Isaki wakalinga kucite myaaka 40 ndyaakeeba Labeka. Wakalinga kumusuni abuumbi alimwi mukuya kwaciindi, bakaba abaana bampundu basankwa.

Munenebantu wakalinga Esau, lyalo mwanike wakalinga Jakobo. Esau wakalinga kusuni bunene kuya muluundu, alimwi wakalinga kucishi kabotu kucaya shinyama. Sombi Jakobo wakalinga kusuni bunene kukala paŋanda.

Paciindi cilya, mwaana musankwa munenebantu ngowakalinga kupekwa musena unene alimwi amaali na baishi bafwa. Kucita boobo kwakalinga kwiitwa ayi kupyana. Mumukwashi wakwe Isaki, kucita boobo kwakalinga kwiilikaawo akuba alubasu mushishomesho Yehova nshaakashomesha Abulaamu. Esau taakwe kushibikilako bunene maano shishomesho isho, sombi Jakobo wakalinga kucishi ayi shilayandika abuumbi.

Bushiku bumwi Esau wakaswa muluundu kaalemete abuumbi. Wakacana Jakobo wateleka shakulya shakalinga kununkila kabotu abuumbi, aboobo wakaamba ayi: ‘Ndafwa nsala! Mpeeko shakulya nshowateleka!’ Jakobo wakakumbula ayi: ‘Ntookupa na utaangune kunshomesha ayi utoompa bunenebantu bwako.’ Esau wakaamba ayi: ‘Bunenebantu tabucitewo ncito kuli ndime! Ndakupa mbwaako. Nebo ndisunibo kulya.’ Sa utoobona ayi Esau wakacita kabotu? Sobwe, taakwe kucita kabotu. Esau wakaaba cintu ciyandika abuumbi ceebo cakusunabo kulya.

Isaki ndyaakacembela, cakashika ciindi cakupa shoolwe ku mwanaakwe musankwa munenebantu. Sombi Labeka wakacafwa Jakobo mwanaakwe musankwa mwanikebantu kubwesa shoolwe. Esau ndyaakashiba ayi bamunyaya shoolwe, wakakalala abuumbi cakwaamba ayi wakapinga kucaya mukwabo. Isaki a Labeka bakalinga kusuni kushitilisha Jakobo, aboobo bakamulwiita ayi: ‘Kooya ukekale kuli bashimishaanu ba Labani, kushikila Esau akaboosheemo moyo.’ Jakobo wakanyumfwila shakamulwiita bashali bakwe akuloboka.

Yehova wakashomesha Jakobo ayi alaakumushitilisha bweenka mbwaakashitilisha Abulaamu a Isaki. Jakobo wakaya mukukala kumusena wakalinga kwiitwa ayi Alani, uko nkwakeebela akuba amukwashi unene abuumbi ashintu shiinji.

Mukuya kwaciindi Yehova wakalwiita Jakobo ayi: ‘Boolela kucishi cinemishaanu.’ Aboobo Jakobo amukwashi wakwe bakatalika lweendo lwakuboolelaamo. Ndyebakalinga kweenda munshila bantu bamwi bakesa kuli Jakobo akumulwiita ayi: ‘Esau mukwanu atoosa abasankwa bali 400!’ Jakobo wakaloonda ayi mpashi Esau atoosa mukumulwana amukwashi wakwe. Wakapaila kuli Yehova ayi: ‘Ndasenga amumpulushe kuswa kumukwesu Esau.’ Bushiku bwakakonkelaawo Jakobo wakatuma mbelele, mpongo, ŋombe, ngamela, amadonki aanji kuli Esau mbuli cipo.

Mashiku alya Jakobo kaali eenka wakabona munjelo! Lyalo munjelo wakatalika kutintana anguwe. Bakatintana mashiku oonse kushikila bwaca. Nabi kwaamba ayi Jakobo wakalicisa, wakatolelela. Munjelo wakamulwiita ayi: ‘Ndeke nooya.’ Sombi Jakobo wakaamba ayi: “Teshi nkuleeke, sombibo na umpe coolwe.”

Aboobo munjelo wakapa coolwe Jakobo. Lyalo Jakobo wakeshiba ayi Yehova teshi alekele Esau kumulwana.

Macuunsa bushiku bweenka bulya Jakobo wakabona Esau abasankwa bali 400 palaamfu kabesa kuli nguwe. Lyalo wakaya kunembo lya mukwashi wakwe akufukama cakushisha ciwa panshi mankanda ali 7. Esau lakwe wakacica akukumbata Jakobo akumufyonta. Boonse bobilo bakalila akutalika kunyumfwana. Ino utobona ayi Yehova wakanyumfwa buyani pa shintu Jakobo nshaakacita kwaamba ayi banyumfwane amukwabo?

Lyalo Esau wakaboolela kumishaabo, alakwe Jakobo wakaboolela kumishaabo. Jakobo wakalinga kucite baana basankwa bali 12. Meenaabo bakalinga Lubeni, Simyoni, Lefi, Juda, Dani, Nafutali, Gadi, Asha, Isaka, Sebuluni, Josefu, a Benjameni. Yehova wakasebensesha Josefu mwanaakwe Jakobo kupulusha bantu bakwe. Sa ulishi nshaakacita? Leka twiiye ashimwi.