CIIYO 01
Ino Baibo Inga Yamucafwa Buyani?
Soonse tulisuni kushiba shiinji pamakani abuumi, kupenga, lufu alimwi asheshi shikacitike kunembo. Alimwi bushiku abushiku tulayeeya pa nsheenga twaciita kwaamba ayi tucane maali akuula shiyandika, na nsheenga twaciita kwaamba ayi tunooba alusangalalo mumukwashi. Bantu baanji besa mukucana kwaamba ayi Baibo taibacafwibo kucana shikumbulo kumiipusho iyandika mubuumi, sombi ilaamba apamakani eenga abacafwa mubuumi. Sa mutoyeeya ayi Baibo inga yacafwa muntu uli woonse?
1. Ino njimiipusho nshi imwi njeenga twacana shikumbulo mu Baibo?
Inga twacana shikumbulo mu Baibo kumiipusho iyandika mbuli: Ino shintu shicite buumi shakabako buyani? Ino nceebonshi ncotwakabetaako? Ino nceebonshi bantu boonse balapenga? Ino nciinshi cicitika na muntu wafwa? Ino nceebonshi pacishi pali nkondo abuumbi? Ino nshiinshi sheshi shikacitike pacishi kunembo? Baibo ilatuyuminisha kucana shikumbulo kumiipusho mbuli yeeyi, alimwi bantu baanji bacana kwaamba ayi shikumbulo shicanika mu Baibo shilacafwa.
2. Ino nshiinshi Baibo nshoyaamba sheenga shatucafwa mubuumi bwesu bwa bushiku abushiku?
Baibo ilatulwiita makani eenga atucafwa. Kucakubonenaako, ilaamba nsheenga mikwashi yacita kwaamba ayi bacane lusangalalo lwancinencine. Ilatulwiita nsheenga twaciita na twalisukama alimwi ambweenga twacana lusangalalo muncito yesu. Mulakwiiya Baibo nshoiisha pamakani aya alimwi amakani amwi aanji mulibuku ili. Mpashi amwebo mulaakusa mukushiba cancine cakwaamba ayi ‘Malembo oonse [na makani oonse ali mu Baibo] . . . alacafwa.’—2 Timoti 3:16.
Libuku ili teshi Baibo. Sombi lyakabambilwa kumucafwa kunyumfwishisha Baibo. Aboobo tutomuyuminisha ayi munobelenga malembo oonse ali mushiiyo, akubona mbwatokweendelana anshemutokwiiya.
AMWIIYILEWO ASHIMWI
Amwiiye Baibo mboyacafwa bantu, mbweenga mwasangalala kwiibelenga alimwi ancocibetele kabotu kucafwikwa kwaamba ayi mwiinyumfwishishe.
3. Baibo inga yatutanjilila
Baibo ili anga ndilaiti linyaka abuumbi. Inga yatucafwa kusala kabotu shakucita akushiba sheshi shikacitike kunembo.
Amubelenge Kulumbaisha 119:105, akubandika miipusho itokonkelaawo:
Ino shikulumbaisha wakalemba lilembo ili wakalinga kwiibona buyani Baibo?
Ino Baibo mulaibona buyani?
4. Baibo inga yatucafwa kucana shikumbulo kumiipusho njeenga katucite
Mwanakashi umwi wakacana shikumbulo mu Baibo kumiipusho yakalinga kumupensha kwa myaaka iinji. Amweebele VIDYO, akubandika miipusho itokonkelaawo.
Kweelana avidyo, ino njimiipusho nshi mwanakashi uyu njaakalinga kucite?
Ino kwiiya Baibo kwakamucafwa buyani?
Baibo ilatuyuminisha kwiipusha miipusho. Amubelenge Mateyo 7:7, akubandika mwiipusho utokonkelaawo:
Ino njimiipusho nshi njemucite mpashi njeenga mwacana shikumbulo mu Baibo?
5. Inga mwasangalala kubelenga Baibo
Bantu baanji balasangalala kubelenga Baibo alimwi itobacafwa. Amweebele VIDYO, akubandika miipusho itokonkelaawo.
Kweelana avidyo, ino bacanike bakalinga kulinyumfwa buyani pamakani akubelenga?
Nabi kwaamba ayi tabanyumfwi kabotu kubelenga, ino nceebonshi balanyumfwa kabotu kubelenga Baibo?
Baibo ilaamba sheenga shatuyuminisha akutucafwa kulangila kunembo. Amubelenge Bene Loma 15:4, akubandika mwiipusho uyu:
Ino mutolinyumfwa buyani pashishomesho shiyuminisha alimwi shipa kulangila shaambwa mu Baibo?
6. Bamwi inga batucafwa kunyumfwishisha Baibo
Kwiilika pakubelenga Baibo palwaabo, baanji bacana kwaamba ayi kubandika abamwi makani amu Baibo kulacafwa. Amubelenge Milimo 8:26-31, akubandika mwiipusho uyu:
Ino nciinshi ceenga catucafwa kunyumfwishisha Baibo?—Amubone vesi 30 a 31.
Musankwa mwine Isopya wakalinga kuyandika lucafwo kwaamba ayi anyumfwishishe Malembo. Bantu baanji munshiku shino balacana ayi kubandika makani amu Baibo abamwi kulacafwa
BANTU BAMWI BALAAMBA AYI: “Kwiiya Baibo nkusowabo ciindi.”
Ino mwebo mutoyeeya buyani? Ino nceebonshi?
CITEENTE CINENE
Baibo ilaamba makani eenga atucafwa mubuumi, kukumbula miipusho iyandika, kwaamba makani ayuminisha akucafwa bantu kulangila.
Kwiindulukaamo
Ino ngamakani nshi acafwa ngeenga twacana mu Baibo?
Ino njimiipusho nshi imwi njeenga twacana shikumbulo mu Baibo?
Ino nshiinshi nsheenga mwasuna kwiiya mu Baibo?
AMULANGWETEEWO ASHIMWI
Amwiiye makani amu Baibo mbweenga amucafwa munshiku shino.
“Njiisho Shamu Baibo—Mbusongo Bucafwa Lyoonse” (Njashi Yamulindilishi No. 1 2018)
Amubone Baibo mboyakacafwa musankwa umwi wakalinga kupenshekwa mumiyeeyo kuswabo kubwanike.
Amubone Baibo nshoyaamba sheenga shacafwa mikwashi.
“Shintu Shili 12 Sheenga Shacafwa Mikwashi” (Sinsimuka! No. 2 2018)
Amwiiye Baibo nshoyaamba pamakani awooyo utokweendelesha cishi.
Ino Ngumulandunshi Ngomweelete Kwiiya Baibo?—Vidyo Yoonse (3:14)