Josefu wakalinga mwaana womwi wacanike pa baana bakwe Jakobo. Bamakwabo bakabona kwaamba ayi baishi bakalinga kumusuni abuumbi Josefu. Ino bakalinyumfwa buyani? Bakamunyumfwila munyono alimwi bakamupata. Josefu ndyaakalota shiloto shimwi nshaatana kulotawo kale, wakaya mukulwiitako bamakwabo. Bakayeeya ayi shiloto isho shakalinga kusansulula ayi bumwi bushiku balaakumufukamina. Aboobo bakeendaawo kumupata!

Bushiku bumwi bamakwabo Josefu bakalinga kweembela mbelele pafwiifwi amusena wiitwa ayi Shekemu. Jakobo wakatuma Josefu kuya mukubona bamakwabo. Ndyebakamubona keesa palaale bakatalika kulyaambosha ayi: ‘Inoolya shikulota waashika. Ono atumucaaye!’ Lyalo bakamubwesa akumuwaala mumukalo wakayuma. Sombi Juda wakaambila bamakwabo ayi: ‘Mutamucaayi! Atumuulishebo mubusha.’ Aboobo bakamuulisha maali a silifa ali 20 ku beshimakwebo bene Midyani bakalinga kuya ku Ijipiti.

Bakacaya mpongo akwiinsha cakufwala cakwe ca peculu mubulowa bwa njiyo, akucitola kuli baishiwabo akubaambila ayi: “Twakacana ceeci, sa ncamwanaanu?” Aboobo Jakobo wakayeeya ayi Josefu wacaikwa kucinyama ca muluundu. Wakalila abuumbi cakwaamba ayi taakuwo wakalinga kucikonsha kumuumbulusha.

Ndyaakalinga ku Ijipiti, Josefu wakoolishikwa mubusha kuli Potifa. Sombi Yehova wakatolelela kucafwa Josefu. Potifa wakabona ayi Josefu wakalinga musebenshi uli kabotu alimwi ushomeka. Aboobo kapatana kwiinda aciindi cilaamfu Josefu wakapekwa mukuli wakulama shintu shoonse shakwe Potifa.

Muka Potifa wakabona kwaamba ayi Josefu wakalinga mubotu alimwi muyumu. Aboobo bushiku abushiku wakalinga kulwiita Josefu ayi akumanaakwe. Ino Josefu wakacita buyani? Wakakaka akwaamba ayi: ‘Sobwe! Kucita boobo nkubisha. Mwaami wangu ulanshoma, alimwi mwebo muli muka mwaami wangu. Ono nebo inga ndacita buyani cintu cibiibi ca mushobo uyu pameenso akwe Lesa?’

Bushiku bumwi muka Potifa wakeelesha kukakatisha Josefu kwaamba ayi akumanaakwe. Wakamucata kucakufwala ca peculu, sombi wakapusumuka akucicila pansengwe. Potifa ndyaakaboola, mukaakwe wakabeca akwaamba ayi Josefu wakalinga kusuni kumucata ayi akumanaakwe. Potifa wakakalala abuumbi akwaangisha Josefu mujeele. Sombi Yehova taakwe kumulubaako Josefu.

Josefu ndyaakalinga mujeele, Falawo mwaami wa bene Ijipiti, wakalota shiloto bantu boonse nshobakaalilwa kusansulula. Musebenshi wakwe Falawo womwi wakamulwiita ayi Josefu inga wacikonsha kusansulula shiloto isho. Cakufwambaana Falawo wakeeta Josefu.

Falawo wakeepusha Josefu ayi: ‘Sa inga wacikonsha kusansulula nshondalota?’ Josefu wakasansulwiita Falawo ayi: ‘Mu Ijipiti mulaakuba shakulya shiinji kwa myaaka 7, lyalo kulaakusa myaaka 7 ya nsala. Amusale muntu musongo kwaamba ayi alame kabotu shakulya kwaamba ayi bantu banu batakafwi ku nsala.’ Falawo wakaamba ayi: ‘Ndasala ndiwe weenka! Ulaakuba wabili kuli ndime mucishi coonse ca Ijipiti!’ Ino nciinshi cakapa Josefu kushiba busansulushi bwa shiloto shakwe Falawo? Yehova ngowakamucafwa.

Josefu wakalama kabotu shakulya kwa myaaka 7 yakakonkelaawo. Lyalo kwakaba nsala inene abuumbi pacishi coonse, bweenka Josefu mbwaakaamba. Bantu bakalinga kuswa kumisena yoonse kusa mukuula shakulya kuli Josefu. Baishi ba Jakobo abalo bakanyumfwa ayi kwakalinga shakulya ku Ijipiti, aboobo bakatuma bana babo basankwa bali 10 kuya mukuulaako.

Bana bakwe Jakobo bakaya kuli Josefu uyo wakashikilabo kubashiba. Sombi balo tabakwe kumushibaawo ayi ngu Josefu. Bakamufukamina, bweenka mbwaakalota kaacili mwanike. Josefu wakalinga kusuni kushiba na bamakwabo bakaaluka. Aboobo wakaamba ayi: ‘Mwesa mukubona cishi cesu. Mulisuni kusa mukutulwana.’ Bamakwabo bakakumbula ayi: ‘Sobwe! Tuli basankwa bamukowa bali 12 bekala kucishi ca Kenani. Mukwesu womwi wakafwa, alimwi shikeela wacaala abata.’ Lyalo Josefu wakaamba ayi: ‘Amumuleete shikeela wanu, lyalo ndyeshi mushoome.’ Aboobo bakaboolela kumishaabo kuli beshiwabo.

Shakulya ndyeshakamana alimwi, Jakobo wakatuma bana bakwe kuboolela ku Ijipiti. Lweendo ulu bakaya pomwi a Benjameni shikeela. Kwaamba ayi abone na bamakwabo bakaaluka, Josefu wakabwesa kaapu yakwe ya silifa akwisisa mulisaka lya shakulya lyakwe Benjameni akubekesha bamakwabo ayi mbobeepa. Bamakwabo bakakankamana basebenshi bakwe Josefu ndyebakaicana kaapu mulisaka lyakwe Benjameni. Bakasenga ayi ape mbabo mulandu muciindi cakwe Benjameni.

Aboobo Josefu ndyaakashiba ayi bamakwabo bakaaluka, wakaalilwa kulicata. Wakatalika kulila akwaamba ayi: ‘Ndime Josefu mukwanu. Sa bata bacili boomi?’ Bamakwabo bakakankamana abuumbi. Lyalo wakabalwiita ayi: ‘Mutalinyumfwi cibiibi ceebo ca nshomwakancita. Lesa ngowakantanjisha kuno kwaamba ayi mupulushe. Ono amweendeshe kamuya mukalete bata.’

Bakaboolela akuya mukulwiita beshiwabo ayi Josefu ngumuumi lyalo akuyaabo ku Ijipiti. Josefu wakaba pomwi abaishi alimwi, pesule lya myaaka iinji abuumbi.