Makani Akusebensesha amu Kabuku Kamabungano Abuumi Anciito

MARCH 1-7

BUBONI BUCANIKA MUMASWI AKWE LESA | SHAKUBELENGA 7-8

“Nsheenga Tweeya Kuswa Kumusumba Wabene Isilaeli”

it-1-E 497 pala. 3

Libungano

Muciindi ca bene Isilaeli bacinenenene bakasalwa mbobakalinga kwiimikaninaako bantu. (Esila 10:14) Aboobo tente yakulambililaamo ndyeyakamana kuyakwa bamatanjilili bamikowa bakapa shipo. (Shaku. 7:1-11) Alimwi muciindi cakwe Neyemiya, bapailishi, bene Lefi, alimwi abamatanjilili ba bantu mbobakeemikaninaako bantu boonse kwiinda mukubikaawo kalamatila wa twishibilo twabo ‘pacipangano ceelete kukonkelwa cakushomeka.’ (Neye. 9:38–10:27) Bene Isilaeli ndyebakalinga palweendo lwabo lwa muluyanga, Kola, Datani, Abilamu alimwi a Oni kwiilikaawo abamatanjilili bali 250 bakasalwa kuba munkuta, bakabukila Mose a Aloni. (Shaku. 16:1-3) Kweelana abutanjilishi mbwakatambula kuswa kuli Yehova, Mose wakasala basankwa bacinenenene bali 70 abo bakalinga bamatanjilili kwaamba ayi banomucafwaako amukuli wakweendelesha bene Isilaeli uyo ngwaakalinga kusebensabo eenka. (Shaku. 11:16, 17, 24, 25) Lilembo lya Bene Lefi 4:15 lilaamba sha bamatanjilili babene Isilaeli, alimwi citoboneka ayi bamaloba, bamatanjilili, boomboloshi alimwi abacinenenene ba mu Isilaeli mbobakalinga kwiimikaninaako bantu.​—Shaku. 1:4, 16; Joshu. 23:2; 24:1.

it-2-E 796 pala. 1

Lubeni

Mumusumba wa bene Isilaeli, Misumba yaba mumukowa wakwe Lubeni yakalinga kubambene a misumba ya bamumukowa wakwe Simyoni alimwi aba mumukowa wakwe Gadi iyo yakalinga kulubasu lwa kumalenge kwa tente yakulambililaamo. Na bene Isilaeli batoolonga, pamishobo yotatwe iyi bamu mukowa wakwe Lubeni mbobakalinga kutaanguna kunyamuka pesule lyakwaamba ayi bamu mukowa wakwe Juda, Isaka alimwi abamumukowa wakwe Sebuluni banyamuka. (Shaku. 2:10-16; 10:14-20) Alimwi mishobo iyi mboyakalinga kukonkana pakupa shipo pabushiku ndyebakalinga kwaaba tente isalalite kuli Yehova.​—Shaku. 7:1, 2, 10-47.

w04-CW 8/1 25 pala. 1

Shiteente Shinene Shitocanika Mulibuku lya Shakubelenga

8:25, 26. Kwaamba ayi incito ya bene Lefi isebensekwe kabotu, kweelana amulawo basankwa bacinene bakalinga kucileka kusebensa ncito na bacembela. Nacibi boobo, bacinene aba bakalinga kulyaaba kucafwa bene Lefi bamwi. Nabi kwaamba ayi munshiku shino taakuwo kucileka kusebensa ncito yakushimikila Makani abotu a Bwaami, makani aya alatwiisha njiisho iyandika yakwaamba ayi na Mwineklistu atokwaalilwa kukumanisha mikuli imwi ceebo cakukula, inga kaasebensaako ncito shimwi nsheenga wacikonsha.

Buboni Bwakumushimu

it-1-E 835

Mutaanshi Kushalwa, Shinyama Shitaanshi Kushalwa

Baana bakwiiya ba bene Isilaeli bakalinga kwiimikaninaako mushobo woonse wa bene Isilaeli mukwiinga mbobakalinga kusa mukuba mitwi yamikwashi. Alimwi Ceebo ca cipangano ncaakapangana a Abulaamu, Yehova wakeeta mushobo woonse wa bene Isilaeli ayi “mwanaangu musankwa wakwiiya.” (Kulo. 4:22) Ceebo cakwaamba ayi wakapulusha buumi bwabo, Yehova wakapa mulawo wakwaamba ayi “mwaana musankwa wakwiiya woonse mwine Isilaeli alimwi amwaana musankwa woonse wakwiiya wa shifubwa” balyeelete kusalashikwa kwaamba ayi babe baakwe. (Kulo. 13:2) Aboobo baana basankwa bakwiiya bakalinga kubengwa kuli Lesa.

MARCH 8-14

BUBONI BUCANIKA MUMASWI AKWE LESA | SHAKUBELENGA 9-10

“Yehova Mbwaatanjilila Bantu Bakwe”

it-1-E 398 pala. 3

Musumba

Kwaamba ayi likoto lya bantu baanji bobulya balonge kuswa kumusena womwi kuya kumwi (mulibuku lya Shakubelenga 33 Mose wakaamba sha kulonga kwa bene Isilaeli mankanda mpashi ashika cakuma 40) bakalinga kweelete kuba bacatene. Na likumbi kalili pa tente yakulambililaamo, bene Isilaeli tabakalinga kulonga. Ano na likumbi lyaswa pa tente yakulambililaamo, bene Isilaeli bakalinga kulonga. “Anu bantu abo bakalinga kulongabo na Yehova wabaambila, alimwi akuyaka misumba na wabaambila.” (Shaku. 9:15-23) Mapeenga obilo asilifa wakufula ngaakalinga kusebenseshekwa pakubunganya bene Isilaeli kwaamba ayi babalwiite shaamba Yehova. (Shaku. 10:2, 5, 6) Na lupeenga lwalilabo ciindi ciniini cakalinga cishibisho cakwaamba ayi balyeelete kulonga. Ciindi cakutaanguna ishi ndyeshakacitika mwakalinga “mumwaaka wabili [1512 B.C.E.], pabushiku bwa makumi obilo, mumweenshi wabili.” Makoto a mumukowa wakwe Juda akalinga kutaanguna kunyamuka akweendela pesule lya libokoshi lya cipangano, lyalo bakalinga kukonkelaawo ngamakoto a mumukowa wakwe Isaka a bene Sebuluni. Kuswawaawo bene Geshoni a bene Melali bakalinga kutalika lweendo lwabo kabayumwite shintu shaku tente yakulambililaamo. Kuboolawo makoto a mumukowa wakwe Lubeni akalinga kunyamuka, lyalo bakalinga kukonkelaawo ngamakoto a bamumukowa wakwe Simyoni a bamumukowa wakwe Gadi. Kuswawaawo bene Koati bakalinga kunyamuka kabayumwite shintu shisalalite, lyalo bakalinga kukonkelaawo ngamakoto a mumukowa wakwe Efuleemu alimwi abamumukowa wakwe Manase a Benjameni. Mukweelaako, bakalinga kukonkelaawo ngamakoto a bamumukowa wakwe Dani, a bamumukowa wakwe Asha a Nafutali. Aboobo, makoto ankusu alimwi akalinga kucite bantu baanji ngaakalinga kuba kunembo alimwi akwisule.​—Shaku. 10:11-28.

w11-CG 4/15 mape. 4-5

Sa Mulabona Bumboni Butondesha ayi Lesa Atootutanjilila?

Ino inga twatondesha buyani ayi tulalumba abuumbi Lesa mbwaatutanjilila? Mutumwi Paulo wakaamba ayi: ‘Amunyumfwile baabo bamutanjilila pakati kanu alimwi kamulibombya.’ (Ebu. 13:17) Sombi cimwi ciindi teshi cuubu kucita boobo. Kucakubonenaako, amuyeye ayi mwakalinga mulikoto lya bene Isilaeli muciindi cakwe Mose. Lyalo, pesule lyakweenda mushinso ulaamfu, licincilo lya likumbi lyeemikana. Aboobo mwatalika kuliipusha ayi, ino licincilo ili lya likumbi litokwiimikana nshiku shongaye? Sa bushiku bomwi, nsondo yomwi nabi myeenshi iinji? Mpashi pakutaanguna inga mwalongololabo shintu shiyandika abuumbi. Lyalo mukuya kwaciindi inga mewatalika kulongolola shoonse. Ano ndikwacaalabo ciindi ciniini kwaamba ayi mumanishe kulongolola, mwabona licincilo lya likumbi lyatalika kweenda alimwi, aboobo mulyeelete kutalika alimwi kulongela shintu shanu. Ici inga tacibi cuubu. Nacibi boobo, “bene Isilaeli bakalinga kulonga” ciindi ceenka ico.​—Shaku. 9:17-22.

Ino tulacita buyani na twapekwa butanjilishi kuswa kuli Lesa? Sa tuleelesha kubukonkela paciindi ceenka ico, na mpashi tulatolelela kucita shintu munshila njetwakashibila? Ino mbutanjilishi nshi bupya mbotushi kulansha kumakani akutanjilila shiiyo sha Baibo, kushimikila bantu baamba mushobo umwi alimwi ambweenga twatolelela kucita kulambila kwamukwashi? Alimwi sa tulishi kabotu nshotweelete kucita kwaamba ayi twaambe abamakwesu basebensela mukomiti ilanga pamakani ashakucipatela, alimwi amibo njotweelete kutondesha ndyetuli kumabungano esu anene? Tulatondesha ayi tulisuni kunootanjililwa a Lesa na katutambula kululika. Ndyetutosala shakucita mubuumi, tatweelete kucita shintu kweelana ambotuyeeya, sombi tulyeelete kucinka manungo muli Yehova alimwi alibunga lyakwe. Bweenka mwaana mbwaacicila ku bashali kwaamba ayi bamushitilishe na kwesa mfula inene yacipuupu, aswebo tulyeelete kucicila kulibunga lyakwe Yehova na twacana mapensho eenga aboneka kuba anga nimfula inene yacipuupu.

Buboni Bwakumushimu

it-1-E 199 pala. 3

Kubungana

Kuyandika kwa Kubungana. Kusekelela kwa Pasika uko kwakalinga kucitwabo linkanda lomwi mumwaaka, kulatutondesha kuyandika kwa kusebensesha shintu Yehova nshaatupa ndyetutoobungana kwaamba ayi tucane shoolwe shakumushimu. Musankwa uliwoonse usalalite kweelana a Mulawo weenga waalilwa kulama bushiku bwa Pasika na taabete palweendo, wakalinga kweelete kucaikwa. (Shaku. 9:9-14) Mwaami Esekiya ndyaakeeta bantu bekala muJuda amu Isilaeli kwaamba ayi bese ku Jelusalemu mukusekelela Pasika, maswi amwi ngakaamba akalinga akwaamba ayi: “Nobene Isilaeli, amuboole kuli Yehova . . . mutabi beshicimpamya mbuli bwakalinga bamashali banu bakulukulu, sombi amunyumfwile Yehova akusa kuŋanda yakwe mu Jelusalemu iyo njaakasalasha kwalyoonse alyoonse. Kamusebensela Yehova, Lesa wanu kwaamba ayi bukali bwakwe bumane pali ndimwe. . . . Yehova ngushinkumbu alimwi ulicite luse. Na muboole kuli nguwe, ncakwiila utoomutambula.” (2 Maka. 30:6-9) Uliwoonse weenga waalilwa kucanikaako cakashanga, cakalinga ncitondesho cakwaamba ayi taanyumfwili Lesa. Alimwi, nabi kwaamba ayi Beneklistu munshiku shino tababiiwo akusekelela mbuli Pasika, Paulo wakayuminisha Beneklistu kubungana pomwi lyoonse abantu bakwe Lesa. Wakaamba ayi: “Katubikilana maano kwaamba ayi tuyuminishanye kutondesha lusuno akucita ncito shibotu, tutacileeki kubungana pomwi, bweenka mbuli bamwi mbobacita, sombi katuyuminishanya, alimwi akutolelela kucita boobo bunene bunene mbotutoobona bushiku ndyebutoosa cisena.”​—Ebu. 10:24, 25; amubone mutwi waamba ayi CONGREGATION mulibuku lya Insight.

MARCH 15-21

BUBONI BUCANIKA MUMASWI AKWE LESA | SHAKUBELENGA 11-12

“Ino Nceebonshi Tulyeelete Kuleya Mushimu Wakutongooka?”

w01-CN 6/15 17 pala. 20

Mutabi Beshikukutika Baluba

²⁰ Beneklistu baanji tabaciti bulale. Nacibi boobo, tulyeelete kucenjela kwaamba ayi tutabi acilabo cakutongooka ico ceenga capa kwaamba ayi tutabi abushicibusa bubotu a Yehova. Mutumwi Paulo wakaamba ayi: “Tatweelete kweelesha Yehova bweenka bwakacita [bene Isilaeli] bamwi pakati kabo akucaikwa kunsoka. Tatweelete kunootongooka bweenka bwakacita bamwi pakati kabo, alimwi bakacaikwa kuli shikunyonyoola.” (1 Bene Kolinto 10:9, 10) Bene Isilaeli bakatongookela Mose a Aloni—ncakwiila, alimwi bakatongookela a Lesa wancine—bakatongooka ceebo ca mana ngobakapekwa munshila ikankamika. (Shakubelenga 16:41; 21:5) Sa Yehova wakakalashikwa abuumbi ceebo cakutongooka kwiinda kucita bufuule? Baibo ilaamba ayi baanji abo bakalinga kutongooka bakafwa kwiinda mukulumwa ansooka. (Shakubelenga 21:6) Pakutaanguna, bantu bakanyonyoolwa ceebo cakutongooka bakeendilila 14,700. (Shakubelenga 16:49) Aboobo, tutanokweelesha Yehova kwiinda mukutalemeka shintu nshaatupa.

w06-CW 7/15 15 pala. 7

‘Amuleye Kutongooka’

⁷ Miyeeyo yabene Isilaeli yakaaluka abuumbi! Ciindi ndyebakaangululwa kuswa mubusha ku Ijipiti akupulushikwa Palweenge Lusalala bakatondesha kulumba kwabo kwiinda mukulumbaisha Yehova mulwiimbo. (Kulonga 15:1-21) Sombi ceebo camapensho ngobakeendaamo ndyebakalinga muluyanga alimwi akuloonda bene Kenani, bakacileka kutondesha kulumba kuli Yehova akutalika kulinyumfwa kutakwana anshaakalinga kubapa. Muciindi cakulumba Yehova ceebo ca lwaanguluko ndobakalinga kucite, bene Isilaeli bakamupa mulandu wakwaamba ayi wakalinga kubeema shintu shibotu. Aboobo, kutongooka kwabo kwakatondesha ayi tabakalinga kulumba pashintu Lesa nshaakabapa. Nceceeco ncaakaambila ayi, “Ino bamucita shibi aba batootola ciindi cilaamfu buyani kabacitongooka?”​—Shakubelenga 14:27; 21:5.

it-2-E 719 pala. 4

Kwaambana

Kutongooka. Kutongooka takuyuminishi alimwi kulanyonyoola shintu. Ndipakeendabo ciindi ciniinibo pesule lyakwaamba ayi bene Isilaeli baswa mu Ijipiti, bakatalika kutongookela Yehova, kwiinda mukucana shilubo muli Mose a Aloni abo Lesa mbwaakapa kwaamba ayi banoobatanjilila. (Kulo. 16:2, 7) Kuswawaawo Mose wakasenga Lesa ayi afwe ceebo cakutongooka kwabo. (Shaku. 11:13-15) Kutongooka inga kwaleta mapensho abiibi abuumbi kubaabo batootongooka. Yehova wakabona bantu abo bakalinga kutongookela Mose ayi batotongookela butanjilishi bwakwe mwiine. (Shaku. 14:26-30) Baanji bakafwa ceebo cakucana shilubo muli Mose.

Buboni Bwakumushimu

it-2-E 309

Mana

Mbwakalinga Kuboneka. Mana akalinga kuboneka anga ninseke shiniini shitubulukite alimwi akalinga kuboneka anga nguleemba. Akalinga kunyumfwika anga shimaande shakapangwa amafuta. Pesule lyakupela nabi kutwa muncili, bakalinga kwaatelekabo nabi kupangaamo shili anga nshimaande.​—Kulo. 16:23, 31; Shaku. 11:7, 8.

MARCH 22-28

BUBONI BUCANIKA MUMASWI AKWE LESA | SHAKUBELENGA 13-14

“Lushomo Mbolutucafwa Kuba Bataloondi”

w06-CN 10/1 16-17 mapa. 5-6

Kutaloonda Ceebo Cakuba Alushomo Alimwi Akuloonda Lesa

⁵ Sombi beshikusensa bobilo, Joshuwa alimwi a Kalebu, bakalinga kusunishishi kunjila Mucishi Cakashomeshekwa. Balo bakaamba ayi bene Kenani “tulaakwiindililabo kubakoma. Yehova uli aswebo, alimwi balo tabacite shikubalama. Aboobo mutabaloondi.” (Shakubelenga 14:9) Sa Joshuwa a Kalebu bakalinga kushomabo shintu nshobatakalinga kushi? Sobwe. Balo pomwi abene Isilaeli boonse bakabona Yehova mbwaakalensha nsoni bene Ijipiti alimwi abalesa babo kwiinda mukusebensesha Myaalu Likumi. Kuswawaawo bakabona Yehova mbwaakalobya Falawo alikoto lyakwe lyabashilumamba Palweenge Lusalala. (Kulumbaisha 136:15) Cakabonekelabo patuba kwaamba ayi beshikusensa bali likumi kwiilikaawo abaabo bakabanyumfwila tabakalinga kweelete kuloonda. Kwaamba ayi Yehova atondeshe mbocakamucisa kumoyo wakaamba ayi: “Ino batootola ciindi cilaamfu buyani kabacikaka kushoma muli ndime, nakubi kwaamba ayi ndacita shaankamiko shiinji pali mbabo?”​—Shakubelenga 14:11.

⁶ Yehova wakaamba ayi lipenshi linene bantu aba ndyebakalinga kucite, nkubula lushomo uko kwakabonekela ceebo caboowa mbobakalinga kucite. Ncakwiila lushomo akubula boowa shileendela pomwi. Twaamba boobo mukwiinga mutumwi Joni ndyaakalinga kwaamba pa libungano lya Bwineklistu wakaamba ayi: “Ncetukomeshako cishi ca panshi ndushomo lwesu.” (1 Joni 5:4) Munshiku shino, Bakamboni beendilila 6 miliyoni bacanike abanene, bacite nkusu alimwi abeshikuciswa ciswa boonse balasebensa cankusu kushimikila makani abotu a Bwaami mukwiinga balicite lushomo mbuli lwakalinga kucite Joshuwa a Kalebu. Taakuwo mulwani weenga wacikonsha kukasha bantu aba bataloondi alimwi batolelela kuyabo kunembo anga ndikoto lya bashilumamba.​—Bene Loma 8:31.

Buboni Bwakumushimu

it-1-E 740

Cishi Lesa Ncaakapa Bene Isilaeli

Cishi Lesa ncaakapa bene Isilaeli cakalinga cibotu abuumbi. Mose ndyaakatuma beshikusensa kwaamba ayi baye bakasense Cishi Cakashomeshekwa alimwi akuleta shisepo shamulincico, bakaleta nkuyu, mapomegilaneti, alimwi acisankata ca minyansa. Cisankata ico cakalinga cilemu abuumbi cakwaamba ayi basankwa bobilo mbobakacikonsha kukulika. Nabi kwaamba ayi bakaloonda ceebo cakubula lushomo, bakaamba ayi: ‘Cishi ico ncemwakatutumaako twakacibona, ncishi cikunka buuci ameleki.’​—Shaku. 13:23, 27.

MARCH 29–​APRIL 4

BUBONI BUCANIKA MUMASWI AKWE LESA | SHAKUBELENGA 15-16

“Amuleye Mushimu Wakulisumpula Akulishoma”

w11-CN 9/15 27 pala. 12

Sa Yehova Alimushi?

¹² Nacibi boobo, ciindi bene Isilaeli ndyebakalinga palweendo lyabo lwakuya kucishi Cakashomeshekwa, Kola wakatalika kubona anga nshila Yehova njaakalinga kusebensesha kutanjilila bantu bakwe tayakalinga kabotu. Kuswawaawo basankwa bali 250 bakatalika kunyumfwana anguwe akuyeeya ayi inga baalula shintu. Kola ababye balyeelete bakalinga kuyeya ayi balicite bushicibusa bubotu a Yehova. Bakalwiita Mose ayi: ‘Mweendilisha! Boonse bene Isilaeli balisalalite, alimwi Yehova uli pakati kabo.’ (Shaku. 16:1-3) Nshebakacita shakatondesha patuba ayi bakalinga kulisumpula akulishoma. Mose wakabaambila ayi: ‘Yehova ulaakutubonesha uli kulubasu lwakwe.’ (Amubelenge Shakubelenga 16:5.) Bushiku bwakaboolaawo macolesha, Kola pomwi ababye aabo bakapondoka bakacaikwa.​—Shaku. 16:31-35.

w11-CN 9/15 27 pala. 11

Sa Yehova Alimushi?

¹¹ Twabandika pashakubonenaako sha bantu bobilo abo bakacita shintu munshila ipusene abuumbi pamakani akulemeka shintu Yehova nshaakasala kucita. Bantu aba ngu Mose alimwi a Kola. Nshebakacita shilatucafwa kushiba Yehova mbwatubona na katulemeka nabi kuubya shintu nshaasala. Kola wakalinga wamumukwashi wabene Koati aabo bakalinga bamulunyungu lwakwe Lefi, alimwi bakalinga kucite mikuli iinji. Kola wakabonaako ciindi bene Isilaeli ndyebakapulushikwa Palweenge Lusalala, alimwi wakaabanamo lubasu mukoombolosha bene Isilaeli bakapondokela Yehova Pakalundu ka Sinayi. Incito imwi mpashi Kola njaakasebensa yakalinga yakunyamuna libokoshi lya cipangano. (Kulo. 32:26-29; Shaku. 3:30, 31) Citooboneka ayi kwa myaaka iinji, Kola wakalinga kupekwa bulemu kubene Isilaeli baanji alimwi wakalinga kushomeka kuli Yehova.

Buboni Bwakumushimu

w98-CN 9/1 20 mapa. 1-2

Amushinishe Kubika Shintu Shiyandika Abuumbi Panembo!

Yehova wakabona cilubo ncebakacita kuba mulandu unene abuumbi. Baibo ilaamba ayi ‘Yehova wakaambila Mose ayi, “Muntu uyo ulyeelete kucaikwa.”’ (Shakubelenga 15:35) Ano ino nceebonshi Yehova wakakalala abuumbi ceebo cashintu muntu ulya nshaakacita?

Bantu bakalinga kucite nshiku 6 shakutepa nkuni kwiilikaawo akucana shakulya, shakufwala alimwi apakoona. Sombi pabushiku bwa namba 7, bakalinga kweelete kubikila maano kushintu shakumushimu. Nabi kwaamba ayi tawakalinga mulandu kutepa nkuni, sombi kusebensesha ciindi ncaakalinga kweelete kulambila Yehova ngomulandu ngwaakapanga. Nabi kwaamba ayi munshiku shino Beneklistu tabakonkeliiwo Mulawo wakwe Mose, sa cakucitika ici tacitootwiisha kuyandika kwakubika shintu shakumushimu panembo lya shintu shoonse?​—Filip. 1:10

APRIL 5-11

BUBONI BUCANIKA MUMASWI AKWE LESA | SHAKUBELENGA 17-19

“Ndime . . . Buboni Mboweelete Kupyana”

w11-CN 9/15 13 pala. 9

Sa Mutoosuminisha Yehova Kuba Cipansha Canu?

⁹ Amuciyeeyelebo bene Lefi abo batana kupekwawo musena. Mukwiinga bakabikila maano abuumbi kukulambila kwancine, bakalinga kushoma ayi Yehova ananoobapa shintu nshebayandika mukwiinga wakabalwiita ayi: “Nebo ne Yehova ndime cipansha cako.” (Shaku. 18:20) Nabi kwaamba ayi tatusebenseli pa tempele yancinencine mbuli bwakalinga kucita bene Lefi, inga twakonkela cakubonenaako cabo kwiinda mukushoma ayi Yehova ananootupa nshetuyandika. Ndyetutooya cisena pafwiifwi abuumbi kumamanino abweende bwashintu mbotubeteemo, tulyeelete kushoma abuumbi ayi Lesa ananootupa nshetuyandika.​—Ciyu. 13:17.

w11-CN 9/15 7 pala. 4

Yehova Ncecipansha Cangu

⁴ Ino Yehova wakaba buyani cipansha cabene Lefi ndyakabapa ncito iyi? Yehova ndyakabapa ncito iyi akubalwiita ayi alaakuba buboni bwabo wakasansulula ayi muciindi cakubapa musena, wakabapa ncito iyandika abuumbi. “Kusebensela Yehova mulimo wa bupailishi” mbobuboni mbobakapyana. (Joshu. 18:7) Shakubelenga capita 18 ilatucafwa kushiba ayi nshebakalinga kupa shakalinga kuyandika abuumbi. (Amubelenge Shakubelenga 18:19, 21, 24.) Bene Lefi bakalinga kweelete kupekwa ‘calikumi coonse ncebakalinga kuleta bene Isilaeli, ayi ngomalipilo pamulimo ngobacita’. Bakalinga kweelete kubwesa cipansha comwi ca shipansha shili likumi sha shakulya nshobakatebula bene Isilaeli kwiilikaawo asha shifubwa shabo. Abalo bene Lefi bakalinga kweelete kupa calikumi “ciindaawo kubota” kuswa pasheesho nshebakatambula kwaamba ayi babenge milambu. (Shaku. 18:25-29) Alimwi bapailishi bakalinga kupekwa a “shipo shoonse shisalalite” isho bene isilaeli nshobakalinga kutola kumusena wakulambililaako. Aboobo tabakalinga kweelete kutoonsha nabi paniini ayi Yehova ananoobalama.

Buboni Bwakumushimu

g02-CW 6/8 14 pala. 2

Mwiinyo Ncintu Cibotu Abuumbi

Mwiinyo wakesa mukuba citondesho ca kukalikana akutanyonyooka. Aboobo muBaibo cipangano cakashinishikwa cakalinga kwiitwa ayi cipangano camwiinyo. Beelikitweemo mucipangano ici bakalinga kulita pomwi cakulya cicite mwiinyo kutondesha ayi bapanga cipangano. (Shakubelenga 18:19) Mumulawo wakwe Mose, mwiinyo wakalinga kubikwa ku milambu njobakalinga kweelete kubenga pacipaililo, kutondesha lwaanguluko kuswa kushibiibi nabi kubola.

APRIL 12-18

BUBONI BUCANIKA MUMASWI AKWE LESA | SHAKUBELENGA 20-21

“Amutolelele Kulibombya Nabi Ndyemutokwiinda Mubukaalo Buyumu”

w19-CW.02 12 pala. 19

Amube Balibombya Kwaamba ayi Munoosangalasha Yehova

¹⁹ Tunanoleya sheenga shalengesha ayi tucite shibiibi. Atubandike pali Mose alimwi. Kwamyaaka iinji wakalinga muntu uliceesha alimwi usangalasha Yehova. Sombi kumamanino alweendo lwabo lushupite lwa myaaka 40 muluyanga, Mose wakaalilwa kuba muntu uliceesha. Paciindi ici nankashi yakwe, uyo wakamucafwa kwaamba ayi atacaikwi ku Ijipiti, kaali wafwa kale alimwi bamubika mucuumbwe ku Kadeshi. Paciindi ici bene Isilaeli bakatalika kutongookela Mose ayi taakalinga kubalama kabotu. Bantu bakatalika kutongookela Mose ceebo cakwaamba ayi tabakalinga kucite maanshi. Bantu aba bakatongooka nabi kwaamba ayi bakalinga kucishi ayi Yehova wakalinga kusebensesha Mose kucita shaankamiko shiinji. Alimwi kwaciindi cilaamfu Mose wakatondesha ayi wakalinga muntu utalisuuni alimwi uyeyelaako bamwi. Bantu tabana kutongookabo ceebo cakubula maanshi sombi bakalinga kumutongookela akubona anga ngowakapa kwaamba ayi banyumfwe nyotwa.​—Shaku. 20:1-5, 9-11.

w19.02 13 mapa. 20-21

Amube Balibombya Kwaamba ayi Munoosangalasha Yehova

²⁰ Mose taakwe kutolelela kuba muntu uliceesha mukwiinga wakakalala abuumbi. Muciindi cakutondesha lushomo kwiinda mukwaamba alibwe kweelana a Yehova mbwaakamulwiita, Mose wakakalalila bantu balya kubona anga lakwe ngweenga wabapa maanshi. Kuswawaawo wakooma palibwe mankanda obilo cakwaamba ayi maanshi aanji akatalika kuswa. Kutaliceesha alimwi akukalala nsheshakapa kwaamba ayi abishe abuumbi. (Kulu. 106:32, 33) Nshaakacita pakeendi kaniinibo shakapa kwaamba ayi atasuminishikwi kunjila Mucishi Cakashomeshekwa.​—Shaku. 20:12.

²¹ Ino nshiinshi nshetutokwiiya pamakani aya? Cakutaanguna, lyoonse tulyeelete kusebensa cankusu kwaamba ayi tutolelele kuba baliceesha. Na twalilekelesha nabibo kwaciindi ciniini, inga twatalika kulisumpula akutalika kwaamba na kucita shintu cakutayeyela. Cabili, muntu na walisukama, nkusu shilamana, aboobo tulyeelete kutolelela kuba baliceesha nabi ndyetuli mubukaalo bweenga bwatupa kulisukama abuumbi.

w09-CW 9/1 19 pala. 5

Moomboloshi Woombolosha Cabululami

Cakutaanguna, Lesa taakwe kulwiita Mose ayi aambe abantu nabi kulwiita bantu abo ayi bakalinga kupikishanya a Yehova. Cabili, Mose alimwi a Aloni tabana kupa bulemu kuli Yehova. Nceceeco Lesa ncaakabalwiitila ayi: “Mukwiinga tamukwe . . . kundemeka.” (Vesi 12) Mose ndyakaamba maswi akwaamba ayi “sa tumukushishe maanshi,” cakaboneka anga lakwe Mose a Aloni mbobakalinga kweelete kupa bantu maanshi kuteshi Lesa. Catatu ncakwaamba ayi Lesa mbwakoombolosha Mose a Aloni tashikwe kupusanaawo ambwakoombolosha bamwi muciindi cakwisule. Bweenka Lesa mbwaatakwe kusuminisha bene Isilaeli bakapondoka kunjila mucishi ca Kenani, alakwe Mose a Aloni taakwe kubasuminisha kunjila Mucishi Cakashomeshekwa. (Shakubelenga 14:22, 23) Cane, Mose a Aloni mbobakalinga kutanjilila bene Isilaeli. Aboobo abo boonse bakalinga kucite mikuli na babisha, Lesa wakalinga kubapa mulandu unene.​—Luka 12:48.

Buboni Bwakumushimu

w14-CW 6/15 26 pala. 12

Sa Mulabona Shilubo Shabamwi Bweenka Yehova Mbwashibona?

¹² Pashintu shoonse ishi Aloni nshaakacita, Yehova nakwiinga wakacitaawo comwi paciindi ceenka cilya. Sombi Lesa wakalinga kucishi ayi Aloni taakalinga mubiibi alimwi teshi ngowakatalikisha mapensho aya. Citooboneka anga Aloni wakacita cilubo ceebo cakukakatishikwa nabi kukonkela shintu bamwi nshebakalinga kusuni. Sombi Aloni wakasumina shilubo shakwe alimwi taakalinga kupikisha boomboloshi bwakwe Yehova. (Kulo. 32:26; Shaku. 12:11; 20:23-27) Yehova taakwe kubikila maano kushilubo shakwe Aloni sombi wakalinga kubona lushomo luyumu ndwaakalinga kucite, alimwi na wacita cilubo wakalinga kwaana. Pesule lya myaaka iinji, bantu bakalinga kwiibaluka Aloni alimwi abana bakwe ayi bakalinga bantu baloonda Lesa.​—Kulu. 115:10-12; 135:19, 20.

APRIL 19-25

BUBONI BUCANIKA MUMASWI AKWE LESA | SHAKUBELENGA 22-24

“Yehova Waalula Lishingo Kuba Coolwe”

bt-CW 53 pala. 5

Kushimikila ‘Makani Abotu Aamba Pali Yesu’

⁵ Bweenka mbocakalinga muciindi ca batumwi, abalo bantu bakwe Lesa munshiku shino tabacileeki kushimikila nabi ndyebatopenshekwa. Liinji, Beneklistu ndyebatopenshekwa balakakatishikwa kuswa nkobabete akuya kumisena imwi, bamwi balaangwa nabi kuya kushishi shimwi, alimwi ishi shapa kwaamba ayi makani abotu a Bwaami ashimikilwe kubantu bekala kumisena iyi nkobaya. Kucakubonenaako, ciindi ca Nkondo Yabili ya Cishi Coonse, Bakamboni Bakwe Yehova bakatolelela kushimikila nabi ndyebakalinga mumisumba yakupenshesha yabene Nazi. MuJuda umwi uyo wakalinga pomwi a Bakamboni mujeele wakaamba ayi: “Kuliyumya kwa Bakamboni Bakwe Yehova aabo bakalinga mujeele, kwakanengesha kushinisha kwaamba ayi balicite lushomo luyumu ceebo cashintu nshobakeeya kuswa mu Baibo, aboobo ici cakapa kwaamba ayi anebo mbe Kamboni Wakwe Yehova.”

it-2-E 291

Buluya

Kuba Muluya Ceebo Cakupikishanya a Yehova. Mushinshimi Balamu wakalinga kusuni kushingana bene Isilaeli kwaamba ayi apekwe maali kuswa kuli Balaki Mwaami wabene Moabu, sombi Yehova wakalwiita mushinshimi Balamu kwaamba ayi atashingani bene Isilaeli. Mutumwi Pita wakaamba pali Balamu ayi ‘Mbongolo ngumunyama utaambi, sombi yakaamba bweenka mbuli muntu akukasha mushinshimi uyu kucita shabuluya.’ Kwaamba pabuluya bwakwe Balamu mutumwi Pita wakasebensesha liswi lya ciGiliki lyakwaamba ayi pa·ra·phro·niʹa, ilyo lisansulula ‘kwaamba anga ngumuntu ucinkukite.’​—2 Pita 2:15, 16; Shaku. 22:26-31.

Buboni Bwakumushimu

w04-CW 8/1 27 pala. 2

Shiteente Shinene Shitocanika Mulibuku lya Shakubelenga

22:20-22​—Ino nceebonshi Yehova wakalala ashakacita Balamu? Yehova wakalinga walwiita mushinshimi Balamu kwaamba ayi atashingani bene Isilaeli. (Shakubelenga 22:12) Sombi mushinshimi uyu wakaya abasankwa bakwe Balaki kacite muyeeyo wakuya mukushingana bene Isilaeli. Balamu wakalinga kusuni kusangalasha mwaami wabene Moabu kwaamba ayi amupe cipo. (2 Pita 2:15, 16; Judi 11) Nabi Balamu ndyaakakakatishikwa ayi ape shoolwe bene Isilaeli muciindi cakubashingana, Balamu wakalinga kusunishishi kusangalasha mwaami uyo kwiinda mukumulwiita ayi banakashi balambila Baali balyeelete kucita bulale abasankwa bene Isilaeli. (Shakubelenga 31:15, 16) Aboobo, shintu shibiibi Balamu nshakaamba nsheshakalengesha ayi bukali bwakwe Lesa buse palinguwe.

APRIL 26–​MAY 2

BUBONI BUCANIKA MUMASWI AKWE LESA | SHAKUBELENGA 25-26

“Sa Bantu Baanji Inga Bacana Shoolwe Ceebo ca Muntu Womwi?”

lvs-CW 118 mapa. 1-2

‘Amutalamuke Bufuule!’

SHIKUCAYA NSWI na alisuni kucata nswi, ulaya kumusena nkweenga wacana mushobo wanswi nshaasuni. Ulasala kabotu cakulya ncaasuni kubika kundobo, lyalo ulawaala ndobo iyo pamaanshi. Pesule lyakucita boobo, ulalindila kushikila inswi yalya cakulya cili kundobo lyalo cakufwambaana ulaikusha mumaanshi.

² Abalo bantu inga bacatwa munshila yeenka iyi. Kucakubonenaako, ndikwakacaalabo paniini kwaamba ayi bene Isilaeli banjile Mucishi Cakashomeshekwa, bakayaka misumba mucinyika ca Moabu. Mwaami wabene Moabu wakashomesha muntu umwi waliina lya Balamu ayi utoomupa maali aanji na ashingane bene Isilaeli. Ndyaakalilwa kucita boobo, wakacana nshila imwi iyo yakalengesha ayi bene Isilaeli baliletele mapensho beene. Aboobo nshaakasala shakalinga anga ncakulya cabikwa kundobo. Wakatuma banakashi bene Moabu kumisumba yabene Isilaeli kwaamba ayi bayunge basankwa bene Isilaeli akucita bulale ambabo.​—Shakubelenga 22:1-7; 31:15, 16; Ciyubululo 2:14.

lvs-CW 119 pala. 4

‘Amutalamuke Bufuule!’

⁴ Ino nceebonshi bene Isilaeli baanji bakacatwa mukoose kakwe Balamu? Nceebo cakwaamba ayi bakalinga kusuni kulikondelesha alimwi bakaluba shintu shibotu Yehova nshaakabacitila. Yehova wakabacitila shintu shiinji shakalinga kweelete kubapa kwaamba ayi batolelele kushomeka kuli nguwe. Kucakubonenaako, wakabakusha mubusha ku Ijipiti, kubapa shakulya muluyanga alimwi akubatanjilila kushikila ndyekwakacaalabo paniini kwaamba ayi banjile Mucishi Cakashomeshekwa. (Bene Ebulu 3:12) Sombi bakaluba shoonse Lesa nshaakabacitila akutalika kucita bufuule. Mutumwi Paulo wakalemba ayi: “Tutaciti bufuule bweenka bwakacita bamwi pakati kabo. Balo ndibakacita boobo, bantu bakafwa.”​—1 Bene Kolinto 10:8.

Buboni Bwakumushimu

it-1-E 359 mapa. 1-2

Nyiinsa

Citoboneka ayi pakwaabanya musena mishobo yabene Isilaeli, kuli shintu shobilo nshobakalinga kucita: cakutaanguna, nkuuma cisolo, cabili, nkukomena kwa mushobo. Cisolo cakalinga kubacafwabo kushiba lubasu lwa musena mushobo uliwoonse nkweenga wapekwa. Inga caba ayi ndubasu lwa Kumatwa, Kumalenge, Kwicwe nabi Kumbo mucinyika nabi musena wakutulundu. Yehova ngwakalinga kubalwiita shakucita kwiinda mukuuma cisolo, aboobo ici cakalinga kubacafwa kuleya kunyumfwilana munyono alimwi akwaambana. (Tus. 16:33) Kwiinda mukucita boobo, Lesa wakalinga kupa kwaamba ayi mushobo uliwoonse utambule musena kweelana abushinshimi bwakaamba Jakobo ndyaakalinga pafwiifwi akufwa bulembetwe pa Matalikilo 49:1-33.

Pesule lyakushiba musena mushobo uliwoonse ngweenga wapekwa kwiinda mukuuma cisolo, cintu cabili cakalinga kuyandika nkushiba kukomena kwa musena ngobakalinga kweelete kupekwa. Baibo ilaamba ayi: ‘Mukabaane cishi pakati ka mikowa yoonse alimwi ashipani kwiinda mukuuma cisolo. Akupa cishi cinene kucipani cinene akwalo kucipani ciniini, nkupa cishi ciniini. Mulaakutambula cishi kwaamba ayi bube buboni bwanu kweelana amishobo alimwi amikwashi ya bashali banu.’ (Shaku. 33:54) Pesule lya kuuma cisolo, lubasu lwa musena talwakalinga kwaalukawo, sombi kukomena kwa musena kwakalinga kwaaluka kweelana akukomena na kuceya kwa mushobo. Aboobo, musena wakapekwa ku bamulunyungu lwakwe Juda ndyewakacanika ayi ngunene abuumbi, bakauceesha kwiinda mukwaabanyaako bamulunyungu lwakwe Simyoni.​—Joshu. 19:9.