Ino Milawo Yakwe Lesa Ilatucafwa Buyani?

1. Nceebo nshi bantu balayandika kutangililwa?

Mulengi wesu ulicite maano kwiinda ndiswe. Mukwiinga ngu ishi wesu utusuni, ulatulama. Alimwi, taakalinga kusuni ayi tunoolitangilila. (Jelemiya 10:23) Bweenka mbuli baana mbobayandika kutangililwa abashali, soonse tulayandika kutangililwa a Lesa. (Isaya 48:17, 18) Milawo icanika mu Baibo ilatutangilila, ico ncipo cakaswa kuli Lesa.—Amubelenge 2 Timoti 3:16.

Milawo yakwe Yehova ilatwiisha mbwenga twakala kabotu cino ciindi alimwi ilatutondesha mbwenga twatambula cilambu ca muyayaya kunembo. Mukwiinga Lesa ngo mulengi wesu, ngoweelete kutupa milawo. Aboobo tulyeelete kunomulumba kwiinda mu kunokonkela milawo yakwe mukwiinga ulatutangilila mu lusuno.—Amubelenge Kulumbaisha 19:7, 11; Ciyubululo 4:11.

2. Maswi akwe Lesa alatutangilila buyani?

Mu Baibo mulacanika milawo itutondesha Lesa nshayanda ayi tunocita kweelana ashitocitika. Ono milawo imwi ilalulama pa cintu comwibo. (Dutolonomi 22:8) Tulyeelete kunyumfwishisha a kushiba mbwenga twasebensesha milawo kweelana ashitocitika. (Tushimpi 2:10-12) Baibo ileisha ayi, buumi ncipo kuswa kuli Lesa. Kushiba ceeco inga kwatucafwa, pa ng’anda, ndi tutosebensa, nabi na tuli pa lweendo. Alimwi, teshi tukanocita shenga shalenga ayi twalicisa nabi kucisa bamwi.—Amubelenge Milimo ya Batumwi 17:28.

3. Ino njili milawo yobilo inene?

Yesu wakaamba pa milawo yobilo ilemu kwiinda milawo imwi. Mulawo utaanshi ulayubulula bantu ncebayandika kucita mu buumi, kwaamba ayi balyeelete kushiba Lesa, kumusuna, a kumusebensela mulushinisho. Uyu mulawo utaanshi tulyeelete kuwanuka lyoonse ndi tutocita shintu. (Tushimpi 3:6) Abo bakonkela mulawo uyu balaba bashicibusa bakwe Lesa, balacana kusangalala kwa ncinencine alimwi balaakuba abuumi butamaani.—Amubelenge Mateyo 22:36-38.

Mulawo wabili inga watucafwa kwaamba ayi tunonyumfwana abantu bamwi. (1 Bene Kolinto 13:4-7) Na mutokonkela mulawo wabili cilatondesha ayi mutocita shintu ku bantu bamwi bweenka Lesa mbwaacita.—Amubelenge Mateyo 7:12; 22:39, 40.

4. Ino milawo yakwe Lesa ilatucafwa buyani?

Milawo yakwe Lesa ileisha beshikamukowa mbwenga bacatana kwiinda mu kusunana. (Bene Kolose 3:12-14) Maswi akwe Lesa alafuna beshikamukowa kwiinda mu kubeisha awumwi mulawo wakwaamba ayi cikwati taceelete kumana.—Amubelenge Matalikilo 2:24.

Kukonkela milawo icanika mu Baibo inga kwatucafwa kunosebensa kabotu, aboobo kufuna ncito a miyeeyo yesu. Beshikunjisha ncito liinji balayanda basebenshi bakonkela milawo yaamba pa kushomeka a kucabaana. (Tushimpi 10:4, 26; Bene Ebulu 13:18) Maswi akwe Lesa alatwiisha ayi tulyeelete kukwaana na katucite shintu shiyanda mibili a kubika panembo bushicibusa bwesu a Lesa kwiinda bubile.—Amubelenge Mateyo 6:24, 25, 33; 1 Timoti 6:8-10.

Kukonkela milawo yakwe Lesa inga kwatucafwa kuba abuumi bubotu. (Tushimpi 14:30; 22:24, 25) Kukonkela milawo yakwe Lesa ikasha kukolwa kulatufuna ku kulicisa alimwi akumalwashi enga atucaya esa ceebo ca bwalwa. (Tushimpi 23:20) Yehova ulatusuminisha kunwa bwalwa, ono ulakasha kukolwa. (Kulumbaisha 104:15; 1 Bene Kolinto 6:10) Milawo yakwe Lesa ilatucafwa ndiitwiisha kulama micito a miyeeyo yesu. (Kulumbaisha 119:97-100) Ono, bene Klistu balushinisho tabakonkelibo milawo yakwe Lesa mukwiinga ilabacafwa. Balacita boobo kwaamba ayi balemeke Yehova.—Amubelenge Mateyo 5:14-16.