CIIYO 36
Amushomeke Mushintu Shoonse
Muntu uli woonse ulisuni beshicibusa bashomeka. Yehova alakwe alalangila beshicibusa bakwe kuba bantu bashomeka. Nacibi boobo, kushomeka teshi cintu cuubu mucishi bantu baanji mobatashomeki. Ino nshoolwe nshi nsheenga twacaana na katushomeka mushintu shoonse?
1. Ino nceebo nshi cinene kushomeka ncokuyandikila abuumbi?
Na katushomeka kubamwi, tulatondesha Yehova ayi tulimusuni alimwi tulamulemeka. Amuyeeye paceeci: Yehova alishi shintu shoonse nshetuyeeya anshetucita. (Bene Ebulu 4:13) Alabona ndyetushomeka alimwi cilamusangalasha na twacita boobo. Maswi akwe alaamba ayi: ‘Yehova ulipatite muntu utaluleme, sombi balo baluleme ulanyumfwanaabo.’—Tushimpi 3:32.
2. Ino inga twatondesha buyani ayi tulashomeka mubuumi bwesu?
Yehova alisuni kwaamba ayi ‘tunookwaamba lushinisho kumuntu womwi awomwi.’ (Sekaliya 8:16, 17) Ino ici cilaamba nshi? Cilaamba ayi tatweelete kwaamba makani akubeca ndyetutobandika abamumukwashi wesu, bantu mbotusebensaabo, bamakwesu abenankashi, na bamanene bamu mfulumeende. Bantu bashomeka tabeepi na kubeca bamwi. (Amubelenge Tushimpi 24:28 alimwi a Bene Efeso 4:28.) Alimwi balalipila misonko yoonse njobayandika kulipila. (Bene Loma 13:5-7) Munshila ishi alimwi amunshila shimwi, tulatondesha ayi “tulashomeka mushintu shoonse.”—Bene Ebulu 13:18, NWT.
3. Ino kushomeka kulaleta shoolwe nshi?
Bamwi inga batushoma na katushibikitwe ayi tuli bantu bashomeka. Tulapa kwaamba ayi cibe cuubu muntu uli woonse mulibungano kulinyumfwa kushitilishikwa bweenka mbociba mumukwashi. Tulaba anjeelacaamba isalalite. Alimwi kushomeka kwesu inga kwalengesha kwaamba ayi bamwi “balemeke Maswi akwe Lesa Mupulushi wesu,” akupa kwaamba ayi basune kwiiya pali Yehova.—Taitasi 2:10.
AMWIIYILEWO ASHIMWI
Amwiiye kushomeka mbokukuma Yehova alimwi anobeene, ambweenga mwashomeka mubukaalo bupusenepusene.
4. Yehova alasangalala na katushomeka
Amubelenge Kulumbaisha 44:21 alimwi a Malaki 3:16, akubandika miipusho iyi:
Ino nceebonshi teshi cintu camaano kushoma ayi cilibo kabotu kutaamba lushinisho?
Ino Yehova alalinyumfwa buyani na twasalawo kwaamba lushinisho nabi ndyecibete ciyumu kucita boobo?
Bashali balakondwa na baana kabaamba lushinisho. Yehova alakondwa na katwaamba lushinisho
5. Amushomeke mubukaalo buli boonse
Bantu baanji balashoma ayi teshi lyoonse ndyeenga cakonsheka kushomeka mushintu shoonse. Nacibi boobo, amubone kushomeka lyoonse ncokuyandikila. Amweebele VIDYO.
Amubelenge Bene Ebulu 13:18, akubandika mbweenga twashomeka . . .
mumukwashi.
kucikolo na kuncito.
mubukaalo bumwi buli boonse.
6. Kushomeka kulaleta shibotu
Pakutaanguna kushomeka inga kwaboneka anga kulaleta mapensho. Sombi mukuya kwaciindi, cilesa mukubonekela patuba kwaamba ayi ncintu cibotu abuumbi. Amubelenge Kulumbaisha 34:12-16, akubandika mwiipusho uyu:
Ino kushomeka inga kwamucafwa buyani mubuumi bwanu?
Cikwati cilayuma na beebene kabashomeka kuwooyo ngobeebenaakwe
Bantu bashomeka pancito balabashoma kubaabo bakabanjisha ncito
Bantu bashomeka balaba ampuwo ibotu kubamanene bamu mfulumeende
BANTU BAMWI BALAAMBA AYI: “Kubeca mutuntu tuniini kulibo kabotu.”
Ino nceebonshi ncomushomena ayi Yehova alipatite kubeca koonse?
CITEENTE CINENE
Yehova alisuni ayi beshicibusa bakwe banoshomeka mushintu shoonse nshobaamba akucita.
Kwiindulukaamo
Ino inga twatondesha buyani ayi tulashomeka?
Ino nceebonshi teshi cintu camaano kuyeeya ayi cilibo kabotu kutaamba lushinisho?
Ino nceebonshi mulisuni kunooshomeka mubukaalo buli boonse?
AMULANGWETEEWO ASHIMWI
Ino bashali inga bacita buyani kwaamba ayi baiishe bana babo kuba bantu bashomeka?
Ino mbubotu nshi mbweenga twacaana na katukumanisha nshetushomesha?
Amwiiye akubona na tulyeelete kunoolipila misonko nabi kwaamba ayi maali ayo taasebenseshekwi kabotu.
“Sa Tulyeelete Kulipila Misonko?” (Njashi Yamulindilishi, September 1, 2011)
Ino nciinshi cakapa kwaamba ayi musankwa watakalinga kushomeka aalule buumi bwakwe akutalika kushomeka?
“Ndakeeya Kwaamba ayi Yehova Ngushinkumbu Alimwi Alalekelela” (Njashi Yamulindilishi, May 1, 2015)