Makani Akusebensesha amu Kabuku Kamabungano Abuumi Anciito
DECEMBER 7-13
BUBONI BUCANIKA MUMASWI AKWE LESA | BENE LEFI 10-11
“Kusuna Yehova Abuumbi Kwiinda Mukwashi”
(Bene Lefi 10:1, 2) Bana bakwe Aloni basankwa Nadabu aAbiyu, bakabwesa shikaye shabo shakubikawo mulilo, akubikawo mulilo alimwi atununkila kabotu. Lyalo bakatalika kubenga tununkila kuli Yehova ntobatakwe kusuminishikwa, ntobatakwe kupekwa mulawo wakucita boobo. 2 Paciindi ceenka ico kwakesa mulilo kuswa kuli Yehova uyo akubatenta, aboobo bakafwa kunembo lyakwe Yehova
it-1-E 1174
Citakwe Kusuminishikwa
Mulilo Atununkila Kabotu Tutakwe Kusuminishikwa. Bana bakwe Aloni Nadabu a Abiyu bakatenta tununikila pamulilo ntobatakwe kusuminishikwa kubenga, aboobo Yehova wakabacaya ceebo ca nshebakacita. Liswi lyamu ciEbulu lyakwaamba ayi zar ndyetucana pa Lefi 10:1 ndyebakasebensesha kwaamba ‘pamulilo ngobatakwe kusuminishikwa, uyo [Lesa] ngwaatakwe kubapa mulawo wakucita boobo.’ (Lefi 10:2; Shaku. 3:4; 26:61) Yehova wakalwiita Aloni ayi: ‘Webo abana bako basankwa tamweelete kunwa waini na shakunwa shimwi shikola ndyemutoonjila mutente yakulambililaamo, kwaamba ayi mutakafwi. Uyu ngumulawo ngobeelete kukonkela boonse bamulunyungu lwako, kwaamba ayi mucikoonshe kushiba kabotu pakati ka cintu cilibetele acitalibetele, cintu cisalalite acitasalite, akwaamba ayi mwiishe bene Isilaeli milawo yoonse Yehova njaakabaambila kwiinda muli Mose.’ (Lefi 10:8-11) Ici cilatondesha ayi mpashi Nadabu a Abiyu bakalinga kukoletwe, ico cakapa kwaamba ayi batente tununkila pamulilo ntobatakwe kusuminishikwa. Alimwi cakapa kwaamba ayi Yehova akalale pamulilo uyo mpashi nciindi ncebakacitilawo boobo, musena nkobakacitila na nshila njebakasebensesha. Alimwi mpashi tununkila ntobakasebensesha twakalinga kupusene a Yehova ntwakabalwiita kusebensesha kweelana alilembo lya Kulonga 30:34, 35. Aboobo kukolwa kwabo teshi ncocakalinga cakubekesha ayi ncecakabapa kucita boobo.
(Bene Lefi 10:4, 5) Mpeeke Mose wakeeta Mishaelo alimwi aElisafani bana bakwe Usiyelo basankwa, alimwi abashimishaabo Aloni akubaambila ayi: “Kamwisa mukushe mituntu ya bapyala banu mutente isalalite, akubabika pansengwe lya misumba.” 5 Abalo bakesa babakusha kabacifwete aminjila yabo akubatola pansengwe lya misumba, kweelana abwakaamba Mose.
(Bene Lefi 10:6, 7) Kuswawaawo, Mose wakaambila Aloni alimwi abana bakwe basankwa Elyasa alimwi aItama ayi: “Mutacileeki kusakula misusu yanu alimwi mutatoleleli kukwamoona shakufwala shanu, kwaamba ayi mutafwi alimwi akwaamba ayi Lesa atakalalili likoto lya bene Isilaeli lyoonse. Sombi bene Isilaelinyinaanu boonse balaakulila baabo Yehova mbwakanyonyoola amulilo. 7 Tamweelete kuswa kumulyango wa tente yakulambililaamo kwaamba ayi mutafwi, ceebo mafuta akunanika akwe Yehova ali andimwe.” Aboobo, bakacita bweenka bwakaamba Mose.
w11-CG 7/15 31 pala. 16
Sa Mwakenjila Kale Mukookesha Kwakwe Lesa?
16 Aloni mukwabo Mose wakeenda mubukaalo buyumu ceebo ca bana bakwe basankwa bobilo. Amuyeeyebo Aloni mbwaakalinyumfwa bana bakwe basankwa bobilo, Nadabu a Abiyu ndyebakacaikwa, ceebo ca kutenta tununkila pamulilo Yehova ntwatakwe kubasuminisha. Ici cakamana bushicibusa mbobakalinga kucite abashali babo. Nacibi boobo, kuli ashimwi shiinji. Yehova wakalwiita Aloni abana bakwe bashomeka ayi: ‘Mutacileeki kusakula misusu yanu alimwi mutatoleleli kukwamoona shakufwala shanu [kwaamba ayi muboneshe ayi mulicite cililo] kwaamba ayi mutafwi alimwi akwaamba ayi Lesa atakalalili likoto lya bene Isilaeli lyoonse.’ (Lefi 10:1-6) Ino nshiinshi nshotutokwiiyawo? Tulyeelete kusuna Yehova abuumbi kwiinda beshikamukowa besu batashomeki.
Kulangoola Buboni Bwakumushimu
(Bene Lefi 10:8-11) Lyalo Yehova wakalwiita Aloni ayi: 9 “Webo abana bako basankwa tamweelete kunwa waini na shakunwa shimwi shikola ndyemutoonjila mutente yakulambililaamo, kwaamba ayi mutakafwi. 10 Uyu ngumulawo ngobeelete kukonkela boonse bamulunyungu lwako, kwaamba ayi mucikoonshe kushiba kabotu pakati ka cintu cilibetele acitalibetele, cintu cisalalite acitasalite, 11 akwaamba ayi mwiishe bene Isilaeli milawo yoonse Yehova njaakabaambila kwiinda muli Mose.”
w14-CG 11/15 17 pala. 18
18 Tulyeelete Kuba Basalalite Mushintu Shoonse Nshetucita
Kwaamba ayi tube basalalite tulyeelete kukutumana akuyeeya cakubikila maano pa Malembo alimwi akucita nshaatulwiita Lesa. Amuyeeye cakacitikila bana bakwe Aloni, Nadabu a Abiyu, abo bakacaikwa ceebo ca kutenta tununkila pamulilo Yehova ntwatakwe kubasuminisha mpashi ceebo cakwaamba ayi bakalinga kukoletwe. (Lefi 10:1, 2) Amubone maswi Lesa ngaakalwiita Aloni. (Amubelenge Bene Lefi 10:8-11.) Sa ici cilaamba ayi tatweelete kunwa bwalwa katutana kuya kumabungano? Amuyeeye pashiteente ishi: Tatukonkeli Mulawo wakwe Mose. (Loma. 10:4) Mushishi shimwi, bamakwesu abenankashi balanwako bwalwa cakuteendilila ciindi ndyebatoolya cakulya kabatana kuya kumabungano. Pakusekelela kwa Pasika bakalinga kusebenseshabo makaapu one awaini. Yesu ndyaakatalika Ciibalusho, wakapa bashikwiiya bakwe waini uyo wakalinga kwiimikaninaako bulowa bwakwe. (Mate. 26:27) Baibo ilakasha bucakolwa akunwa bwalwa cakwiindilila. (1 Koli. 6:10; 1 Timo. 3:8) Alimwi njeelacaamba ya Beneklistu baanji taibasuminishiiwo kunwa nabi paniini ndyebatooya mukusebensa ncito iliyoonse yakwe Lesa. Nacibi boobo, bukaalo bulipusene pusene kweelana akumusena nkotukala, alimwi ciyandika abuumbi ku Beneklistu nkushiba ‘shintu shisalalite alimwi ashitasalalite’ kwaamba ayi batolelele kuba basalalite akusangalasha Lesa.
(Bene Lefi 11:8) Tamweelete kulya banyama aba nabi kukumya mituntu yabo, ceebo tabasalalite kuli ndimwe.
it-1-E 111 pala. 5
Shinyama
5 Bantu bakalinga kukonkela Mulawo wakwe Mose mbobakalinga kukonkela mulawo wakutalya shakulya shimwi. Lilembo lya Bene Lefi 11:8 lilaamba ayi: “Ceebo tabasalalite kuli ndimwe,” nkokwaamba ayi kubene Isilaeli. Yesu Klistu ndyaakafwa Mulawo wakamana, aboobo kukonkela mulawo wakutalya shakulya shimwi kwakamana. Bantu boonse bakatalika alimwi kukonkela maswi Lesa ngakaambila Nowa pesule lya Muyoba Unene pamakani ashakulya.—Kolo. 2:13-17; Mata. 9:3, 4.
Kubelenga Baibo: (Bene Lefi 10:1-15)
DECEMBER 14-20
BUBONI BUCANIKA MUMASWI AKWE LESA | BENE LEFI 12-13
“Nsheenga Tweeya Kuswa ku Milawo Yaamba pa Bulwashi bwa Manata”
(Bene Lefi 13:4, 5) Sombi na cilonda ncituba alimwi tacina kwinjila bunene mukati kwiindilila cikanda, abooya mukati kabutana kutuba, mupailishi ulyeelete kupatula muntu uyo kwanshiku shosanwe ashobilo. 5 Kuswawaawo, mupailishi ulyeelete kumubona alimwi pabushiku bwasanu ashobilo, na cilonda ico wacibona ayi cilibo mushobo womwi cakubula kwiindaawo, ulaakumunungilako nshiku shosanwe ashobilo ashimwi sha kwikala eenka.
wp18-CW.1 7
Sa Nshoyaamba Nshakale kale na Ilaamba Shintu Shitana Kucitika?
• Kupatula bantu balwashi.
Kweelana aMulawo wakwe Mose bantu balwashi manata bakalinga kweelete kukala beenka. Bamadokota bakesa mukushiba akutalika kukonkela bubaambo ubu mpashi myaaka 700 yaiinda, ciindi ndyekwakalinga bulwashi buyambukila, alimwi batolelela kucita boobo kushika apacecino ciindi.—Bene Lefi, capita 13 a Bene Lefi, capita 14.
(Bene Lefi 13:45, 46) Muntu ucite manata ulyeelete kufwala shakufwala sha masempele, taeelete kusakula alimwi ulyeelete kufweka camulomo akunokoolobesha ayi, ‘Nshisalalite! Nshisalalite!’ 46 Kulilabo na akanoocicite bulwashi ubo, teshi akanoosalaliteewo, alimwi ulyeelete kwikala pansengwe lya misumba kantalamukila abamwi boonse.
wp16-CG.4 9 pala. 1
Sa Mulishi?
BaJuda bakalekale bakalinga kuloonda bulwashi bwa manata bwakalinga kupukite abuumbi paciindi cilya. Bulwashi ubu bwakalinga buyoosha abuumbi cakwaamba ayi bwakalinga kunyonyoola nshinga sha muntu alimwi akumulemanika. Bulwashi ubu tabwakalinga kucitewo musamu. Aboobo abo bakalinga kuciswa bulwashi ubu bakalinga kweelete kukala beenka kulale abamwi alimwi akucenjesha bamwi ayi mbalwashi manata.—Bene Lefi 13:45, 46.
(Bene Lefi 13:52) Ulyeelete kucitenta cisani ico, cisani cabooya bwa mbelele na cintu cili coonse ca cipaya cicite bulwashi bwa manata, mukwiinga ngamanata eendaawo. Cilyeelete kunyonyoolwa amulilo.
(Bene Lefi 13:57) Nacibi boobo, na aciboneka kucisani mubulaamfu na mubufwiifwi na cintu cili coonse ca cipaya, nkokwaamba ayi bulwashi ubu butooya bwiindaawo, alimwi mulyeelete kutenta cintu cili coonse cicite bulwashi bwa manata mumulilo.
it-2-E 238 pala. 3
Manata
Kushisani amumaanda. Bulwashi bwa manata bwakalinga kuyambukila ashisani sha booya bwa mbelele na cintu cili coonse ca cipaya. Bwakalinga kumana pesule lyakucicapa cintu ico, alimwi akucibika ceenka kwanshiku. Ano na cintu ico ciciboneka kushiyashiya nabi kufubela nkokwaamba ayi bulwashi bwamanata bweendaawo, aboobo cintu ico cakalinga kweelete kutentwa. (Lefi 13:47-59) Na mulubumbu lwa ŋanda mutoboneka mabala ashiyashiya nabi asalala anjilite, mupailishi wakalinga kwiicala ŋanda iyo. Bulongo boonse mbobakashingusha amabwe oonse akalinga kucite bulwashi ubu, akalinga kuyandika kukushikwa kulubumbu akuwaalwa mumusena utasalalite pansengwe lya ndabala. Ano na bulwashi ubu bwatalika alimwi, ŋanda iyo yakalinga kuba itasalalite aboobo yakalinga kumwayululwa, alimwi mabwe a njiyo, shisamu alimwi abulongo boonse mbobakashingusha shakalinga kutolwa pansengwe lya ndabala kumusena utasalalite. Ano na cacanika ayi bulwashi bwamana muŋanda iyo, kwakalinga bubaambo bwakwisalasha. (Lefi 14:33-57) Bamwi balaamba ayi bulwashi bwa manata ubo bwakalinga kuyambukila shisani na maanda, kwakalinga nkubunda kwa mushobo umwi; nacibi boobo makani aya taashibikitwe kabotu.
Kulangoola Buboni Bwakumushimu
(Bene Lefi 12:2) “Lwiita bene Isilaeli ayi, ‘Na mwanakashi watumbuka mwaana musankwa, taasalalite kweelana aMilawo kwanshiku shosanwe ashobilo kuswa pabushiku ndyaapulukaamo, bweenka mbwaatasalalite kweelana aMilawo na wakubala.
(Bene Lefi 12:5) “‘Ono na wapulukamo mwaana mwanakashi, taasalalite kweelana aMilawo kwanshiku shili makumi obilo ashone kuswa pabushiku ndyaakapulukaamo, bweenka mbwaatasalalite na wakubala. Lyalo palaakwiinda nshiku shili makumi osanwe alyomwi alimwi anshiiku shosanwe abomwi, kwaamba ayi asalashikwe kweelana aMilawo ceebo ca bulowa bwakwe bwakaswa.
w04-CW 5/15 23 pala. 2
Shiteente Shinene Shitocanika Mulibuku lya Bene Lefi
12:2, 5—Ino nceebonshi kutumbuka kwakalinga kulengesha mwanakashi ‘kutasalala’? Shipansha shakushalila shakapangilwa ayi kashishala bantu bamaninite. Ano ceebo ca bubi mbotwakapyana, bana balashalwa abubi alimwi batamaninite. Kuba ‘utasalalite’ kwa kaciindi uko kusa ceebo ca kutumbuka, kukubala kwa mwanakashi alimwi akulitilila meense, kwakalinga kwiibalusha bene Isilaeli sha bubi mbobakapyana. (Bene Lefi 15:16-24; Kulumbaisha 51:5; Bene Loma 5:12) Milawo yakusalashikwa yakalinga kuyandika kwaamba ayi icafwe bene Isilaeli kubona kuyandika kwa mulambu wacilubula wakufweka pashibiibi sha bantu boonse akuboosha buumi bumaninite. Aboobo Mulawo wakaba ‘shikubatanjilila kushikila ciindi cakwe Klistu.’—Bene Galatiya 3:24.
(Bene Lefi 12:3) Pabushiku bwasanu ashotatwe, mwaana uyo ulyeelete kupalulwa.
wp18-CW.1 7
Sa Nshoyaamba Nshakalekale na Ilaamba Shintu Shitana Kucitika?
• Ciindi ca kupalulwa.
Kweelana a Mulawo wakwe Lesa mwaana musankwa wakalinga kweelete kupalulwa pabushiku bwa namba 8 kuswa ciindi ndyaakashalwa. (Bene Lefi 12:3) Nsondo yomwi kaitana kwiinda kuswa ciindi mwaana ndyaashalwa, bulowa bulaswa abuumbi na walicisa. Ano mukwiinga muciindi camu Baibo takwakalingaawo shakusebensesha shaconoono sheenga shapa kwaamba ayi bulowa butanoswa, cakalinga kabotu kulindila kushikila peenda nsondo yomwi kwaamba ayi mwaana apalulwe.
Kubelenga Baibo: (Bene Lefi 13:9-28)
DECEMBER 21-27
BUBONI BUCANIKA MUMASWI AKWE LESA | BENE LEFI 14-15
“Kulambila Kwancine Kulayandika Kuba Usalalite”
(Bene Lefi 15:13-15) “‘Na musankwa uyo waba kabotu, ulyeelete kulindila peenda nshiku shosanwe ashobilo, lyalo akacape shakufwala nsheshi akanoofwete akusamba mumaanshi abotu a mukantupu. Mpeeke ulaakuba muntu usalalite. 14 Ingayi pabushiku bwasanu ashotatwe, ulyeelete kutola mpolobe shobilo nabi nkulimba shobilo kumulyango wa tente yakulambililaamo akushipa mupailishi. 15 Mpeeke mupailishi ulaakubengawo yomwi ayi ngumulambu wakulekelelwa shibiibi, alimwi imwi ayi ngumulambu wakutenta. Lyalo mupailishi alakumana milandu ya muntu uyo pameenso akwe Yehova ceebo ca bulwashi bwakwe bwakuswa mashina kubusankwa.
it-1-E 263
Kusamba
Kwakalinga sheebo shiinji shakalinga kupa bene Isilaeli kusamba. Muntu uliwoonse woola kuswa kubulwashi bwa manata, uliwoonse wacata cintu cakacatwa amuntu ucite bulwashi bwakuswa mashina, musankwa walitilila meense, mwanakashi pesule lyakukubala na kuswa bulowa kwanshiku shiinji, na abo baswa mukoonana bakalinga kuba ‘batasalalite’ alimwi bakalinga kweelete kusamba. (Lefi 14:8, 9; 15:4-27) Muntu na wacata mutuntu nabi kunjila mutente mwakalinga mutuntu, wakalinga kuba “utasalalite” alimwi wakalinga kweelete kusalashikwa amaanshi akusalasha. Uyo woonse wakalinga kukaka kucita boobo wakalinga ‘kubisha tente yakulambililaamo yakwe Yehova alimwi taakalinga kunoociyeeyelwa kuba mulikoto lya bantu bakwe.’ (Shaku. 19:20) Aboobo cileelela kwaamba ayi kusamba kulemikaninaako kuba basalalite pameenso akwe Yehova. (Kulu. 26:6; 73:13; Isa. 1:16; Ese. 16:9) Nceceeco Baibo nceisebenseshela liswi lyakwaamba ayi kusamba kusansulula kuba usalalite pameenso akwe Yehova.—Efe. 5:26.
(Bene Lefi 15:28-30) “‘Na bulowa bwacileka kuswa, ulyeelete kulindila peenda nshiku shosanwe ashobilo, kuswawaawo ulaakuba usalalite. 29 Pabushiku bwasanu ashotatwe ulaakutola mpolobe shobilo nabi nkulimba shobilo kumupailishi pamulyango wa tente yakulambililaamo. 30 Mpomunyaawo mupailishi ulaakubengawo yomwi ayi ngumulambu wakulekelelwa shibiibi alimwi imwi ayi ngumulambu wakutenta, lyalo mupailishi alakumana milandu ya mwanakashi uyo pameenso akwe Yehova ceebo cakuswa bulowa.
it-2-E 372 pala. 2
Kukubala
Mwanakashi alakwe wakalinga kubonwa ayi tasalalite ciindi ndyaakalinga kuswa bulowa kwanshiku shiinji, alimwi shintu nshaakalinga koonawo na kukalaawo ashalo tashakalinga kusalalite alimwi abantu bakalinga kucata shintu isho, abalo bakalinga kuba batasalalite. Pesule lyakwaamba ayi wacileka kuswa bulowa, wakalinga kulindila kushikila peenda nshiku 7 lyalo ndyeenga waba usalalite. Pabushiku bwa namba 8 wakalinga kutola mpolobe shobilo nabi nkulimba shobilo ku mupailishi kwaamba ayi amusalashe kuswa kushibiibi. Mpolobe na nkulimba yomwi yakalinga kubengwa kuli Yehova mbuli mulambu wakulekelelwa shibiibi alimwi mpolobe na nkulimba imwi yakalinga kubengwa mbuli mulambu wakutenta.—Lefi 15:19-30; amubone mutwi waamba ayi CLEAN, CLEANNESS mu Insight.
(Bene Lefi 15:31) “‘Ulyeelete kutalamusha bene Isilaeli kuswa kushintu shilengesha kutanoosalalite kwaamba ayi batakabishi tente yangu yakulambililaamo iyo ili pakati kabo. Na bakeebishe, balaakumana kufwa.
it-1-E 1133
Musena Usalalite
2. Tente yakulambililaamo iyo mukuya kwaciindi yakesa mukwiitwa ayi tempele. Bubaambo boonse kwiilikaawo alubaansa lwapa tente yakulambililaamo alimwi ankuta shapa tempele wakalinga musena usalalite. (Kulo. 38:24; 2 Maka. 29:5; Mili. 21:28) Shintu shakutaanguna shakalinga kucanika mulubaansa lwa tempele, ncakubengelawo milambu alimwi acakusambilaamo cifongomene ca mukuba. Ishi shakalinga shintu shisalalite. Bantu basalalite beenkabo mbobakalinga kusuminishikwa kunjila mulubaansa lwa tente yakulambililaamo; alimwi bweenka ubo mbocakalinga akunjila munkuta shapa tempele. Kucakubonenaako, mwanakashi utasalalite taakalinga kusuminishikwa kucata cintu cilicoonse cisalalite nabibo kunjila mumusena usalalite. (Lefi 12:2-4) Aimwi Bene Isilaeli batakalinga kusalalite kwaciindi cilaamfu bakalinga kubonwa ayi batobisha tente yakulambililaamo. (Lefi 15:31) Abo bakalinga kuleta shipo pesule lyakusalashikwa kuswa kubulwashi bwa manata, bakalinga kweelabo pamwinjililo wa lubaansa lwa tente yakulambililaamo. (Lefi 14:11) Taaku muntu utasalalite wakalinga kweelete kulyaako mulambu wa bwanabwankashi pa tente yakulambililaamo na pa tempele, na walya wakalinga kucaikwa.—Lefi 7:20, 21.
Kulangoola Buboni Bwakumushimu
(Bene Lefi 14:14) “Mpeeke mupailishi ulaakubwesa bulowa bumwi bwa mulambu wakumana milandu akunanika muntu uyo utoosalashikwa kukapansha ka panshi ka kutwi kwa kululyo, kucikumo cinene ca kulyaansa lyalulyo, alimwi akucikumo cinene ca kumweendo walulyo.
(Bene Lefi 14:17) Kuswawaawo ulaakubwesa mafuta amwi ali mulupaka lwakwe alimwi abulowa bumwi bwa mbelele akunanika muntu uyo utoosalashikwa kukapansha ka panshi ka kutwi kwa kululyo, kucikumo cinene ca kulyaansa lyalulyo, alimwi akucikumo cinene ca kumweendo walulyo.
(Bene Lefi 14:25) Lyalo ulaakucaya mbelele ya mulambu wakumana milandu, akubwesa bulowa bumwi akunanika muntu uyo utoosalashikwa kukapansha ka panshi ka kutwi kwa kululyo, kucikumo cinene ca kulyaansa lyalulyo, alimwi akucikumo cinene ca kumweendo walulyo.
(Bene Lefi 14:28) Alimwi mupailishi ulaakubwesa mafuta amwi ali mulupaka lwakwe, akunanika kukapansha ka panshi ka kutwi kwa kululyo wa muntu uyo, pacikumo cinene ca kulyaansa lyalulyo alimwi apacikumo cinene ca kumweendo walulyo pamisena yeenka njaakabikawo bulowa bwa mulambu wakumana milandu
it-1-E 665 pala. 5
Litwi
Pakubika bantu pabupailishi mu Isilaeli, Mose wakalwiitikwa kubwesa bulowa bwa mbelele isankwa iyo yakalinga kubengwa pakubika bapailishi, akubunanika kukapansha ka panshi ka kutwi kwa kululyo kwakwe Aloni a bana bakwe, kwiilikaawo akucikumo cinene ca kulyaansa lyalulyo alimwi akucikumo cinene ca kumweendo walulyo. Kutondesha kwaamba ayi mbuli bapailishi, balaakunoonyumfwila Yehova ndyebatomusebensela, alimwi andyebatokweenda munshila shakwe. (Lefi 8:22-24) Ubo mbocakalinga akumuntu wakasalashikwa kuswa kubulwashi bwa manata. Kweelana a Mulawo mupailishi wakalinga kweelete kubwesa bulowa bwa mbelele isankwa yakabengwa mbuli mulambu wakumana mulandu alimwi akubwesa mafuta, akunanika muntu utoosalashikwa kukapansha ka panshi ka kutwi kwa kululyo. (Lefi 14:14, 17, 25, 28) Alimwi kwakalinga bubaambo bweelene aboobu na musankwa uli mubusha wasuna kutolelela kusebensela mwaami wakwe. Na caba boobo, musha bakalinga kumuleta kucisamu ca kumulyaango, lyalo mwaami wakwe wakalinga kumutulula kutwi. Citondesho cakutululwa kumatwi ici, cakalinga kutondesha ayi musha alisuni kutolelela kunyumfwila mwaami wakwe.—Kulo. 21:5, 6.
(Bene Lefi 14:43-45) “Ono na kubunda kwatalika alimwi muŋanda iyo pesule lyakukusha mabwe akupala lubumbu alimwi akushingula, 44 mupailishi ulyeelete kunjilaamo akwiilanga langa. Na kubunda kweendaawo, ingayi nkubunda kuyambukila alimwi ŋanda iyo teesalalite. 45 Ilyeelete kumwayululwa, alimwi mabwe a njiyo ashisamu alimwi abulongo boonse mbobakashingwisha shilyeelete kutolwa pansengwe lya ndabala kumusena umwi utasalalite.
g-CN 1/06 14, kabokosi
Kubunda Kulacafwa Alimwi Kulanyonyoola!
SA KUBUNDA KWAKALINGAAKO MUCIINDI CAMU BAIBO?
Baibo ilaamba sha ‘bulwashi bwa manata bwa muŋanda.’ (Bene Lefi 14:34-48) Bamwi balaamba ayi bulwashi ubu cimwi ciindi bwiitwa ayi ‘kubunda kuyambukila’ bwakalinga mushobo wakubunda kwiitwa ayi mildew na mold, nacibi boobo makani aya taashibikitwe kabotu. Mulimoonse mweenga cabeta, Mulawo wakwe Lesa wakaamba ayi mwineŋanda iyo wakalinga kweelete kukusha mabwe oonse abundite, abulongo boonse mbobakashingusha lyalo akushitola pansengwe lya ndabala “kumusena umwi utasalalite.” Ano na bulwashi ubo bwatalika alimwi, ŋanda yoonse yakalinga kuba itasalalite, alimwi yakalinga kumwayululwa lyalo akusowa nshobamwayulula. Milawo Yehova njaakapa bantu bakwe yakatondesha ayi alibasuni alimwi wakalinga kubikila maano kubuumi bubotu.
Kubelenga Baibo: (Bene Lefi 14:1-18)
DECEMBER 28–JANUARY 3
BUBONI BUCANIKA MUMASWI AKWE LESA | BENE LEFI 16-17
“Bushiku Bwakusalashikwa Kuswa Kushibiibi Mbobumukuma”
(Bene Lefi 16:12) “Ulaakubwesa cikaye ciswite makalangasha amulilo aswa kucipaililo kunembo lyakwe Yehova alimwi amapaka obilo kaaswite tununkila kabotu, akushileta mu Musena Usalalite Wiindaawo.
Nsheenga Tweeya Kuswa Mulibuku lya Bene Lefi
4 Amubelenge Lefi 16:12, 13. Amuyeeyebo mbocakalinga kuba Pabushiku Bwakusalashikwa Kuswa Kushibiibi: Mupailishi munene wakalinga kunjila muŋanda isalalite. Ili lyakalinga linkanda lyakutaanguna pamankanda otatwe ngaakalinga kunjila mumusena Usalalite Wiindaawo pabushiku ubu. Kulyaansa lyomwi wakalinga kubwesa cakunyamwitaawo tununkila, lyalo uku kumwi kaacite cakubikaawo mulilo ca golodi umo mwakalinga kuswite makalangasha amulilo. Na washika pakalinga cisani ca pamulyaango wakunjila kumusena Usalalite Wiindaawo wakalinga kwiimikana. Cabulemu wakalinga kunjila mumusena Usalalite Wiindaawo akwiimikana pakalinga libokosi lya cipangano. Munshila yacikoshanyo cakalingabo anga weemikana panembo lyakwe Yehova! Lyalo cakubikila maano mupailishi wakalinga kutila tununkila pamakalangasha amulilo, aboobo musena woonse wakalinga kununkila kabotu abuumbi. Pesule wakalinga kunjila alimwi mumusena Usalalite Wiindaawo abulowa bwa mulambu wakulekelela shibiibi. Wakalinga kutaanguna kutenta tununkila kaatana kubenga mulambu wa bulowa bwakulekelela shibiibi.
(Bene Lefi 16:13) Ulyeelete kubika tununkila pamulilo kunembo lyakwe Yehova, mpeeke bwiishi bwa tununkila kabotu bulaakushisa cifwekesho ca Libokoshi lya Cipangano kwaamba ayi atacibooni akufwa.
Nsheenga Tweeya Kuswa Mulibuku lya Bene Lefi
5 Ino kusebensesha tununkila Pabushiku Bwakusalashikwa Kuswa Kushibiibi kutootwiisha nshi? Baibo ilaamba ayi mipailo ya basebenshi bakwe Yehova bashomeka iyo njaatambula, ili anga ntununkila kabotu. (Kulu. 141:2; Ciyu. 5:8) Mutaluubi kwaamba ayi mupailishi munene wakalinga kuliceesha abuumbi ndyaakalinga kuleta tununkila kabotu kuli Yehova. Aswebo tulyeelete kuliceesha ndyetutoopaila kuli Yehova. Tulyeelete kutondesha bulemu abuumbi kuli nguwe. Tulalumba abuumbi kwaamba ayi Mulengi wabubumbo boonse wakatupa coolwe cakubandika anguwe akuba abushicibusa anguwe bweenka mbuli mwaana abaishi. (Jemu. 4:8) Yehova watusuminisha kuba beshicibusa bakwe! (Kulu. 25:14) Tulicisuni abuumbi coolwe ici cakwaamba ayi tatusuniiwo kucita cili coonse ceenga camukalasha.
(Bene Lefi 16:14, 15) “Mpeeke ulaakubwesa bulowa bumwi bwa mucende, akasumpemo munwe akusanseela peculu lya cifwekesho alimwi akusanseela bumwi kunembo lya Libokoshi lya Cipangano mankanda osanwe aobilo. 15 “Kuswawaawo ulaakucaya mpongo ya mulambu wakulekelelwa shibiibi sha bantu, kutola bulowa bwa njiyo muMusena Usalalite Wiindaawo akubusanseela pacifwekesho ca nkumbu alimwi akunembo lya Libokoshi lya Cipangano, bweenka mbwaacita pabulowa bwa mucende.
Nsheenga Tweeya Kuswa Mulibuku lya Bene Lefi
6 Mutaluubi kwaamba ayi mupailishi munene wakalinga kutaanguna kutenta tununkila kaatana kubenga mulambu. Kucita boobo kwakalinga kupa kwaamba ayi Yehova asangalale akutambula mulambu. Ino nciinshi nceenga tweeyawo? Yesu ndyaakalinga pacishi ca panshi, kwakalinga cintu cinene abuumbi cakalinga kwiindite pakupulusha bantu batasalalite ncaakalinga kweelete kucita kaatana kubenga buumi bwakwe mbuli mulambu. Ino nciinshi? Wakalinga kweelete kutolelela kunyumfwila Yehova kwaamba ayi akatambule mulambu wakwe. Ici cakatondesha kwaamba ayi tulyeelete kunoocita shintu kweelana akuyanda kwakwe Yehova. Yesu wakalinga kweelete kutondesha ayi Baishi beenkabo mbobeelela kweendelesha kwiculu alimwi apacishi ca panshi, alimwi abuleelo bwakwe Yehova bweenkabo mbobululeme.
Kulangoola Buboni Bwakumushimu
(Bene Lefi 16:10) Ayalo mpongo yasalwa kuba ya Asaselo ilyeelete kwiimikwa kunembo lyakwe Yehova keeli yuumi, kwaamba ayi imane milandu akwiitola muluyanga kuli Asaselo.
it-1-E 226 pala. 3
Asaselo
Bweenka mbuli mutumwi Paulo mbwakasansulula, Yesu ndyakaaba buumi bwakwe bumaninite mbuli mulambu ceebo ca shibiibi sha bantu, wakakumanisha mukuli wiinda pawooyo wakalinga kukumanishikwa ‘abulowa bwa bacende alimwi abwa mpongo.’ (Ebulu 10:4, 11, 12) Aboobo wakaba anga ‘nimpongo ya Asaselo,’ mukwiinga ‘wakayumuna mapensho esu’ alimwi “wakayaswa ceebo cakusotoka milawo kwesu.” (Isa. 53:4, 5; Mate. 8:17; 1 Pita 2:24) ‘Wakayumuna’ shibiibi sha baabo boonse bashoma mumulambu wakwe. Nshaakacita shakatondesha bubaambo bwakwe Lesa bwakukushaawo shibiibi shoonse cakumaninina. Aboobo ubu mpongo ‘ya Asaselo’ mboyakalinga kwiimikaninaako mulambu wakwe Yesu Klistu.
(Bene Lefi 17:10, 11) “‘Na mwine Isilaeli nabi muswamashi umwi woonse ushiite mulikoto lyabo walya nyama icite bulowa, nebo ne Yehova ndaakumufutatila alimwi teshi akanoociyeeyelwa kuba mulikoto lya bantu bangu. 11 Buumi bwa cintu cili coonse cuumi buli mubulowa. Anu nceceeco nebo neMwaami Lesa nceŋambila ayi bulowa boonse bunootilwa pacipaililo, kwaamba ayi shibiibi sha bantu shikushikwe. Nkokwaamba ayi bulowa ubo buli mbobuumi, bulakusha shibiibi.
w14-CIN 11/15 10 pala. 10
Ino Nceebonshi Tulyeelete Kuba Basalalite?
10 Amubelenge Lefi 17:10. Yehova wakaambila bene Isilaeli ayi tabakalinga kweelete kulya ‘bulowa buliboonse.’ Beneklistu abalo balyeelete kukonkela mulawo wakutalya bulowa bwa banyama na bwabantu. (Milimo 15:28, 29) Tulaloonda kucita shintu sheenga shakalasha Lesa akupa kwaamba ayi atukushe mulibungano lyakwe. Tulimusuni alimwi tulisuni kumunyumfwila. Nabi twaciswa abuumbi, tulishinishite kutolelela kunyumfwila Yehova muciindi cakukonkela shaamba baabo batamushiwo alimwi batabikili maano kukumunyumfwila. Ncakwiila bantu bamwi balaamba shibiibi palindiswe na twakaka kubikwa bulowa, nacibi boobo tulisuni kunyumfwila Lesa. (Judi 17, 18) Ino nciinshi ceenga catucafwa kuba bashinishite camoyo woonse kukaka kulya na kubikwa bulowa?—Duto. 12:23.
Kubelenga Baibo: (Bene Lefi 16:1-17)