Amucafwilishe Libungano Linemishaanu

Nsengwe yoonse, kuli bantu mamiliyoni batosebensela Yehova calusangalalo mumabungano aanji. Balalumba pabutanjilishi mbobatambula alimwi balacafwilisha mabungano munshila shiinji. Sa amwebo ishi nshomubona mulibungano linemishaanu?

1. Ino nshiinshi nsheenga mwaciita kwaamba ayi musebenseshe ciindi ankusu shanu kucafwilisha libungano?

Soonse kuli nceenga twaciita kwaamba ayi tucafwilishe libungano. Kucakubonenaako, na mulibungano linemishaanu muli bacinene na balema, inga mwabacafwa kwaamba ayi banoocanika kumabungano. Alimwi inga mwabacafwa amunshila shimwi, mbuli kubapa shintu shiyandika na kubacafwaako ncito shapalubaansa. (Amubelenge Jemusi 1:27.) Alimwi inga twalyaaba kubotesha akubamba Ŋanda ya Bwaami. Taakuwo weenga watukakatisha kucita ncito ishi. Kusuna Lesa abamakwesu nkokutupa ‘kulyaaba amoyo woonse.’—Kulumbaisha 110:3.

Bakamboni bakabombekwa inga bacafwilisha libungano munshila ashimwi. Bamakwesu beelela lwakumushimu inga basebensa mbuli basebenshi bacafwilisha, alimwi mukuya kwaciindi inga beelela kusebensa mbuli bamanene. Bamakwesu abenankashi boonse balicite coolwe cakucita shiinji muncito yakushimikila kwiinda mukusebensa mbuli bapainiya. Bakamboni bamwi inga balyaaba kusebensa muncito yakuyaka misena njetusebensesha muncito yakwe Lesa na kulongela kumusena kutoyandika lucafwo munshila shimwi.

2. Ino inga twasebensesha buyani shintu nshetucite kwaamba ayi tucafwilishe libungano?

Inga ‘twalemeka Yehova abuboni bwesu.’ (Tushimpi 3:9) Tulabona ayi ncoolwe cinene kupa maali akucafwilisha libungano anciito yakushimikila icitwa nsengwe yoonse. (Amubelenge 2 Bene Kolinto 9:7.) Shabupe nshetupa shilacafwilisha akumisena kucitika mapensho anene alicitikila. Baanji ‘balapatulako maali’ ngeenga kabapa lyoonse mbuli cipo. (Amubelenge 1 Bene Kolinto 16:2.) Inga twapa maali kwiinda mukubika mutubokosi tucanika mumisena motupailila na kuya pa donate.jw.org. Yehova alatupa coolwe cakwaamba ayi tutondeshe mbotumusuni kwiinda mukusebensesha shintu nshetucite.

AMWIIYILEWO ASHIMWI

3. Inga twasebensesha maali ashintu shesu

Yehova a Yesu balisuni muntu upa calusangalalo. Kucakubonenaako, Yesu wakalumba mwanakashi mukalubinje mukandu uyo wakapa cabupe kuli Yehova. Amubelenge Luka 21:1-4, akubandika miipusho iyi:

• Sa tulyeelete kupa maali aanji abuumbi kwaamba ayi tusangalashe Yehova?

• Ino Yehova a Yesu balalinyumfwa buyani na katupa cakusangalala?

Kwaamba ayi mushibe maali apekwa mukuliyandila mbwasebenseshekwa, amweebele VIDYO. Lyalo amubandike mwiipusho utokonkelaawo.

VIDYO: ‘Cabupe Kuli Yehova’ (4:47)

• Ino shipo shipekwa mukuliyandila shilasebenseshekwa buyani kucafwa mabungano nsengwe yoonse?

4. Inga twalyaaba kupa lucafwo

Muciindi camu Baibo, basebenshi bakwe Yehova bakalinga kusebensa cankusu kwaamba ayi batolelele kulama kabotu misena mwakupailila. Nacibi boobo, ici cakalinga kwiilikaawo shiinji kuteshibo kupa maali. Amubelenge 2 Makani 34:9-11, akubandika mwiipusho uyu:

• Ino mwine Isilaeli uli woonse wakalinga kucita buyani kwaamba ayi ŋanda yakwe Yehova na musena wakupaililaamo, ulamwe kabotu?

Kwaamba ayi mubone Bakamboni Bakwe Yehova mbobakonkela cakubonenaako ici cakale kale, amweebele VIDYO. Lyalo amubandike miipusho itokonkelaawo.

VIDYO: Kulama Kabotu Misena Njotupaililaamo (3:31)

• Ino nceebonshi ncociyandikila kubotesha akulama kabotu Ŋanda yesu ya Bwaami?

• Ino nshiinshi nsheenga mwaciita kwaamba ayi mucafwilishe?

5. Bamakwesu inga basebensa cankusu kwaamba ayi beelele kutambula mikuli

Malembo alayuminisha Beneklistu basankwa kusebensa cankusu kwaamba ayi bacafwilishe libungano. Kwaamba ayi mubone cakubonenaako, amweebele VIDYO. Lyalo amubandike mwiipusho utokonkelaawo.

VIDYO: Nobamakwesu—Amusebense Cankusu Kwaamba ayi Mweelele Kucita Ncito Shibotu (5:19)

• Kweelana anshomweebela muvidyo, ino Ryan wakacita buyani kwaamba ayi acafwilishe kabotu libungano?

Baibo ilaamba nsheenga mukwesu wacita kwaamba ayi eelele kusebensa mbuli musebenshi ucafwilisha na munene. Amubelenge 1 Timoti 3:1-13, akubandika miipusho iyi:

• Ino bamakwesu basuni kusebensa mbuli basebenshi bacafwilisha na bamanene balalangilwa kucita nshi?

• Ino mikwashi yabo ilalangilwa kucita nshi?—Amubone mavesi 4 a 11.

• Ino boonse mulibungano balacafwikwa buyani na bamakwesu basebensa cankusu kwaamba ayi beelele kupekwa mikuli mulibungano?

CITEENTE CINENE

Yehova alalumba abuumbi na katucita nsheenga twacikonsha kwaamba ayi tucafwilishe libungano kwiinda mukusebensesha ciindi, nkusu alimwi amaali esu.

Kwiindulukaamo

• Ino inga twacita buyani kwaamba ayi tusebenseshe ciindi ankusu shesu kucafwilisha libungano?

• Ino inga twasebensesha buyani maali ashintu shesu kwaamba ayi tucafwilishe libungano?

• Ino nshiinshi nsheenga mwasuna kucita kwaamba ayi mucafwilishe libungano?

AMULANGWETEEWO ASHIMWI

Amwiiye akubona Lesa ncatalangili basebenshi bakwe kupa calikumi.

“Ino Baibo Ilaamba Nshi Pamakani Akupa Calikumi?” (Makani acanika pa jw.org)

Baibo ilaamba pamikuli imwi basankwa bakabombekwa njeenga basebensa. Ano ino mbuyani na mwanakashi wakabombekwa kayandika kusebensa mikuli iyo?

Kunyumfwisha Nkusu Shakutanjilila Shicite Bamanene Mulibungano (Njashi Yamulindilishi, February, 2021)

Amubone Bakamboni bataloondi balyaaba kuya mukubwesa mabuku kumisena yakulaale akwaleta kumabungano.

Kwaabila Mabuku Aamba Shamu Baibo ku Congo (4:25)

Amwiiye nshila mbotucana maali ngotusebensesha muncito yesu mboipusene abuumbi anshila shisebensesha bupailishi bumwi.

“Ino Maali Bakamboni Bakwe Yehova Ngobasebensesha Muncito Yabo Alaswa Kuli?” (Makani acanika pa jw.org)