Makani Akusebensesha amu Kabuku Kamabungano Abuumi Anciito
© 2023 Watch Tower Bible and Tract Society of Pennsylvania
NOVEMBER 6-12
BUBONI BUCANIKA MUMASWI AKWE LESA | JOBO 13-14
“Na Muntu Wafwa, Sa Inga Waba Abuumi Alimwi?”
w99-E 10/15 pe. 3 mapa. 1-3
Mbotusunisha Kukala Buumi Bulaamfu
NABI kwaamba ayi makani akwaamba ayi tulekalabo nshiku shiniini akalembwa myaaka 3,500 yaiinda, mbantu baniniibo munshiku shino beenga bapikisha. Taakuwo muntu ukondwa kukalabo myaaka iniini lyalo akucembela akufwa. Aboobo kuswabo kale kale bantu baleelesha nshila shiinji kwaamba ayi bekale myaaka iinji.
Muciindi cakwe Jobo, bene Ijipiti bakalinga kulya makandi ashinyama kwaamba ayi mpashi inga baboolela kubwanike, sombi tashikwe kusebensaawo. Cintu comwi ncobakalinga kusuni beshisayansi bapanga misamu bamuciindi cakale kale pakati ka myaaka 500 kushika ku 1500 A.D, nkupanga misamu yeenga yapa bantu kukala myaaka iinji. Beshisayansi bamwi bakalinga kushoma ayi golodi wakapangwa abantu inga wapa muntu kukala buumi butamaani alimwi na muntu kaalita pa mbale ya golodi iyi inga wekala myaaka iinji. Bantu bakale kale bakucishi ca China beetwa ayi bene Tao bakalinga kuyeeya ayi inga bacikonsha kwaalula shimwi mumubili wa muntu kwiinda mukucita shintu mbuli kukutumana kuyeeya, kucita shiyumya mubili, akulya shakulya shipa buumi bubotu lyalo akuba abuumi butafwi.
Shikufwakashila misena wakucishi ca Spain waliina lya Juan Ponce de León alishibikitwe ceebo cakwaamba ayi wakalinga buya cilangoola nshila mbweenga bantu baba bacanike. Mulibuku liitwa ayi Hermippus Redivivus, dokota wamuciindi camu myaaka yamuma 1700 wakaamba ayi bamyooye babikwe mucipinda ciniini muciindi ca cilimo lyalo akubwesa muuya ngobatoyooya akuubika mumabotolo akunopangilako musamu wakulampishako buumi. Nacibi boobo, taakuwo nshila nabi yomwi pasheeshi yakasebensa.
w15-E 4/15 pe. 32 mapa. 1-2
Sa Cisamu Cakatemwa Inga Casonsa Alimwi?
CISAMU camolifi cilaboneka anga taakuwo mbocibete na mwaceelanya ku cisamu cinene abuumbi ca sida caku Lebanoni. Nacibi boobo, cisamu camaolifi nciyumu abuumbi cakwaamba ayi taciyumiiwo nabi kwaba cilanga. Shisamu shimwi sha maolifi shilekala myaaka mpashi 1,000. Cisamu ici cilaba amiyanda iinji ipa kwaamba ayi cishiki cisonse alimwi nabi pesule lyakucitema kulilabo na miyanda taina kuyuma.
Jobo wakalinga kushomete cakutatoonsha ayi na akafwe Lesa alaakumubusha. (Jobo 14:13-15) Wakatondesha mbwaakalinga kushoma ayi Lesa alaakumubusha na akafwe ndyakaamba pacisamu, mpashi camaolifi ayi: “Cisamu calo mbubo cilicite kulangila mukwiinga na catemwa cilasonsa alimwi.” Na infula yaloka cilanga cilamana, lyalo cishiki ciyumu ca cisamu camaolifi “cilasonsa anga ndicamenabo.”—Jobo 14:7-9.
“Nandumi Yako Utoobuka”!
6 Amuyeeye pamaswi Jobo ngaakaamba. Wakalinga kushomete ayi nabi wafwa, Yehova wakalinga kusunishishi kumubusha. (Jobo 14:14, 15.) Ubu bweenka Yehova mbwaalinyumfwa pabasebenshi bakwe boonse bakafwa. Alisunishishi kubabusha kwaamba ayi bakabe abuumi buli kabotu akuba alusangalalo. Ino Yehova alalinyumfwa buyani pabaabo boonse bakafwa kabatana kuba acoolwe cakwiiya cancine pali nguwe? Lesa wesu shilusuno alisunishishi kubabusha abalo. (Milimo 24:15) Alisuni kwaamba ayi abalo bakabe acoolwe cakuba beshicibusa bakwe akukala kwamuyayaya pacishi. (Joni 3:16) Ncakutatoonsha kwaamba ayi Yehova alisunishishi kubusha bantu bakafwa.
Buboni Bwakumushimu
it-1-E pe. 191
Milota
Milota cimwi ciindi yakalinga kwiimikaninako cintu citacite mpindu, kucakubonenaako, Abulaamu wakalyaambilila kuli Yehova ayi, “Nebo ndibo anga ndusuko nabi milota.” (Mtl 18:27; amubone a Isa 44:20; Job 30:19.) Jobo alakwe wakakoshanisha shakaamba babye ku ‘tushimpi tutacite ncito bweenka mbuli milota.’—Job 13:12.
NOVEMBER 13-19
BUBONI BUCANIKA MUMASWI AKWE LESA | JOBO 15-17
“Mutakonkeli Cakubonenaako Cakwe Elifasi Ndyemutoyuminisha Bamwi”
Amutolelele Kuyumya Kulangila Kwanu
10 Kulangila kwesu inga kwatushitilisha kuleya kunooyeeya ayi teshi tukacikoonshewo kucita sheenga shasangalasha Yehova. Kucakubonenaako, bamwi inga kabayeeya ayi: ‘Teshi nkabe pabaabo beshi bakekale kwamuyayaya. Nsheeleliiwo alimwi teshi nkacikonshewo kucita sheesho Lesa nshaasuni ayi ncite.’ Mutaluubi kwaamba ayi uku nkokuyeeya kwakalinga kucite Elifasi ndyaakalinga kubandika a Jobo. Elifasi wakaamba ayi: ‘Anu muntu nciinshi kwaamba ayi abule kampenda?’ Wakatolelela akwaamba pali Lesa ayi: ‘Bona! Taashomi baanjelo bakwe, nabibo meeculu tasalalite mu meenso akwe.’ (Jobo 15:14, 15) Ubu bwakalinga mbubeshi bwa mwanaamunene! Mutaluubi kwaamba ayi Satana ngwaasuni ayi munooyeeya boobo. Alicishi kwaamba ayi na mwatolelela kuyeeya boobo mulaakucileka kulangila. Aboobo amukake bubeshi bwa mushobo uyo akubikila maano kushishomesho shakwe Yehova. Mutatoonshi kwaamba ayi alisuni ayi mukekale kwamuyayaya alimwi alaakumucafwa kucikonsha kucita boobo.—1 Timo. 2:3, 4.
w15-E 2/15 pe. 9 pala. 16
Amube Bantu Baliceesha Alimwi Bacite Nkumbu Bweenka Mbuli Yesu
16 Maswi esu Abotu. Kunyumfwila bamwi inkumbu inga kwatucafwa “kuyuminisha balefukite.” (1 Tesa. 5:14, NWT) Ino inga twabayuminisha buyani abo balefukite? Inga twabalwiita ayi tulibasuni alimwi tulababikila maano. Inga twabalumba kuswa panshi lya moyo kwaamba ayi babone mibo ibotu njobacite ashintu nsheenga bacita. Inga twabeebalusha kwaamba ayi Yehova wakabasenya pafwiifwi amwaanaakwe mukwiinga alibasuni abuumbi. (Joni 6:44) Inga twabayuminisha kwiinda mukubalwiita ayi Yehova ulalama basebenshi bakwe abo “batyongola” na “batacite cakulangila.” (Kulu. 34:18) Maswi esu abotu alakonsha kusangalasha baabo balefukite.—Tus. 16:24.
Buboni Bwakumushimu
w06-E 3/15 pe. 14 pala. 11
Shiteente Shinene Shitocanika Mulibuku Lyakwe Jobo
7:9, 10; 10:21; 16:22—Sa Jobo nshaakaamba shakatondesha ayi taakalinga kushoma mububuke? Jobo apa taakalinga kwaamba sha kunembo sombi wakalinga kwaamba sha paciindi cilya. Ano ino wakalinga kusansulula nshi? Mpashi wakalinga kusansulula ayi taakuwo pakati ka babye abo wakalinga kusa mukumubonaawo alimwi na wafwa. Mukuyeeya kwabo bakalinga kubona ayi teshi akaboolele kuŋanda yakwe na kutolelela kushibikwa kushikila ciindi Lesa ncaakabika. Alimwi cilyeelete mpashi Jobo wakalinga kusansulula ayi taakuwo muntu weenga wabuka kuswa mu Cuumbwe kwiinda munkusu shakwe mwiine. Bumboni butondesha ayi Jobo wakalinga kushoma mububuke tulabucana pa Jobo 14:13-15.
NOVEMBER 20-26
BUBONI BUCANIKA MUMASWI AKWE LESA | JOBO 18-19
“Mutasuuli Bashominyinaanu”
Nsheenga Tweeya Kuswa Kuminsonshi Yesu Njaakalosha
9 Inga mwacafwa baabo bacite buumba. Yesu taakwe kweelabo pakulila pomwi a Malita alimwi a Maliya, sombi wakabakutika alimwi akubayuminisha. Aswebo mbotweelete kucita kubaabo bacite buumba. Munene mulibungano waliina lya Dan ukala ku Australia wakaamba ayi: “Bakaangu ndyebakafwa ndakalinga kuyandika lucafwo. Bamakwesu baanji abamakaabo bakalinga kulibambite kunkutika. Bakalinga kundeka ndalila alimwi tabakalinga kunyumfwa nsoni na ntoolila. Alimwi bakalinga kulyaaba kuncafwa muncito mbuli kunsanshilako motoka, kungulilako shintu alimwi akuntelekelako shakulya na ndaalilwa kucita boobo. Alimwi liinji bakalinga kupaila andime. Bakatondesha patuba kwaamba ayi mbeshicibusa bancine alimwi ‘bamakwanu bakashalilwa kukucafwa mumapensho.’”—Tus. 17:17.
Na Shicibusa Nabi Shikamukowa Wacileka Kusebensela Yehova
16 Amutolelele kucafwa mukwashi bacite shikamukowa wakakushikwa mulibungano. Balisuni kwaamba ayi mubatondeshe lusuno akubayuminisha bunene bunene pacecino ciindi. (Ebu. 10:24, 25) Cimwi ciindi mukwashi bacite shikamukowa wakakushikwa mulibungano, balabona ayi bamwi mulibungano bakacileka kubandikaabo kuba anga abalo bakakushikwa mulibungano. Tatusuniiwo kwaamba ayi banoolinyumfwa boobo! Tulyeelete kunoolumba akuyuminisha bacanike bacite bashali bakacileka kusebensela Yehova. Ba Maria bacite beebaabo bakakushikwa mulibungano akushiya mukwashi bakaamba ayi: “Beshicibusa bamwi bakesa kumisheesu akusa mukuncafwa kuteleka akwiisha bana bangu. Abalo bakalinyumfwa cibiibi abuumbi alimwi bakalila andime. Bakalinga kunjimikaninaako na bantu batalika kwaamba makani akubeca pali ndime. Bakanjuminisha abuumbi!”—Loma. 12:13,15.
w90-E 9/1 pe. 22 pala. 20
Sa Mutoosebensa Cankusu Kwaamba ayi Mweelele Kupekwa Mikuli?
20 Bamanene balyeelete kwiibaluka kwaamba ayi mukwesu inga walisukama abuumbi na wacileka kusebensa mbuli munene na musebenshi ucafwilisha, nabi kwaamba wacita boobo mukuliyandilabo mwiine. Na taakwe kukushikwa mulibungano alimwi bamanene babona ayi atooboneka kulisukama abuumbi, inga wayandika kumucafwa lwakumushimu munshila yalusuno. (1 Bene Tesalonika 5:14) Balyeelete kumucafwa kushiba ayi alayandika mulibungano. Nabi kwaamba ayi kululikwa kwakalinga kuyandika, inga tacitoliwo ciindi kwaamba ayi muntu uliceesha alimwi ulumba kwaamba ayi eelele alimwi kutambula mikuli mulibungano.
Buboni Bwakumushimu
w94-E 10/1 pe. 32
Maswi Ankumbu Mbwaacafwa
Nacibi boobo, Jobo mwiine ndyaakalinga kuyandika kuyuminishikwa, Elifasi ababye tabakwe kwaamba maswi atondesha nkumbu. Bakapa Jobo mulandu pamapensho ngaakalinga kwiindaamo, akutondesha anga Jobo kuli cibiibi cimwi ncaakacita mubushishi. (Jobo 4:8) The Interpreter’s Bible ilaamba ayi: “Jobo wakalinga kuyandika shicibusa ucite moyo wa buntu. Wakatambula mulongo wa maswi abupailishi akufuya amakani akulilemeka ‘ancine’ alimwi ‘abotu.” Ndyaakanyumfwa shakaamba Elifasi ababye, Jobo wakapenga abuumbi cakwaamba ayi cakumupa kwaamba ayi: “Anu mutoocileka lili kuncisa kumoyo? Mutoocileka lili kuntyoloola amaswi anu?”—Jobo 19:2.
Tatweelete kulengesha musebenshinyineesu wakwe Lesa kupenshekwa mumoyo akutoongooka ceebo cakwaamba ayi twaamba maswi cakutayeeyawo akutatondesha nkumbu. (Amweelanye a Dutolonomi 24:15.) Lilembo lya Tushimpi lilatucenjesha ayi: ‘Nshewaamba shilakonsha kukupa buumi nabi kukucaisha, ee, muntu ulyeelete kutambula shisepo sha maswi ngaamba.’—Tushimpi 18:21.
NOVEMBER 27–DECEMBER 3
BUBONI BUCANIKA MUMASWI AKWE LESA | JOBO 20-21
“Kuba Mululami Teshi Kuba Abubile”
w07-E 8/1 pe. 29 pala. 12
Sa Mulibabile Kuli Lesa?
12 Yesu wakaamba bupusano buli pakati ka kuba mubile kuli Lesa akubila lwakumubili. Yesu wakalinga kusansulula ayi tatweelete kunobikila bunene maano kukuba babile lwakumubili na kukusangalala ashintu shakumubili. Sombi tulyeelete kusebensesha buboni bwesu munshila yeenga yatucafwa kuyumya bushicibusa bwesu a Yehova. Kucita boobo, kulaakutupa kuba babile kuli Lesa. Ino nceebonshi? Mukwiinga kuba bushicibusa buyumu a Yehova kulatucafwa kucana shoolwe shiinji kuswa kuli nguwe. Baibo ilaamba ayi: ‘Coolwe ciswa kuli Yehova ncecipa muntu kubila, alimwi taailikiwo kucisa kuli koonse.’—Tushimpi 10:22.
Buboni Bwakumushimu
w95-E 1/1 pe. 9 pala. 19
Kukoma Satana a Milimo Yakwe
19 Tulyeelete kushiba ayi musebenshi wakwe Lesa Jobo wakasebensa cankusu kulwana ‘miyeeyo isukamika,’ Satana njaakaamba kwiinda muli Elifasi a Sofa. (Jobo 4:13-18; 20:2, 3) Aboobo wakapenga abuumbi cakwaamba ayi wakatalika kwaamba ‘caambaambe’ ceebo cakupenga abuumbi mumiyeeyo. (Jobo 6:2-4; 30:15, 16) Eliyu wakoomuna akukutika Jobo ndyaakalinga kwaamba, lyalo akumucafwa kubona Yehova uyo ucite busongo bwiinditeewo mbwaabona shintu. Amunshiku shino, bamanene bacite nkumbu balatondesha kubikila maano kubaabo batokwiinda mumapensho kwiinda mukutabeelikilawo mikuli. Sombi bweenka mbuli bwakacita Eliyu, balabakutika cakubikila maano akubayuminisha kwiinda mu Maswi akwe Lesa. (Jobo 33:1-3, 7; Jemusi 5:13-15) Aboobo uli woonse weenga walinyumwfa kulisukama ceebo camapensho eene na akuyeeyelabo, na kuloonda ceebo cakulota shintu shibiibi na shili anga nshiloto,’ bweenka mbuli Jobo mbwaakaloonda, inga wacana kuyuminishikwa kwa mu Malembo kuswa kubamakwesu mulibungano.—Jobo 7:14; Jemusi 4:7.
DECEMBER 4-10
BUBONI BUCANIKA MUMASWI AKWE LESA | JOBO 22-24
“Ino Muntu Ulicite Ncitonshi Kuli Lesa?”
w05-E 9/15 pe. 27 mapa. 1-3
Amukake Kuyeeya Kutabete Kabotu!
Muyeeyo wakwaamba ayi nciyumu kucita shisangalasha Lesa uleendelana amuyeeyo wakwaamba ayi Lesa alabona ayi bantu taakuwo mbobabete. Linkanda lyatatu Elifasi ndyaakalinga kwaamba wakeepusha mwiipusho wakwaamba ayi: “Ino muntu ulicite ncitonshi kuli Lesa? Nabi musongo, nincitonshi njaacite kuli nguwe?” (Jobo 22:2) Elifasi wakalinga kusansulula ayi muntu taacitewo ncito kuli Lesa. Alakwe Biludadi wakaamba ayi: “Ino muntu inga walulama buyani pameenso akwe Lesa? Anu muntu wakashalwa kumwanakashi inga wabula buyani kampenda?” (Jobo 25:4) Kweelana akuyeeya uku, ino Jobo wakalingabo muntu ukonsha kufwa nakwiinga wakalibona buyani ayi aliluleme kuli Lesa?
Bantu bamwi munshiku shino balapenga ceebo cakulinyumfwa anga taakuwo mbobabete. Balalinyumfwa boobo ceebo ca nkulilo, mapensho ngobakeendaamo mubuumi, na kupatwa kubamwi ceebo cakusalululana mishobo. Satana ashibanda shakwe abalo balanyumfwa kabotu kupensha bantu. Balicishi kwaamba ayi na balengeshabo muntu kutalika kulinyumfwa ayi taakuwo nceenga wacita cibotu kuli Lesa Shinku shoonse, ncuubu muntu uyo kubulilwa kwa kuya. Lyalo mukuya kwaciindi muntu uyo inga watalika kulitalamusha kuli Lesa mpashi akucilekelabo limwi kushoma muli nguwe.—Bene Ebulu 2:1; 3:12.
Kucembela akuciswa kulatupa kwaalilwa kucita shintu shimwi. Inga twatalika kubona ayi tutokwaalilwa kucita shiinji muncito ya Bwaami na twayeeya nshotwakalinga kucita katucili bacanike alimwi katucicite nkusu. Cilayandika abuumbi kutaluba kwaamba ayi Satana ashibanda shakwe balisuni kutupa kuyeeya ayi nshetutoocita pacecino ciindi taakuwo mboshibete kuli Lesa. Tulyeelete kukaka kuyeeya kwa mushobo uyu.
w95-E 2/15 pe. 27 pala. 6
Nsheenga Tweeya Pamakani Ambweenga Twamana Mapensho
Babye Jobo botatwe bakatolelela kumukalasha kwiinda mukwaamba nshobakalinga kuyeeya muciindi cakwaamba maswi abusongo bwakwe Lesa. Elifasi wakashika apakwaamba ayi ‘Lesa tashomiiwo basebenshi bakwe’ alimwi ayi kucita nabi kutacita shilulene kwakwe Jobo tekwakalinga kucitewo ncito kuli Yehova. (Jobo 4:18; 22:2, 3) Aya akalinga maswi akubeca alimwi amana nkusu! Nceceeco Yehova ncaakalulikila Elifasi ababye ceebo ca maswi abo akucobola. Wakaamba ayi: “Mwebo tamukwe kwaamba makani a lushinisho pali ndime.” (Jobo 42:7) Sombi kwakalinga kusa mukwaambwa makani aamwi atabete kabotu.
Mbweenga Mwaba Shicibusa Wakwe Lesa
14 Inga tweeya makani ayandika pashintu shakacitikila Jobo. Pacecino ciindi, Satana alatubekesha ayi tulashomeka kuli Yehova ceebo ca shintu nshetusuni kuli nguwe. Pa Jobo 2:4, Satana wakaamba ayi: “Muntu ulakonsha kupa shintu shoonse nshaacite kwiinda kufwa.” Aboobo Satana alabekesha bantu boonse kuteshibo Jobo eenka ayi balasebensela Lesa ceebo ca shintu nshaabapa. Nabi kwaamba ayi peenda myaaka iinji kuswa ciindi Jobo ndyaakafwa, Satana taakwe kucileka kucobola Yehova akubekesha basebenshi bakwe. Kucakubonenaako, Tusimpi 27:11, ilaamba ayi: ‘Omwanaangu ba musongo akusangalasha moyo wangu, lyalo ndaakwishiba bwakukumbula wooyo untongoola.’
15 Amwebo inga mwasala kunyumfwila Yehova akuba shicibusa wakwe ushomeka, akutondesha ayi ncakwiila Satana ngumubeshi. Mpashi cimwi ciindi inga mwayandika kwaalula shiinji mubuumi kwaamba ayi mube shicibusa wakwe Lesa, ico ncintu cibotu abuumbi! Kucita boobo kulicindeme abuumbi. Satana alamubekesha ayi na mwacana mapensho inga tamutoleleli kushomeka kuli Lesa. Alisuni kutucenjeeka kwaamba ayi tutashomeki kuli Lesa. Munshila nshi?
Buboni Bwakumushimu
w04-E 7/15 mape. 21-22
Amulemeke Mulengi Wanu Kwiinda Mukuba Ashakucita Shakumushimu
Amuyeeye Yehova mbwaakacikonsha kukumanisha ncito yakulenga bubumbo boonse. Maswi akwaamba ayi “kwakaba macolesha amacuunsa” alatondesha ayi Yehova wakaabanya ciindi ndyaakalinga kulenga shintu. (Matalikilo 1:5, 8, 13, 19, 23, 31) Pa bushiku bomwi abomwi ndyaakalinga kutalika kulenga shintu, wakalinga kucishi kale nshaakalinga kusuni kukumanisha pabushiku ubo. Alimwi Lesa wakacikonsha kukumanisha luyaando lwakwe lwakulenga shintu. (Ciyubululo 4:11) Jobo wakaamba ayi: “[Yehova] ulacita kulilabo nshaasuni.” (Jobo 23:13) Cilyeelete cakamusangalasha abuumbi Yehova kubona “shoonse nshaakalenga” akushaamba ayi “nshibotu abuumbi”!—Matalikilo 1:31.
Aswebo kwaamba ayi tucikoonshe kukumanisha nshetusuni kucita tulyeelete kusunishisha shintu isho nshetusuni kukumanisha. Ino nciinshi ceenga catucafwa kucita boobo? Yehova wakalinga kucishi kale cishi mbocakalinga kusa mukuboneka kabotu abuumbi, akupa kwaamba ayi alemekwe akulumbaishikwa nabi paciindi kaatana kutalika kulenga shintu. Aswebo inga twasunishisha kukumanisha nshetusuni kucita na katukutumana kuyeeya pa bubotu bweshi bukasweemo. Ishi nsheshakacitikila mukwesu wa myaaka 19 waliina lya Tony. Wakatolelela kuyeeya mbwaakasangalala paciindi ndyaakafwakashila ofesi ya musampi ya Bakamboni Bakwe Yehova yaku Western Europe. Kuswabo paciindi ico, mukwesu Tony wakatolelela kuliipusha ayi, ‘Ino inga caba buyani na ndaya mukukala akusebensela pamusena mbuli ulya?’ Mukwesu Tony taakwe kucileka kuyeeya ayi inga wacikonsha, alimwi wakatolelela kusebensa cankusu. Ndyepakeenda myaaka wakasangalala abuumbi ndyaakapekwa coolwe cakuya mukusebensela kumusampi!
DECEMBER 11-17
BUBONI BUCANIKA MUMASWI AKWE LESA | JOBO 25-27
“Nabi Muntu Utamaninite Inga Watolelela Kushomeka”
it-1-E pe. 1210 pala. 4
Kushomeka
Jobo. Jobo uyo mpashi wakekalako kuswa paciindi Josefu ndyaakafwa kusa mukushika paciindi cakwe Mose, Baibo ilamusansulula ayi wakalinga musankwa ‘watakalinga kucitewo kampenda nabi komwi alimwi wakalinga kululeme [Heb., tam] wakalinga kulemeka Lesa alimwi wakalinga kushomeka kuli nguwe.’ (Job 1:1; see JOB.) Mwiipusho Lesa ngwaakeepusha Satana Mulwani wakwe pali Jobo paciindi Satana ndyaakabonekela pakubungana kwa baanjelo kwiculu, ulatondesha patuba kwaamba ayi kushomeka kwa muntu uli woonse ndubasu lwa makani anene akabuka pali Yehova Lesa a Satana. Satana wakabekesha Jobo ayi alasebensela Yehova ceebo ca shintu Lesa nshaakamucitila kuteshi ceebo calusuno. Aboobo wakatoonsha kushomeka kwakwe Jobo. Nabi kwaamba ayi wakasuminishikwa kunyonyoola shintu shakwe Jobo akucaya bana bakwe, Satana wakaalilwa kupa kwaamba ayi Jobo acileeke kushomeka. (Job 1:6–2:3) Lyalo wakabekesha Jobo ayi wakatolelela kushomeka akuliyumya pashintu nshaakasowekelwa akufwitwa baana ceebo ca buumi mbwaacite. (Job 2:4, 5) Pesule lyakuciswa bulwashi bucisa abuumbi akuwelulukwa kumukaakwe ababye abo bakaamba shakubeca pa njiisho aluyaando lwakwe Lesa (Job 2:6-13; 22:1, 5-11), Jobo wakakumbula cakushinisha ayi: “Kushikila nkafwe, teshi nkacileeke kushomeka! Ndaakukakatila kubululami bwangu, alimwi teshi nkabushiyeewo; moyo wangu teshi ukampewo mulandu kulilabo kaandi muumi.” (Job 27:5, 6, NWT) Kutolelela kushomeka kwakwe Jobo kwakatondesha patuba kwaamba ayi Mulwani munene wakwe Lesa wakaamba shakubeca.
w19-E.02 pe. 3 mapa. 3-5
Amutolelele Kushomeka!
3 Ino basebenshi bakwe Yehova balatondesha buyani ayi balashomeka? Balacita boobo kwiinda mukusuna Yehova amoyo wabo woonse, alimwi akubika kuyanda kwakwe panembo mushintu shoonse. Liswi lyamu Baibo lyakwaamba ayi “kushomeka” lilasansulula cintu cakabumbulu na citacite kampenda. Kucakubonenaako, bene Isilaeli ndyebakalinga kubenga milambu ya banyama kuli Yehova, Mulawo wakaamba ayi bakalinga kweelete kubenga banyama batacite kampenda. (Lefi. 22:21, 22) Bantu bakwe Lesa tabakalinga kusuminishikwa kubenga munyama mulema myeendo, utacitewo kutwi, utalashi nabi mulwashi. Yehova wakalinga kusuni ayi kababenga banyama bakabumbulu alimwi batacite kampenda. (Mala. 1:6-9) Inga twanyumfwisha cakapa kwaamba ayi Yehova alwiite bene Isilaeli kunoobenga milambu itacite kampenda. Kucakubonenaako, na tutokuula cintu, inga caba ayi ncisepo, libuku na cisebensesho, inga tatuuli citulukite na citabete kabotu mumbasu shimwi. Tulashinisha ayi ncakabumbulu, ncibotu alimwi tacicite kampenda. Yehova alakwe alisuni ayi tumusuune amoyo wesu woonse na kushomeka camoyo woonse kuli nguwe.
4 Sa tulyeelete kuyeeya ayi tulayandika kuba bamaninite kwaamba ayi tutolelele kushomeka? Mpashi inga twatalika kuyeeya ayi, tatumaninite alimwi liinji tulabisha. Ino nceebonshi tatweelete kunooyeeya ayi tulyeelete kuba bamaninite kwaamba ayi tutolelele kushomeka? Cakutaanguna, Yehova taabikilibo maano kushilubo shesu. Maswi akwe alaamba ayi: ‘O Yehova, niwalinga kulemba shibiibi shesu cakutashifuuta, anu ngani wakalinga kweelete kucaala kwakubula mulandu kuli ndiwe?’ (Kulu. 130:3) Alicishi kwaamba ayi tatumaninite alimwi tulabisha, aboobo alatulekelela. (Kulu. 86:5) Cabili, Yehova alicishi nsheenga twacikonsha ansheenga tatucikoonshi, alimwi taatulangili kucita nsheenga tatucikoonshi. (Amubelenge Kulumbaisha 103:12-14.) Ino inga twacita buyani kwaamba ayi tube batacite kampenda na bashomeka kuli nguwe camoyo woonse?
5 Lusuno inga lwatucafwa kutolelela kushomeka kuli Yehova. Tulyeelete kusuna akusebensela Ishiwesu wakwiculu cakushomeka amoyo wesu woonse. Kucita boobo kulaakutucafwa kutolelela kushomeka kuli nguwe nabi ndyetweeleshekwa. (1 Maka. 28:9; Mate. 22:37) Amuyeeye pa Bakamboni botatwe mbotwalinga twaambawo kumatalikilo. Ino nciinshi cakalengesha ayi bacite nshobakacita? Sa nankashi wacanike taakalinga kusuni kusangalala pomwi ababye kucikolo? Sa mukwesu wacanike wakalinga kusuni kwaamba ayi bamulwiite maswi atabete kabotu paŋanda ilya? Sa mukwesu wakalinga kusuni kwaamba ayi bamukushe ncito? Sobwe. Sombi boonse bakalinga kucishi ayi balyeelete kukonkela milawo yakwe Yehova. Alimwi balabikila maano kucita shintu sheenga shasangalasha Ishiwabo wakwiculu. Mukwiinga balimusuni balataanguna kuyeeya pali nguwe kabatana kusalawo shakucita. Aboobo balatondesha ayi balashomeka kwiinda mushintu nshebacita.
Buboni Bwakumushimu
w16-E.11 pe. 9 pala. 3
Lesa Wakabamba Shintu Kweelana a Bwaamba Maswi Akwe
3 Shintu Lesa nshaakalenga shilatondesha patuba kwaamba ayi taakuwo weenga weelana anguwe mukubamba kabotu shintu. Baibo ilaamba ayi: ‘Yehova wakalenga cishi kwiinda mubusongo bwakwe akubika liculu mumusena wa ndilyo kwiinda mumaano akwe akunyumfwisha shintu.’ (Tus. 3:19) Tulishibo ‘milimo yakwe [Lesa] ya peculu,’ alimwi “tulanyumfwabo kutepeta kwakwe.” (Jobo 26:14) Nacibi boobo, shintu shiniini nshetushi pamakani amapulaneti, nyenyeenshi, alimwi amilalabungu, shilatupa kusumina kwaamba ayi shilengwa sha mwiculu shilibambitwe kabotu. (Kulu. 8:3, 4) Milalabungu ilicite nyenyeenshi shiinji abuumbi alimwi shoonse shileenda munshila ibambitwe kabotu. Ino nceebonshi? Mukwiinga mapulaneti alashinguluka lisuba munshila yakutapunkana! Ncakutatoonsha Yehova mbwaakabamba shintu mwiculu, shilatondesha ayi Yehova, uyo wakalenga liculu acishi capanshi “mubusongo bwakwe” tulyeelete kumulumbaisha, kushomeka kuli nguwe, akumulambila.—Kulu. 136:1, 5-9.
DECEMBER 18-24
BUBONI BUCANIKA MUMASWI AKWE LESA | JOBO 28-29
“Sa Mulicite Mpuwo Ibotu Bweenka Mbuli Jobo?”
w02-E 5/15 pe. 22 pala. 19
Kutondesha Nkumbu Kubabulishite
19 Makani amu Baibo ngotwabandikaawo atoyuminisha cancine cakwaamba ayi inga twatondesha nkumbu kubaabo batokwaalilwa kulicanina shiyandika. Abulaamu wakalinga kuyandika lucafwo kuswa kuli Betiwelo kwaamba ayi lishalane lya mukowa wakwe litolelele. Jakobo wakalinga kuyandika lucafwo lwakwe Josefu kwaamba ayi mutuntu wakwe uye mukubikilwa ku Kenani. Alimwi Naomi wakalinga kuyandika lucafwo lwakwe Lute kwaamba ayi acane shikupyana. Abulaamu, Jakobo alimwi a Noami nakwiinga bakaalilwa kucita sheeshi kwakubula lucafwo. Ubu mbocibete amunshiku shino, tulyeelete kutondesha nkumbu bunene bunene kubantu babulishite. (Tushimpi 19:17) Tulyeelete kukonkela cakubonenaaako cakwe Jobo, uyo wakabikila maano “bakandu abo bakalinga kusenga lucafwo, bana banshiwa batakalinga kucite shikubacafwa” alimwi a “kubantu bali pafwaafwi kufwa.” Kwiilikaawo, “wakalinga kucafwa bamukalubinje ayi banookala kabasangalete” alimwi wakalinga ‘meenso a mpofu alimwi amyeendo ya balema.’—Jobo 29:12-15.
it-1-E pe. 655 pala. 10
Lilaaya
Liswi lyakwaamba ayi shakufwala lileemikaninako shintu shiinji. Bweenka shakufwala shimwi shilibetele mboshitondesha libunga muntu mwaabete, shakufwala ashalo mu Baibo shilasebenseshekwa kwiimikaninako cintu cimwi, kutondesha nshaashoma anciito nshaasebensa na wafwala shakufwala isho, bweenka mbuli cikoshanyo Yesu ncaakaamba ca cakufwala ca pabwiinga. (Mt 22:11, 12; see HEADDRESS; SANDAL.) Palilembo lya Ciyubululo 16:14, 15, Mwaami Yesu Klistu wakacenjesha pamakani akoona lwakumushimu akufuulwa citondesho cakuba kamboni ushomeka wakwe Lesa wancine. Ca mushobo uyu inga cabica abuumbi na cacitika “pabushiku bunene bwakwe Lesa Shinkusu shoonse.”
w09-E 2/1 pe. 15 mapa. 3-4
Ino Liina Lileelikaawo Nshi?
Tatulisalili sobeene liina ndyebatutumba na twashaalwa. Nacibi boobo, tulicite nkusu shakulipangila mpuwo. (Tushimpi 20:11) Aboobo ino mbuyani kuliipusha ayi: ‘Nicalinga cakwaamba ayi Yesu na batumwi bapekwa coolwe ca kuntumba liina, ino nakwiinga bantumba liina nshi? Ino ndiina nshi lyeenga lyeelela mubo ngontondesha bunene na mpuuwo njeencite?’
Uyu ngumwiipusho uyandika kuyeeyawo abuumbi. Ino nceebonshi? Nceebo ca maswi akalemba Mwaami musongo Solomoni ayi: “Ncibotu kuba ampuuwo ibotu kwiinda kuba abubile buunji.” (Tushimpi 22:1) Ncintu cibotu abuumbi kuba ampuuwo ibotu kumusena nkotukala. Nacibi boobo, cintu ciyandika abuumbi nkuba aliina libotu kuli Lesa, mukwiinga kucita boobo kulaakutupa kucana shoolwe shitamaani. Munshila nshi? Lesa wakashomesha ayi abo bamulemeka alaakulemba meena abo “mulibuku lya buumi” akubapa coolwe cakuba abuumi butamaani.—Malaki 3:16; Ciyubululo 3:5; 20:12-15.
Buboni Bwakumushimu
g00-E 7/8 pe. 11 pala. 3
Kumweta Mweta Inga Kwamucafwa!
Sa ncakwiila kumweta mweta kulacafwa? Sa mutokwiibaluka kumweta mweta kwa umwi muntu mbokwakamupa kukalika moyo na kwaanguluka? Na mpashi kutamweta mweta kwa muntu umwi mbokwakamupa kulisukama nabi kulinyumfwa ayi muntu taamusuniiwo? Ncakwiila kumweta mweta kulaalula shintu. Kulacafwa wooyo wa mweta mweta alimwi awooyo utotondeshekwa kumweta mweta. Jobo wakaamba pa balwani bakwe ayi: “Na batyongooka, ndakalinga kubasekela, aboobo bakalinga kuyuminishikwa ceebo ca cisangalashi cangu.” (Jobo 29:24) Aboobo Jobo mbwaakalinga kuboneka pameenso wakalinga kutondesha mbwaakalinga kusangalete mumoyo.
DECEMBER 25-31
BUBONI BUCANIKA MUMASWI AKWE LESA | JOBO 30-31
“Jobo Nshaakacita Kwaamba ayi Atolelele Kucita Shisalalite”
w10-E 4/15 pe. 21 pala. 8
Mutalangilishi Pashintu Shibiibi!
8 Beneklistu bancine abalo inga baba alunkumbwa lwa meenso alunkumbwa lwa mubili. Nceceeco Maswi akwe Lesa alatuyuminisha kulikasha pamakani ashintu nshetubona anshetukumbwa. (1 Koli. 9:25, 27; amubelenge 1 Joni 2:15-17.) Jobo musankwa ululeme wakalinga kucishi kabotu kwaamba ayi kulangilisha inga kwapa muntu kuba alunkumbwa. Wakaamba ayi: “Ndakapangana cipangano ameenso angu ayi teshi nkalangilishewo mwanakashi calunkumbwa?” (Jobo 31:1) Jobo taakwe kukakabo kucata mwanakashi munshila itabete kabotu sombi taakalinga kusuniiwo akuba amuyeeyo wamushobo uyo. Yesu wakayuminisha kwaamba ayi tatweelete kunooyeeya pashintu shibiibi ndyakaamba ayi: “Uyo woonse ulangilisha mwanakashi calunkumbwa, wacita kale bulale anguwe mumoyo.”—Mate. 5:28.
w08-E 9/1 pe. 11 pala. 4
Amuyeeye Shiswaamo
Kamutana kucita ca mushobo uyo, amuliipushe ayi, ‘Ino nshiinshi sheshi shikasweemo?’ Kukutumana kuyeeya sheenga shaswaamo inga kwamucafwa kuleya kucita cintu ceenga camuletela mapensho anene. Bantu batakonkeli njiisho shakwe Lesa pamakani akulilemeka balacana mapensho mbuli kuyambula bulwashi bwa AIDS amalwashi amwi bantu ngobayambula mukucita bufuule, kupuumpa mafumo, kukusha mafumo, kunyonyoola bushicibusa, akupenshenkwa anjeelacaamba. Mutumwi Paulo wakasansulula cakuteenda mweela sheshi shikacitikile baabo bacita bufuule ndyaakaamba ayi: ‘Teshi bakenjile mu bwaami bwakwe Lesa.’—1 Bene Kolinto 6:9, 10.
w10-E 11/15 mape. 5-6 mapa. 15-16
Nobacanike—Amukonkele Butanjilishi bwa Maswi Akwe Lesa
15 Ino mbukaalo nshi ndyeenga caba ciyumu kukoma bweelesho—sa nciindi ndyemuli nweenka na ndyemuli abamwi? Ncakutatoonsha kwaamba ayi ndyemuli kucikolo na kuncito muleelesha cankusu kuleya shintu sheenga shanyonyoola bushicibusa bwanu a Lesa. Nacibi boobo, inga caba cuubu abuumbi kukomwa ameelesho paciindi ndyemuli nweenka alimwi ndyemuliibite.
16 Ino nceebonshi mulyeelete kunyumfwila Yehova nabi paciindi ndyemuli nweenka? Mutaluubi kwaamba ayi: Nshemucita inga shalengesha Yehova kukalala na kusangalala. (Mata. 6:5, 6; Tus. 27:11) Shintu nshomucita shilakuma Yehova mukwiinga “ngoomulama.” (1 Pit. 5:7) Alisuni ayi munoomunyumfwila kwaamba ayi shintu shinomweendela kabotu. (Isa. 48:17, 18) Yehova wakakalala basebenshi bakwe bamuciindi cakale kale ndyebatakwe kukonkela kululika kwakwe. (Kulu. 78:40, 41) Nacibi boobo, Yehova wakalinga kumusuni abuumbi Danyelo cakwaamba ayi munjelo wakamwiita ayi “musankwa usunikwi abuumbi.” (Danye. 10:11) Ino nceebonshi? Danyelo wakatolelela kushomeka kuli Lesa kuteshibo ndyaakalinga pabantu sombi aciindi ndyaakalinga eenka.—Amubelenge Danyelo 6:10.
Buboni Bwakumushimu
w05-E 11/15 pe. 11 pala. 3
Kutondesha Lusuno Kwiinda Mukukutika Cakubikila Maano
Beshicibusa bakwe Jobo bakanyumfwa Jobo nshaakaamba ndyaakabandikaabo mankanda 10. Nacibi boobo, Jobo wakaamba ayi: ‘Sa taaku weshi akutikewo nshentokwaamba?’ (Jobo 31:35) Ino nceebonshi? Nceebo cakwaamba ayi tabakwe kumuyuminisha nabi ndyebakalinga kukutika. Tabakwe kumubikila maano alimwi tabakalinga kusuni kunyumfwishisha mbwaakalinga kulinyumfwa. Ncakwiila tabakwe kumuyeeyelaako ndyebakalinga kukutika. Nacibi boobo, mutumwi Pita wakaamba maswi akululika ayi: “Cakweelaako, noonse amucatane amoyo womwi akuba amyoyo ibombu. Mulyeelete kusunana abashominyinaanu akunoonyumfwilana nkumbu akuliceesha.” (1 Pita 3:8) Ino inga twatondesha buyani ayi tulicite nkumbu? Nshila yomwi nkubikila maano kumuntu umwi mbwaatolinyumfwa akweelesha kumunyumfwishisha. Nshila imwi nkwiinda mukwaamba maswi atondesha ayi nshaatokwiindaamo aswebo shatukuma. Kucakubonenaako, inga twaamba ayi “ncakwiila ico inga camukalasha” na kwaamba ayi “ kwalo tabakwe kumunyumfwishisha.” Nshila imwi nkwiinda mukwaamba maswi muntu ngaatotulwiita mu maswi esu. Kucita boobo kulatondesha ayi twanyumfwisha nshaamba. Inga twatondesha lusuno kwiinda mukukutika cakubikila maano kumuntu mbwaatolinyumfwa kuteshibo kumaswi ngaatokwaamba.