Sheenga Shatucafwa Kusala Kabotu

Soonse tulasala nshotweelete kucita. Shiinji nshetusala inga shatukuma abuumbi alimwi akukuma bushicibusa bwesu a Yehova. Kucakubonenaako, mpashi inga twayandika kusala nkweshi tunookala, nsheshi tunoocita kwaamba ayi tucane shiyandika, na kusala kuba mucikwati nabi sobwe. Kusala kabotu inga kwatupa kuba alusangalalo alimwi akusangalasha Yehova.

1. Ino Baibo inga yamucafwa buyani kwaamba ayi musale kabotu shakucita?

Kamutana kusala cakucita, amupaile akusenga Yehova kwaamba ayi amucaafwe alimwi amulangoole makani mu Baibo kwaamba ayi mubone Yehova mbwaabona makani ayo. (Amubelenge Tushimpi 2:3-6.) Cimwi ciindi, Yehova alatupa mulawo pamakani amwi. Na caba boobo, cibotu nceenga mwaciita nkusalawo kukonkela mulawo uyo.

Ano ino mbuyani na mu Baibo taamuwo mulawo ululamite makani ngomutoyandika kusalawo cakucita? Yehova alaakumutanjilila ‘munshila njomweelete kukonkela.’ (Isaya 48:17) Munshila nshi? Alaakusebensesha njiisho shamu Baibo sheenga shamutanjilila. Njiisho shamu Baibo ngamakani ancine asansulula Yehova mbwayeeya alimwi ambwalinyumfwa pashintu shimwi. Liinji tuleeya Yehova mbwalinyumfwa pamakani amwi na twabelenga makani amu Baibo. Kushiba Yehova mbwalinyumfwa inga kwatucafwa kusala kucita shintu sheenga shamusangalasha.

2. Ino nshiinshi nshomweelete kuyeeyawo kamutana kusala shakucita?

Baibo ilaamba ayi: “Muntu ucenjete ulataanguna kuyeeya ncaaelete kucita.” (Tushimpi 14:15) Nkokwaamba ayi katutana kusala shakucita, tulyeelete kutaanguna kuyeeyawo abuumbi pasheesho nshetusuni kusala. Ndyemutoyeeyawo pashintu nsheshi musale mulyeelete kuliipusha ayi: ‘Ino ni njiisho nshi yamu Baibo njeenga ndakonkela? Ino nkusala kuli kweenga kwancafwa kuba aluumuno? Ino nsheshi nsale shitoobakuma buyani bamwi? Ciyandika abuumbi, sa nsheshi nsale shilaakusangalasha Yehova?’—Dutolonomi 32:29.

Yehova ngoocite nkusu shakutulwiita cibotu a cibiibi. Kushiba kabotu milawo yakwe alimwi anjiisho shakwe akuba bashinishite kushikonkela, kulaakutucafwa kwiisha kabotu njeelacaamba yesu. Njeelacaamba njoitucafwa kushiba na cintu cimwi cili kabotu nabi sobwe. (Bene Loma 2:14, 15) Kwiisha kabotu njeelacaamba yesu kulaakutucafwa kusala kabotu shakucita.

AMWIIYILEWO ASHIMWI

3. Amuleke Baibo inoomutanjilila

VIDYO: Munootanjililwa Anjiisho Shamu Baibo (5:54)

• Ino nkusu shakulisalila cilaamba nshi?

• Ino nceebonshi Yehova wakatupa nkusu shakulisalila?

• Ino nciinshi ncaakatupa citucafwa kusebensesha kabotu nkusu shakulisalila?

Kwaamba ayi mubone cakubonenaako ca njiisho yamu Baibo, amubelenge Bene Efeso 5:15, 16. Lyalo amubandike nsheenga mwaciita kwaamba ayi “munoosebensesha kabotu ciindi ncomucite”  . . .

• kwiinda mukubelenga Baibo lyoonse.

• kwiinda mukucita shintu sheenga shapa kwaamba ayi mube musankwa na mwanakashi uli kabotu kumubye wa mucikwati, kuba mushali na mwaana uli kabotu.

• kwiinda mukucanika kumabungano.

4. Amwiishe njeelacaamba yanu kwaamba ayi inoomucafwa kusala kabotu shakucita

VIDYO: “Amutolelele Kuba Anjeelacaamba Isalalite” (5:13)

• Kweelana anshomweebela muvidyo, ino nankashi wakacita buyani kwaamba ayi aiishe njeelacaamba yakwe alimwi akusalaawo kucita sheenga shasangalasha Yehova?

Ino nceebonshi tatweelete kusenga bamwi kwaamba ayi batusalile shakucita nshotweelete kulisalila sobeene? Amubelenge Bene Ebulu 5:14, akubandika miipusho iyi:

• Nabi kwaamba ayi ncuubu kulwiita bamwi kutusalilako shakucita, ino nciinshi ncotweelete kushiba?

• Ino nshiinshi sheenga shamucafwa kwiisha njeelacaamba yanu akusala kabotu shakucita?

5. Amulemeke njeelacaamba ya bamwi

Bantu nsheenga basala shilapusana. Ino inga twatondesha buyani ayi tulalemeka kusala kwa bamwi? Amuyeeye pabukaalo bobilo ubu:

Bukaalo 1: Nankashi usuni sha kulipenta penta walongela kulibungano limwi uko benankashi baanji nkobatasuni bunene bantu balipenta penta.

Amubelenge Bene Loma 15:1 alimwi a 1 Bene Kolinto 10:23, 24, akubandika miipusho iyi:

• Kweelana amavesi aya, ino nciinshi mpashi nankashi uyo nceenga wasalawo kucita? Ino inga mwacita buyani ndyemuli amuntu ucite njeelacaamba imukasha kucita cintu cimwi mwebo njeelacaamba yanu ncoimusuminisha kucita?

Bukaalo 2: Mukwesu ulicishi kwaamba ayi Baibo taikashi kunwa bwalwa cakweelanya, nacibi boobo wasalawo kutanoonwa. Weetwa kukufwakasha nkwaabona bamakwesu batoonwa bwalwa.

Amubelenge Shikushimikila 7:16 alimwi a Bene Loma 14:1, 10, akubandika miipusho iyi:

• Kweelana amavesi aya, ino nciinshi mpashi mukwesu uyo nceenga wasalawo kucita? Ino inga mwacita buyani na mwaboona muntu umwi kaacita cintu cimwi ncomubona ayi tacibete kabotu?

Ino nshiinshi sheenga shamucafwa kusala kabotu?

1. Amupaile kuli Yehova kwaamba ayi amucaafwe kusala shakucita.—Jemusi 1:5.

2. Amulangoole makani mu Baibo alimwi amabuku aamba shamu Baibo kwaamba ayi mucane njiisho nsheenga mwakonkela. Alimwi inga mweepusha mukwesu na nankashi wasebensela Yehova kwamyaaka iinji.

3. Amuyeeye kusala kwanu mbweenga kwakuma njeelacaamba yanu alimwi a ya bamwi.

CITEENTE CINENE

Inga twasala kabotu shakucita na twataanguna kushiba Yehova mbwaalinyumfwa pamakani ayo, lyalo akubona na nshetwasala kucita inga shacafwa bamwi nabi sobwe.

Kwiindulukaamo

• Ino inga mwacita buyani kwaamba ayi musale shakucita sheenga shasangalasha Yehova?

• Ino njeelacaamba yanu inga mwaiisha buyani?

• Ino inga mwatondesha buyani ayi mulalemeka njeelacaamba ya bamwi?

AMULANGWETEEWO ASHIMWI

Ino inga mwacita buyani kwaamba ayi munoosala shakucita sheenga shayumya bushicibusa bwanu a Lesa?

“Amusale Shakucita Shitondesha ayi Mulalemeka Lesa” (Njashi Yamulindilishi, April 15, 2011)

Amwiiye Yehova mbwatucafwa.

Yehova Alatanjilila Bantu Bakwe (9:50)

Amubone shakacafwa musankwa umwi kusala cakucita cimwi catakalinga cuubu.

Shintu Shoonse Yehova Nshatushomesha Nshibotu (5:46)

Amwiiye nsheenga mwaciita kwaamba ayi munoosala shisangalasha Yehova nabi ndyekutaakuwo mulawo ululamite pamakani ngomutoyandika kusalawo cakucita.

“Sa Lyoonse Mulayandika Mulawo Wamu Baibo?” (Njashi Yamulindilishi, December 1, 2003)