Makani Akusebensesha amu Kabuku Kamabungano Abuumi Anciito
JANUARY 4-10
BUBONI BUCANIKA MUMASWI AKWE LESA | BENE LEFI 18-19
“Amutolelele Kuba Basalalite”
Mbweenga Twaleya Koose Kakwe Satana
Yehova ndyaakalinga kulwiita bene Isilaeli pashintu shibiibi shakalinga kucita mishobo imwi wakaamba ayi: “Tamweelete kucita shintu shicita bantu ba mucishi ca Kenani, umo moontoomutola. . . . Cishi ici tacisalalite, alimwi ndaakubapa mulandu bantu bekalaamo ceebo ca shibiibi shabo.” Mukwiinga Lesa wa bene Isilaeli wakalinga kusalalite, wakalinga kubona shintu shakalinga kucita bene Kenani kuba shintu shibiibi abuumbi cakwaamba ayi cishi cabo wakalinga kucibona kuba citasalalite.—Lefi 18:3, 25
w17-CW.02 20 pala. 13
Yehova Ulatanjilila Bantu Bakwe
13 Bamaami bashomeka ba bene Isilaeli bakalinga kupusene abuumbi abamaami bamishobo imwi, abo bakalinga kweendeleshekwa abusongo bwabantu alimwi shintu nshebakalinga kusala shakalingabo shakaciindi kaniini! Kucakubonenaako, mubweendeleshi bwa bene Kenani, bantu bakalinga kucita shintu shibiibi abuumbi mbuli koonana kwa beshikamukowa, koonana kwa basankwa na banakashi beenka beenka, koonana ashinyama, kubenga bana babo mbuli milambu akulambila shibumbwabumbwa. (Lefi 18:6, 21-25) Abalo bamatanjilili babene Babiloni ababene Ijipiti tabakalinga kuciteewo milawo yakalinga kwaamba pa buuya, iyo Lesa njaakapa bene Isilaeli. (Shaku. 19:13) Sombi beendeleshi bashomeka ba bene Isilaeli bakalinga kuyuminisha bantu kukonkela milawo yaamba pa buuya, miibo ibotu alimwi akulambila Yehova eenkabo. Ncakutatoonsha kwaamba ayi Yehova ngowakalinga kubatanjilila.
w14-CW 7/1 7 pala. 2
Lesa Mbweshi Akakusheewo Shibiibi
Ino nshiinshi sheshi shikacitikile bantu batasuni kwaaluka alimwi batolelela kucita shibiibi? Amuyeeye pacishomesho camu Baibo caamba ayi: ‘Ceebo baluleme mbweshi bakekale mucishi. Ee, batacite kampenda mbweshi bakanookalaamo. Sombi balo bamucita shibi balaakunyonyoolwa, abo batashomeki balaakukushikwa mucishi ico.’ (Tushimpi 2:21, 22) Aboobo, teshi kukabeewo bantu babiibi beshi bakanooyunga bamwi kucita shintu shibiibi. Mukuya kwa ciindi bantu banyumfwila balaakuba basalalite mukwiinga bubi mbobakapyana kuswa kuli Adamu bulaakumana.—Bene Loma 6:17, 18; 8:21.
Buboni Bwakumushimu
w06-CW 6/15 22 pala. 11
“Milawo Yanu Ndiisuni Abuumbi!”
11 Mulawo wakubweselela wakalinga mulawo womwi pa Milawo yakwe Mose yakalinga kutondesha ayi Lesa ulabikila maano bantu bakwe. Yehova wakalwiita bene Isilaeli ayi na bamanisha kutebula bakalinga kweelete kusuminisha bakandu kubweselela nshobakalinga kushiya mumuunda beshikutebula. Balimi tabakalinga kweelete kutebula mweela lya myuunda nabi kubweselela shacaala mumyuunda ya minyansa na maolifi. Na kuli mile njobalubaako, tabakalinga kweelete kuboolela kuya mukuibwesa. Milawo ibotu iyi yakalinga kucafwa bakandu, baswamashi, baana banshiwa alimwi abamukalubinje. Ncakwiila kwaamba ayi bantu aba bakalinga kweelete kusebensa cankusu kwaamba ayi bacikonshe kubweselela, nacibi boobo milawo iyi yakalinga kubacafwa kuleya kusengelela.—Bene Lefi 19:9, 10; Dutolonomi 24:19-22; Kulumbaisha 37:25.
JANUARY 11-17
BUBONI BUCANIKA MUMASWI AKWE LESA | BENE LEFI 20-21
“Yehova Wapatula Bantu Bakwe”
w04-CW 10/15 11 pala. 12
Ino Nceebonshi Mulashoma ayi Paladaiso Ilaakubaako?
12 Nacibi boobo, kuli cintu cimwi ncotweelete kubikila maano. Lesa wakalwiita Bene Isilaeli ayi: “Mukonkele milawo yoonse njendamupa sunu. Lyalo mulaakukonsha kusubuka Mulonga wa Joodani akubwesa cishi ico ayi cikabe caanu.” (Dutolonomi 11:8) Bene Lefi 20:22, 24, ayalo ilaamba pacishi ici ayi: ‘Kamulama milawo yangu yoonse amilasho kwaamba ayi cishi ico ncentoomutolaako citakamukaaki. Sombi mwebo ndamulasha kumupa cishi ico muli meleki a buuci. Ncakwiila nebo ndaakumupa cishi ici.’ Ncakwiila bakalinga kweelete kutolelela kuba abushicibusa bubotu a Yehova Lesa kwaamba ayi bapyane Cishi Cakashomeshekwa. Lesa wakasuminisha bene Babiloni kukoma bene Isilaeli akubakusha mucishi cinemishaabo ceebo cakwaamba ayi tabakwe kumunyumfwila.
it-1-E 1199
Kupyana Buboni
Nshintu shipekwa kumuntu na nshaatambula pesule lyakwaamba ayi mushali nabi shikamukowa wafwa. Liswi lya ciEbulu lyakwaamba ayi na·chalʹ (na·chalahʹ) ndyolisebenseshekwa abuumbi kwaamba pa kupyana. Liswi ili lilasansulula kubwesa na kupa buboni muntu umwi kwiinda mukupyana. (Shaku. 26:55; Ese. 46:18) Cimwi ciindi liswi lyeshi kusebenseshekwa ndyakwaamba ayi ya·rashʹ ilyo lisansulula “kubwesa shintu kwiinda mukupyana,” sombi liinji lilasansulula “kubwesa buboni” kuteshibo kupyana. (Mata. 15:3; Lefi 20:24) Alimwi inga lyasansulula ‘kubwesa na kutandaanya,’ kwiinda mukulwana nkondo. (Duto. 2:12; 31:3) Maswi amu ciGiliki aamba pakupyana buboni alikoshenye aliswi lyakwaamba ayi kleʹros ilyo lisansulula ayi “cisolo” sombi mukuya kwaciindi lyakatalika kusansulula “kwaabana” lyalo mukweelaako lyakalinga kusansulula ‘kupyana.’—Mate. 27:35; Mili. 1:17; 26:18.
it-1-E 317 pala. 2
Bayuni
Pesule lya Muyoba Unene, Nowa wakabenga “bayuni basalalite” alimwi abanyama mbuli mulambu. (Mata. 8:18-20) Kuswawaawo, Lesa wakasuminisha bantu kulya bayuni, sombi kuteshi kulya bulowa. (Mata. 9:1-4; amweelanishe a Lefi 7:26; 17:13.) ‘Kusalala’ kwa bayuni bamwi paciindi cilya, cakalinga citondesho cakwaamba ayi inga babengwa mbuli mulambu. Mulawo wakwe Mose kootana kubaako, makani amu Baibo alatondesha ayi taakuwo bayuni bakalinga kubonwa ayi “tabasalalite.” (Lefi 11:13-19, 46, 47; 20:25; Duto. 14:11-20) Baibo tayaambiwo cakapa kwaamba ayi bayuni bamwi banoobonwa kuba “batasalalite.” Aboobo, teshi boonse bayuni bauluka bakalinga kubonwa kuba batasalalite. (Amubone mutwi waamba ayi HOOPOE mu Insight.) Mulawo uyu wakacileka kusebensa pesule lyakwaamba ayi cipangano cipya cakatalika kusebensa, alimwi kwiinda mucili anga nciloto ncakatondesha Pita, Lesa wakatondesha patuba ayi mulawo uyu wakacileka kusebensa.—Mili. 10:9-15.
Buboni Bwakumushimu
it-1-E 563
Kulinengoola Pamubili
Mulawo wakwe Lesa wakalinga kukasha kulinengoola pamubili ceebo ca muntu wafwa. (Lefi 19:28; 21:5; Duto. 14:1) Bene Isilaeli tabakalinga kweelete kucita boobo mukwiinga bakalinga bantu basalalite kuli Yehova, na mushobo ulibetele. (Duto. 14:2) Aboobo tabakalinga kweelete kulambila shibumbwabumbwa. Alimwi tabakalinga kweelete kulila cakwiindilila na muntu wafwa kwiinda mukulinengoola pamubili, mukwiinga balo bakalinga kucishi kabotu cicitika na muntu wafwa alimwi bakalinga kushoma mububuke. (Danye. 12:13; Ebu. 11:19) Kwiilikaawo, Mulawo wakwe Lesa wakukasha kulinengoola, wakacafwa bene Isilaeli kubona kuyandika kwakulama kabotu mibili yabo mukwiinga ncipo kuswa kuli Lesa.
JANUARY 18-24
BUBONI BUCANIKA MUMASWI AKWE LESA | BENE LEFI 22-23
“Kusekelela Kwakalinga Kucitika Kalekale Mbokutukuma”
it-1-E 826-827
Kusekelela Kwakulya Cimaande
Bushiku bwakutaanguna bwa Kusekelela Kwakulya Cimaande bwakalinga bushiku bwa kulambila akookesha. Pabushiku bwabili, na Nisani 16, bakalinga kuleta mule wa shishango shitaanshi sha bale ku mupailishi isho shakalinga kutaanguna kupya ku Palestine. Kusekelela uku kakutana kucitika taakuwo wakalinga kweelete kulya shishango shibishi, shakukanga nabi kupanga shinkwa kuswa kusheesho nshobaswa mukutebula. Munshila yacikoshanyo, mupailishi wakalinga kubenga mulambu wa shishango kwiinda mukutambeeka mule uyo kunembo lyakwe Yehova, alimwi paciindi ceenka ico bakalinga kubenga mwanaambele musankwa ucite mwaaka womwi utacite kampenda, akubenga shishango shisenkene amafuta amaolifi alimwi acipo ca cakunwa. (Lefi 23:6-14) Takwakalingaawo mulawo wakalinga kusuminisha kutenta shishango nabi fulaulo pacipaililo, bweenka bapailishi mbobakatalika kucita mukuya kwaciindi. Pakusekelela uku tabakalinga kubengabo milambu ya shishango iyo njobakalinga kweelete kubengela pomwi mbuli mushobo, sombi kwakalinga abubaambo bwakwaamba ayi mukwashi womwi awomwi na muntu uliwoonse ucite cipo inga waleta ayi cibengwe mbuli mulambu wakulumba.—Kulo. 23:19; Duto. 26:1, 2; amubone mutwi waamba ayi FIRSTFRUITS mu Insight.
Kuyandika. Lilembo lya Kulonga 12:14-20 lilatondesha shakucita Yehova nshaakapa Mose, isho bene Isilaeli nshobakalinga kweelete kukonkela ndyebakalinga kulya cimaande, ico cakeelikaawo kukonkela mulawo ucanika muvesi 19 waamba ayi: “Panshiku shili shosanwe ashobilo, tamweelete kucanika cimena mumaandaanu.” Palilembo lya Dutolonomi 16:3 cimaande cileetwa ayi “cimaande camapensho,” alimwi ici cakalinga kwiibalusha bene Isilaeli mbobakaswa mu Ijipiti calubilo (cakwaamba ayi tabakalinga kuciteewo aciindi cakupanga fulaulo ucite cimena [Kulo. 12:34]). Aboobo kusekelela uku kwakalinga kubeebalusha mapensho ngobakalinga kwiindaamo ndyebakalinga mubusha mu Ijipiti, nceceeco Yehova ncakaambila ayi, “Mukanoocilya kwaamba ayi mukanokwiibaluka bushiku ndimwakaswa mucishi ca mapensho ca Ijipiti kwa buumi bwanu boonse.” Pakusekelela kunene kotatwe nkobakalinga kubaako mwaaka amwaaka, bene Isilaeli bakalinga kuba akusekelela kutaanshi kutondesha kulumba pa lwaanguluko ndobakalinga kucite alimwi kwakalinga kubeebalusha ayi Yehova ngowakabapulusha.—Duto. 16:16.
it-2-E 598 pala. 2
Pentekositi
Pabushiku ubu, bakalinga kubenga witi yakutaanguna kutebulwa kuli Yehova. Nacibi boobo shishango ishi shakalinga kubengwa bupusene ambobakalinga kubenga shishango shitaanshi sha bale. Bakalinga kupanga shinkwa wobilo kwiinda mukusebensesha makilogilamu obilo a fulaulo (malita 4.4) usenkene acimena. Shinkwa wakalinga kweelete ‘kuswa mumaanda abo,’ ico cakalinga kusansulula ayi wakalinga kweelete kuba shinkwa mbuli ngobakalinga kulya kuteshi wooyo ngobakalinga kusebensesha pakulambila. (Lefi 23:17) Pakusekelela uku bakalinga kubenga amilambu yakutenta, mulambu wakulekelelwa shibiibi alimwi akubenga mbelele shisankwa shobilo mbuli mulambu wa bwanabwankashi. Mupailishi wakalinga kubenga shinkwa ambelele shobilo kwiinda mukubika maansa akwe panshi lya shinkwa ashipansha sha mbelele, akushitambeeka kunembo lyakwe Yehova, kutondesha ayi atoshibenga kuli Yehova. Pesule lya kushibenga, mupailishi wakalinga kushilya mbuli mulambu wa bwanabwankashi.—Lefi 23:18-20.
w14-CW 5/15 29 pala. 11
Sa Mutokweendela Pomwi a Libunga Lyakwe Yehova?
11 Libunga lyakwe Yehova lilatubikila maano kwiinda mukutuyuminisha kukonkela maswi akaamba mutumwi Paulo ayi: “Katubikilana maano kwaamba ayi tuyuminishanye kutondesha lusuno akucita ncito shibotu, tutacileeki kubungana pomwi, bweenka mbuli bamwi mbobacita, sombi katuyuminishanya, alimwi akutolelela kucita boobo bunene bunene mbotutoobona bushiku ndyebutoosa cisena.” (Ebu. 10:24, 25) Kusekelela kwa mwaaka amwaaka akubungana kumwi bene Isilaeli nkobakalinga kubaako, kwakalinga kuyumya lushomo lwabo. Kwiilikaawo, kusekelela kulibetele mbuli Kusekelela kwa Shimpaka uko kwakacitika muciindi cakwe Neyemiya cakalinga ciindi cakusangalala. (Kulo. 23:15, 16; Neye. 8:9-18) Amunshiku shino mabungano, kubungana kwalubasu alimwi akubungana kunene kulatusangalasha akuyumya lushomo lwesu. Aboobo, lyoonse tunookweelesha kucanika kumabungano.—Taitasi 2:2.
Buboni Bwakumushimu
w19-CW.02 3 pala. 3
Amutolelele Kushomeka!
3 Ino basebenshi bakwe Yehova balatondesha buyani ayi balashomeka? Balacita boobo kwiinda mukusuna Yehova amoyo wabo woonse, alimwi akubika kuyanda kwakwe panembo mushintu shoonse. mu Baibo liswi lyakasansululwa ayi “kushomeka” lilasansulula cintu cakabumbulu na citacite kampenda. Kucakubonenaako, bene Isilaeli ndyebakalinga kubenga milambu ya banyama kuli Yehova, mulawo wakaamba bakalinga kweelete kubenga banyama batacite kampenda. (Lefi 22:21, 22) Bantu bakwe Lesa tabakalinga kusuminishikwa kubenga munyama mulema myeendo, utacitewo kutwi, utalashi nabi mulwashi. Yehova wakalinga kusuni ayi kababenga banyama bakabumbulu alimwi batacite kampenda. (Mala. 1:6-9) Inga twanyumfwisha cakapa kwaamba ayi Yehova alwiite bene Isilaeli kunoobenga milambu itacite kampenda. Kucakubonenaako, na tutokuula cintu, inga caba ayi ncisepo, libuku na cisebensesho, inga tatuuli citulukite na citabete kabotu mumbasu shimwi. Tulashinisha ayi ncakabumbulu, ncibotu alimwi tacicite kampenda. Yehova alakwe alisuni ayi tumusuune amoyo wesu woonse na kushomeka kuli nguwe.
JANUARY 25-31
BUBONI BUCANIKA MUMASWI AKWE LESA | BENE LEFI 24-25
“Mwaaka wa Lwaanguluko Ulayandika Kulindiswe”
it-1-E 871
Lwaanguluko
Lesa wa Lwaanguluko. Yehova ngu Lesa wa lwaanguluko. Wakalubula bene Isilaeli kuswa mubusha mu Ijipiti. Yehova wakabalwiita ayi na batolelela kumunyumfwila balaakuba a lwaanguluko lwancinencine. (Duto. 15:4, 5) Defedi wakaamba pakuuliiba na ‘kutalisukama’ kwakalinga mu Jelusalemu. (Kulu. 122:6, 7) Nacibi boobo, Mulawo wakaamba ayi na musankwa waba mukandu inga walyuulisha mubusha kwaamba ayi acanine mukwashi wakwe shiyandika. Ano mumwaaka wa namba 7, mwine Ebulu uyu wakalinga kwaangululwa kuswa mubusha. (Kulo. 21:2) Mumwaaka wa lwaanguluko (ubaako pesule lya myaaka 50), bantu boonse bakalinga mubusha bakalinga kwaangululwa. Musha uliwoonse mwine Ebulu wakalinga kwaangululwa, alimwi musankwa uliwoonse wakalinga mubusha wakalinga kuboolela kumishaabo.—Lefi 25:10-19.
it-1-E 1200 pala. 2
Kupyana Buboni
Musena tawakalinga kweelete kuulishikwa kwamuyayaya, mukwiinga wakalinga kupekwa kumukwashi abamulishalane lya mumukwashi uyo. Alimwi musena wakalinga kuulishikwa pamuulo weelene ashakulya sheenga shaswa mumuunda uyo kweelana amyaaka yacaala Mwaaka wa Lwaanguluko kootana kushika. Mwaaka wa Lwaanguluko na washika, shoonse shakoolishikwa shakalinga kubooshekwa kumwiine na taakwe kucikonsha kuula shintu isho mwaaka uyu kootana kushika. (Lefi 25:13, 15, 23, 24) Bubaambo ubu bwakalinga kwiilikaawo amaanda amumushi utacite malinga, ayo akalinga kubonwa ayi njimyuunda. Sombi maanda amundabala icite malinga, shikuulisha wakalinga kucite nkusu shakuyuula alimwi kootana kumana mwaaka womwi kuswa pabushiku ndyaakayuulisha ŋanda. Mukwiinga na waalilwa kucita boobo, ŋanda iyo yakalinga kubeta limwi ya wooyo wakoola. Bene Lefi bakalinga kucite nkusu shakuula maanda akoolishikwa paciindi cilicoonse mukwiinga tabakalinga kucitewo musena pakati ka bene Isilaeli.—Lefi 25:29-34.
it-2-E 122-123
Mwaaka wa Lwaanguluko
Mubupusano asheshi kucitika mumisena iinji munshiku shino, kukonkela mulawo wakalinga kwaamba pa Mwaaka wa Lwaanguluko kwakalinga kucafwa bene Isilaeli kutaba babile cakwiindilila na kuba bakandu abuumbi. Bantu boonse bakalinga kufubilaamo, mukwiinga boonse bakalinga kuba ashintu shiyandika. Alimwi taakuwo wakalinga kuba mukandu cakwiindilila ceebo cakubula shiyandika, sombi boonse na basebensela pomwi bakalinga kukala kabotu. Ceebo ca shoolwe Yehova nshaakalinga kubapa pa shakulya alwiiyo ndobakalinga kutambula kuswa kuli nguwe, bene Isilaeli na banyumfwila bakalinga kuswitilila mukwiinga Lesa ngowakalinga Mwaami wabo.—Isa. 33:22.
Buboni Bwakumushimu
w09-CW 9/1 22 pala. 4
Nsheenga Mwaciita na Mwakalashikwa
Na mwine Isilaeli wooma mubye akumutulula liinso, kweelana a mulawo bakalinga kweelete kumwaanisha munshila yeelete. Nacibi boobo, muntu ngobatulula liinso na beshikamukowa bakwe teshi mbokalinga kweelete kumwaanisha. Kweelana aMulawo muntu uyo wakalinga kweelete kutola mulandu kuboomboloshi, mukwiinga mbobakalinga kucite nkusu shakwaanisha muntu uyo. Kwaanisha muntu kweelana amulandu ngwaacita, kwakalinga kucafwa bantu kutanobooshesha cibiibi. Sombi kwakalinga asheebo shimwi shakalinga kupa kutabooshesha cibiibi.
FEBRUARY 1-7
BUBONI BUCANIKA MUMASWI AKWE LESA | BENE LEFI 26-27
“Mbweenga Twatambula Shoolwe Kuswa Kuli Yehova”
w08-CW 4/15 4 pala. 8
Amukake Shintu “Shitacite Ncito”
8 Ino “bubile” inga bwaba buyani lesa? Kucakubonenaako, amuyeeye pa mabwe akalinga kucanika mumyuunda ya bene Isilaeli. Mabwe ayo mpashi bakalinga kwaasebensesha kuyaka ŋanda na lilinga. Sombi na basebensesha mabwe aya kupanga “cibumbwabumbwa,” cakalinga kuba mfumpu kubantu bakwe Yehova. (Lefi 26:1) Aalo maali mbwaabete, alayandika alimwi inga twasebensesha kabotu. Maali alatucafwa kuula shiyandika lwakumubili alimwi inga twaasebensesha ndyetutosebensela Yehova. (Shiku. 7:12; Luka 16:9) Maali inga aba lesa kuli ndiswe na twabikila maano abuumbi kukwayandoola muciindi cakubikila maano kushintu shakumushimu. (Amubelenge 1 Timoti 6:9, 10.) Munshiku shino, bantu baanji balabikila maano abuumbi ku bubile, sombi swebo tulyeelete kunoobona maali munshila yeelete.—1 Timo. 6:17-19.
it-1-E 223 pala. 3
Kuloonda
Mose wakacita shintu shikankamika (muciEbulu, moh·raʼʹ) kunembo lya bantu bakwe Lesa ceebo cakwaamba ayi Yehova wakalinga kumusebensesha. (Duto. 34:10, 12; Kulo. 19:9) Bantu bakalinga kucite lushomo bakatondesha bulemu bweelete kuli Mose. Bakalinga kucishi ayi Lesa wakalinga kwaamba ambabo kwiinda muli Mose. Alimwi bene Isilaeli bakalinga kweelete kuloonda akulemeka tempele isalalite yakwe Yehova. (Lefi 19:30; 26:2) Ici cilasansulula ayi bakalinga kweelete kutondesha bulemu bweelete ku tempele isalalite, kulambila Yehova kweelana ambwaakabalwiita alimwi akunookonkela milawo yakwe yoonse.
w91-CW 3/1 17 pala. 10
Amusuminishe “Luumuno Lwakwe Lesa” Kushitilisha Moyo Wanu
10 Yehova wakalwiita bene Isilaeli ayi: “Na munookala kweelana amilawo yangu alimwi amilasho yangu, ndaakumupa mfula paciindi ceelete kwaamba ayi mumyuunda mukaswe shakulya alimwi ashisamu shikacate shisepo. Ndaakumupa luumuno mucishi canu alimwi mulaakunokoona cakutaloonda muntu nabi womwi. Banyama boonse bakali ndaakubatandaamo, anu teshi mukabewo nkondo alimwi. Anu ndaakunooli amwebo akuba Lesa wanu, amwebo mulaakuba bantu bangu.” (Bene Lefi 26:3, 4, 6, 12) Bene Isilaeli bakalinga kweelete kuba muluumuno ceebo Lesa wakalinga kubashitilisha kubalwani baabo, bakalinga kucite shintu shiinji shakumubili alimwi abushicibusa buyumu a Yehova. Sombi kwaamba ayi ishi shikonsheke bakalinga kweelete kukonkela Milawo yakwe Yehova.—Kulumbaisha 119:165.
Buboni Bwakumushimu
it-2-E 617
Malwashi
Malwashi Ceebo Cakwaalilwa Kukonkela Milawo Yakwe Lesa. Yehova wakacenjesha bene Isilaeli ayi na baalilwa kulama cipangano cabo anguwe, wakalinga kusa ‘mukubatumina malwashi.’ (Lefi 26:14-16, 23-25; Duto. 28:15, 21, 22) mu Malembo, kuba abuumi bubotu, lwakumubili na lwakumushimu kulasansulula kuba ashoolwe kuswa kuli Lesa (Duto. 7:12, 15; Kulu. 103:1-3; Tus. 3:1, 2, 7, 8; 4:21, 22; Ciyu. 21:1-4), lyalo malwashi alaabaako ceebo ca bubiibi akutamaninina. (Kulo. 15:26; Duto. 28:58-61; Isa. 53:4, 5; Mate. 9:2-6, 12; Joni 5:14) Ncakwiila kwaamba ayi Yehova wakaleta malwashi pabantu bamwi mbuli Milyamu, Usiya a Geyasi (Shaku. 12:10; 2 Maka. 26:16-21; 2 Baami 5:25-27), nacibi boobo, malwashi akesa ceebo cakutamaninina alimwi aceebo ca shibiibi bantu nshobacita. Bantu aba bakatebula nshebakashanga; bakaciswa ceebo cakubisha kwabo. (Gala. 6:7, 8) Kwaamba pabaabo bakalinga kucita shintu shilensha nsoni, mutumwi Paulo wakaamba ayi Lesa ‘wakabaleka kwaamba ayi bacite shintu shibiibi isho shisuni myoyo yabo, aboobo balacita shintu shilensha nsoni beene abeene kumibili yabo . . . paceebo ceeco Lesa wakabapa mulandu pabubi bwabo.’—Loma. 1:24-27.
FEBRUARY 8-14
BUBONI BUCANIKA MUMASWI AKWE LESA | SHAKUBELENGA 1-2
“Yehova Alabunganya Bantu Bakwe”
w94-CW 12/1 9 pala. 4
Kulambila Yehova Mbokuyandika Mubuumi Bwesu
4 Ino mutooyeeya ayi nakwiinga mwakabona nshi nimwakalinga mwiculu akulanga pakalinga musumba wa bene Isilaeli muluyanga? Nakwiinga mwakabona musena unene muli misumba ibambitwe kabotu yabantu mpashi beendilila 3 miliyoni, abo bakayaka misumba mumakoto makoto, nkokwaamba ayi kumatwa mishobo yotatwe, kumalenge mishobo yotatwe, kwicwe mishobo yotatwe alimwi akumbo mishobo yotatwe. Nimwakalangilisha cakubikila maano, nakwiinga mwakabona misumba yakalinga kuyakitwe pafwiifwi a tempele. mu misumba iyi iniini iniini momwakalinga kukala mikwashi yone ya bene Lefi. Pakati kamisumba, pakalinga tente ilibetele iyo yakalinga mumusena ushitilishitwe acisani. Iyi yakalinga “tente yakulambililaamo,” bantu “bacishi milimo” njobakayaka kweelana a Yehova mbwakaamba.—Shakubelenga 1:52, 53; 2:3, 10, 17, 18, 25; Kulonga 35:10.
it-1-E 397 pala. 4
Musumba
Musumba wa bene Isilaeli wakalinga unene abuumbi. Basankwa boonse bacikonsha kusebensa ncito ya bushilumamba bakashika 603, 550, kwiilikaawo abanakashi, baana, bacembele, balema, bene Lefi bashika 22,000, alimwi abantu “bamwi baanji bateshi bene Isilaeli” na baswamashi. Aboobo mpashi boonse pomwi bakalinga 3,000,000 na kwiindaawo. (Kulo. 12:38, 44; Shaku. 3:21-34, 39) Kukomena kwa musena ngobakalinga kuyandika kukalawo, takushibikitwe kabotu mukwiinga bantu balaamba shipusenepusene pamakani aya. Ndyebakayaka musumba muliwesa lya Moabu kwitala lya Mulonga wa Joodani na kamuli mu Jeliko, Baibo ilaamba ayi bakayaka misumba “kuswa ku Beti Jeshimoti kweela ku Abelo Shitimu.”—Shaku. 33:49.
Buboni Bwakumushimu
it-2-E 764
Kulembesha
Uku nkulemba liina alimwi alishalane kweelana amushobo alimwi amukwashi muntu nkwaaswa. Kubelenga uku kwakalinga kwiilikaawo shiinji kuteshibo kubelenga bantu na bacinenenene ba mikowa. Muciindi camu Baibo bantu bakalinga kulembwa kwaamba ayi bashibe misonko yeelete kulipilwa, kushiba beenga beelela kusebensa ncito ya bushilumamba, na kushiba bene Lefi beenga beelela kusebensa ncito shapa tente isalalite na pa tempele.
FEBRUARY 15-21
BUBONI BUCANIKA MUMASWI AKWE LESA | SHAKUBELENGA 3-4
“Incito Bene Lefi Njobakalinga Kusebensa”
it-2-E 683 pala. 3
Mupailishi
Mumulawo wa Cipangano. Bene Isilaeli ndyebakalinga basha mu Ijipiti, Yehova wakasala baana basankwa boonse bakwiiya babene Isilaeli kuba baakwe, ciindi ndyaakacaya baana bakwiiya babene Ijipiti mu mwaalu walikumi. (Kulo. 12:29; Shaku. 3:13) Baana bakwiiya bakalinga bakwe Yehova kwaamba ayi kabamusebensela ncito ilibetele. Lesa nakwiinga wakasala baana basankwa boonse babene Isilaeli kwaamba ayi babe bapailishi alimwi akunoolama tente isalalite. Sombi, wakasala basankwa bamumushobo wakwe Lefi kwaamba ayi banoosebensa ncito iyi. Nceceeco ncakasalalila baana basankwa bakwiiya ba bene Lefi muciindi cakusala baana basankwa ba mishobo ili 12 ya bene Isilaeli (bamulunyungu lwakwe Manase a Efuleemu abo bakalinga baana bakwe Josefu bakalinga kubonwa ayi njimishobo yobilo). Ciindi ndyebakalinga kubelenga baana basankwa kutalikila baabo bakalinga kucite mweenshi womwi na kwiindaawo, bakacana ayi baana batakalinga bene Lefi bakalinga 273 kwiinda ba bene Lefi, aboobo Lesa wakalinga kusuni ayi balubule mwaana womwi awomwi pa baana aba kwiinda mukulipila mashekeli 5 ($11). Aboobo maali aya akapekwa kuli Aloni abaana bakwe. (Shaku. 3:11-16, 40-51) Sombi ishi kashitaana kucitika, Yehova kaali wasala kale baana basankwa bamumukwashi wakwe Aloni, uyo wakalinga wamu mushobo wa bene Lefi, kwaamba ayi babe bapailishi.—Shaku. 1:1; 3:6-10.
it-2-E 241
Bene Lefi
Incito nshebakalinga kusebensa. Bene Lefi wakalinga mushobo wa baana basankwa botatwe bakwe Lefi, Geshoni, Koati a Melali. (Mata. 46:11; 1 Maka. 6:1, 16) Ndyebakalinga muluyanga, mukwashi womwi awomwi wakapekwa musena pafwiifwi a tente yakulambililaamo. Bamulunyungu lwakwe Koati bakayaka misumba yabo kwicwe. Bamwi bamulunyungu lwakwe Koati bakayaka misumba yabo kumalenge, bamulunyungu lwakwe Geshoni bakayaka misumba yabo kumbo, lyalo bamulunyungu lwakwe Melali bakayaka misumba yabo kumatwa. (Shaku. 3:23, 29, 35, 38) Bene Lefi mbobakalinga kuyaka, kumwayulula akunyamuna shintu shapa tente yakulambililaamo. Ndyebakalinga kulonga, Aloni abana bakwe basankwa mbobakalinga kukusha cisani cakushitilisha ico cakalinga kupansaanya musena Usalalite amusena Usalalite Wiindaawo. Alimwi mbobakalinga kufweka libokoshi lya cipangano, shipaililo alimwi ashintu shimwi shisalalite. Lyalo bamulunyungu lwakwe Koati mbokalinga kunyamuna shintu ishi. Bamulunyungu lwakwe Geshoni bakalinga kunyamuna cakufweka peculu ca mukati, cakufweka peculu ca pansengwe lya tente, cisani cakushitilisha pamulyango, shisani shakulushito lwa lubaansa lushingulukite tente acipaililo, cisani cakushitilisha mwinjililo wa lubaansa alimwi antaambo sha ndulo. Lyalo, bamulunyungu lwakwe Melali mbobakalinga kunyamuna shintu sha makonko one sha shisamu sha ku tente, mbaalo sha ndilyo, shisamu sha ndilyo, shapanshi sha ndilyo ashimwi shoonse shibikwaako.—Shaku. 1:50, 51; 3:25, 26, 30, 31, 36, 37; 4:4-33; 7:5-9.
it-2-E 241
Bene Lefi
Muciindi cakwe Mose, mwine Lefi wakalinga kutalika kusebensa ncito shoonse shapa tente yakulambililaamo na wakwanisha myaaka 30. Incito yakalinga kwiilikaawo kunyamuna shintu shapa tente ciindi ndyebakalinga kulonga. (Shaku. 4:46-49) Incito shimwi shakalinga kupekwa kuli mbabo na bakwanisha myaaka 25, sombi kuteshi ncito shiyumu mbuli yakunyamuna shintu shapa tente ciindi ndyebakalinga kulonga. (Shaku. 8:24) Muciindi ca Mwaami Defedi, mwine Lefi wakalinga kutalika kusebensela pa tente na wakwanisha myaaka 20. Defedi wakaamba ayi myaaka yakaceeshekwa ceebo cakwaamba ayi tente yakalinga kusa mukucileka kusebenseshekwa pesule lyakuyakwa kwa tempele. Mwine Lefi wakalinga kucileka kusebensa ncito iyi na wakwanisha myaaka 50. (Shaku. 8:25, 26; 1 Maka. 23:24-26; amubone mutwi waamba ayi AGE mu Insight.) Bene Lefi bakalinga kweelete kuushiba kabotu Mulawo mukwiinga liinji mbobakalinga kubelenga akwiisha bantu.—1 Maka. 15:27; 2 Maka. 5:12; 17:7-9; Neye. 8:7-9.
Buboni Bwakumushimu
w06-CW 8/1 23 pala. 13
Amube Basongo Kwiinda Mukuloonda Lesa!
13 Defedi ndyaakabona Yehova mbwakalinga kumucafwa muciindi ca mapensho, kwamucafwa kuloonda Lesa abuumbi alimwi akuyumya lushomo lwakwe mulinguwe. (Kulumbaisha 31:22-24) Nacibi boobo kwakalinga mankanda otatwe, Defedi ndyaakaalilwa kuloonda Lesa alimwi shakaswaamo shakalinga shintu shibiibi. Cakutaanguna nciindi ndyaakalinga kutola Libokoshi lya Cipangano ku Jelusalemu kusebensesha cikoci muciindi cakusebensesha bene Lefi kweelana aMulawo wakwe Lesa mbowakaamba. Usa ndyaakalinga kutanjilila cikoci wakacata Libokoshi lya Cipangano kwaamba ayi itawi, lyalo wakacaikwa peenkapo ceebo “cakutalemeka Libokoshi ilyo.” Ncakwiila kwaamba ayi Usa wakabisha, nacibi boobo, Defedi ngwaatakwe kutolelela kutondesha bulemu ku Mulawo wakwe Lesa, alimwi ici ncecakapa ayi Usa acaikwe. Kuloonda Lesa cilaamba kucita shintu kweelana abubaambo bwakwe.—2 Samwelo 6:2-9; Shakubelenga 4:15; 7:9.
FEBRUARY 22-28
BUBONI BUCANIKA MUMASWI AKWE LESA | SHAKUBELENGA 5-6
“Ino Inga Mwakonkela Buyani Cakubonenaako Caba Nasili?”
it-2-E 477
Mu Nasili
Kwakalinga shintu shinene shotatwe nshobatakalinga kweelete kucita aabo bakalinga kusala kuba baNasili: (1) Taakalinga kweelete kunwa waini nabi shimwi shoonse shibilite, kunwa cintu cili coonse cakapangwa kuminyansa nabi kulya minyansa itontola nabi iyumu. (2) Taakalinga kweelete kucesa misusu yakwe. (3) Taakalinga kweelete kusena pafwaafwi amutuntu nabi kwafwa baishi, banyina, mukwabo nabi nankashi yakwe.—Shaku. 6:1-7.
Cishomesho Cilibetele. Na muntu washomesha cishomesho ici wakalinga kweelete ‘kuba mu Nasili [ulyaabite alimwi ulibetele] wakwe Yehova’ kuteshi kucita boobo kwaamba ayi aliboneshe kubantu. Sombi ‘kulilabo kaali mu Nasili ulisalalite kuli Yehova.’—Shaku. 6:2, 8; amweelanishe a Mata. 49:26.
Shintu nshaakalinga kuyandika kucita muntu wasala kuba mu Nasili, shakalinga kuyandika abuumbi mukulambila Yehova. Bweenka mupailishi munene mbwatakalinga kweelete kucata mutuntu ceebo ca ncito isalalite njaakalinga kusebensa, mu Nasili alakwe taakalinga kweelete kucita boobo. Ceebo ca ncito isalalite njebakalinga kusebensa, mupailishi munene alimwi abapailishi, tabakalinga kweelete kunwa waini nabi shibilite shimwi shoonse ndyebatosebensa ncito ishi.—Lefi 10:8-11; 21:10, 11.
Kwiilikaawo, mu Nasili (me ciEbulu, na·zirʹ) wakalinga kweelete kutondesha ayi ulisalalite kwiinda ‘mukuleka misusu ayi ikule’ kwaamba ayi cibe cuubu bamwi kumushiba ayi ngumu Nasili. (Shaku. 6:5) Liswi lyeenka lya muci Ebulu lyakwaamba ayi na·zirʹ ndyolyakalinga kusebenseshekwa kwaamba pa shisamu sha minyansa shitana “kutimboolwa” misampi yamweela ciindi ca bushiku busalalite bwa Sabata alimwi amu Mwaaka wa Lwaanguluko. (Lefi 25:5, 11) Alimwi cisangalasha ncakwaamba ayi cisani ca kumutwi ca mupailishi munene, cakalinga kucite keela ka golodi pankumo mbuli “keshibilo kasalalite kakubengwa, [Liswi lyamu ciEbulu lyakwaamba ayi neʹzer, lilasansulula cintu comwi a liswi lya na·zirʹ]” alimwi pakeela ako pakalinga kulembetwe maswi akwaamba ayi “Kusalala nkwakwe Yehova.” (Kulo. 39:30, 31) Awalo mushini wa bwaami, uyo bamaami bananikitwe ba bene Isilaeli ngobakalinga kufwala wakalinga kwiitwa ayi neʹzer. (2 Samwe. 1:10; 2 Baami 11:12; amubone mutwi waamba ayi CROWN; DEDICATION mu Insight.) Kwaamba palibungano lya Bwineklistu, mutumwi Paulo wakaamba ayi mwanakashi wakapekwa misusu ilaamfu kwaamba ayi cibe cakufwala kumutwi. Ici cileebalusha mwanakashi kwaamba ayi alipusene amusankwa, nkokwaamba ayi alyeelete kunoonyumfwila kweelana abubaambo Lesa mbwaakabika. Kutacesa misusu (citeeleli kumusankwa), kutanwa waini akuyandika kwa kuba basalalite, kwakalinga kutondesha ayi mu Nasili wakalikaka alimwi akulyaaba cakumaninina kucita kuyanda kwakwe Yehova.—1 Koli. 11:2-16; amubone mitwi yaamba ayi HAIR; HEAD COVERING; NATURE mu Insight.
Buboni Bwakumushimu
w05-CW 1/15 30 pala. 2
Miipusho Kuswa Kubeshikubelenga
Nacibi boobo buNasili bwakwe Samusoni bwakalinga kupuseneeko. Samusoni kaatana kushalwa, munjelo wakwe Yehova wakaambila banyina Samusoni ayi: “Ulaakumita akushala mwaana musankwa. Mwaana uyo na akashalwe taaelete kuceswa misusu mukwiinga ulaakuba mu Nasili kuswabo bushiku mbweshi akashalwe. Nkokwaamba ayi ulaakubengwa kuli Lesa. Musankwa uyo ngweshi akatalike mulimo wakufuna bene Isilaeli mumaansa a bene Filisiti.” (Boomboloshi 13:5) Samusoni taakwe kushomesha kuba mu Nasili. Lesa ngwakamusala kuba mu Nasili alimwi wakalinga mu Nasili buumi bwakwe boonse. Lakwe taakalinga kweelete kukonkela mulawo wakapekwa kuba Nasili wakutacata mutuntu. Twaamba boobo, mukwiinga naakacata mutuntu cakuteshiba nakwiinga taakwe kucikonsha kutalika buumi bwa buNasili alimwi ubo mbwakatalika ciindi ndyaakashalwabo. Ncakutatoonsha kwaamba ayi buNasili bwakwe bwakalinga kupusene abwabaabo bakalyaaba kwaamba ayi babe baNasili.