Mose wakekala kucishi ca Midyani kwa myaaka 40. Wakeeba akuba abaana. Bushiku bumwi ndyaakalinga kweembela mbelele shakwe kufwiifwi a Kalundu ka Sinayi, wakabona cintu cikankamika. Wakabona cikupu cakalinga kunyaka mulilo sombi tacakalinga kupya! Ndyaakalinga kusuni kushika pafwiifwi akubona cakalinga kulengesha, wakanyumfwa liswi mucikupu ayi: ‘Mose! Imikana peenka apo. Fuula nsapato shako mukwiinga pamusena apo mpooimfwi palisalalite.’ Yehova ngowakalinga kwaamba kwiinda mumunjelo.

Mose wakaloonda, aboobo wakalifweka pameenso. Yehova wakaamba ayi: ‘Ndaabona mapensho oonse a bene Isilaeli. Ndaakubakusha mucishi ca Ijipiti akubaleta mucishi cibotu. Ndiwe weshi ukatanjilile bantu bangu kuswa mucishi ca Ijipiti.’ Cilyeelete ici cakamukankamika Mose.

Mose wakeepusha ayi: ‘Ino ndakubalwiita ayi ngani wantuma?’ Lesa wakakumbula ayi: ‘Ukabalwiite ayi Yehova, Lesa wakwe Abulaamu, Lesa wakwe Isaki, alimwi a Lesa wakwe Jakobo ngowantuma.’ Lyalo Mose wakaamba ayi: ‘Ino mbuyani na bantu bakakake?’ Yehova wakacita caankamiko kwaamba ayi acafwe Mose kushoma. Wakalwiita Mose kuwaala nkoli yakwe panshi. Lyalo nkoli yakaaluka akuba nsoka! Mose ndyaakaicata kumucila insoka yakaba nkoli alimwi. Yehova wakaamba ayi: ‘Na ukacite caankamiko ici, balaakushiba ayi ndime ndakutuma.’

Mose wakaamba ayi: ‘Nebo nshicishiiwo kwaamba.’ Yehova wakamushomesha ayi: ‘Ndaakukulwiita shakwaamba, alimwi ndaakutuma Aloni mukwanu kwaamba ayi akucaafwe.’ Mose ndyaakashiba ayi Yehova ali anguwe, wakabwesa mukaakwe abana bakwe akuboolela kucishi ca Ijipiti.

Bene Isilaeli bakakatishikwa kusebensa ncito shiyumu mbuli basha. Yehova wakatuma Mose a Aloni kuya mukulwiita Falawo ayi: ‘Amubaleeke bantu bangu baye kwaamba ayi bakacite kulambila muluyanga.’ Falawo wakakumbula cakulisumpula ayi: ‘Yehova uyo nshimwishiiwo, alimwi bene Isilaeli teshi mbalekeewo.’ Lyalo Falawo wakeendaawo kubapa ncito shiyumu abuumbi. Yehova wakalinga kusa mukwaanisha Falawo. Sa ulishi ncaakalinga kusa mukucita? Wakaleta Mapensho Anene ali 10 mucishi ca Ijipiti. Yehova wakalwiita Mose ayi: ‘Falawo wakaka kunyumfwila. Macuunsa alaakuya ku Mulongo wa Nailo. Koya ukamulwiite ayi mukwiinga wakaka kusuminisha bantu bangu ayi banooya, maanshi oonse ali mu Mulonga wa Nailo atokwaaluka akuba bulowa.’ Mose wakanyumfwila akuya kuli Falawo. Aloni wakooma nkoli yakwe pamaanshi amumulonga wa Nailo, lyalo Mulonga woonse wakaaluka akuba bulowa Falawo kaalangilisha. Mulonga wakatalika kununka, inswi shakafwa, alimwi taakuwo wakalinga kucikonsha kunwa maanshi a mumulonga wa Nailo. Nacibi boobo, Falawo wakakaka kuleka bene Isilaeli ayi baye.

Ndyepakeenda nshiku 7, Yehova wakatuma Mose kuboolela kuli Falawo alimwi akuya mukumulwiita ayi: ‘Na ukake kuleka bantu bangu ayi banooya, cishi ca Ijipiti citosulabo babombwe.’ Aloni wakeemika nkoli yakwe, lyalo babombwe bakatalika kusula mucishi coonse. Lyalo mumaanda abantu oonse mwakasulabo babombwe! Falawo wakasenga Mose ayi asenge kuli Yehova kwaamba ayi amane lipenshi ili. Lyalo Falawo wakashomesha ayi atoleka bene Isilaeli kwaamba ayi banooya. Aboobo Yehova wakamana lipenshi ili, lyalo bene Ijipiti bakatalika kubunjika babombwe bakafwa. Mpeeke cishi coonse cakanunkabo nununu. Sombi Falawo wakakaka alimwi kuleka bene Isilaeli ayi baye.

Lyalo Yehova wakalwiita Mose ayi: ‘Aloni alyeelete kuuma nkoli yakwe panshi, lyalo lusuko luli mucishi ca Ijipiti coonse lutokwaaluka mpobe.’ Ndyaakamanabo kucita boobo mpobe shakasulabo pali poonse. Bantu bakwe Falawo bamwi bakamulwiita ayi: ‘Lipenshi ili lyaswa kuli Lesa.’ Sombi Falawo wakakaka kuleka bene Isilaeli ayi baye.