Ino Nceebonshi Shintu Shibiibi Amapensho Shilacitika?

Na cintu cimwi cibiibi cacitika liinji kulaba kuliipusha ayi: “Ino nceebonshi cintu ca mushobo uyu cacitika?” Tulikondetwe abuumbi kwaamba ayi Baibo ilaamba shikumbulo shinyumfwika kumwiipusho uyu!

1. Ino Satana wakacita nshi cakapa kwaamba ayi shibiibi shitalike pacishi?

Satana wakapondokela Lesa. Wakalinga kusuni kweendelesha bamwi, aboobo wakayunga bantu bobilo bakutaanguna, Adamu a Efa kwaamba ayi abalo bapondoke. Satana wakacita boobo kwiinda mukubeca Efa. (Matalikilo 3:1-5) Wakapa Efa kuyeeya anga kuli cintu cimwi cibotu Yehova ncaatakalinga kusuni ayi abe aco. Satana wakapa muyeeyo wakwaamba ayi kutanyumfwila Lesa inga kwapa bantu kuba alusangalalo. Wakaamba bubeshi bwakutaanguna ndyaakalwiita Efa ayi teshi akafwewo. Aboobo, Baibo ilaamba ayi Satana “ngoishi wa bubeshi.”—Joni 8:44.

2. Ino Adamu a Efa bakasala kucita nshi?

Yehova wakapa Adamu a Efa shintu shiinji abuumbi. Wakabalwiita ayi inga balya shisepo sha kucisamu cili coonse kukushakobo comwi. (Matalikilo 2:15-17) Sombi bakasala kulya cisepo cakucisamu ceenka ncaakabakasha. Efa “wakayapaako akulya.” Adamu “alakwe wakalya.” (Matalikilo 3:6) Boonse bobilo tabakwe kunyumfwila Lesa. Mukwiinga Adamu a Efa bakalinga bantu bamaninite, cakalinga cuubu kuli mbabo kucita cintu ciluleme. Ano kwiinda mukutanyumfwila Lesa mukashanga, bakabisha akukaka bweendeleshi bwakwe Lesa. Kusala kwabo kwakabaletela mapensho anene abuumbi.—Matalikilo 3:16-19.

3. Ino kusala kwakwe Adamu a Efa kwakatukuma buyani?

Adamu a Efa ndyebakabisha, bakaba bantu batamaninite, aboobo bana babo abalo bakapyana kutamaninina. Kulansha kuli Adamu, Baibo ilaamba ayi: “Bubi bwakesa mucishi capanshi ceebo ca muntu womwi alimwi bubi ubo bwakaleta lufu. Mbweeke ubo lufu lwakashika kubantu boonse.”—Bene Loma 5:12.

Kuli shintu shiinji shilengesha kwaamba ayi tunookwiinda mumapensho. Cimwi ciindi tulacana mapensho ceebo cakutasala kabotu kwesu na kwa bamwi. Cimwi ciindi tulacana mapensho ceebo ca kulicana kumusena kutabete kabotu alimwi apaciindi citabete kabotu.—Amubelenge Shikushimikila 9:11.

AMWIIYILEWO ASHIMWI

4. Wakaleta mapensho ngotwiindaamo

Bantu baanji balashoma ayi Lesa ngotokweendelesha cishi. Sa makani aya ngancine? Amweebele VIDYO.

VIDYO: Ino Ngani Weendelesha Cishi? (1:24)

Amubelenge Jemusi 1:13 alimwi a 1 Joni 5:19, akubandika mwiipusho uyu:

• Sa Lesa ngoolengesha shintu shibiibi amapensho?

5. Amubone shakacitika ceebo ca bweendeleshi bwakwe Satana

VIDYO: Lubasu lwa Vidyo ya—Ino Nceebonshi Lesa Ncaalekela Mapensho? (3:07)

Amubelenge Matalikilo 3:1-6, akubandika miipusho iyi:

• Ino mbubeshi nshi Satana mbwaakaamba?—Amubone vesi 4 a 5.

• Ino ngamaswi nshi Satana ngakaamba atondesha anga Yehova wakalinga kusisa bantu shintu shibotu?

• Kweelana a Satana nshakaamba, sa bantu balayandika kutanjililwa a Yehova kwaamba ayi babe basangalete?

Amubelenge Shikushimikila 8:9, akubandika mwiipusho uyu:

• Ino nshiinshi shicitika ceebo cakwaamba ayi Yehova teshi Ngotokweendelesha cishi?

1. Adamu a Efa bakalinga kumaninite alimwi bakalinga kukala mu Paladaiso Nacibi boobo, bakanyumfwila Satana akupondokela Yehova

2. Pesule lyakupondoka kwakwe Adamu a Efa, cishi cakasula bubi, mapensho, alimwi alufu

3. Yehova alaakukushaawo kubisha, mapensho, alimwi alufu. Aboobo bantu balaakuba abuumi bubotu akukala mucishi ca Paladaiso

6. Yehova alanyumfwa cibiibi na katwiinda mumapensho

Sa Lesa alatubikila maano ndyetutokwiinda mumapensho? Amubone shakalemba Mwaami Defedi alimwi amutumwi Pita. Amubelenge Kulumbaisha 31:7 alimwi a 1 Pita 5:7, akubandika mwiipusho uyu:

• Ino kushiba cancine cakwaamba ayi Lesa alabona mapensho ngotwiindaamo alimwi alatubikila maano, kulamupa kulinyumfwa buyani?

CITEENTE CINENE

Satana alimwi abantu bobilo bakutaanguna mbobakaleta mapensho ali pacishi capanshi. Yehova alanyumfwa cibiibi abuumbi na katupenga, alimwi conoonobo alaakwakushawo mapensho.

Kwiindulukaamo

• Ino mbubeshi nshi Satana mbwaakalwiita Efa?

• Ino ngamapensho nshi akesa ceebo ca kupondoka kwakwe Adamu a Efa?

• Ino tulishi buyani ayi Yehova alalinyumfwa cibiibi na katwiinda mumapensho?

AMULANGWETEEWO ASHIMWI

Amwiiye Baibo mboisansulula kubisha ncocaamba.

“Ino Kubisha Cilaamba Nshi?” (Makani acanika pa jw.org)

Amwiiye shiinji pamakani Satana ngakabusha mumuunda wa Edeni.

“Ino Nceebonshi Lesa Ncaalekela Mapensho Kucitika?” (Njashi Yamulindilishi, January 1, 2014)

Amubone shikumbulo shiyuminisha kumwiipusho uyumu.

“Ino Nceebonshi Lesa Wakalekela ba Juda Baanji Kucaikwa Munkondo Yapacishi Coonse Yabili?” (Makani acanika pa jw.org)

Amubone musankwa umwi nshakeeya pamakani amapensho.

Nshibete Neenka Ano (5:09)