Watchtower LAIBULALI YAPA INTANETI
Watchtower
LAIBULALI YAPA INTANETI
Cilenje
  • BAIBO
  • MABUKU
  • MABUNGANO
  • mwbr22 May mape. 1-10
  • Makani Akusebensesha amu Kabuku Kamabungano Abuumi Anciito

Taakuwo vidyo itondesha nshemwasala.

Cabica, vidyo yaala kutalika.

  • Makani Akusebensesha amu Kabuku Kamabungano Abuumi Anciito
  • Makani Akusebensesha amu Kabuku Kamabungano Abuumi Alimwi Anciito—2022
  • Tumitwi Tuniini
  • MAY 2-8
  • MAY 9-15
  • MAY 16-22
  • MAY 23-29
  • MAY 30–JUNE 5
  • JUNE 6-12
  • JUNE 13-19
  • JUNE 20-26
  • JUNE 27–JULY 3
Makani Akusebensesha amu Kabuku Kamabungano Abuumi Alimwi Anciito—2022
mwbr22 May mape. 1-10

Makani Akusebensesha amu Kabuku Kamabungano Abuumi Anciito

MAY 2-8

BUBONI BUCANIKA MUMASWI AKWE LESA | 1 SAMWELO 27-29

“Defedi Mbwakalinga Kulwana Nkondo”

it-1-E 41

Akishi

Mankanda obilo Defedi ndyaakalinga kucica Mwaami Saulo, wakayuba mumusena wakalinga kweendeleshekwa a Mwaami Akishi. Ciindi cakutaanguna cakalinga ciindi Defedi ndyaakalicinkusha ceebo cakuyeeyelwa kuba mulwani aboobo Mwaami Akishi wakamuleka ayi aye. (1Sa 21:10-15; Kulu 34: Maswi ali peculu; 56: Maswi ali peculu) Ciindi cabili cakalinga nciindi Defedi ndyaakalinga abashilumamba alimwi amikwashi yabo, Mwaami Akishi ndyaakamulwiita kuya mukukala ku Sikilagi. Kwamwaaka alimwi amyeenshi yone njobakekala kumusena uku, Akishi wakalinga kubona anga Defedi abashilumamba bakwe, batolwana mandabala amu Judeya. Sombi Defedi wakalinga kulwana bene Geshuli, bene Gesi abene Amaleki alimwi akubanyaya shintu. (1Sa 27:1-12) Defedi wakacenjeeka Akishi cakwaamba ayi Akishi wakamusala kuba shikumulindilila bene Filisiti ndyebakalinga kulibambila kuya mukulwana mwaami Saulo. Sombi pesule lyakwaamba ayi bakumanya ‘bamaami bamwi’ ba bene Filisiti, Defedi abashilumamba bakwe bakabalwiita ayi baboolele ku Sikilagi. (1Sa 28:2; 29:1-11) Defedi ndyaakaba Mwaami alimwi apesule lyakulwana bene Gati, citoboneka ayi Akishi tabakwe kumucayaawo. Alimwi wakalingaako ciindi Solomoni ndyaakaba mwaami.​—1Ba 2:39-41; amubone palembetwe ayi GATH.

w21.03 4 ¶8

Nobamakwesu Bacanike—Ino Nshiinshi Nsheenga Mwaciita Kwaamba ayi Bamwi Banoomushoma?

8 Amuyeeye lipensho limwi Defedi ndyaakeendaamo. Ndyaakananikwa kuba mwaami, wakalinga kweelete kulindila kwaciindi cilaamfu kwaamba ayi atalike kweendelesha mbuli mwaami waba Juda. (1 Samwe. 16:13; 2 Samwe. 2:3, 4) Ino nciinshi cakamucafwa kulindila cakukalika moyo? Muciindi cakulefuka, Defedi wakabikila maano kushintu nshaakalinga kucikonsha kucita. Kucakubonenaako, Defedi ndyaakalinga ku Filisiti paciindi ndyaakalinga kucica mwaami Saulo, wakasebensesha ciindi ici kulwana balwani ba bene Isilaeli. Kwiinda mukucita boobo wakashitilisha musena woonse wa bene Isilaeli.​—1Samwe. 27:1-12.

it-2-E 245 pala. 6

Bubeshi

Nabi kwaamba ayi Baibo ilakasha bubeshi bweenga bwanjisha muntu mumapensho, tacisansululi ayi muntu alyeelete kuyubulula makani ancine kubantu mbateelete kulwiita. Yesu wakaamba ayi: “Mutapi bakabwa shintu shisalalite, mukwiinga inga bamupilukila bamuluma. Mutapi nkumba shintu shamakwebo ceebo inga shalyatolobo myeendo.” (Mt 7:6) Nceceeco Yesu cimwi ciindi taakalinga kwaamba makani oonse nabi kwaamba shikumbulo kumiipusho imwi na kucita boobo inga kwaleta mapensho. (Mt 15:1-6; 21:23-27; Jo 7:3-10) Alimwi ubu mbotweelete kubona shakacita Abulaamu, Isaki, Laabu alimwi a Elisha ciindi ndyebatakwe kuyubulula makani ancine kubantu batakalinga kulambila Yehova.​—Mtl 12:10-19; Mtl. 20; 26:1-10; Jos 2:1-6; Jem 2:25; 2Ba 6:11-23.

Buboni Bwakumushimu

w10-CG 1/1 20 mapa. 5-6

Sa Bafu Inga Bacafwa Boomi?

Amuyeeye paceeci. Baibo ilaamba ayi na muntu wafwa alaboolela kubulongo alimwi miyeeyo yakwe ilamana. (Kulumbaisha 146:4) Saulo alimwi a Samwelo bakalinga kucishi kwaamba ayi Lesa wakakasha kubandika amishimu. Nceceeco pakutaanguna Saulo ngwaakalinga kunembo kutanda bantu baamba amishimu!​—Bene Lefi 19:31.

Alimwi amuyeeye pamakani aya. Na Samwelo muntu wakalinga kushomeka wakalinga muumi mbuli mushimu, sa nakwinga wakapwaya mulawo wakwe Lesa akubandika abantu baamba a mushimu kwaamba ayi abonane a Saulo? Yehova wakakaka kubandika a Saulo. Sa muntu ubandika amishimu inga wakakatisha Lesa shinkusu shoonse kubandika a Saulo kwiinda muli Samwelo uyo wakalinga kufwite? Sobwe napaceyi. Ncakutatoonsha kwaamba ayi Samwelo uyu taakalinga mushinshimi wakwe Lesa ushomeka. Wakalinga mushimu—na shikaswa uyo wakalinga kulitondesha kuba anga ngu Samwelo.

MAY 9-15

BUBONI BUCANIKA MUMASWI AKWE LESA | 1 SAMWELO 30-31

“Amuliyumye Kwiinda Muli Yehova Lesa Wanu”

w06-CG 8/1 30 pala. 12

Amuloonde Yehova kwaamba ayi Mube a Lusangalalo!

12 Boowa Defedi mbwaakalinga kucite pali Yehova, bwakamucafwa kuleya kucita shintu shibiibi. Alimwi bwakamucafwa kucita shintu cabusongo ndyaakalinga mubukaalo buyumu. Kwamwaaka womwi alimwi amyeenshi yone, Defedi alimwi abashilumamba bakwe bakaya mukukala ku Sikilagi mushi wa bene Filisiti ndyebakalinga kucica Mwaami Saulo. (1 Samwelo 27:5-7) Paciindi cimwi basankwa ndyebakaswaamo mumushi, bene Amaleki bakesa akutenta ndabala iyo alimwi akubwesa banakashi bakwe Defedi alimwi ababashilumamba bakwe, baana alimwi ashifubwa. Ndyebakaboola alimwi akubona shakacitika, Defedi alimwi abashilumamba bakwe bakalila. Bashilumamba bakwe Defedi bakakalala abuumbi cakwaamba ayi bakalinga kusuni kumucaya kwiinda mukumuwaala mabwe. Nabi kwaamba ayi Defedi wakalinyumfwa cibiibi abuumbi, wakatolelela kuliyumya. (Tushimpi 24:10) Ceebo cakuloonda Lesa wakatolelela kushoma Yehova alimwi wakaliyumya kwiinda munkusu shakwe Yehova Lesa wakwe. Kwiinda mulucafwo lwakwe Yehova, Defedi alimwi abashilumamba bakwe bakacikonsha kukoma bene Amaleki alimwi akuboosha shintu shoonse nshobakalinga babwesa.​—1 Samwelo 30:1-20.

w12-CG 4/15 30 pala. 14

Yehova Alatushitilisha Kwaamba ayi Tukapuluke

14 Defedi wakeenda mumapensho aanji abuumbi mubuumi bwakwe. (1 Samwe. 30:3-6) Baibo ilaamba ayi Yehova wakalinga kucishi Defedi mbwaakalinga kulinyumfwa. (Amubelenge Kulumbaisha 34:18; 56:8.) Lesa alicishi aswebo mbotulinyumfwa. Na twalefuka nabi kulisukama, Yehova alasena pafwiifwi andiswe. Na twashiba kwaamba ayi Yehova alasena pafwiifwi andiswe, tulaba alusangalalo bweenka Defedi mbwaakaba alusangalalo. Wakeemba ayi: “Ndanokondetwe alimwi ndanosangalete ceebo calusuno lwanu lutamaani. Ncakwiila ndimwe mubona mapensho angu alimwi ndimwe mwishi kupenga kwa moyo wangu.” (Kulu 31:7) Yehova taeelibo pakubona mapensho esu, sombi alatucafwa akutuyuminisha kwiinda mumabungano esu a Bwineklistu.

Buboni Bwakumushimu

w05-CG 3/15 32 pala. 8

Shiteente Shinene Shitocanika Mulibuku lya 1 Samwelo

1 Samwelo 30:23, 24. Cakusala ici, ico citokweendelana amaswi ngotucana palilembo lya Shakubelenga 31:27, cilatondesha ayi Yehova alabikila maano kubaabo basebensa ncito shakucafwilisha mulibungano. Aboobo cintu coonse ncotucita tulyeelete ‘kucicita a moyo womwi anga tutocitila Yehova kuteshi bantu.’​—Bene Kolose 3:23.

MAY 16-22

BUBONI BUCANIKA MUMASWI AKWE LESA | 2 SAMWELO 1-3

“Nsheenga Tweeya Kuswa ku ‘Buta’”

w00-CG 7/1 9 pala. 9

Munoolemeka Baabo Bamutanjilila

9 Sa Defedi wakalinyufwa cibiibi ndyaakalinga kupenshekwa. Defedi wakapaila kuli Yehova ayi: ‘Bantu batashinshikili batofwima buumi bwangu.’ (Kulumbaisha 54:3) Wakapaila kuli Yehova kuswa panshi lya moyo ayi: ‘Noba Lesa bangu amumfuune kuswa kubalwani bangu, basankwa babiibi myoyo balibungabunga mukupinga ndime. Nacibi boobo, taaku cibiibi nabi mulandu ngondakacita nobaami ba Lesa. Kutaaku acilubo ncendakacita batoopilingana akunoolumbila kulwana. Amunyamuke ono muse muncaafwe akubona citoocitika.’ (Kulumbaisha 59:1-4) Sa amwebo mwakalinyumfwaawo kale boobo, kwaamba ayi taaku cibiibi ncomwacitila muntu utoomutanjilila sombi lakwe watolelela kumupensha? Defedi wakatolelela kumutondesha bulemu Saulo. Saulo ndyaakafwa, Defedi taakwe kusangalala sobwe sombi wakeemba lwiimbo lwakutondesha buumba mbwaakalinga kucite. Wakalemba ayi: “Saulo a Jonasani bakalinga bantu bakondelesha alimwi basunikwi. Basankwa bacabeene anga ngumumbankwashi. Bacite nkusu shiinda nkusu sha nkalamu. Nobanakashi bene Isilaeli, amulile Saulo.” (2 Samwelo 1:23, 24) Nabi kwaamba ayi defedi wakacitilwa shibiibi kuli Saulo, wakatondesha cakubonenaako cibotu abuumbi cakutondesha bulemu kumuntu wakasalwa a Yehova.

w21.01 22 mapa. 7, 8

Amutolelele Kusunana Abuumbi

7 Mpashi inga twakankamana na twayeeya Jonasani a Defedi mbobakalinga kunyumfwana abuumbi, mukwiinga kuli shakalinga kweelete kupa kwaamba ayi batabi beshicibusa. Kucakubonenaako, Jonasani wakalinga munene pali Defedi mpashi amyaaka 30. Naakwiinga wakalinga kusuni, Jonasani naakwiinga wakayeeya ayi inga taabi shicibusa a Defedi mukwiinga wakalinga mwanike abuumbi kuli nguwe alimwi utacishi shiinji. Nacibi boobo, ubu teshi mbwaakalinga kuyeeya. Wakalinga kumulemeka abuumbi Defedi.

8 Jonasani naakwiinga wakanyumfwila munyono Defedi. Mbuli mwaana wa Mwaami Saulo, naakwiinga wakayumabo ayi ngoweelete kupyana baishi pacuuna ca bwaami. (1 Samwe. 20:31) Sombi Jonasani wakalinga muntu uliceesha, alimwi ushomeka kuli Yehova. Aboobo wakaba kulubasu lwakwe Defedi uyo Yehova ngwakasala kuba mwaami kunembo. Wakalinga kushomeka kuli Defedi nabi kwaamba ayi ici cakakalasha baishi ba Saulo.​—1 Samwe. 20:32-34.

Buboni Bwakumushimu

it-1-E 369 pala. 2

Mukwesu

Liswi lyakwaamba ayi ‘mukwesu’ lilasebenseshekwa akubantu bacatene alimwi basuni kukumanisha cintu comwi. Kucakubonenaako, mwaami Ilamu waku Taya, wakeeta Mwaami Solomoni ayi ngumukwabo kuteshibo ceebo cakwaamba ayi boonse bobilo bakalinga baami sombi aceebo cakwaamba ayi boonse bobilo bakasebensela pomwi kubamba shisamu alimwi ashintu shimwi shakusebensesha pakuyaka Tempele. (1Ba 9:13; 5:1-12) Defedi wakalemba maswi akwaamba ayi: ‘Amubone mbocibete cibotu alimwi cisangalasha kwaamba ayi bamakwesu kabekala pomwi mulucatano.’ Kusansulula ayi bantu tababibo bacatene alimwi akukala muluumuno ceebo cakwaamba ayi mbamukowa lwakumubili. (Kulu 133:1) Kuba aluyaando lwakusuna kucita cintu comwi nkwakapa Defedi kwaamba ayi Jonasani ayi ngumukwabo.​—2Sa 1:26.

MAY 23-29

BUBONI BUCANIKA MUMASWI AKWE LESA | 2 SAMWELO 4-6

“Munooloonda Yehova Munshila Yeelete Akuleya Kucita Shintu Sheenga Shamukalasha”

w05-CG 5/15 9 pala. 8

Shiteente Shinene Shitocanika Mulibuku lya 2 Samwelo

2 Samwelo 6:1-7. Na kwaamba ayi muyeeyo Defedi ngwaakalinga kucite wakalingabo kabotu, wakapwaya mulawo kwiinda mukunyamuna libokosi lya cipangano alimwi ncaakacita cakaleta mapensho. (Kulonga 25:13, 14; Shakubelenga 4:15, 19; 7:7-9)[10] Alimwi ncaakacita Usa cakweelesha kucata kulibokosi lya cipangano cilatondesha ayi miyeeyo ili kabotu tayaaluli nshaasuni Yehova.

w05-CG 2/1 32 pala. 20

Yehova Alacita Shiluleme Lyoonse

20 Amushibe kwaamba ayi Usa alyeelete wakalinga kweeshi kabotu makani aya. Libokoshi lya cipangano lyakalinga kutondesha Yehova ali pakati kabo. Mulawo wakalinga kwaamba ayi taakuwo muntu utana kusuminishikwa wakalinga kweelete kucata kulibokosi lya cipangano. Muntu uliwoonse weenga wacita boobo wakalinga kweelete kucaikwa. (Shakubelenga 4:18-20; 7:89) Aboobo kulonsha libokosi lya cipangano wakalinga mukuli unene abuumbi. Usa wakalinga mwine Lefi (sombi taakalinga mupailishi) aboobo alyeelete wakalinga kuushi mulawo. Kwiilikaawo, libokoshi lya cipangano lyakalinga kulaminwa muŋanda ya baishi. (1 Samwelo 6:20–7:1) Alimwi lyakalaminwa muŋanda ya baishi kwamyaaka 70 kushikila Defedi ndyaakasalaawo kulilonsha. Kuswabo kubwanike Usa alyeelete wakalinga kwiishi milawo yakalinga kwaamba palibokoshi lya cipangano.

w05 2/1 32 pala. 21

Yehova Alacita Shiluleme Lyoonse

21 Kweelana ambotwaambaawo, Yehova alashiba shili mumoyo wa muntu. Mukwiinga Baibo ilaamba ayi Usa taakwe kulemeka mulawo wakwe Lesa, Yehova alyeelete wakabona ayi Usa alicite miyeeyo ibiibi nabi kwaamba ayi taikwe kulembwa mu Baibo. Sa Usa wakalinga muntu ulisumpula alimwi watakalinga kusuni kukonkela milawo? (Tushimpi 11:2) Sa kutanjilila cikoci cakalinga kunyamwite libokosi lya cipangano ilyo lyakalinga kulaminwa kuŋanda ya baishi kwakamupa kulibona ayi ulayandika abuumbi? (Tushimpi 8:13) Sa Usa wakalinga kucite lushomo luniini cakwaamba ayi wakalinga kubona anga Yehova inga taashitilishi libokoshi lya cipangano ilyo lyakalinga kutondesha ayi Yehova ali pakati kabo? Mulimoonse mweenga cabeta, inga twashoma cakutatonsha kwaamba ayi Yehova alacita shiluleme lyoonse. Alyeelete kuli ncaakabona mumoyo wakwe Usa ico cakapa kwaamba ayi amoomboloshe peenkaapo.​—Tushimpi 21:2.

Buboni Bwakumushimu

w96-CG 4/1 30 pala. 1

Amutule Nshemulisukama Mumaansa Akwe Yehova

Defedi alakwe wakalinga kucite mulandu pasheeshi shakacitika. Nshaakacita shilatondesha ayi nabibo bantu bacite bushicibusa buyumu a Yehova cimwi ciindi inga bacita shibiibi ndyebapolelwa mapensho. Pakutaanguna Defedi wakakalala, lyalo mukweelaako wakaloonda. (2 Samwelo 6:8, 9) Bushicibusa bwakwe buyumu a Yehova bwakeeleshekwa abuumbi. Defedi taakwe kutula kulisukama kwakwe mumaansa akwe Yehova ndyaakaalilwa kukonkela milawo yakwe. Sa shintu shamushobo uyu shilacitika akulindiswe cimwi ciindi? Sa tulapa mulandu Yehova na twacana mapensho ceebo cakutakonkela nshaatulwiita?​—Tushimpi 19:3.

MAY 30–JUNE 5

BUBONI BUCANIKA MUMASWI AKWE LESA | 2 SAMWELO 7-8

“Yehova Wapangana Cipangano a Defedi”

w10-CG 4/1 20 pala. 3

“Bwaami Bwako Bulaakwikala Kwamuyayaya”

Yehova wakakondwa abuumbi anshaakalinga kusuni kucita Defedi. Alimwi kweelana a bushinshimi Lesa wakapangana cipangano a Defedi ayi wamulunyungu lwakwe alaakuba Mwaami kwamuyayaya. Natani wakalwiita Defedi cishomesho Lesa ncakaamba ayi: ‘Bamulunyungu lwako balaakunoolikobo lyoonse. Alimwi ndaakulengesha Bwaami bwako kwikala muyayaya. Buleelo bwako teshi bukamaneewo.’ (2Sa 7:16) Ino ngani wakalinga kusa mukuba Mwaami kwamuyayaya?​—Kulumbaisha 89:20, 29, 34-36.

w10-CG 4/1 20 pala. 4

“Bwaami Bwako Bulaakwikala Kwamuyayaya”

Yesu waku Nasaleti wakalinga wamulunyungu lwakwe Defedi. Munjelo ndyaakalinga kwaamba shakushalwa kwakwe Yesu wakaamba ayi: ‘Yehova alaakumupa Bwaami bweenka bwakalinga kucite Defedi Ishi mukulukulu. Ulaakuba Mwaami wamushobo wakwe Jakobo alimwi Bwaami bwakwe teshi bukamaneewo.’ (Luka 1:32, 33) Aboobo cipangano Yehova ncaakapangana a Defedi cakalinga kusa mukukumanishikwa muli Yesu Klistu. Mukwiinga Yesu taakwe kusalwa a bantu kuba Mwaami, aleelela kweendelesha kwamuyayaya kweelana a Lesa mbwaakashomesha. Tutaluubi kwaamba ayi shishomesho shakwe Lesa lyoonse shilakumanishikwa.​—Isaya 55:10, 11.

w14-CG 10/15 10 pala. 14

Tunoshoma mu Bwaami bwakwe Lesa abuumbi

14 Amuyeeye Yehova nshaakashomesha Mwaami Defedi, kwiinda mucipangano cakwe Defedi. (Amubelenge 2 Samwelo 7:12, 16.) Defedi ndyaakalinga kweendelesha ku Jelusalemu mbuli Mwaami, Yehova wakamushomesha ayi Mesiya alaakushalilwa mulunyungu lwakwe. (Luka 1:30-33) Kwiinda mucipangano ici Yehova wakatondesha patuba ayi uyo eshi akapyane Defedi ngweshi akeelele kuba Mwaami wa Bwaami bwabu Mesiya. (Ese. 21:25-27) Kwiinda muli Yesu Bwaami bwakwe Defedi ‘bulaakukala kwamuyayaya.’ Ncakwiila ‘bamulunyungu lwakwe Defedi, balaakunooliikobo kwalyoonse alyoonse. Cuuna ca Bwaami bwakwe cilaakukalilila pameenso angu bweenka mbuli lisuba.’ (Kulu. 89:34-37) Ncakwiila Bwaami bwa Bumesiya teshi bukabiceewo alimwi nsheshi bukacite shilaakunoliiko kwamuyayaya!

Buboni Bwakumushimu

it-2-E 206 pala. 2

Inshiku Shakweelaako

Bushinshimi Bwakwe Balamu. Cakalinga nciindi bene Isilaeli kabatana kunjila mucishi cakashomeshekwa, ciindi mushinshimi Balamu, ndyaakalwiita Balaki, mwaami wabene Moabu ayi: “Ntokucenjeshaako pashintu isho, bene Isilaeli nsheshi bakacite kubantu bako, munshiku shakweelaako. . . . Nyenyeenshi ilaakuswa mubamulunyungu bakwe Jakobo, nkokwaamba ayi mwaami ulaakuswa mubene Isilaeli, ulaakukoma bamatanjilili babene Moabu, akunyonyoola bene Seti boonse cakumaninina.” (Shaku 24:14-17) Mulubasu lwakutaanguna lwakukumanishikwa kwa bushinshimi ubu, nyenyeenshi yakalinga kwiimikaninaako mwaami Defedi, uyo wakakoma bene Moabu boonse. (2Sa 8:2) Mukukumanishikwa kwa bushinshimi ubu, ‘inshiku shakweelaako’ shakatalika ciindi Defedi ndyakaba mwaami. Mukwiinga Defedi uleemikaninaako Yesu mbuli Mwaami wa bumesiya, bushinshimi ubu, bulaamba pali Yesu, ciindi ndyeshi akakome balwani bakwe. Defedi wakatondesha lusuno lutamaani.​—Isa 9:7; Kulu 2:8, 9.

JUNE 6-12

BUBONI BUCANIKA MUMASWI AKWE LESA | 2 SAMUEL 9-10

“Defedi Wakatondesha Lusuno Lutamaani”

w06-CW 6/15 14 pala. 6

Inga Mwaba Alusangalalo

Defedi wakaamba ayi, ‘Ulicite coolwe muntu uyo uyeyelaako bakandu. Alimwi wakatolelela kwaamba ayi, Yehova ulaakumufuna muciindi camapensho, alimwi alakwaamba ayi alisangalete.’ (Kulumbaisha 41:1, 2) Lusuno Defedi ndwaakatondesha Mefibosheti, uyo wakalinga mulema, alimwi mwanaakwe Jonasani, mubyaakwe Defedi, ncakubonenaako cibotu cakuyeyelaako bakandu.​—2 Samwelo 9:1-13.

w05-CG 5/15 17 pala. 12

Shiteente Shinene Shitocanika Mulibuku lya 2 Samwelo

2 Samwelo 9:1, 6, 7. Defedi wakakumanisha nshaakashomesha. Aswebo tulyeelete kweelesha cankusu, kukumanisha nshetwashomesha.

w02-CG 3/1 14 pala. 10

Bakaliyumya Amuumfwa Mumubili

10 Ndipakeenda myaaka, Mwaami Defedi wakatondesha nkumbu Mefibosheti, ceebo calusuno lunene ndwaakalinga kucite pali Jonasani. Defedi wakapa Mefibosheti shintu shoonse shakalinga shakwe Saulo, akusala Siba uyo wakalinga musebenshi wakwe Saulo, kwaamba ayi anolama shintu shoonse ishi. Alimwi Defedi wakalwiita Mefibosheti ayi, ulaakunoolya tebulu yomwi anebo. (2 Samwelo 9:6-10) Ncakutatoonsha kwaamba ayi, Mefibosheti wakayuminishikwa, Defedi ndyaakamutondesha nkumbu, alimwi ici cakamucafwa kutalinyumfwa cibiibi abuumbi, ceebo cabulema mbwaakalinga kucite. Defedi wakatondesha cakubonenaako cibotu abuumbi. Aswebo tulyeelete kutondesha nkumbu kubaabo batokwiinda mumapensho.

Buboni Bwakumushimu

it-1-E 266

Ndesu

Muciindi cakale kale, bantu baanji bakale kale, kwiilikaawo abene Isilaeli, bakalinga kubona ayi ndesu ncitondesho cabulemu kumusankwa. Mulawo Lesa ngwaakapa bene Isilaeli, wakalinga kukasha kucesa misusu ili mumbasu sha mutwi, nabi kuceesha ndesu. (Le 19:27; 21:5) Ncakutatoonsha kwaamba ayi, cakapa kwaamba ayi Lesa akashe bene Isilaeli kucita boobo, nceebo cakwaamba ayi ishi nshebakalinga kucita bantu batakalinga kulambila Yehova.

JUNE 13-19

BUBONI BUCANIKA MUMASWI AKWE LESA | 2 SAMWELO 11-12

“Amuleye Kuba Alunkumbwa Lutabete Kabotu”

w21.06 17 pala. 10

Inga Mwacikonsha Kusupuka Mutoose Twakwe Satana!

10 Lunkumbwa lwakapa Mwaami Defedi kulubaako shintu Yehova nshaakamupa mbuli buboni, kupuka alimwi akumucafwa kukoma balwani baanji. Defedi wakalumba alimwi wakaamba ayi shipo Lesa nshaakamupa “nshiinji abuumbi!” (Kulu. 40:5) Nacibi boobo, Defedi wakaba alunkumbwa akusuna kuba ashintu shiinji kwiinda pasheesho Yehova nshaakamupa. Nabi kwaamba ayi Defedi wakalinga kucite banakashi baanji, wakatalika kukumbwa muka mwiine. Mwanakashi uyo wakalinga Batisheba mukaakwe Uliya mwiine Iti. Ceebo cakulisuna, Defedi wakakumana a Batisheba aboobo Batisheba wakamita. Defedi nshaakacita shakalinga shibiibi abuumbi. Nacibi boobo, wakeelikawo acimwi cibiibi kwiindaawo. Wakabika bubaambo bwakwaamba ayi Uliya acaikwe! (2 Samwe. 11:2-15) Ano ino wakalinga kuyeeya nshi ndyaakacita sheeshi? Sa wakalinga kuyeeya ayi Yehova inga tabooni nshaacita? Nabi kwaamba ayi Defedi wakasebensela Yehova kwaciindi cilaamfu, wakaba alunkumbwa alimwi ici cakamunjisha mumapensho aanji. Nacibi boobo, mukuya kwaciindi Defedi wakasumina cilubo ncaakacita alimwi wakaana. Wakalumba abuumbi kwaamba ayi Yehova wakamulekelela!​—2 Samwe. 12:7-13.

w19.09 17 pala. 15

Amunyumfwile Butanjilishi Bwakwe Yehova

15 Yehova wakasala Defedi kuba mutwi wa mukwashi wakwe alimwi amushobo woonse wa bene Isilaeli. Mbuli Mwaami, Defedi wakalinga kucite nkusu abuumbi. Cimwi ciindi wakalinga kusebensesha nkusu shakwe munshila itabete kabotu akucita shilubo shinene. (2 Samwe. 11:14, 15) Nacibi boobo, wakatondesha kunyumfwila Yehova kwiinda mukusumina kululikwa a Yehova. Wakalinga kupaila kuli Yehova camoyo woonse. Alimwi wakeelesha cankusu kunyumfwila kululika kwakwe Yehova. (Kulu. 51:1-4) Kwiilikaawo, wakalinga muntu uliceesha alimwi usumina lucafwo kuswa kubamwi kwiilikaawo abanakashi. (1 Samwe. 19:11, 12; 25:32, 33) Defedi wakeeyawo pashilubo shakwe akululamika buumi bwakwe boonse kusebensela Yehova.

w18-CG.06 17 pala. 7

Amusebenseshe Milawo Yakwe Lesa Alimwi Anjiisho Shamu Baibo, Kwiisha Njeelacaamba Yanu

7 Cisangalasha ncakwaamba ayi, kwaamba ayi twiiye shintu shiyandika abuumbi, tatuyandiki kwiinda mumapensho ceebo cakutakonkela milawo yakwe Lesa. Kuli nsheenga tweeya kuswa kushilubo bamwi nshebakacita, isho shakalembwa mumaswi akwe Lesa. Tushimpi 1:5 ilaamba ayi, muntu musongo ulakutika, alimwi akwiilaawo shiinji. Ncakwiila kuli shintu shibotu abuumbi Lesa nshatwiisha, mbuli ndyetutobelenga, alimwi akukutumana kuyeeya pamakani amuBaibo. Kucakubonenaako, amuyeeye pamapensho Defedi ngakeendaamo ceebo cakutakonkela mulawo wakwe Yehova, alimwi aceebo cakucita bulale a Batisheba. (2 Samwe. 12:7-14) Ndyetutobelenga akukutumana kuyeeya pamakani aya, inga twaliipusha ayi, ino nshiinshi Defedi nshaakalinga kweelete kucita kwaamba ayi aleye mapensho ngaakacana ceebo cakucita bulale a Batisheba? Nakwiinga ndime ndakeeleshekwa, sa nakwiinga ndakacikonsha kuleya kucita bulale? Sa nakwiinga ndakacica mbuli Josefu na kucita bulale mbuli mbwaakacita Defedi? (Mata. 39:11-15) Na katuyeeya pashibiibi sheenga shaswaamo na twaciita cilubo, ‘tulaakupata shibiibi.’

Buboni Bwakumushimu

it-1-E 590 pala. 1

Defedi

Yehova wakalinga kubona shoonse. Alimwi wakashibika patuba shoonse. Nakwiinga Yehova wakasuminisha ayi, mulandu wakwe Defedi a Batisheba, woomboloshekwe abamatanjilili babene Isilaeli kweelana amulawo wakwe Mose, nakwiinga boonse bobilo bakacaikwa. Alimwi mwaana wakalinga kusa mukushalwa, nakwiinga wakafwita pomwi abanyina. (Du 5:18; 22:22) Sombi Yehova mwiine ngwaakoombolosha mulandu, alimwi wakamutondesha nkumbu Defedi, ceebo cacipangano cabwaami ncakapangana anguwe (2Sa 7:11-16), alimwi aceebo cakwaamba ayi Defedi alakwe wakalinga kutondesha nkumbu kubamwi (1Sa 24:4-7; amweelanye a Jem 2:13) alimwi cimwi nceebo cakwaamba ayi, Lesa wakabona ayi boonse bobilo bakacita cilubo, bakaana. (Kulu. 51:1-4) Nacibi boobo, boonse bakacana mapensho, ceebo cacilubo ncebakacita. Kwiinda mumushinshimi Natani, Yehova wakaamba ayi: ‘Ndaakuleta mapensho, kuswa muŋanda yako.’​—2Sa 12:1-12.

JUNE 20-26

BUBONI BUCANIKA MUMASWI AKWE LESA | 2 SAMWELO 13-14

“Kulisuna Kwakwe Amunoni, Kwakamuletela Mapensho”

it-1-E 32

Abusalomu

Kucaikwa kwakwe Amunoni. Kuboneka kabotu kwakwe Tama, nankashi wakwe Abusalomu, kwakapa kwaamba ayi Amunoni mukwabo, atalike kumukumbwa. Kwiinda mukubeca ayi ngumulwashi, Amunoni wakakatisha Tama ayi aye mukumutelekela kucipinda cakwe. Lyalo wakakumanaakwe cakumukakatisha. Amunoni wakamupata abuumbi Tama, kwiinda ambwaakalinga kumusuni. Lyalo wakamutanda. Tama wakalibika milota mumutwi, akukwamuna cakufwala ico ncaakalinga kufwete, ico banaabaami banakashi, batana kukumanaawo kale amusankwa, ncobakalinga kufwala. Abusalomu ndyaakamucana, wakashiba kwaamba ayi Amunoni, ngwamucita boobo. Mukwiinga wakalinga kumushi kabotu Amunoni. Nacibi boobo, Abusalomu wakalwiita nankashi shakwe kwaamba ayi atalwiiti uliwoonse cikani ici, alimwi wakamubwesa akuya mukwiikalakwe kuŋanda yakwe.​—2Sa 13:1-20.

w17-CG.09 5 pala. 11

Amwiiye Kulikasha

11 Mu Baibo muli shakubonenaako sha bantu, abo bakaalilwa kulikasha pamakani akoonana. Baibo ilatondesha mapensho eenga aswaamo, na muntu waalilwa kulikasha pamakani aya. Na katweeleshekwa kucita bulale, inga twacita kabotu kuyeeya pamusankwa utacite maano, waambwa mulilembo lya Tushimpi capita 7. Alimwi inga twayeeya pashakacita Amunoni, alimwi amapensho ngaakacana. (2 Samwe. 13:1, 2, 10-15, 28-32) Bashali inga bacafwa bana babo kuba amubo wakulikasha, alimwi akucita shintu cabusongo pamakani aya. Inga bacita boobo kwiinda mukubandika abana babo makani aya amuBaibo aya ngotwaambaawo, ndyebatoocita kulambila kwa mukwashi.

it-1-E 33 pala. 1

Abusalomu

Ndipakeenda myaaka yobilo, ciindi cakucesa mbelele booya ndyecakashika, Abusalomu wakabamba kusekelela, ku Baliyaso, musena uyu wakalinga kulaamfu makilomita 22 kuswa kuJelusalemu. Kukusekelela uku wakeeta Defedi, alimwi abana bakwe basankwa. Baishi ndyebakasenga ayi bataiiko, Abusalomu wakabakakatisha ayi batume Amunoni, mwanaabo musankwa wakwiiya. (Tus. 10:18) Pakusekelela uku, Amunoni ndyaakakolwa, Abusalomu wakalwiita basebenshi bakwe kwaamba ayi bacaye Amunoni. Kuswawaawo, banaamwaami bamwi bakaboolela kuJelusalemu, lyalo Abusalomu abankambuyakwe, bakalobokela kucishi ca Geshuli, ico cakalinga kwicwe, lya lweenge lwa Galili. (2Sa 13:23-38) Lyalo nkondo njaakambila limwi mushinshimi Natani, yakatalika pabamunanda yakwe Defedi, alimwi yakatolelela kushikila ndyaakafwa.​—2Sa 12:10.

Buboni Bwakumushimu

g04-E 12/22 mapa. 8-9

Kuboneka Kabotu Kuyandika Abuumbi

Mubupusano asheeshi, Amuyeeye pali Abusalomu, mwanaakwe Defedi. Wakesa mukuba muntu utabete kabotu, nabi kwaamba ayi wakalinga kuboneka kabotu. Baibo ilaamba pali nguwe ayi: “Ono mucishi coonse ca Isilaeli, tamwakalinga musankwa wakalinga kulumbaishikwa, pakuboneka kabotu mbuli Abusalomu. Taakalinga kucitewo kampenda kuswabo kumutwi, kushikila akumyeendo.” (2 Samwelo 14:25) Nacibi boobo, ceebo cakulisumpula, Abusalomu wakapondokela baishi, alimwi wakalinga kusuni kunyaya baishi Bwaami. Alimwi wakakumana abakasuwa babaishi, cakaswaamo ncakwaamba ayi, Abusalomu wakakalasha Lesa, alimwi wakafwa lufu lubiibi.​—2 Samwelo 15:10-14; 16:13-22; 17:14; 18:9, 15.

Sa mulisuni kuba anga ngu Abusalomu? Sobwe. Abusalomu wakalinga muntu ucite miibo ibiibi. Nabi kwaamba ayi wakalinga kuboneka kabotu, kulisumpula alimwi akutashomeka, tashikwe kumucafwawo. Nabi kumushitilisha kwaamba ayi atafwi. muBaibo muli shakubonenaako shiinji shabantu bakalinga basongo, sombi batakwe kwaambwa mbobakalinga kuboneka. Ncakutatoonsha kwaamba ayi, cakalinga kuyandika abuumbi, nkubota kwabo kwa mumoyo. Abusalomu wakapondoka ceebo cakulisumpula.

JUNE 27–JULY 3

BUBONI BUCANIKA MUMASWI AKWE LESA | 2 SAMWELO 15-17

“Abusalomu Wakapondoka Ceebo Cakulisumpula”

it-1-E 860

Beshi Kutanjila Kunembo

Kale kale wakalinga mulawo kwaamba ayi, beshi kutanjilila shikoci sha nkondo, mbobakalinga kweelete kutaanguna kuya kumusena kutooya mwaami, lyalo akoolobesha kusa kwa mwaami, alimwi akumucafwa kubamba shimwi. (1Sa 8:11) Kwiinda mukukonkela mulawo uyu, Abusalomu alimwi a Adonija ndyebakapondoka ceebo cakulisumpula, bakabamba shikoci sha nkondo amaaki alimwi kusala bashilumamba bali 50, kwaamba ayi batanjile kunembo.​—2Sa 15:1; 1Ba 1:5; amubone amutwi utokwaamba ayi RUNNERS.

w12-CG 7/15 13 pala. 5

Amusebensele Lesa Walwaanguluko

5 Mu Baibo muli shakubonenaako shiinji, sha bantu bakayunga bamwi kwaamba ayi bacite shibiibi. Cakubonenaako comwi ngu Abusalomu, uyo wakalinga mwanaakwe mwaami Defedi. Abusalomu wakalinga kuboneka kabotu abuumbi. Nacibi boobo mukuya kwaciindi, bweenka mbuli Satana, Abusalomu wakaba alunkumbwa abuumbi, cakwaamba ayi wakalinga kusuni kunyaya baishi Bwaami, nabi kwaamba ayi taakalinga kweelela kuba mwaami. Ceebo cakusunisha kuba mwaami, Abusalomu wakapa kwaamba ayi bene Isilaeli batalike kunoobona ayi mwaami taabasuniwo, sombi ayi lakwe ngwaabasuni. Bweenka mbuli Satana mbwaakacita mumuunda wa Edeni, Abusalomu wakalibonesha anga alisuni kucafwa bantu. Sombi wakabisha liina lya baishi.​—2 Samwe. 15:1-5.

it-1-E 1083-1084

Ebuloni

Ndipakeenda myaaka, Abusalomu mwanaakwe Defedi wakaboolela alimwi ku Ebuloni, uko nkwaakatalikila kubamba bubaambo bwakwaamba ayi nyaye baishi bwaami. (2Sa 15:7-10) Alimwi mpashi ceebo cakwaamba ayi Ebuloni yakalinga ndabala inene muJuda, alimwi aceebo cakwaamba ayi wakashalilwa mundabala iyi, Abusalomu wakasala ndabala iyi, kwaamba ayi nkweshi atalikile, kubamba bubaambo bwakunyaya baishi bwaami. Mukuya kwa ciindi, mwaami Leoboamu, mwishikulu wakwe Defedi, wakayakulula ndabala ya Ebuloni. (2Ma 11:5-10) Pesule lyakwaamba ayi bene Babiloni bakoma ba Juda, alimwi abene Isilaeli ndyebakaswa mubusha, baJuda bamwi bakaswa mubusha, bakesa mukukala ku Ebuloni.​—Ne 11:25.

Buboni Bwakumushimu

w18-CG.08 6 pala. 11

Sa Mulyeeshi Kabotu Makani Oonse?

11 Cimwi ciindi, aswebo inga twacitilwa shintu shitabete kabotu, ceebo camakani akubeca, bantu ngeenga kabaamba palindiswe. Amuyeeye pacakubonenaako ca mwaami Defedi, alimwi a Mefibosheti. Defedi wakatondesha bwaabi alimwi ankuumbu kuli Mefibosheti, kwiinda mukumupa musena woonse wakalinga wa bankambiyakwe ba Saulo. (2 Samwe. 9:6, 7) Nacibi boobo mukuya kwaciindi, Defedi wakalwiitikwa makani akubeca, pali Mefibosheti. Kwakubula akwiipusha kwaamba ayi ashibe makani mbwaabete, Defedi wakasalawo kunyaya Mefibosheti, shintu shoonse nshaakalinga kucite. (2 Samwe. 16:1-4) Mukweelaako Defedi ndyaakabandika a Mefibosheti, wakashiba kwaamba ayi wakacita cilubo, aboobo wakamubooshelaako Mefibosheti shintu shimwi. (2 Samwe. 19:24-29) Nakwiinga Defedi wakacana ciindi cakwaalanga langa kabotu makani oonse, nakwiinga taakwe kucita cilubo ncaakacita.

    Mabuku amu Cilenje (2011-2026)
    Amusweemo
    Amunjile
    • Cilenje
    • Share
    • Kusala shimwi nshemusuni
    • Copyright © 2025 Watch Tower Bible and Tract Society of Pennsylvania
    • Mbweenga Mwasebensesha
    • Makani Amulawo
    • Privacy Settings
    • JW.ORG
    • Amunjile
    Share