Mucishi ca Usi mwakalinga kukala musankwa wakalinga kulambila Yehova. Liina lyakwe wakalinga Jobo. Wakalinga mubile alimwi wakalinga kucite mukwashi unene. Wakalinga kucite moyo ubotu, alimwi wakalinga kucafwa bakandu, banakashi bakafwitwa, abaana batakalinga kucite bashali. Nabi kwaamba ayi Jobo wakalinga kucita shili kabotu, alakwe wakalinga kwiinda mumapensho.

Jobo taakwe kushiba ayi Satana wakalinga kubona shoonse nshaakalinga kucita. Yehova wakaambila Satana ayi: ‘Sa wamubona musebenshi wangu Jobo? Taakuwo muntu nabi womwi pacishi uli mbuli nguwe. Alanyumfwila akucita shintu shili kabotu.’ Satana wakakumbula ayi: ‘Ncakwiila Jobo ulamunyumfwila mukwiinga mulamushitilisha akumupa shoolwe. Mwakamupa musena ashinyama. Amumunyaye mubone, alaakucileka kumunyumfwila.’ Yehova wakaamba ayi: ‘Inga wa mweelesha na ulisuni. Sombi uteeleshi kumucaya.’ Ino nceebonshi Yehova wakasuminisha Satana kweelesha Jobo? Wakalinga kucishi ayi Jobo teshi akaalilwe.

Satana wakatalika kweelesha Jobo amapensho anene. Cakutaanguna wakatuma bantu beetwa ayi bene Sabeya abo bakesa mukwiipa ŋombe amadonki akwe. Lyalo mbelele shakwe shoonse shakapya kumulilo. Alimwi likoto lya bantu beetwa ayi bene Kaludeya bakesa mukwiipa ngamela shakwe. Basebenshi bakwe boonse bakalinga kulama shifubwa ishi bakacaikwa. Lyalo wakacitikilwa lipenshi linene abuumbi. Bana bakwe Jobo boonse bakafwa ciindi ŋanda njebakalingaamo ndyebakalinga kusekelela ndyeyakabawita. Nabi kwaamba ayi mapensho aya akamucisa abuumbi, Jobo taakwe kucileka kulambila Yehova.

Satana wakalinga kusuni kumupensha abuumbi Jobo, aboobo wakalengesha Jobo kuba ashilonda mubili woonse. Shilonda isho shakalinga kucisa abuumbi. Taakalinga kucishiiwo kwakalinga kuswa mapensho oonse aya. Sombi taakwe kucileka kulambila Yehova. Lesa wakalinga kubona shoonse Jobo nshaakalinga kwiindaamo alimwi wakalinga kukondetwe pali nguwe.

Lyalo Satana wakatuma basankwa botatwe kusa mukweelesha Jobo. Bakalwiita Jobo ayi: ‘Cilyeelete kuli cibiibi ncewakacita ncootosisa. Aboobo Lesa atokwaanisha.’ Jobo wakaamba ayi: ‘Taakuwo cibiibi cili coonse ncondakacita.’ Sombi wakatalika kuyeeya ayi Yehova ngowakalinga kuleta mapensho ngaakalinga kwiindaamo, alimwi wakaamba ayi Lesa taabete kabotu.

Musankwa wacanike waliina lya Eliyu wakalinga kuumwite babye ndyebakalinga kwaamba. Lyalo wakaamba ayi: ‘Noonse nshomwaamba nshakubeca. Yehova ngu Lesa wiinditewo ngweenga tatunyumfwishi. Inga taacitiiwo cili coonse cibiibi. Alabona shintu shoonse alimwi alacafwa bantu bali mumapensho.’

Lyalo Yehova wakalwiita Jobo ayi: ‘Ino wakalinga kuli ndyendakalenga liculu acishi ca panshi? Ino nceebonshi utokwaamba ayi nshibete kabotu? Utokwaamba sombi toocishiiwo shintu ncoshicitikila.’ Jobo wakasumina ayi taakwe kwaamba kabotu. Wakaamba ayi: ‘Ndalinga kulubite. Ndakalinga kunyumfwabo pali ndimwe, sombi sunu ndamushiba. Taakuwo ncemwaalilwa. Mundekeleleeko pa nshendakaamba.’

Jobo ndyaakakoma meelesho, Yehova wakamulengesha kuba abuumi buli kabotu alimwi akumupa shintu shiinji kwiinda nshaakalinga kucite pakutaanguna. Jobo wakekala myaaka iinji mulusangalalo. Yehova wakamupa shoolwe ceebo ca kumunyumfwila nabi ndyecakalinga ciyumu. Sa awebo inga wasuna kutolelela kulambila Yehova nabi shintu shiyume buyani bweenka mbuli Jobo?

Mukwashi wakwe Jakobo ndyebakalinga mu Ijipiti bakatalika kwiitwa ayi bene Isilaeli. Jakobo a Josefu ndyebakafwa, mwaami mupya wakatalika kweendelesha cishi ca Ijipiti. Mwaami uyu wakatalika kuloonda ayi bene Isilaeli batalika kufula abuumbi kwiinda bene Ijipiti. Aboobo wakabika bene Isilaeli mubusha. Wakabakakatisha kusebensa ncito shiyumu shakuuma ncelwa akusebensa mumyuunda. Nabi kwaamba ayi bene Ijipiti bakalinga kusebensesha bene Isilaeli ncito shiyumu, bakatolelela kuya bufulilaako. Aboobo Falawo wakapa mulawo wakwaamba ayi na mwine Isilaeli washala mwaana musankwa, mwaana uyo alyeelete kucaikwa. Cilyeelete bene Isilaeli bakaloonda.

Mwanakashi mwine Isilaeli waliina lya Jokebedi wakaba amwaana musankwa mubotu. Kwaamba ayi amushitilishe wakamubika mu basiketi akuya mukumusisa mumatete mweela mwa Mulonga wa Nailo. Lyalo Milyamu nankashi wa mwaana uyo wakeemikana kulaale kwaamba ayi abone ceshi cicitike kumwanike wakwe.

Mwanaakwe Falawo mwanakashi wakaya kumulonga mukusamba. Lyalo wakabona basiketi mumatete, ndyaakafwekula wakabona mwaana musankwa kaalila, alimwi wakamunyumfwila nkumbu. Milyamu wakeepusha ayi: ‘Sa inga ndaya mukuleta mwanakashi mwine Ebulu kwaamba ayi ese amuyamwishe?’ Mwanaakwe Falawo ndyaakasumina, Milyamu wakaya mukuleta banyina, ba Jokebedi. Mwanaakwe Falawo wakaamba ayi: ‘Koya ukansungileko mwaana uyu ndaakukulipila.’

Mwaana ndyaakakomena, Jokebedi wakamutola ku mwanaakwe Falawo, uyo wakamutumba liina lyakwaamba ayi Mose akumulela mbuli mwanaakwe. Mose wakakulila muŋanda ya mwaami alimwi wakalinga kucite shintu shoonse nshaakalinga kusuni. Sombi taakwe kuluba Yehova. Wakalinga kucishi ayi wakalinga mwine Isilaeli kuteshi mwine Ijipiti. Aboobo wakasalawo kusebensela Yehova.

Ndyaakalinga kucite myaaka 40, Mose wakasalawo kucafwa benemishaabo. Ndyaakabona mwine Ijipiti kauma mwine Isilaeli musha, Mose wakooma mwine Ijipiti uyo akumucaya akufukila mubili wakwe musanti. Falawo ndyaakashiba makani aya wakalinga kusuni kucaya Mose. Sombi Mose wakalobokela kucishi ca bene Midyani. Yehova wakamulama kabotu ndyaakalinga kokulya.