Makani Akusebensesha amu Kabuku Kamabungano Abuumi Anciito

JANUARY 3-9

BUBONI BUCANIKA MUMASWI AKWE LESA | BOOMBOLOSHI 15-16

“Kutashomeka Nkubiibi Abuumbi!”

w12-CG 4/15 9 pala. 4

Kutashomeka Ncitondesho ca Munshiku Shakweelaako!

⁴ Cakutaanguna, amuleke tubandike pali Delila, mwanakashi mubeshi uyo Samusoni ngwaakasuna. Samusoni wakalinga kusunishishi kutanjilila bantu bakwe Lesa, kuya kunkondo akulwana bene Filisiti. Cilyeelete kwaamba ayi bamaami bosanwe babene Filisiti bakalinga kucishi kwaamba ayi Delila taakalinga kumusuniwo Samusoni, aboobo bakamushomesha kumupa maali aanji kwaamba ayi ayubulule kwakalinga kuswa nkusu shakwe Samusoni kwaamba ayi bamucaaye. Ceebo cakusunisha maali Delila wakeelesha mankanda otatwe kwaamba ayi ashibe kwakalinga kuswa nkusu shakwe Samusoni sombi wakaalilwa. Aboobo Delila “ndyaakatolelela kwaamba makani ayo bushiku abushiku” alimwi akumunyengelela “Samusoni wakatentuka cakuyanda kufwa.” Mukweelaako, Samusoni wakalwiita Delila ayi taakwe kuceswaawo kale misusu yakwe alimwi akwaamba ayi na misusu yakwe yaceswa nkusu shakwe shilaakumana. Pesule lyakushiba makani aya, Delila wakafukatisha Samusoni akumooneka pamabelo akwe akumucesa misusu. Lyalo kuswawaawo wakamwaaba kubalwani bakwe, kwaamba ayi bamucite shilishoonse nshebakalinga kusuni. (Boombo. 16:4, 5, 15-21) Delila nshaakacita shakalinga shibiibi abuumbi! Wakaaba muntu wakalinga kumusuni ceebo cakusunishisha maali.

w05-CG 3/1 11 pala. 3

Shiteente Shinene Shitocanika Mulibuku lya Boomboloshi

Boomboloshi 14:16, 17; 16:16. Kukakatisha muntu kwiinda mukulila akutongooka kulanyonyoola bushicibusa.​—Tushimpi 19:13; 21:19.

w12-CG 4/15 11-12 mapa. 15-16

Kutashomeka Ncitondesho ca Munshiku Shakweelaako!

¹⁵ Ino nshiinshi abo bali mucikwati nsheenga bacita kwaamba ayi batolelela kushomeka kuwooyo ngobali akwe mucikwati? Maswi akwe Lesa alaamba ayi: “Kosangalalila mumwanakashi [na mwibayo] ngowakeeba koocili mwanike” alimwi maswi akwe Lesa alaamba ayi: “Sangalala mubuumi bwako amukaako [na mwibayo] uyo ngoosuni.” (Tus. 5:18; Shiku. 9:9) Ndyebatooya cikulu, bantu bali mucikwati balyeelete kucita shoonse nsheenga bacikonsha kwaamba ayi batolelele kusunana akubikilana maano abuumbi. Ici cilasansulula kubikilana maano, kuba aciindi cakuba pomwi, alimwi akusena pafwiifwi ku umwi amubye. Balyeelete kubikila maano kushitilisha cikwati cabo alimwi abushicibusa bwabo a Yehova. Kwaamba ayi ishi shikonsheke balyeelete kwiiya Baibo pomwi, kusebensela pomwi muncito yakushimikila ciindi aciindi alimwi akunoopaila pomwi kwaamba ayi Yehova abape shoolwe.

AMUTOLELELE KUSHOMEKA KULI YEHOVA

¹⁶ Beneklistu bamwi bakacitaawo shilubo shinene aboobo ‘bakalulikwa cankusu kwaamba ayi balulame mulushomo.’ (Taitasi 1:13) Nacibi boobo, shintu shimwi bamwi nshobakalinga kucita shakapa kwaamba ayi bakushikwe mulibungano. Ano abo ‘bakaishikwa kuswa kukululikwa’ uku bakacafwikwa kwaamba ayi bayume lwakumushimu alimwi. (Ebu. 12:11) Ano ino mbuyani na tulicite shikamukowa na shicibusa ngotusuni wakakushikwa mulibungano? Na caba boobo tulyeelete kutolelela kushomeka kuli Lesa, kuteshi kuli shikamukowa na shicibusa uyo. Yehova alisunishishi kubona na tulakonkela mulawo wakwaamba ayi tatweelete kucanika pomwi na kubandika amuntu uliwoonse wakakushikwa mulibungano.​—Amubelenge 1 Bene Kolinto 5:11-13.

Buboni Bwakumushimu

w05-CW 3/15 27 pala. 6

Samusoni Wakakoma Kwiinda Munkusu Shakwe Yehova!

Samusoni wakalinga kushinishite kukumanisha luyando lwakwe lwakulwana abene Filisiti. Wakekala muŋanda ya mufuule ku Gasa kwaamba ayi akumanishe luyando lwakwe lwa kulwana balwani bakwe Lesa. Wakalinga kuyandika musena kwakoona mundabala ya balwani bakwe alimwi musena uyo wakacanika muŋanda ya mufuule. Samusoni taakalinga kucite muyeeyo wakucita bufuule amwanakashi uyo. Wakaswa muŋanda ya mufuule pakati kamashiku akucata shisasa shakumwiinjililo wandabala, akushishuula pomwi ashisamu shobilo mpeeke wakashibika pacifushi akuya mukutantaasho peculu lyakalundu kali pafwiifwi a Ebuloni, ako kali palaale mushinso wamakilomita pafwiifwi a 60. Lesa wakasuminisha nshaakacita alimwi ngowakamupa nkusu shakucita boobo.​—Boomboloshi 16:1-3.

JANUARY 10-16

BUBONI BUCANIKA MUMASWI AKWE LESA | BOOMBOLOSHI 17-19

“Kutakonkela Milawo Yakwe Lesa Kulaleta Mapensho”

it-2-E mape. 390-391

Mika

1. Wakalinga musankwa mwine Efuleemu. Wakapwaya mulawo wanamba 8 pamilawo 10 (Kulo 20:15), ndyakeepila banyina maali asilifa ashika ku 1,100. Ndyaakalyaambilila nshaakacita alimwi akubosha maali ayo, banyina bakaamba ayi: “Kukasha mashingo ngondakashingana kucitika kumwanaangu ndapa maali asilifa aya nemwine kuli Yehova, maali asilifa aya asebenseshekwe kubesa cibumbwabumbwa akucinanika silifa, aboobo ndakupa maali aya.” Mpeeke banyina bakabwesa maali asilifa ali 200 akwaapa shikufula, uyo “wakabesa cibumbwabumbwa akucinanika silifa,” kuswawaawo cibumbwabumbwa ico cakesa mukubikwa muŋanda yakwe Mika. Mika wakalinga kucite ‘ŋanda yabalesa,’ wakapanga cakufwala ca efodi, telafimu alimwi akusala mwanaakwe womwi kwaamba ayi abe mupailishi. Nabi kwaamba ayi wakacita boobo kwaamba ayi alemeke Yehova, nshaakacita shakalinga shibiibi abuumbi, mukwiinga wakapwaya mulawo wakalinga kukasha kulambila shibumbwabumbwa (Kulo 20:4-6) alimwi taakwe kukonkela bubaambo bwakwe Yehova bwakulambila. (Boo 17:1-6; Du 12:1-14) Mukuya kwaciindi Mika wakabwesa Jonasani, mwanaakwe Geshomu, mwishukulu wakwe Mose, kwaamba ayi abe mupailishi mukwiinga wakalinga mwine Lefi. (Boo 18:4, 30) Ceebo cakuyeeya ayi wakwana, Mika wakaamba ayi: “Ano ndashiba kwaamba ayi Yehova utoompa shoolwe.” (Boo 17:7-13) Nacibi boobo, Jonasani taakalinga wamulunyungu lwakwe Aloni alimwi taakalinga kweelela kusebensa ncito ya bupailishi, ico cakeelikaawo pakubisha kwakwe Mika.​—Shaku 3:10.

it-2-E pe. 391 pala. 2

Mika

Ndipakeenda ciindi ciniini, Mika abasankwa bakwe bakakonkela bene Dani. Ndyaakabacana, bene Dani bakamwiipusha nshaakalinga kusuni, mpeeke wakakumbula ayi: “Mwantolela balesa bangu mbondakalipangila alimwi mwanyaya amupailishi wangu nebo taaku ancemwanshiilaawo.” Lyalo bene Dani bakamucenjesha ayi na atolelele kubakonkela akubashupa batoomucaya. Mika ndyaakabona ayi bene Dani bakalinga kucite nkusu kumwiindaawo wakaboolela kuŋanda. (Boo 18:22-26) Kuswaawo bene Dani bakacaya bantu bamundabala ya Laishi akwiitenta, lyalo bakayakaawo ndabala ya Dani pamusena uyo. Jonasani abana bakwe basankwa bakaba bapailishi bamumukowa wine Dani abo bakalinga “kulambila cibumbwabumbwa cakwe Mika kwaciindi coonse musena wakulambililaako Lesa ndyewakalinga kuShilo.”​—Boo 18:27-31.

Buboni Bwakumushimu

w15-CG 12/15 11 pala. 6

Busansulushi bwa Maswi Akwe Lesa Butashupi Kunyumfwisha

⁶ Munshiku shino tulicite bumboni buunji butondesha ayi tulyeelete kusebensesha liina lyakwe Yehova. Mu Baibo ya New World Translation yakasansululwa mu 1984 liina lyakwe Lesa lyakalinga kucanikaamo mankanda 7210, ano mu Baibo yacisungu yakabambululwa mu 2013 liina lyakwe Lesa lilacanika mumavesi amwi 6, ico cisansulula ayi liina lyakwe Lesa lilacanikaamo mankanda 7,216. Mavesi amwi mpobakabika liina lyakwe Lesa ngu 1 Samwelo 2:25; 6:3; 10:26; 23:14, 16 alimwi a Boomboloshi 19:18. Bakeelika liina lyakwe Lesa pa Boomboloshi 19:18 ceebo camakani amwi akale kale amu Baibo bantu beeite ngobakacana. Pamavesi aya amwi bakeelikaawo liina lyakwe Lesa ceebo ca nshobakacana mumabuku akupeta ayo ngobakacana mulweenge lwa mwiinyo.

JANUARY 17-23

BUBONI BUCANIKA MUMASWI AKWE LESA | BOOMBOLOSHI 20-21

“Amutolelele Kusenga Butanjilishi Kuli Yehova”

w11-CG 9/15 32 pala. 2

Amukonkele Cakubonenaako Cakwe Fineyasi Ndyemutokwiinda Mumapensho

Mikowa imwi yabene Isilaeli yakaya mukulwana bene Benjameni, pesule lyakwaamba ayi basankwa bene Gibiya bamumukowa wakwe Benjameni, boona kasuwa wamwine Lefi cakumukakatisha lyalo akumucaya. (Boombo. 20:1-11) Mikowa iyi yakapaila kuli Yehova kwaamba ayi abacaafwe pankondo, nacibi boobo bakakomwa mankanda obilo. (Boombo. 20:14-25) Sa bakayeeya ayi Yehova taakwe kukutika mipailo yabo? Sa ncakwiila Yehova wakasangalala kwaamba ayi bakacitaawo comwi paciibi cakacitika?

w05 3/1 11 pala. 7

Shiteente Shinene Shitocanika Mulibuku lya Boomboloshi

Boomboloshi 20:17-48​—Ino nceebonshi Yehova wakasuminisha bene Benjameni kukoma mikowa iyi imwi mankanda obilo nabi kwaamba ayi bakalinga kweelete kwaanishikwa? Yehova wakasuminisha mikowa iyi ishomeka kukomwa pakutaanguna, mukwiinga wakalinga kusuni kubona na bakalinga kusunishishi kukusha shibiibi shakalinga mu Isilaeli.

w11-CG 9/15 32 pala 4

Amukonkele Cakubonenaako Cakwe Fineyasi Ndyemutokwiinda Mumapensho

Ino nshiinshi nsheenga tweeyawo pamakani aya? Mapensho amwi mulibungano inga atolelela nabi kwaamba ayi bamanene beelesha cankusu kucitaawo comwi alimwi akupaila kuli Lesa kwaamba ayi abacafwe. Na ishi shacitika bamanene balyeelete kwiibaluka maswi Yesu ngakaamba ndyakaamba ayi: “Amutolelele kusenga [na kupaila], lyalo mulaakupekwa; amutolelele kulangoola, lyalo mulaakucana; amutolelele kukonkonsha, lyalo mulaakucalwiitwa.” (Luka 11:9) Nabi kwaamba ayi mupailo waboneka anga wacelwa kukumbulwa bamanene balyeelete kushoma ayi Yehova alaakukumbula mupailo wabo paciindi ceelete

Buboni Bwakumushimu

w14-CG 5/1 11 pala. 4-6

Sa Mulicishi?

Ino shipaya shakuwalisha mabwe shakalinga kusebenseshekwa buyani munkondo?

Defedi wakasebensesha cipaya cakuwalishaako mabwe ndyakacaya Golyati ndundwa minkulwa. Cilyeelete wakeeya kusebensesha cipaya cakuwalishaako mabwe ndyaakalinga mweembeshi wacanike.​—1 Samwelo 17:40-50.

Cipaya cakuwalishaako mabwe cakalinga kutondeshekwa mushipikica shakale kale shabene Ijipiti abene Silya. Cipaya cakuwalishaako mabwe cakalinga kucite kapansha kacipaya na cakufwala alimwi kakalinga kucite ntambo shobilo. Muntu wakalinga kusebensesha cipaya cakuwalishaako mabwe, wakalinga kubika libwe liteshimite na libulungene lilampa masentimita 5 kushika ku 7.5 mulupaya alimwi mpashi lyakalinga kulema magilamu ali 250. Lyalo wakalinga kushungulusha lupaya kacatite kututambo tobilo ico cakalinga kupa kwaamba ayi awale libwe cankusu abuumbi alimwi cakubula kwiinsha.

Beshikukaba shakukaba kaba bakacana ayi ku Middle East kwakalinga mabwe aanji ayo akalinga kusebenseshekwa munkondo. Bashilumamba bacishi kabotu bakalinga kucikonsha kuwaala libwe lyeenga lyacica pamakilomita 160 kushika ku 240 muwoola lyomwi. Bantu beeite balapikisha na cakuwalishaako mabwe cakalinga kucite nkusu bweenka mbuli buta. Nacibi boobo cakuwalishaako mabwe acalo cakalinga kucaya.​—Boomboloshi 20:16.

JANUARY 24-30

BUBONI BUCANIKA MUMASWI AKWE LESA | LUTE 1-2

“Amutolelele Kutondesha Lusuno Lutamaani”

w16-CG.02 10 pala. 5

Amukonkele Baabo Bakalinga Kucite Bushicibusa Buyumu a Yehova

⁵ Beshikamukowa bakwe Lute bakalinga kukala ku Moabu. Aboobo nakwiinga wakaboolela nakwiinga bakamulama, mukwiinga wakalinga kubeshi kabotu bene Moabu, mushobo wabo, alimwi ambobakalinga kukala. Sombi shintu shoonse shakalinga kusa mukuba sheensu na waya ku Betileemu. Alimwi Naomi wakabona ayi teshi akacikonshe kucana musankwa wakweeba Lute na waya anguwe ku Betileemu. Ino nshiinshi Lute nshaakasala kucita? Wakasala bupuseneeko abwakasala Opa. Opa “wakaboolela kubenemishaabo akubalesa bakwe.” (Lute 1:9-15) Nacibi boobo, Lute wakasala kutaboolela kubenemishaabo akubalesa bakubeca.

w16-CG.02 10 pala. 6

Amukonkele Baabo Bakalinga Kucite Bushicibusa Buyumu a Yehova

⁶ Citoboneka ayi Lute wakeeya pali Yehova Lesa kuswa kubeebaye na mpashi kuswa kuli Naomi. Yehova taakalinga anga mbalesa ba bene Moabu. Lute wakashiba ayi wakalinga kweelete kusuna alimwi akulambila Yehova eenka. Aboobo Lute wakasala cabusongo. Wakaambila Naomi ayi: “Bene mishaanu, anebo balaakuba bene misheesu, alimwi Lesa wanu ulaakuba Lesa wangu.” (Lute 1:16) Cilayuminisha kuyeeya palusuno Lute ndwaakalinga kucite pali Naomi. Sombi ciyuminisha abuumbi nkubona lusuno ndwakalinga kucite pali Yehova. Bowasi wakalumba Lute pasheeshi nshaakacita, mukwiinga kucita boobo kwakalingabo anga wakacicila mu mapapaminwa akwe Yehova kwaamba ayi ashitilishikwe. (Amubelenge Lute 2:12.) Maswi ngakaamba Bowasi alatwiibalusha pa twana twa tuyuni mbotucicila mu mapapaminwa akwe nyina kwaamba ayi tushitilishikwe. (Kulu. 36:7; 91:1-4) Yehova wakamushitilisha alimwi wakamupa shoolwe ceebo cakushomeka kwakwe. Lute taakwe kulinyumfwa cibiibi ceebo cakusala kukonkela Naomi.

Buboni Bwakumushimu

w05-CG 5/1 30 pala. 2

Shiteente Shinene Shitocanika Mulibuku lya Lute

Lute 1:13, 21​—Sa Yehova ngowakalengesha buumi bwakwe Naomi kubica alimwi akumuletela mapensho? Sobwe, Naomi taakwe kupa Lesa mulandu ceebo ca shibiibi shakamucitikila. Aboobo ceebo ca shintu shoonse nshaakeendaamo, Naomi wakalinyumfwa ayi Yehova wamusuula. Nceceeco ncakalinyumfwila cibiibi. Kwiilikaawo, munshiku isho kuba abana kwakalinga kubonwa ayi nshoolwe kuswa kuli Lesa alimwi kutashala kwakalinga ndishingo. Naomi mpashi wakalinyumfwa ayi cililuleme kuyeeya ayi Yehova wakamusuula ceebo cakwaamba ayi taakalinga kucitewo beshikulu alimwi bana bakwe basankwa bobilo bakafwa.

JANUARY 31–FEBRUARY 6

BUBONI BUCANIKA MUMASWI AKWE LESA | LUTE 3-4

“Amutolelele Kuba Ampuwo Ibotu”

w12-CW 10/1 22 pala. 5

“Mwanakashi Wakalinga Kucite Mibo Ibotu”

Ncakutatoonsha kwaamba ayi maswi Bowasi ngaakaamba akamuyuminisha abuumbi Lute. Wakaamba ayi: “Yehova aakupe coolwe. Ubu buumi mbowatondesha bweendaawo kubota kwiinda mbowakatondesha bapongoshi bako, ceebo tookwe kuyanda kweebwa kubacikula bwangunyoko, bakandu nabi babile.” (Lute 3:10) Maswi akwaamba ayi “buumi mbowakatondesha bapongoshi bako,” alasansulula lusuno lutamaani Lute ndwakatondesha Naomi ciindi ndyakesabo mucishi ca Isilaeli alimwi akubalama. Lyalo maswi akwaamba ayi “ubu buumi mbowatondesha bweendaawo kubota,” alasansulula ciindi Lute ndyaakasalaawo kweebwa kuli Bowasi muciindi cakweebwa kubacikula bwangu babile na bakandu. Lute taakalinga kusunibo kucitila shibotu Naomi sombi akubeebaye Naomi abo bakalinga kufwite paciindi ico kwaamba ayi liina lyabo litolelele kubaako mu Isilaeli. Aboobo, inga twaboona cakapa kwaamba ayi Bowasi eebe mwanakashi wacanike uyu wakalinga kubikila maano bamwi.

w12-CW 10/1 23 pala. 1

“Mwanakashi Wakalinga Kucite Mibo Ibotu”

Lute alyeelete wakasangalala kuyeya pamaswi Bowasi ngakaamba ayi wakalinga kushibikitwe pakati kabantu ayi ngu “mwanakashi wakalinga kucite mibo ili kabotu”! Ncakutatoonsha kwaamba ayi lusuno ndwaakalinga kucite pali Yehova alimwi akusuna kumusebensela nkokwakapa kwaamba ayi ashibikwe boobo. Alimwi wakalinga kutondesha bubotu akubikila maano kuli Naomi alimwi abantu bakwe, alimwi wakalyaaba kukala buumi bupya mbwaatakalinga kucishi kabotu. Na twakonkela cakubonenaako calushomo lwakwe Lute, tulaakusuna kutondesha bulemu kubantu bamwi ashintu nshebashoma. Na twacita boobo aswebo tulaakushibikwa ayi tulicite mibo ibotu.

w12-CW 10/1 24 pala. 3

“Mwanakashi Wakalinga Kucite Mibo Ibotu”

Bowasi wakeeba Lute. Alimwi tulabelenga ayi: “Yehova wakamulengesha ayi amite akuba amwaana musankwa.” Banakashi bene Betileemu bakapa Naomi shoolwe alimwi akulumbaisha Lute ceebo ca shibotu nshaakacitila Naomi kwiinda sheenga nshaamucitila bana basankwa bali 7. Alimwi tuleeya ayi mwaana musankwa wakwe Lute wakaba mushali mukulukulu wa Mwaami Defedi. (Lute 4:11-22) Lyalo, Defedi wakalinga mushali mukulukulu wakwe Yesu Klistu.​—Mateyo 1:1.

Buboni Bwakumushimu

w05-CG 5/1 32 pala. 4

Shiteente Shinene Shitocanika Mulibuku lya Lute

Lute 4:6​—Ino munshila nshi shikulubula mbwaakalinga ‘kunyonyoola’ buboni bwakwe mbwakapyana? Cakutaanguna na muntu waba mukandu akuulisha buboni bwakwe mbwakapyana, shikulubula wakalinga kweelete kuula musena pamuulo weelene amyaaka yacalaako kwaamba ayi mwaka wa Lwaanguluko ukashike. (Bene Lefi 25:25-27) Kucita boobo kwakalinga kuceeshako mpindu ya musena wakwe. Kwiilikaawo na Lute waba amwaana musankwa, mwaana uyo ngowakalinga kupyana muunda wakoolwa kuteshi beshikamukowa bashikulubula.

FEBRUARY 7-13

BUBONI BUCANIKA MUMASWI AKWE LESA | 1 SAMWELO 1-2

“Amupaile Kuli Yehova Camoyo Woonse”

ia-CG 55 pala. 12

Wakapaila Kuli Lesa Camoyo Woonse

¹² Aboobo Aana ncakubonenaako cibotu pamakani akupaila kubasebenshi boonse bakwe Lesa. Calusuno, Yehova alisuni ayi bantu bakwe banoobandika anguwe cakwaanguluka, kumulwiita shoonse shibasukamika bweenka mbuli mwaana mbwaacita kubashali bakwe bamusuni. (Amubelenge Kulumbaisha 62:8; 1 Bene Tesalonika 5:17.) Kwiinda mukutanjililwa amushimu, mutumwi Pita wakalemba maswi aya ayuminisha aamba pakupaila kuli Yehova ayi: “Amutole kulisukama kwanu koonse kuli nguwe ceebo ngoomulama.”​—1 Pit. 5:7.

w07-CW 3/15 16 pala. 4

Aana Mbwaakaba a Luumuno

Ino nshiinshi nsheenga tweeya pamakani aya? Ndyetutoolwiita Yehova shintu shitusukamika mumupailo, tulyeelete kumulwiita mbotutoolinyumfwa alimwi akumusenga kuswa panshi lya moyo. Na taakuwo nsheenga twaciita kwaamba ayi tumane lipenshi ilyo, tulyeelete kushiya shoonse mumaansaakwe. Kucita boobo ncintu cabusongo.​—Tushimpi 3:5, 6.

Buboni Bwakumushimu

w05-CG 6/1 29 pala. 5

Shiteente Shinene Shitocanika Mulibuku litaanshi lya Samwelo

1 Samwelo 2:10​—Ino nceebonshi Aana ndyaakalinga kupaila wakaamba ayi Yehova ape “nkusu mwaami ngwaakasala” nabi kwaamba ayi paciindi cilya takwakalingaawo mwaami wakalinga kweendelesha bene Isilaeli? Mulawo wakwe Mose wakaambila limwi ayi kunembo bene Isilaeli balaakuba amwaami. (Dutolonomi 17:14-18) Mubushinshimi mbwaakaamba Jakobo ndyaakalinga pafwiifwi kufwa wakaamba ayi: “Nkooli ya bwaami [citondesho ca bweendeleshi] Juda unanoicitebo lyoonse.” (Matalikilo 49:10) Yehova wakaamba pali Saala mushali mukulukulu wabene Isilaeli ayi: “Pakati ka bamulunyungu lwakwe palaakuba abamaami.” (Matalikilo 17:16) Aboobo Aana wakalinga kupailila pa mwaami wakalinga kusa kunembo.

FEBRUARY 14-20

BUBONI BUCANIKA MUMASWI AKWE LESA | 1 SAMWELO 3-5

“Yehova Alayeyelaako Bamwi”

w18-CG.09 24 pala. 3

Ngushinkusu Shoonse Sombi Ulayeyelaako Bamwi

³ Samwelo wakatalika ‘kusebensela Yehova’ pa tente yakubunganinaamo kaacili wacanike. (1 Samwe. 3:1) Bushiku bumwi Samwelo ndyaakaya mukoona, kwakacitika cintu cimwi ncaatakalinga kuyeeyela. (Amubelenge 1 Samwelo 3:2-10.) Wakanyumfwa muntu umwi kamwiita. Wakayeeya ayi ngu Eli Mupailishi Munene wakalinga kumwiita, aboobo cakulibombya wakacicila kulinguwe akumwaambila ayi: “Ndime ngomwalinga kwiita, ndesa.” Sombi Eli wakakaka ayi taakalinga kumwiita. Ishi ndyeshakacitika mankanda aamwi obilo, Eli wakeshiba ayi Lesa ngowakalinga kwiita Samwelo. Aboobo wakalwiita Samwelo bwakukumbula alimwi alakwe wakanyumfwila. Ino nceebonshi Yehova, kwiinda mumunjelo, taakwe kuliyubulula kuli Samwelo ciindi cakutaanguna ndyaakamwiita? Baibo tayaambiwo, nacibi boobo shintu shakakonkelaawo shakatondesha ayi Yehova wakalinga kuyeyelaako Samwelo. Ino twaambilanshi boobo?

w18-CG.09 24 pala. 4

Ngushinkusu Shoonse Sombi Ulayeyelaako Bamwi

⁴ Amubelenge 1 Samwelo 3:11-18. Mulawo wakwe Yehova wakalinga kwaamba ayi baana bakalinga kweelete kulemeka bacinene, bunene bunene mutanjilili. (Kulo. 22:28; Lefi 19:32) Sa mutoyeya ayi Samwelo wakaya kuli Eli macuunsa cuunsa akumulwiita makani aboomboloshi akaswa kuli Lesa cakutaloonda? Sobwe napaceyi! Mukwiinga tulabelenga ayi Samwelo “wakalinga kuloondete kulwiita Eli shacili anga nciloto ico ncaakabaaco.” Nacibi boobo, Lesa wakalinga kutondesha Eli patuba kwaamba ayi wakalinga kwiita Samwelo. Aboobo Eli ngwaakalwiita Samwelo kusansulula nshaakalwiitikwa muciloto. Wakamulwiita ayi, “Utashisi cimwi cili coonse kuli ndime.” Mpeeke Samwelo wakanyumfwila akumulwiita shoonse cakutashisawo nabi paniini.

Buboni Bwakumushimu

w05-CG 6/1 29 pala. 6

Shiteente Shinene Shitocanika Mulibuku litaanshi lya Samwelo

1 Samwelo 3:3​—Sa ncakwiila Samwelo wakoona mumusena Usalalite Kwiindaawo? Sobwe. Samwelo wakalinga mwine Lefi wa mumukowa wiine Koati, abo batakalinga bapailishi. (1 Makani 6:33-38) Aboobo taakalinga kusuminishikwa kusena “muliimfwa lya shintu shisalalite shiindaawo.” (Shakubelenga 4:17-20) Samwelo wakalinga kusuminishikwabo kunjila mulubaansa lwa tente yakulambililaamo. Aboobo, cilyeelete mwaakalinga koona. Citoboneka ayi Eli alakwe wakalinga koona mumusena umwi walubaansa. Maswi akwaamba ayi ‘umo mwakalinga Libokoshi lya Cipangano’ alyeelete alasansulula musena woonse pakalinga tente yakulambililaamo.

FEBRUARY 21-27

BUBONI BUCANIKA MUMASWI AKWE LESA | 1 SAMWELO 6-8

“Ino Mwaami Wanu Ngani?”

it-2-E 163 pala. 1

Bwaami Bwakwe Lesa

Bakasenga Kuba a Mwaami. Pafwiifwi amyaaka 400 kuswa ciindi ndyebakaswa ku Ijipiti alimwi ndipakeenda myaaka iindilila 800 kuswa ciindi Lesa ndyaakapangana cipangano a Abulaamu, bene Isilaeli bakasenga kuba a mwaami wakubatanjilila bweenka mbuli mishobo imwi yakalinga kucite bamaami. Kusenga kwabo kwakatondesha ayi bakaka Yehova kwaamba ayi anoobatanjilila mbuli mwaami. (1Sa 8:4-8) Ncakwiila bantu bakalinga kulangila kuba a bwaami bweshi bukabikwe a Lesa kweelana ambwakashomesha Abulaamu alimwi a Jakobo. Bakalinga kucite kulangila uku ceebo cabushinshimi Jakobo mbwaakaamba pali Juda ndyaakalinga pafwiifwi kufwa (Mtl 49:8-10), maswi akwe Yehova kubene Isilaeli pesule lyakulonga (Kulo 19:3-6), Mumulawo wacipangano (Du 17:14, 15), alimwi a mumaswi Lesa ngaakalengesha mushinshimi Balamu kwaamba (Shak. 24:2-7, 17). Aana, banyina Samwelo, abalo bakaamba pa kulangila uku mumupailo. (1Sa 2:7-10) Nacibi boobo, Yehova paciindi ico kaatana kuyubulula ‘makani abushishi’ aamba pa Bwaami alimwi aciindi bwaami ubu ndyeshi bukatalike kweendelesha, mbweshi bukabe alimwi ankweshi bukanookweendelesha—na pacishi capanshi nabi kwiculu. Aboobo bantu bakatondesha kulisumpula ndyebakasenga kuba amwaami paciindi ici.

w11-CG 4/1 29 pala. 2

Wakatolelela Kuliyumya Nabi Ndyaakalinga Kwiinda Mumapensho

Pesule lyakwaamba ayi Samwelo walwiita Yehova makani aya mumupailo, amunyumfwe Yehova mbwaakalwiita Samwelo: “Nyumfwila shoonse bantu nsheenga baamba kuli ndiwe. Tabatookaka ndiwe, sombi nebo. Ndime bakaka kunoocili mwaami wabo.” Maswi aya alyeelete akamuyuminisha abuumbi Samwelo. Nacibi boobo maswi aya akatondesha ayi bantu bakacitila Lesa Shinkusu shoonse cintu cibiibi abuumbi. Yehova wakalwiita mushinshimi Samwelo kwaamba ayi acenjeshe bene Isilaeli shamapensho ngeshi bakacane ceebo cakusala kuba amwaami. Samwelo ndyaakabacenjesha, bakatolelela kwaamba ayi: “Sobwe, swebo tulisunibo mwaami.” Ceebo cakwaamba ayi Samwelo lyoonse wakalinga kunyumfwila Lesa, wakaya akunanika mwaami, Yehova ngwakasala.​—1 Samwelo 8:7-19.

w10-CG 1/15 30 pala. 9

Yehova Ngoweelela Kweendelesha!

⁹ Shintu shakacitika shakatondesha ayi Yehova nshaakaamba nshancine. Bene Isilaeli bakacana mapensho anene abuumbi ceebo ca kweendeleshekwa amuntu, bunene bunene na mwaami taakalinga kushomeka. Na twabona cakubonenaako cabene Isilaeli tulanyumfwishisha capa kwaamba ayi mfulumeende sha bantu shaalilwe kumana mapensho. Ncakwiila beendeleshi bamwi balasenga shoolwe kuswa kuli Lesa kwaamba ayi abacafwe kuleta luumuno. Ano sa Lesa inga wapa shoolwe bantu abo bakaka kunyumfwila bweendeleshi bwakwe?​—Kulu. 2:10-12.

Buboni Bwakumushimu

w02-CG 4/1 22 pala. 13

Ino Nceebonshi Mulyeelete Kubombekwa?

¹³ Muntu alyeelete kusanduka kaatana kubombekwa mbuli womwi wa Bakamboni Bakwe Yehova. Alyeelete kulisalila eenka kwaamba ayi asanduke akukonkela Yesu camoyo woonse. Bantu aba balacileka kucita shintu shibiibi nshobakalinga kucita kalekale, akutalika kucita shintu Lesa nshaabona ayi shibotu. Mumalembo maswi aciEbulu alimwi aciGiliki aamba pa kusanduka, inga asansulula kupiluluka. Ici cilatondesha kupiluluka kuli Lesa kuswa kushintu shibiibi. (1 Baami 8:33, 34) Kusanduka kuleelikawo ‘kucita shintu shitondesha ayi muntu wakaana cancinencine.’ (Milimo 26:20 Muntu alayandika kucileka bupailishi bwakubeca, kukonkela milawo yakwe Lesa akulyaaba camoyo woonse kuli Yehova. (Dutolonomi 30:2, 8-10; 1 Samwelo 7:3) Kusanduka kulacafwa muntu kwaalula mbwayeya, mbwaabona shintu alimwi ashintu nshaasuni kucita. (Esekelo 18:31) Muntu alapiluluka na wacileka kucita shintu shibiibi alimwi akufwala buntu bupya.​—Milimo 3:19; Bene Efeso 4:20-24; Bene Kolose 3:5-14.

FEBRUARY 28–MARCH 6

BUBONI BUCANIKA MUMASWI AKWE LESA | 1 SAMWELO 9-11

“Pakutaanguna Saulo Wakalinga Muntu Uliceesha Alimwi Ulibombya”

w20.08 10 pala. 11

Amweende a Lesa Mukulibombya Akuliceesha

¹¹ Amuyeye shakacitikila Mwaami Saulo. Kaatana kuba Mwaami, Saulo wakalinga musankwa wacanike ulibombya. Wakalinga kucishi kabotu nsheenga wacikonsha kucita ansheenga taacikoonshi, alimwi wakakaka kusumina mikuli imwi inene. (1 Samwe. 9:21; 10:20-22) Ano mukuya kwaciindi, Saulo wakatalika kulinyumfwa akucita shintu nshaatakwe kupekwa nkusu. Wakatalika kucita boobo pesule lyakuba mwaami. Paciindi cimwi wakaalilwa kukalika moyo ndyaakalinga kulindila mushinshimi Samwelo. Muciindi cakulibombya akucinka manungo muli Yehova kwaamba ayi atoopulusha bantu bakwe, Saulo wakabenga mulambu wakutenta nabi kwaamba ayi taakwe kupekwa nkusu shakucita boobo. Aboobo Yehova wakamukaka alimwi mukuya kwaciindi wakamukusha pa bwaami. (1 Samwe. 13:8-14) Inga cabota kwiiyako ku cakubonenaako ici, akuleya kucita shintu nshetutana kupekwa nkusu.

w14-CG 3/15 9 pala. 8

Mbweenga Twatolelela Kuba Amushimu Wakulyaaba

⁸ Shakacitikila Saulo Mwaami wabene Isilaeli shilatwiisha ayi kulisuna inga kwapa kwaamba ayi twaalilwe kulyaaba. (1 Samwe. 9:21) Pakutaanguna Saulo wakalinga muntu uliceesha alimwi ulibombya. Wakakaka kwaanisha bene Isilaeli bakalinga kwaamba shibiibi pa buleelo bwakwe nabi kwaamba ayi wakalinga kucite nkusu shakucita boobo mukwiinga wakalinga mwaami Lesa ngwakasala. (1 Samwe. 10:27) Mwaami Saulo wakasumina kukonkela butanjilishi bwa mushimu usalashi wakwe Lesa ciindi ndyaakatanjilila bene Isilaeli kulwana bene Amoni. Kuswawaawo, cakuliceesha wakalumbaisha Yehova ceebo cakukoma munkondo iyi.​—1 Samwe. 11:6, 11-13.

w95-E 12/15 10 pala. 1

Bene Amoni Bakabooshesha Cibiibi Ndibakatondeshekwa Nkumbu

Bene Amoni alimwi bakabooshesha cibiibi ndibakatondeshekwa nkumbu shakwe Yehova. Yehova taana kusuulabo cibiibi ici ncebakacita. “Saulo ndyaakanyumfwa boobo Mushimu wakwe Lesa wakamuselukila cankusu, mpeeke wakakalala abuumbi [pali Naashi].” Kwiinda mukutanjililwa amushimu wakwe Lesa, Saulo wakabunganya bashilumamba bali 330,000 abo bakaya mukulwana bene Amoni ‘akubapalanganya cakwaamba ayi umwi aumwi wakalinga kuya cicicabo eenka.’​—1 Samwelo 11:6, 11.

Buboni Bwakumushimu

w05-CG 6/1 30 pala. 8

Shiteente Shinene Shitocanika Mulibuku litaanshi lya Samwelo

1 Samwelo 9:9​—Ino maswi akwaamba ayi “mulaluki, wakalinga kwiitwa ayi shikubona alyeelete alasansulula nshi”? Cilyeelete maswi aya akalinga kusansulula ayi bashinshimi ndyebakalinga kuya bufula muciindi cakwe Samwelo alimwi amuciindi ca bamaami bene Isilaeli, liswi lyakwaamba ayi “shikubona” lyakacileka kusebenseshekwa bunene, aboobo bakatalika kusebensesha liswi lyakwaamba ayi “mulaluki.” Citoboneka ayi Samwelo ngowakalinga mushinshimi wakutaanguna pamulongo wa bashinshimi.​—Milimo 3:24.