonkela iyo mwaami njaabika. (Jemu. 2:8) Mulawo wacipangano wakalinga kweendeleshekwa alusuno; aboobo mulawo wakwaamba ayi “suna mubyo bweenka mboolisuni omwiine” (mulawo wa mwaami) ngowakalinga Mulawo wabili pamilawo yobilo, iyo pakalinga kwiimfwi Mulawo woonse alimwi akwiisha kwa balaluki. (Mate. 22:37-40) Nabi kwaamba ayi Beneklistu tabakonkeli Mulawo wacipangano, sombi balakonkela Mulawo wa Mwaami Yehova alimwi a Mwanaakwe, Yesu Klistu kweelana acipangano cipya.
Kubelenga Baibo: (Jemusi 2:10-26)
SEPTEMBER 2-8
it-1-E 524 pala. 3-5
Pangano Yalomba. Mu 600 B.C.E., kupitila mwa mneneli Yeremiya, Yehova elaŵililatu za pangano yalomba. Enena kuti pangano iyi ikankhale yosiyana na Pangano ya Cilamulo yeciphwanya Aisiraeli. (Yer 31:31-34) Pa Nisani 14 mu 33 C.E., usiku wakuti Yesu akuyopaiwa m’mawa mwake, eyambisha mwambo wa Cakulya Cam’cingulo ca Asikulu. Pa nthawi iyi, Yesu elengeza za pangano yalomba yamene yenzofunika kuyamba kuseŵenza cifukwa ca nsembe yake. (Luka 22:20) Masiku 50 pavuli pakuti waukishiwa koma soti masiku 10 pavuli pakuti wakwela kululu kwa Awisi, Yesu epeleka mzimu utuŵa kwa ophunzila ŵake amene esonkhana m’cipinda capalulu ku Yerusalemu. Yesu elandila mzimu uyu kucokela kwa Yehova.—Mac 2:1-4, 17, 33; 2Akor 3:6, 8, 9; Aheb 2:3, 4.
M’pangano iyi yalomba muli Yehova koma soti “Isiraeli wa Mulungu,” wamene opanamila ozozewa amene ni okatizhyana na Khristu. Ozozewa aŵa niye opanga mpingo wa Khristu, kapena kuti muŵili wake. (Aheb 8:10; 12:22-24; Agal 6:15, 16; 3:26-28; Aro 2:28, 29) Pangano yalomba yeyamba kuseŵenza Yesu Khristu pecikhesa milopa yake nopeleka mtengo wa nsembe yake kwa Yehova pecikwela kululu. (Mat 26:28) Munthu akasankhiwa kuti akalute kululu (Aheb 3:1), Mulungu oseŵenzesha nsembe ya mwana wake kuti munthu wamene uyo ankhale m’pangano iyi. (Sal 50:5; Aheb 9:14, 15, 26) Yesu Khristu niye Nkhoswe ya pangano yalomba (Aheb 8:6; 9:15) koma soti niye Mbewu Yoyamba ya Abulahamu. (Agal 3:16) Yesu oseŵenzesha udindo wake monga nkhoswe ya pangano yalomba, poyavya ŵanthu onse amene ali m’pangano iyi kuti ankhale mbali ya mbewu yeneyene ya Abulahamu (Aheb 2:16; Agal 3:29) mwa kuŵakhululukila macimo ŵao. Yehova oŵaona kuti ni ŵanthu olungama.—Aro 5:1, 2; 8:33; Aheb 10:16, 17.
Ozozewa aŵa, amene ni akwake a Khristu, onkhala ansembe atontho-atontho amene oseŵenza pamozi na Mkulu wa Ansembe ndipo onkhala “ansembe acifumu.” (1Pet 2:9; Chiv 5:9, 10; 20:6) Oseŵenza nchito yao monga ansembe, yamene ni “nchito yotumikila ŵanthu” (Afil 2:17), ndipo oziŵika soti kuti ni “atumiki a pangano yalomba.” (2Akor 3:6) Ŵanthu aŵa, amene ni osankhiwa, ofunika kukonkha maluwayo a Khristu mosamala ngako koma soti mokhulupilika mpaka imfwa yao. Pavuli pake, Yehova oŵapasa mwayi wonkhala ufumu wa ansembe koma soti monga ayake a Khristu olandilila pamozi coloŵa ca moyo wakululu ndipo oŵapasa mphotho ya moyo wosafwa na wosawonongeka. (1Pet 2:21; Aro 6:3, 4; 1Akor 15:53; 1Pet 1:4; 2Pet 1:4) Colinga ca pangano iyi ni kusonkhanisha ŵanthu oziŵika na zina ya Yehova kuti ankhale mbali ya “mbewu” ya Abulahamu. (Mac 15:14) Aŵa ŵanthu onkhala “mkwatibwi” wa Khristu ndipo opanga gulu yamene Khristu ecita nayo pangano ya Ufumu kuti akalamulie naye pamozi. (Yoh 3:29; 2Akor 11:2; Chiv 21:9; Luka 22:29; Chiv 1:4-6; 5:9, 10; 20:6) Pangano iyi yalomba ipitilizhye kuseŵenza mpaka onse amene opanga gulu ya “Isiraeli wa Mulungu” akaukishiwe nopasiwa moyo wosafwa kululu. Madaliso ati akawele cifukwa ca pangano iyi akasile lini. Niye cifukwa cake pangano iyi yuitiwa kuti “pangano yosasila.”—Aheb 13:20.