Makani Akusebensesha amu Kabuku Kamabungano Abuumi Anciito
© 2022 Christian Congregation of Jehovah’s Witnesses
JANUARY 2-8
BUBONI BUCANIKA MUMASWI AKWE LESA | 2 BAAMI 22-23
“Ino Nceebonshi Tulyeelete Kuliceesha?”
w00 9/15 mape. 29-30
Josiya Wakasangalasha Yehova Ceebo Cakuliceesha
Basankwa bakalinga kubamba tempele bakasebensa cankusu kuswa macuunsa cuunsa. Cilyeelete Josiya wakalumba Yehova kwaamba ayi ŋanda yakwe Lesa iyo yakalinga yanyonyoolwa kubashali bakwe bakulukulu bakalinga kucita shibiibi, yakalinga kubambwa alimwi. Ndyebakalinga kusebensa, Shafani wakatola lipooti kuli Josiya kaacite acintu cimwi mumaansa. Wakaya mukulwiita Josiya ayi Ilikiya Mupailishi Munene ‘wakacana libuku lya Milawo iyo Lesa njaakapa Mose.’ (2 Makani 34:12-18) Ncakutatoonsha kwaamba ayi libuku ndyebakacana, lyakalinga libuku liine lya Milawo lyakalembwa a Mose!
Josiya wakalinga kusunishishi kunyumfwa makani oonse akalinga kulembetwe mulibuku. Aboobo Shafani ndyaakalinga kubelenga, mwaami wakeelesha kubona mbweenga lakwe abantu bakwe bakonkela milawo yakalinga kulembetwe mulibuku. Alimwi cakamusangalasha abuumbi nkubona libuku mbolyakalinga kuyuminisha bunene kulambila kwancine alimwi akwaambila limwi mapensho akalinga kusa mukubacitikila alimwi abusha mbobakalinga kusa mukubaamo ceebo cakwaabanamo lubasu mukupaila kwakubeca. Ndyaakesa mukushiba kwaamba ayi teshi milawo yoonse yakwe Lesa yakalinga kukonkelwa, Josiya wakakwamuna shakufwala shakwe akulwiita Ilikiya, Shafani alimwi abamwi ayi: ‘Kamuya mukeepushileko ndime abene Juda boonse kuli Yehova pasheesho shilembetwe mulibuku lya Milawo ili lyacanika. Yehova ulikalalite abuumbi pali ndiswe mukwiinga bamashali besu bakulukulu tabakwe kukonkela maswi ali mulibuku ili.’—2 Baami 22:11-13; 2 Makani 34:19-21.
w00 9/15 pe. 30 pala. 2
Josiya Wakasangalasha Yehova Ceebo Cakuliceesha
Beshinkombe Josiya mbaakatuma bakashika ku mushinshimi mwanakashi Ulida ku Jelusalemu alimwi akuboolela kuleta lipooti. Ulida wakabalwiita maswi Yehova ngaakamulwiita akalinga kutondesha ayi mapensho akaambwa mulibuku ndyebakacana alaakucitikila mushobo wa bene Isilaeli ceebo cakupondoka kwabo. Ano mukwiinga Josiya wakaliceesha kuli Yehova Lesa, mapensho ayo taakalinga kusa mukucitikila. Alaakubunganishikwa kwakoona bashali bakwe bakulukulu akubikwa mucuumbwe cakwe muluumuno.—2 Baami 22:14-20; 2 Makani 34:22-28.
Buboni Bwakumushimu
w01 4/15 pe. 26 mapa. 3-4
Inga Mwaswitilila Teshi Mulandu a Nkulilo Yanu
Josiya wakacita shintu shibotu mumeenso akwe Yehova nabi kwaamba ayi shintu tashakalinga kabotu ndyaakalinga kukula. Ceebo cakuswitilila kwa bweendeleshi bwakwe, Baibo ilaamba ayi: ‘Takuna kubawo kale mwaami wakeelanaakwe mukucita shoonse shakaamba Yehova camoyo woonse amiyeeyo yakwe yoonse ankusu shakwe shoonse. Ncakwiila wakalinga kukonkela Milawo yakwe Mose yoonse.’—2 Baami 23:19-25.
Josiya ncakubonenaako cibotu abuumbi kubaabo bakakulila mubukaalo buyumu! Ino nciinshi nceenga tweeya kucakubonenaako cakwe? Ino nciinshi cakacafwa Josiya kusala kukonkela nshila ili kabotu akutolelela kucita shibotu?
JANUARY 9-15
BUBONI BUCANIKA MUMASWI AKWE LESA | 2 BAAMI 24-25
“Amutolelele Kuba Bacenjete Aciindi Ncetutokalaamo”
w01 2/15 pe. 12 pala. 2
Bushiku Bwakwe Yehova bwa Boomboloshi Buli Pafwiifwi!
Ncakutatoonsha kwaamba ayi bushinshimi bwakaamba Sefaniya bwakacafwa Josiya kubona kuyandika kwakukusha kulambila kutasalalite. Nacibi boobo, mwaami nshaakacita tashikwe kumana shintu shibiibi shoonse bantu nshobakalinga kucita na kulubula bantu kuswa kushibiibi shakacita Mwaami Manase, bankambiyakwe mwaami Josiya, abo ‘bakacaya bantu baanji batacite milandu muJelusalemu.’ (2 Baami 24:3, 4; 2 Makani 34:3) Aboobo bushiku bwakwe Yehova bwa boomboloshi bwakalinga mukusa.
w07 3/15 pe. 11 pala. 10
Shiteente Shinene Shitocanika Mulibuku Lyakwe Jelemiya
Mu mwaaka 607 B.C.E. mu mwaaka wa namba 11 wa bweendeleshi bwakwe Sedekiya, Mwaami Nebukadinesa waku Babiloni wakashinguluka ndabala ya Jelusalemu kwa myeenshi 18. Pabushiku bwa namba 7 mu mweenshi wa namba 5 mu mwaaka wa namba 19 wa bweendeleshi bwakwe Nebukadinesa, Nebusaladani, munene wa beshikulindilila, wakashika ku Jelusalemu. (2 Baami 25:8) Mpashi Nebusaladani kaali mumusumba wakwe wakalinga kunsengwe kwa lubumbu lwa ndabala, wakalanga langa bukaalo mbobwakalinga akuyeeya shakucita. Pesule lya nshiku shotatwe, pabushiku bwa namba 10, wakenjila mu ndabala ya Jelusalemu, lyalo akwitenta.—Jelemiya 52:12, 13.
Buboni Bwakumushimu
w05 8/1 pe. 12 pala. 1
Shiteente Shinene Shitocanika Mulibuku lya 2 Baami
24:3, 4. Ceebo ca mulandu wakwe Manase wakutila bulowa, Yehova “wakakaka kulekelela” baJuda. Lesa alabikila maano bantu baluleme bacaikwa. Inga twashoma ayi Yehova alaakucitawo comwi ceebo ca baluleme kwiinda mukunyonyoola baabo babacaya.—Kulumbaisha 37:9-11; 145:20.
JANUARY 16-22
BUBONI BUCANIKA MUMASWI AKWE LESA | 1 MAKANI 1-3
“Baibo Ndibuku Lyaamba Makani Ancine, Kuteshi Akuyeeyelabo”
w09 9/1 pe. 14 pala. 1
Sa Adamu a Efa Bakalinga Bantu Bancine?
Kucakubonenaako, amuyeeye pamulongo wabamashali bakulukulu baJuda ngotucana mulibuku lyamu Baibo lya 1 Makani capita 1 kushika ku 9 alimwi amulibuku lya Makani Abotu akwe Luka capita 3. Mulongo ngotucana mulibuku lya 1 Makani ulaamba mashalane 48, lyalo uli mulibuku lyakwe Luka ulaamba mashalane 75. Mulibuku lyakwe Luka muli mulongo wabashali bakulukulu bakwe Yesu Klistu, lyalo mulibuku lya 1 Makani muli mulongo wa bamaami alimwi abapailishi ba bene Isilaeli. Mu milongo yoonse yobilo bakaambawo bantu bamwi bashibikitwe abuumbi mbuli Solomoni, Defedi, Jakobo, Isaki, Abulaamu, Nowa, lyalo kumamanino bakaamba Adamu. Bantu boonse bakaambwa mumilongo iyi yobilo, bakalinga bantu bancinencine, alimwi Adamu wakalinga mutaanshi kulengwa. Alimwi Adamu waambwa mumilongo yoonse yobilo wakalinga muntu wancinencine.
w08 6/1 pe. 3 pala. 4
Makani Aamba Pali Nowa Alimwi Amuyoba Unene Ngancine Teshi Akuyeeyelabo
Malembo obilo amu Baibo aamba pa mulongo wa mashalane, alatondesha ayi Nowa wakalinga muntu wancinencine. (1 Makani 1:4; Luka 3:36) Esila a Luka boonse bobilo, bakalemba mulongo wa mashalane aya, bakalinga kucishi kabotu abuumbi kulangoola makani. Luka wakaulangoola mulongo walishalane akucana ayi Nowa wakalinga mushali mukulukulu wakwe Yesu Klistu.
w09 9/1 mape. 14-15
Sa Adamu a Efa Bakalinga Bantu Bancine?
Amuyeeye pamakani acilubula, njiisho beshibupailishi baanji njobasuni abuumbi. Kweelana a Baibo nshoyaamba, Yesu Klistu wakaaba buumi bwakwe bumaninite kwaamba ayi alubule bantu kuswa kushibiibi. (Mateyo 20:28; Joni 3:16) Kweelana ambotushi, cilubula ngamalipilo alipilwa akwene muulo wacintu cakasoweka na cakanyonyoolwa. Nceceeco Baibo ncoyaambila ayi Yesu ‘ncilubula ceelene.’ (1 Timoti 2:6) Ano ino cilubula cilyeelene a nshi? Baibo ilaamba ayi: ‘Bweenka bantu boonse mbobafwa kwiinda muli Adamu, akwalo kubushikwa kwa bantu boonse mbweshi kukabe kwiinda muli Klistu.’ (1 Bene Kolinto 15:22) Buumi bwakwe Yesu bumaninite mbwaakapa mbuli cilubula kwaamba ayi apulushe bantu batamaninite banyumfwila bulyeelene abuumi bumaninite bwakwe Adamu mbwakasowa ndyaakabisha mumuunda wa Edeni. (Bene Loma 5:12) Aboobo, naakwiinga Adamu taakalingaako, naakwiinga cilubula tacikwe kuba anciito.
Buboni Bwakumushimu
it-1-E pe. 911 mapa. 3-4
Lishalane
Meena Abanakashi. Banakashi bakalinga kwaambwabo mumulongo walishalane na kakuli luyaando lwakucitila boobo kweelana amakani akale kale. Palilembo lya Matalikilo 11:29, 30, Salai (Saala) wakaambwa, mpashi ceebo cakwaamba ayi lunyungu lwakashomeshekwa lwakalinga kuswa muli nguwe, kuteshi kwiinda mumukaakwe Abulaamu umwi. Mpashi Milika wakaambwa palubasu lomwi ceebo cakwaamba ayi wakalinga bankambiyakwe Labeka, muka Isaki, kutondesha ayi Labeka wakaswa mulishalane lya beshikamukowa bakwe Abulaamu, mukwiinga Isaki taakalinga kweelete kweeba mwanakashi kuswa kumishobo imwi. (Mtl 22:20-23; 24:2-4) Palilembo lya Matalikilo 25:1, tulacana liina lya Ketula mwanakashi Abulaamu ngwakeeba mukuya kwaciindi. Ici cilatondesha ayi Abulaamu wakeeba alimwi Saala ndyaakafwa alimwi wakalinga kunoocicite nkusu shakuba abaana nabi pakalinga peenda myaaka iindilila 40 kuswa ciindi Yehova ndyakabapa nkusu shakuba abaana. (Lo 4:19; Mtl 24:67; 25:20) Alimwi ici cilatondesha mukowa wakalinga pakati ka bene Isilaeli abene Midyani alimwi amishobo imwi ya ci Alabu.
Leya, Lakelo, alimwi abakasuwa bakwe Jakobo, pomwi abana babo basankwa, bakapekwa meena. (Mtl 35:21-26) Ici cilatucafwa kunyumfwishisha Yehova nshaakesa mukucita kubaana basankwa aba. Ici ncecipa kwaamba ayi tucane meena abanakashi bamwi mumulongo walishalane. Na mwanakashi ngowapyana buboni bwa bashali bakwe, liina lyakwe lyakalinga kulembwa pamulongo walishalane. (Shaku 26:33) Nacibi boobo, Tama, Laabu, alimwi a Lute bakalinga kulibetele. Womwi awomwi wa banakashi aba wakesa mukuba mushali mukulukulu wakwe Mesiya Yesu Klistu pesule lya cintu cimwi cilibetele. (Mtl 38; Lute 1:3-5; 4:13-15; Mt 1:1-5) Makani amwi mpotucana milongo ya lishalane ilikaawo banakashi ngamakani ngotucana pa 1 Makani 2:35, 48, 49; 3:1-3, 5.
JANUARY 23-29
BUBONI BUCANIKA MUMASWI AKWE LESA | 1 MAKANI 4-6
“Ino Mipailo Yangu Ilatondesha Nshi Pali Ndime?”
w10 10/1 pe. 23 mapa. 3-7
“Shikukutika Mipailo”
Jabesi wakalinga musankwa upaila abuumbi. Ndyaakalinga kupaila wakataanguna kusenga ayi Lesa amupe coolwe. Lyalo wakasenga shintu shotatwe shitondesha ayi wakalinga muntu ucite lushomo luyumu.
Cakutaanguna, Jabesi wakasenga Lesa ayi: “Amumpe coolwe cakuba acishi cinene.” (Vesi 10) Musankwa ulemekwa uyu taakalinga kupamba na kunyumfwila bamwi munyono ceebo ca misena njobakalinga kucite. Cilyeelete wakalinga kusuni bunene bantu kuteshi misena. Mpashi wakalinga kusenga ayi musena wakwe ukomeneneeko muluumuno ceebo cakwaamba ayi wakalinga kusuni ayi mukale bantu baanji beshikulambila Lesa wancine.
Cabili, Jabesi wakasenga ayi “lyaansa” lyakwe Lesa libe anguwe. Maswi acikoshanyo akwaamba ayi lyaansa lyakwe Lesa alasansulula nkusu Lesa nshaasebensesha kucafwa bantu bamulambila. (1 Makani 29:12) Kwaamba ayi atambule nshaakasenga kuswa panshi lya moyo, Jabesi wakacinka manungo muli Lesa uyo ucite lyaansa litaleli kubantu bamushoma.—Isaya 59:1.
Catatu, Jabesi wakapaila: “Amube anebo akuntabilila kuswa kushintu sheenga shancisa kwaamba ayi ntakanyumfwiwo kucisa.” Maswi akwaamba ayi “ntakanyumfwiwo kucisa” atotondesha kwaamba ayi Jabesi taakwe kusenga ayi mapensho atakamucitikili, sombi wakalinga kusenga ayi amushitilishe kwaamba ayi atanooba abuumba abuumbi na kukomwa kushibiibi.
Mupailo wakwe Jabesi wakatondesha ayi wakalinga kubikila maano abuumbi kukulambila kwancine alimwi wakalinga kushoma akucinka manungo muli Lesa Shikukutika mipailo. Ino Yehova wakamukumbula buyani? Makani afwiifwi aya alamana amaswi akwaamba ayi: “Lyalo Lesa wakamupa isho shoonse nshaakasenga.”
Buboni Bwakumushimu
w05 10/1 pe. 9 pala. 7
Shiteente Shinene Shitocanika Mulibuku lya 1 Makani
5:10, 18-22. Munshiku Saulo ndyaakalinga kweendelesha, mikowa yakalinga kwicwe kwa Joodani yakakoma bene Agi nabi kwaamba ayi bene Agi bakalinga baanji abuumbi kwiinda mikowa iyi. Ici cakaba boobo ceebo kwaamba ayi basankwa aba bacite nkusu bakacinka manungo muli Yehova kwaamba ayi abacaafwe. Atucinke manungo muli Yehova amoyo woonse ndyetutotolelela kulwana nkondo yakumushimu abalwani batwiinditeewo.—Bene Efeso 6:10-17.
JANUARY 30–FEBRUARY 5
BUBONI BUCANIKA MUMASWI AKWE LESA | 1 MAKANI 7-9
“Yehova Inga Wamucafwa Kukumanisha Ncito Iyumu”
w05 10/1 pe. 9 pala. 8
Shiteente Shinene Shitocanika Mulibuku lya 1 Makani
9:26, 27. Bene Lefi bakalinga beshikulindilila minjililo bakalinga kucite ncito inene abuumbi. Bakalinga bapekwa maki akucalwiisha milyaango ya kumisena isalalite yamu tempele. Bakalinga kushomeka kwiinda mukucalula milyaango bushiku abushiku. Twakapekwa mukuli wakushimikila bantu bakumusena nkotushimikila kwaamba ayi bese mukulambila Yehova. Aboobo aswebo tulyeelete kushomeka bweenka mbuli bene Lefi bakalinga beshikulindilila minjililo.
w11 9/15 pe. 32 pala. 7
Sa Inga Mwakonkela Cakubonenaako Cakwe Fineyasi na Mwapekwa Mukuli Uyumu?
Muciindi ca bene Isilaeli bakale kale, Fineyasi wakalinga kucite mukuli uyumu. Nacibi boobo, kwiinda mukutaloonda, kusebensesha busongo, alimwi akucinka manungo muli Yehova, wakacikonsha kukumanisha mukuli wakwe. Mukwiinga Fineyasi wakalama libungano lyakwe Lesa cakubikila maano, wakalengesha Yehova kukondwa. Ndipakeenda myaaka 1,000, Esila wakatanjililwa amushimu kulemba ayi: ‘Kale kale Fineyasi mwanaakwe Eliyasa ngowakalinga mutanjilili wa beshikulindilila minjililo alimwi Yehova wakalinga anguwe.’ (1 Maka. 9:20) Ubu mboceelete kuba kubaabo boonse bacite mukuli wakutanjilila pakati kabantu bakwe Lesa munshiku shino alimwi a Beneklistu boonse bamusebensela cakushomeka.
Buboni Bwakumushimu
w10 12/15 pe. 21 pala. 6
Amwiimbile Yehova!
6 Kwiinda mubashinshimi Yehova wakalwiita bantu bakwe bamulambila kumulumbaisha munyimbo. Beshikwiimba bakaswa mumukowa wabapailishi tabakalinga kusebensako ncito shimwi shakalinga kusebensa bamwi kwaamba ayi babikile maano kukulemba akulibambila kwiimba.—1 Maka. 9:33.
FEBRUARY 6-12
BUBONI BUCANIKA MUMASWI AKWE LESA | 1 MAKANI 10-12
“Amusunishishe Kucita Kuyanda Kwakwe Lesa”
w12 11/15 pe. 6 mapa. 12-13
“Amunjiishe Kucita Kuyanda Kwanu”
12 Alimwi tulyeelete kukonkela cakubonenaako cakwe Defedi cakulumba njiisho nshetucana mu Mulawo alimwi akusunishisha kushikonkela. Amubone cakacitika Defedi ndyaakatondesha kwaamba ayi wakalinga kusuni “maanshi akunwa kumukalo uli kufwaafwi amwiinjililo wa ndabala ya Betileemu.” Basankwa bakwe Defedi botatwe bakabika buumi bwabo mumapensho kwiinda mukunjila ca bushishi mu ndabala yakalinga ya bene Filisiti paciindi ico, akuteka maanshi. Nacibi boobo, ‘Defedi taakwe kwaanwa, sombi wakaatila panshi mukulemeka Yehova.’ Ino nceebonshi? Defedi wakaamba ayi: “Cintu ca mushobo uyu nsheelete kucicita napaceyi. Bantu aba beensha buumi bwabo mumaansa kuya mukuteka maanshi aya. Aboobo inga caba anga ntoonwa bulowa bwabo.”—1 Maka. 11:15-19.
13 Defedi wakalinga kucishi kwaamba ayi kweelana a Mulawo bulowa bwakalinga kweelete kutilwa panshi kuli Yehova kuteshi kulikwa. Alimwi wakalinga kucishi aluyaando lwa kucitila boobo. Defedi wakalinga kucishi kwaamba ayi “buumi bwa cintu cili coonse cuumi buli mubulowa.” Nacibi boobo, aya akalinga maanshi, kuteshi bulowa. Ino nceebonshi Defedi wakakaka kwaanwa? Wakalinga kutondesha kulumba pa njiisho yakalinga kwaamba pa mulawo uyu. Defedi wakabona ayi maanshi alya akalinga kuyandika abuumbi bweenka bulowa bwabasankwa botatwe balya mbobwakalinga kuyandika. Aboobo kuli nguwe wakacibona ayi tacakalinga kabotu kunwa maanshi aaya. Muciindi ca kwaanwa, wakasalawo kwaatila panshi.—Lefi. 17:11; Duto. 12:23, 24.
w18.06 pe. 17 mapa. 5-6
Amwiishe Njeelacaamba Yanu Kwiinda mu Milawo a Njiisho Shakwe Lesa
5 Kwaamba ayi milawo yakwe Lesa itucaafwe, tatweelete kweelabo pa kwiibelenga na kwiishiba. Tulyeelete kwiisuna akwikonkela. Maswi akwe Lesa alaamba ayi: “Amupate bubi akusuna shintu shibotu.” (Amosi 5:15) Ano ino inga twacita buyani ubo? Ciyandika nkubona shintu kweelana a Yehova mbwashibona. Atwaambe ayi mulicite lipenshi lyakwaalilwa koona kabotu. Lyalo dokota wamulwiita ayi munoocita shisekano shiyumya mubili, munoolya shakulya shibotu akwaalula shintu shimwi mubuumi bwanu. Lyalo pesule lya kukonkela nshebamulwiita mwabona kwaamba ayi mwatalika kucikonsha koona kabotu! Inga mwamulumba abuumbi dokota uyo kwaamba ayi wakamucafwa ayi mube abuumi bubotu.
6 Mulengi wesu alakwe alatupa milawo itucafwa kwaamba ayi tukale buumi bubotu akuleya mapensho esa ceebo cakubisha. Amuyeeyebo bubotu mbotucana ceebo cakukonkela Baibo nshoyaamba pamakani akubeca, miyeeyo yakucita shibiibi, kwiipa, bulale, lunkutwe, amakani a shamishimu. (Amubelenge Tushimpi 6:16-19; Ciyu. 21:8) Tulamusuna abuumbi Yehova amilawo yakwe na twabona shoolwe nshotucana ceebo ca kucita shintu kweelana akuyanda kwakwe.
Buboni Bwakumushimu
it-1-E pe. 1058 mapa. 5-6
Moyo
Kusebensa “Camoyo Woonse.” Kwaamba ayi moyo wiine usebense kabotu ulayandika kuba wakabumbulu, ano ubu teshi mbocibete amoyo wacikoshanyo. Defedi wakapaila ayi: “Amunjiishe kumusebensela amoyo wangu woonse, kwaamba ayi noolemeka liina lyanu,” kusansulula ayi muntu inga wasuna na kuloonda cintu cimwi kuteshi camoyo woonse. (Kulu 86:11) Na caba boobo nkokwaamba ayi muntu uyo taalambili Lesa amoyo woonse. (Kulu 119:113; Ci 3:16) Alimwi muntu inga waba “amyoyo yobilo” nkokwaamba ayi kusuna kucita shintu shobilo paciindi comwi, na kwaamba cintu cipusene ancatoyeeya. (1Ma 12:33; Kulu 12:2) Yesu wakaamba ayi ncibiibi abuumbi kuba muntu waamba nshaataciti.—Mt 15:7, 8.
Muntu usuni kusangalasha Lesa alyeelete kumusebensela camoyo woonse kuteshi amyoyo yobilo. (1Ma 28:9) Kucita boobo kulayandika kusebensa cankusu mukwiinga moyo liinji ulisuni kucita shibiibi. (Jel 17:9, 10; Mtl 8:21) Shintu sheenga shatucafwa kutolelela kusebensa camoyo woonse: nkupaila camoyo woonse (Kulu 119:145; Mali 3:41), kwiiya Maswi akwe Lesa lyoonse (Esil 7:10; Tu 15:28), kusebensa cankusu muncito yakushimikila makani abotu (amweelanye a Jel 20:9), akucanika pomwi abamwi batosebensela Yehova camoyo woonse.—Amweelanye a 2Ba 10:15, 16.
FEBRUARY 13-19
BUBONI BUCANIKA MUMASWI AKWE LESA | 1 MAKANI 13-16
“Kukonkela Butanjilishi Kulatupa Kuswitilila”
w03 5/1 mape. 10-11
Sa Muleepusha Ayi, “Ino Yehova Ali Kuli?”
12 Pesule lyakwaamba ayi libokoshi lya cipangano lyabooshekwa ku Isilaeli akukala myaaka iinji ku Kilyati Jeyalimu, Mwaami Defedi wakalinga kusuni kulilonsha kulitola ku Jelusalemu. Wakeepusha bamatanjilili ba bantu alimwi akwaamba ayi Libokoshi lilaakulonshekwa ‘na balisuminite alimwi na cilibo kabotu kuli Yehova.’ Sombi taakwe kushinisha kucita nsheenga wacikonsha kwaamba ayi ashibe na kucita boobo kwakalinga kweendelana aluyaando lwakwe Yehova. Naakwiinga wakacita boobo, naakwiinga Libokoshi talikwe kunyamwitwa pacikoci. Naakwiinga lyakanyamunwa pashifushi abene Koati bamumukowa wa bene Lefi, kweelana abutanjilishi bwakwe Yehova. Nabi kwaamba ayi Defedi liinji wakalinga kwiipusha Yehova, paciindi ici wakaalilwa kucita boobo munshila yeelete. Ishi shakaleta mapensho anene. Lyalo pesule Defedi wakaamba ayi: “Bukali bwakwe Yehova Lesa wesu bwakatushikila, mukwiinga tatukwe kwiipusha kwaamba ayi tucite kweelana abutanjilishi.”—1 Makani 13:1-3; 15:11-13; Shakubelenga 4:4-6, 15; 7:1-9.
w03 5/1 pe. 11 pala. 13
Sa Muleepusha Ayi, “Ino Yehova Ali Kuli?”
13 Libokoshi ndyelyakalonshekwa abene Lefi kuswa ku ŋanda yakwe Obedi Edomu ku Jelusalemu, lwiimbo lwakalembwa a Defedi lwakeembwa. Lwiimbo ulu lwakalinga kucite makani akwiibalusha ashika pamoyo akwaamba ayi: ‘Amulangoole Yehova ankusu shakwe. Amulangoole ciwa cakwe lyoonse. Kamwiibaluka shitondesho sha nkusu sha kwiculu nshaakacita, shaankamiko shakwe alimwi abupingushi mbwaakapa.’—1 Makani 16:11, 12.
Buboni Bwakumushimu
w14 1/15 pe. 10 pala. 14
Amulambile Yehova, Mwaami wa Muyayaya
14 Defedi wakaleta libokoshi lya cipangano lisalalite ku Jelusalemu. Paciindi ici bantu bakasangalala abuumbi alimwi bene Lefi bakeemba nyimbo yakulumbaisha Lesa. Munyimbo iyo mwakalinga maswi ngotucana pa 1 Makani 16:31 paamba ayi: ‘Amwaambilishe pakati ka mishobo yoonse ayi: ‘Yehova waba Mwaami!’’ Ano mpashi bamwi inga baliipusha ayi, ‘Yehova ngu Mwaami wamuyayaya, ano ino wakaba buyani Mwaami paciindi ici?’ Yehova alaba Mwaami na wacita shintu shitondesha kwaamba ayi lakwe ngotokweendelesha na mpashi ndyaasala umwi kwaamba ayi amwiimikanineeko paciindi cimwi. Kushiba Yehova mbwaba Mwaami kulayandika abuumbi. Defedi kaatana kufwa, Yehova wakamushomesha ayi bwaami bwakwe bulaakutolelela kwamuyayaya ndyaakaamba ayi: “Ndaakusala mwanaako wakushala omwiine kwaamba ayi akapyane bwaami bwako alimwi ndaakulengesha bwaami bwakwe kuyuma.” (2 Samwe. 7:12, 13) Maswi aya akesa mukukumanishikwa ndipakeenda myaaka iindilila 1,000. Ino mwaana uyu wakesa mukuba aani, alimwi ino ndilili ndyaakalinga kusa mukuba Mwaami?
FEBRUARY 20-26
BUBONI BUCANIKA MUMASWI AKWE LESA | 1 MAKANI 17-19
“Amutolelele Kuba Basangalete Nabi Nshemwalinga Kulangila Tashikwe Kucitika”
w06 7/15 pe. 19 pala. 1
Amubikile Maano ku Bubotu bwa Libunga Lyakwe Yehova
DEFEDI wamuciindi ca bene Isilaeli wakalinga muntu womwi wakalinga kushibikitwe abuumbi waambwa mu Malembo aci Ebulu. Musankwa uyu wakalinga mweembeshi, shikwiimba, mushinshimi alimwi mwaami, wakalinga kushoma Yehova Lesa abuumbi. Bushicibusa buyumu Defedi mbwaakalinga kucite a Yehova bwakamupa kuba aluyaando lwakusuna kuyaka ŋanda yakwe Lesa. Ŋanda iyo na tempele yakalinga kusa mukuba musena unene wakulambila kwancine mu Isilaeli. Defedi wakalinga kucishi kwaamba ayi tempele anciito sheshi shikanoocitwa pa tempele shilaakupa bantu bakwe Lesa kuba alusangalalo alimwi akucana shoolwe. Nceceeco Defedi ncaakeembila ayi: “Balicite coolwe abo [Yehova] mbomwakasala, abo mbomwakaleta ayi bekale mumusena wanu usalalite. Tulaakukuta kushintu shibotu sha muŋanda yanu, ncakwiila shoolwe sha muŋanda yanu isalalite.”—Kulumbaisha 65:4.
Munoosangalala Muncito Njemusebensela Yehova
11 Aswebo inga twaba alusangalalo abuumbi, na katusebensa cankusu incito iliyoonse njetucite muncito yakwe Yehova. ‘Amubikile maano abuumbi’ kuncito yakushimikila alimwi akusebensa cankusu mulibungano. (Milimo 18:5; Ebu. 10:24, 25) Amulibambile kabotu mabungano kwaamba ayi mukaambe shikumbulo shiyuminisha. Munoobona lubasu luliloonse lwa shikwiiya ndweenga mwapeekwa mumabungano amukati kansondo kwaamba ayi lulayandika. Na bamusenga ayi musebenseko ncito imwi mulibungano, amukumanishe ncito iyo akwiimanisha muciindi ceelete. Tamweelete kuyeeya ayi incito njemwapekwa taiyandiki, aboobo tamweelete kusebenselawo. Amweeleshe cankusu kushiba kabotu bwakusebensa ncito iyo. (Tus. 22:29) Na kamusebensa cankusu muncito yakwe Yehova, bushicibusa bwanu anguwe bulaakuyuminaako alimwi mulaakutolelela kuba alusangalalo. (Gala. 6:4) Alimwi cilaakumubeta cuubu kusangalala na bamwi bapekwa mukuli ngomwalinga kusuni.—Loma. 12:15; Gala. 5:26.
Buboni Bwakumushimu
w20.02 pe. 12, Bokosi
Tulimusuni Abuumbi Yehova, Ishiwesu
Sa Yehova Alambikila Maano?
Sa mwakaliipushawo kale mwiipusho wakwaamba ayi, ‘Ino nceebonshi Yehova nceenga wabikila maano kuli ndime pabantu boonse bali mucishi?’ Na mwakaliipushawo kale, nkokwaamba ayi tamubete nweenka. Mwaami Defedi wakalemba ayi: “No Yehova, anu muntu nciinshi ngweenga kamuyeeya, muntubo nciinshi cakwaamba ayi kamumulama?” (Kulu. 144:3) Defedi wakalinga kushomete kwaamba ayi Yehova alimushi kabotu. (1 Maka. 17:16-18) Aboobo nshaamba kwiinda mu Maswi akwe alibunga lyakwe, shilatondesha ayi alalumba ceebo ca mbomutondesha ayi mulimusuni. Amubone maswi ngotucana mu Maswi akwe Lesa eenga amucafwa kushoma ayi alalumba ceebo ca mbomutondesha ayi mulimusuni:
• Yehova wakamubona kamutana kushalwa.—Kulu. 139:16.
• Yehova alishi shili mumoyo wanu, alimwi alishi anshemutoyeeya.—1 Maka. 28:9.
• Yehova alakutika mipailo yanu. —Kulu. 65:2.
• Nshemucita inga shapa Yehova kusangalala na kukalala.—Tus. 27:11.
• Yehova ngowakamusenya pafwiifwi anguwe.—Joni 6:44.
• Nabi mukafwe, Yehova alimushi kabotu abuumbi cakwaamba ayi alaakucikonsha kumubusha. Ulaakumupa mubili abongo bupya bweenka mbuli mbomubete pacecino ciindi, mulaakunokwiibaluka shintu bweenka mbomucita amibo yeenka njomucite.—Joni 11:21-26, 39-44; Milimo 24:15.
FEBRUARY 27–MARCH 5
BUBONI BUCANIKA MUMASWI AKWE LESA | 1 MAKANI 20-22
“Amucafwe Bacanike Kuswitilila”
w17.01 pe. 29 pala. 8
“Shintu Ishi Ushibike Mumaansa Abantu Bashomeka”
8 Amubelenge 1 Makani 22:5. Cilyeelete Defedi wakalinga kuyeeya ayi Solomoni teshi akacikoonshe kutanjilila ncito inene yakuyaka. Mukwiinga tempele yakalinga kusa mukuba ‘ibotu abuumbi alimwi icite bulemu butaambiki.’ Alimwi paciindi ico Solomoni wakalinga ‘mwanike alimwi kaatana kuba alushibo.’ Nacibi boobo, Defedi wakalinga kucishi kwaamba ayi Yehova alaakucafwa Solomoni kusebensa ncito njaakamupa. Aboobo Defedi wakabikila maano kukucafwilisha kubamba shintu shiinji shakalinga kuyandika pakuyaka.
w17.01 pe. 29 pala. 7
“Shintu Ishi Ushibike Mumaansa Abantu Bashomeka”
7 Defedi wakatolelela kucafwa Solomoni, taakwe kulisukama ayi mwanaakwe ngweshi akalumbaishikwe na tempele ikayakwe. Alimwi tempele yakesa mukwiitwa ayi tempele yakwe Solomoni. Nabi kwaamba ayi Defedi taakwe kunyumfwa kabotu kwaamba ayi teshi ngweshi akasebense ncito njaakalinga kusuni, wakacafwa mwanaakwe kubamba shintu shoonse shakalinga kuyandika pakuyaka. Wakalangoola basebenshi, akubunganya sheela, mukuba, silifa, alimwi a golodi, ashisamu sha sida. Kwiilikaawo, wakayuminisha mwanaakwe ayi: ‘Ono omwanaangu, Yehova aabe awebo alimwi akulengeshe kuswitilila mukumuyakila ŋanda kweelana ambwaakashomesha.’—1 Maka. 22:11, 14-16
w18.03 mape. 11-12 mapa. 14-15
Nobashali, Sa Mutoocafwa Bana Banu Kuya Panembo Akubombekwa?
14 Mbuli beembeshi bakumushimu, bamanene mulibungano inga bacafwa bashali kwiinda mukwaamba shiyuminisha pamakani ashakucita shakumushimu. Nankashi umwi wakasebensa bupainiya kwa myaaka iindilila 70 wakaamba shakaamba Mukwesu Charles T. Russell paciindi ndyaakalinga kucitebo myaaka 6 mboshakamuyuminisha. Wakaamba ayi, “Wakabandika andime kwa mamineti 15 pamakani anshendakalinga kusuni kucita lwakumushimu.” Ncakwiila maswi ali kabotu alimwi akuyuminisha inga shacafwa muntu kwamyaaka iinji. (Tus. 25:11) Alimwi bamanene inga basenga bashali abana babo kwaamba ayi banoocafwilishaako muncito sha pa Ŋanda ya Bwaami. Inga bapa baana ncito kweelana ankusu aciimo cabo.
15 Bamakwesu abenankashi mulibungano inga bacafwa bashali kwiinda mukubikila maano abuumbi kubaana baniini. Ishi inga sheelikaawo kubikila maano kushintu shitoocita wacanike shitotondesha ayi atooya panembo lwakumushimu. Mpashi inga caba wacanike wakumbula kabotu pakubungana na kwaamba kabotu likani pakubungana kwa Buumi Anciito. Na mpashi wacanike wakatolelela kushomeka ndyaakalinga weeleshekwa kucikolo na mpashi wakashimikilako umwi kucikolo. Munoofwambaana kubalumba. Amubandikeeko awacanike mabungano kaatana kutalika na pesule lya kubungana, akucita shitondesha ayi mulamubikilako maano. Na kamucita sheeshi alimwi ashimwi, bacanike balaakulinyumfwa ayi abalo balayandika abuumbi ‘mulibungano linene.’—Kulu. 35:18.
Buboni Bwakumushimu
w05 10/1 pe. 11 pala. 6
Shiteente Shinene Shitocanika Mulibuku lya 1 Makani
21:13-15. Yehova wakalwiita munjelo kwaamba ayi akashe mapensho mukwiinga alabikila maano ku kupenga kwa bantu Bakwe. Ncakwiila, ‘mukwiinga ngushinkumbu abuumbi.’