Mose a Aloni bakaya mukulwiita Falawo maswi akaswa kuli Lesa ayi: ‘Na ukake kuleka bantu bangu ayi banooya, ndaakutuma shibubi mucishi coonse.’ Shibubi shakasulabo maanda oonse abene Ijipiti, babile abakandu. Kukushakobo kumusena wa Gosheni, uko kwakalinga kukala bene Isilaeli. Kutalikilabo palipenshi ili lya namba 4, mapensho Yehova ngaakaleta mu Ijipiti akalinga kupenshabo bene Ijipiti beenka. Aboobo Falawo wakapapaata ayi: ‘Amusenge Yehova kwaamba ayi akushe shibubi ishi. Lyalo ntomuleka ayi munooya.’ Ano Yehova ndyaakakushabo shibubi, Falawo wakacinja maano. Sa Falawo wakalinga kusa mukwaana?

Yehova wakaamba ayi: ‘Na Falawo akake kuleka bantu bangu ayi banooya, shinyama sha bene Ijipiti shilaakuciswa akufwa.’ Bushiku bwakakonkelaawo, shinyama shakatalika kufwa. Sombi shinyama sha bene Isilaeli tashikwe kufwa. Nacibi boobo, Falawo wakatolelela kupanga shitala.

Lyalo Yehova wakalwiita Mose kuboolela kuli Falawo akuya mukufusa milota mwiculu. Milota iyo yakaba lusuko lwakasula mumuuwo woonse akulokela pa bene Ijipiti boonse. Lusuko ulu lwakaleta shilonda pa bene Ijipiti boonse ashifubwa shabo. Nacibi boobo, Falawo wakakaka kuleka bene Isilaeli.

Yehova wakatuma Mose kuboolelaako alimwi kuli Falawo kuya mukumulwiita ayi: ‘Sa ucikaka kuleka bantu bangu kwaamba ayi banooya? Ciilo kulaakusa mfula ya mabwe mucishi coonse.’ Bushiku bwakakonkelaawo, Yehova wakalosha mfula ya mabwe, mulilo alimwi kwakaba cilulumo. Yakalinga mfula inene abuumbi bene Ijipiti njobatana kubonaawo kale. Yakanyonyoola shisamu ashishango shoonse, kukushakobo kumusena wa Gosheni. Falawo wakaamba ayi: ‘Amusenge Yehova kwaamba ayi imfula iyi imane! Lyalo inga mwaya.’ Ano mfula ya mabwe ndyeyakamanabo, Falawo wakacinja maano.

Lyalo Mose wakaamba ayi: ‘Ono nsoshi shitoosa mukulya shishango shoonse shakacaala ku mfula yamabwe.’ Lyalo nsoshi shiinji shakesa akulya shishango shoonse shakacaala mumyuunda a kushisamu. Falawo wakapapaata ayi: ‘Amusenge Yehova kwaamba ayi nsoshi ishi shinooya.’ Nabi kwaamba ayi Yehova wakakusha nsoshi, Falawo taana kwaana.

Yehova wakalwiita Mose ayi: ‘Tambika lyansa lyako mwiculu.’ Peenka apo kwiculu kwakashiyabo mbi. Bene Ijipiti tebakalinga kubonana nabi kuswa mumaanda kwanshiku shotatwe. Bene Isilaeli beenkabo mbobakalinga kucite mumuni mumaanda abo.

Falawo wakalwiita Mose ayi: ‘Webo abantu bako inga mwaya. Sombi shinyama shanu shicaale.’ Lyalo Mose wakaamba ayi: ‘Tulyeelete kuya ashinyama shesu kwaamba ayi tukabenge milambu kuli Lesa wesu.’ Falawo wakakalala abuumbi akwaamba ayi: ‘Swawo apa! Nshisuni kukubona lyobilo, na ukese alimwi ndaakukucaya.’

Mose wakaambila Falawo ayi teshi akamubonewo lyobilo. Sombi kaatana kuya wakalwiita Falawo ayi: ‘Pakati ka mashiku, baana bakwiiya boonse bamu Ijipiti kutalikila ku mwaana musankwa wakwe Falawo kushika kubaana basankwa ba basha, batoofwa.’

Yehova wakalwiita bene Isilaeli kubamba shakulya shilibetele. Wakaamba ayi: ‘Mucaye mwanaambelele nabi mwanaampongo mucende wa mwaaka womwi, akunanika bulowa bumwi pamilyaango ya maandaanu. Nyama ilyeelete kuba yakutenta alimwi mulyeelete kulya pomwi a buledi utacite isiti. Mulyeelete kufwalila limwi shoonse mbuli muntu ulibambite kuya palweendo. Ubu mbobushiku ndyeshi mukaswe mubusha.’ Ano yeeyabo bene Isilaeli mbobakasangalala!

Pakati kamashiku, munjelo wakwe Yehova wakeenda pamaanda oonse abene Ijipiti. Baana bakwiiya bakalinga mumaanda oonse atakalinga kunanikitwe bulowa pamilyaango bakafwa. Sombi munjelo wakasotokela maanda akalinga kunanikitwe bulowa pamilyaango. Mikwashi yoonse ya bene Ijipiti bakafwitwa mwaana, inga caba ayi mbakandu nabi babile. Sombi taakuwo mwaana wa bene Isilaeli nabi womwi wakafwa.

Mwanaakwe Falawo musankwa alakwe wakafwa. Falawo cakamucisa abuumbi. Aboobo peenka apo wakalwiita Mose a Aloni ayi: ‘Amuswe mucishi cangu. Kamuya mukalambile Lesa wanu. Mubwese ashinyama shanu!’

Muciindi ca mashiku mweenshi koobala, bene Isilaeli bakaswa mucishi ca Ijipiti kweelana a mikwashi amikowa yabo. Basankwa bene Isilaeli bakalinga 600,000 alimwi abanakashi baanji abaana. Kwiilikaawo, abamwi batakalinga bene Isilaeli bakakonkela abalo kwaamba ayi bakalambile Yehova. Bene Isilaeli bakaangululwa kuswa mubusha!

Mwaaka uli woonse bakalinga kweelete kuba abushiku bwakusekelela kwakwiibaluka Yehova mbwaakabapulusha. Bushiku ubu bwakalinga kwiitwa ayi Bushiku Bwakusotokela.