CIIYO 32
Bwaami Bwakwe Lesa Butokweendelesha!
Bwaami bwakwe Lesa bwakatalika kweendelesha kwiculu mu 1914. Ici nceciindi inshiku shakweelaako ndyeshakatalika. Ino tulishi buyani? Tutoobona Baibo nshoyakaambila limwi, shitoocitika mucishi alimwi amicito ya bantu kuswabo mu 1914.
1. Ino nshiinshi Baibo nshoyakaambila limwi?
Libuku lyamu Baibo lyakwe Danyelo lilatondesha ayi Bwaami bwakwe Lesa bwakalinga kusa mukutalika kweendelesha kumamanino aciindi ciitwa ayi “mankanda 7.” (Danyelo 4:16, 17) Pesule lya myaaka iinji, ciindi ici Yesu wakaciita ayi “ciindi cibikitwe ca shishi,” alimwi wakaiisha ayi ciindi ici cakalinga kacitana kumana. (Luka 21:24) Kweelana ambweshi twiiye, ciindi ciitwa ayi mankanda 7 cakamana mu 1914.
2. Ino nshiinshi shitoocitika mucishi, alimwi njimibo nshi bantu njobatondesha kuswabo mu 1914?
Bashikwiiya bakwe Yesu bakamwiipusha ayi: “Ino nciinshi ceshi cikabe citondesho cakubaako kwako alimwi acamamanino abweende bwashintu?” (Mateyo 24:3, NWT) Yesu ndyaakalinga kubakumbula wakaamba shintu shiinji shakalinga kusa mukucitika pesule lyakutalika kweendelesha kwiculu mbuli Mwaami wa Bwaami bwakwe Lesa. Wakaamba ayi kulaakuba nkondo, nsala, alimwi ashitentaanshi. (Amubelenge Mateyo 24:7.) Alimwi Baibo yakaambila limwi ayi mibo ya bantu “munshiku shakweelaako” ilaakulengesha kwaamba ayi buumi bube ‘buyumu abuumbi.’ (2 Timoti 3:1-5) Ishi shoonse shakatalika kuboneka bunene mu 1914.
3. Ino nceebonshi shintu shabica abuumbi kuswabo ciindi Bwaami bwakwe Lesa ndyebwakatalika kweendelesha?
Ndipakeendabo ciindi ciniini Yesu ndyaakatalika kweendelesha kwiculu mu Bwaami bwakwe Lesa, wakalwana Satana ashibanda shakwe. Satana wakakomwa. Baibo ilaamba ayi “wakawaalwa panshi pantu pomwi abaanjelo bakwe boonse.” (Ciyubululo 12:9,10, 12) Satana alikalalite abuumbi mukwiinga alicishi kwaamba ayi alaakunyonyoolwa. Nceceeco ncaaletela kucisa alimwi akupenga pacishi. Ici ncocalengesha kwaamba ayi shintu shibice abuumbi pacishi! Ano Bwaami bwakwe Lesa bulaakukushaawo mapensho oonse.
AMWIIYILEWO ASHIMWI
Amubone citucafwa kushiba kwaamba ayi Bwaami bwakwe Lesa bwakatalika kweendelesha mu 1914 alimwi amakani aya mbwaeelete kutukuma.
4. Bushinshimi bwamu Baibo bulatondesha ayi Bwaami bwakwe Lesa bwakatalika kweendelesha mu 1914
Lesa wakalengesha Mwaami Nebukadinesa waku Babiloni kulota ciloto. Mwaami uyu nshaakalota alimwi a Danyelo mbwakasansulula ciloto ncocakalinga kwaamba, shilatondesha kwaamba ayi ciloto ici cakalinga kwaamba pa bwaami bwakwe Nebukadinesa alimwi a Bwaami bwakwe Lesa.—Amubelenge Danyelo 4:17.a
Amubelenge Danyelo 4:20-26, akusebensesha caati kukumbula miipusho itokonkelaawo:
(A) Ino Nebukadinesa wakabona nshi muciloto?—Amubone vesi 20 a 21.
(B) Ino nciinshi cakalinga kusa mukucitika kucisamu?—Amubone vesi 23.
(C) Ino nciinshi cakalinga kusa mukucitika pesule lya “mankanda 7”?—Amubone vesi 26.
Ciloto Cakwe Nebukadinesa Cakalinga Kwaamba Pacisamu Mbocikumite ku Bwaami Bwakwe Lesa
BUSHINSHIMI (Danyelo 4:20-36)
Bweendeleshi
(A) Cisamu cinene
Kumana kwa bweendeleshi
(B) “Amutimbule cisamu,” mucileeke kushikila ciindi ciitwa ayi “mankanda 7” cikeende
Kutalika alimwi kwa bweendeleshi
(C) ‘Bwaami bulaakubooshekwa mumaansaanu alimwi’
Mukukumanishikwa kwakutaanguna kwa bushinshimi ubu . . .
(D) Ino cisamu cakalinga kwiimikaninaako baani?—Amubone vesi 22.
(E) Ino ndilili ndyakacileka kweendelesha?—Amubelenge Danyelo 4:29-33.
(F) Ino nciinshi cakacitikila Nebukadinesa pesule lya kwaamba ayi ciindi ciitwa ayi “mankanda 7” camana?—Amubelenge Danyelo 4:34-36.
KUKUMANISHIKWA KWAKUTAANGUNA
Bweendeleshi
(D) Nebukadinesa, Mwaami waku Babiloni
Kumana kwa bweendeleshi
(E) Pesule lya mwaaka wa 606 B.C.E., Nebukadinesa wakacinkuka akucileka kweendelesha kwa myaaka 7
Kutalika alimwi kwa bweendeleshi
(F) Nebukadinesa wakaba kabotu akutalika kweendelesha alimwi
Mukukumanishikwa kwabili kwa bushinshimi ubu . . .
(G) Ino cisamu cakalinga kwiimikaninaako baani?—Amubelenge 1 Makani 29:23.
(H) Ino ndilili ndyebakacileka kweendelesha? Ino tulishi buyani ayi tabakalinga kweendelesha nabi Yesu ndyaakalinga pacishi capanshi?—Amubelenge Luka 21:24.
(I) Ino ndilili alimwi nkuli bwaami ubu nkobwakatalika kweendelesha alimwi?
KUKUMANISHIKWA KWABILI
Bweendeleshi
(G) Bamaami ba bene Isilaeli bakalinga kwimikaninaako bweendeleshi bwakwe Lesa
Kumana kwa bweendeleshi
(H) Jelusalemu yanyonyoolwa, aboobo beendeleshi ba bene Isilaeli bacileka kweendelesha kwa myaaka 2,520
Kutalika alimwi kwa bweendeleshi
(I) Yesu watalika kweendelesha kwiculu mbuli Mwaami wa Bwaami bwakwe Lesa
Ino mankanda 7 nciindi cilaamfu buyani?
Mbasu shimwi shamu Baibo shilatucafwa kunyumfwishisha mbasu shimwi. Kucakubonenaako, libuku lya Ciyubululo lilaamba ayi mankanda otatwe a haafu aleemikaninaako nshiku 1,260. (Ciyubululo 12:6, 14) Aboobo mankanda 7 aleemikaninaako nshiku 2,520, nkokwaamba ayi pa nshiku 1,260 kubikawo ashimwi 1,260. Cimwi ciindi mu Baibo bushiku bomwi inga bweemikaninaako mwaaka womwi. (Esekelo 4:6) Aboobo mankanda 7 aambwa mulibuku lyakwe Danyelo aleemikaninaako myaaka 2,520.
5. Shintu shakaaluka kuswabo mu 1914
Yesu wakaambila limwi shakalinga kusa mukucitika pacishi pesule lyakwaamba ayi watalika kweendelesha. Amubelenge Luka 21:9-11, akubandika mwiipusho uyu:
Ino nshiinshi pasheesho Yesu nshakaamba nshomwakabonaawo na nshomwakanyumfwawo?
Mutumwi Paulo wakaamba pamibo ya bantu mbweshi ikabe munshiku shakweelaako. Amubelenge 2 Timoti 3:1-5, akubandika mwiipusho uyu:
Ino njimibo ili payeeyi njetwabelenga njomwakabonaawo?
6. Kweendelesha kwa Bwaami bwakwe Lesa kulyeelete kutuyuminisha
Amubelenge Mateyo 24:3, 14, akubandika miipusho iyi:
Ino nincito nshi iyandika itootondesha ayi Bwaami bwakwe Lesa butokweendelesha?
Ino inga mwacita buyani kwaamba ayi mwaabanemo lubasu muncito iyi?
Bwaami bwakwe Lesa butokweendelesha, alimwi bushiku ndyeshi bukatalike kweendelesha pacishi buli pafwiifwi. Amubelenge Bene Ebulu 10:24, 25, akubandika mwiipusho uyu:
Ino nciinshi ncotweelete kucita soonse ‘ndyetutoobona bushiku ubu kabusena pafwiifwi’?
Ino inga mwacita buyani na mweeya makani amwi eenga acafwa alimwi akupulusha bamwi?
BAMWI INGA BAMWIIPUSHA AYI: “Ino nceebonshi Bakamboni Bakwe Yehova balaamba bunene pamwaaka wa 1914?”
Ino inga mwakumbula buyani?
CITEENTE CINENE
Bushinshimi bwamu Baibo, alimwi ashitoocitika mucishi shilatondesha patuba kwaamba ayi Bwaami bwakwe Lesa bwakatalika kweendelesha. Tulatondesha ayi tulashoma cancine ici kwiinda mukushimikila makani abotu aamba pa Bwaami ubu alimwi akucanika kumabungano.
Kwiindulukaamo
lno nciinshi cakacitika pesule lyakwaamba ayi ciindi ciitwa ayi mankanda 7 caambwa mulibuku lyakwe Danyelo camana?
Ino nciinshi cimupa kushoma cakutatoonsha kwaamba ayi ncakwiila Bwaami bwakwe Lesa bwakatalika kweendelesha mu 1914?
Ino inga mwatondesha buyani ayi mulashoma ayi Bwaami bwakwe Lesa bwakatalika kweendelesha?
AMULANGWETEEWO ASHIMWI
Amubone beshikulemba makani akale kale alimwi abantu bamwi nshobaamba pa kwaaluka kwashintu mucishi kuswabo mu 1914.
“Ciindi Mibo ya Bantu Ndyeyakatalika Kubica Abuumbi” (Sinsimuka!, April 2007)
Amubelenge pa musankwa umwi mbwakaalula buumi bwakwe pesule lyakubelenga bushinshimi mbotucana pa Mateyo 24:14.
“Ndakalinga Kusuni Kusekana Boola Abuumbi!” (Njashi Yamulindilishi No. 3 2017)
Ino tulishi buyani ayi bushinshimi bwaambwa mulilembo lyakwe Danyelo capita 4 bulaamba pa Bwaami bwakwe Lesa?
Ino nciinshi citondesha ayi ciindi ciitwa ayi “mankanda 7” caambwa mulibuku lyakwe Danyelo capita 4 cakamana mu 1914?
a Amubone mitwi yobilo yakweelaako palubasu lwa “Amulangweteewo Ashimwi” muciiyo ici.