Ndabala ya Babelo yakalinga pafwiifwi a ndabala ya Ulu. Bantu baanji mundabala iyi tabakalinga kulambila Yehova, sombi bakalinga kulambila balesa baanji. Nacibi boobo, kwakalinga musankwa womwi mundabala iyi wakalinga kulambila Yehova eenkabo. Liina lyakwe wakalinga Abulaamu.

Yehova wakalwiita Abulaamu ayi: ‘Shiya ŋanda yako abeshikamukowa bako akuya kumusena nkweshi nkutondeshe.’ Lyalo Lesa wakamushomesha ayi: ‘Ndaakukupa bamulunyungu lwako baanji, alimwi ndaakucita shintu shiinji shibotu pacishi coonse ca panshi ceebo ca ndiwe.’

Abulaamu taakalinga kucishiiwo Yehova nkwakalinga kumutuma, sombi wakamushoma. Abulaamu, Saala mukaakwe, baishi ba Tela, a Loti mwicwa wakwe, bakalongela shintu akutalika lweendo lwabo.

Abulaamu wakalinga kucite myaaka 75 paciindi ndyebakashika kumusena Yehova ngwaakalinga kusuni ayi babone. Musena uyu wakalinga kwiitwa ayi cishi ca Kenani. Lesa wakabandika a Abulaamu akumushomesha ayi: ‘Musena woonse uyu ngootobona, ndaakuupa ku bana bako.’ Sombi Abulaamu a Saala bakalinga bacembela alimwi tabakalinga kucitewo mwaana. Aboobo ino Yehova wakalinga kusa mukukumanisha buyani cishomesho cakwe?

Abulaamu a Saala bakekala mucikwati kwa myaaka iinji. Bakashiya buumi bubotu ku Ulu akutalika kukala mutente. Ano mukwiinga Saala wakalinga kucinkite manungo muli Yehova, taakwe kutongooka.

Saala wakalinga kusunishi kuba amwaana aboobo wakalwiita Abulaamu ayi: ‘Na musebenshi wangu Aga waba a mwaana, inga cababo anga ngu mwanaangu.’ Mukuya kwaciindi, Aga wakaba a mwaana musankwa, uyo ngwaakatumba ayi Ishimaeli.

Ndyepakeenda myaaka iinji, Abulaamu ndyaakakwanisha myaaka 99 Saala kaacite myaaka 89, bakatambula beensu botatwe. Abulaamu wakabatambula akubalwiita ayi bekale munshi lya cisamu akubabambila shakulya. Sa uli beshi bakamufwakashila? Bakalinga baanjelo! Bakalwiita Abulaamu ayi: ‘Mwaaka utoosa paciindi ceenka cino mulaakuba amwaana musankwa.’ Saala wakalinga kukutika kaali mutente. Wakaseka eenka akuyeeya ayi: ‘Ano sa bulya mbondacembela inga ndaba amwaana?’

Mwaaka wakakonkelawo, Saala wakaba amwaana musankwa, bweenka munjelo wakwe Yehova mbwaakashomesha. Abulaamu wakamutumba liina ayi Isaki, lisansulula “Kuseka.”

Isaki ndyaakalinga kucite myaaka 5, Saala wakabona Ishimaeli kaapensha Isaki. Mukwiinga wakalinga kusuni kushitilisha mwanaakwe, Saala wakaya kuli Abulaamu akumwaambila ayi ataande Aga a Ishimaeli. Pakutaanguna Abulaamu taakalinga kusuniiwo kucita boobo. Sombi Yehova wakalwiita Abulaamu ayi: ‘Nyumfwa nshaamba Saala. Ndaakumulama Ishimaeli. Sombi shishomesho shangu shilaakukumanishikwa kwiinda muli Isaki.’