CIIYO 37
Baibo Nshoyaamba Pamakani Amaali Alimwi Anciito
Sa mwakalisukamaawo ceebo ca ncito na kubula maali? Teshi cuubu kulangoola shiyandika alimwi akubikila maano kushintu shakumushimu. Baibo ilaamba makani eenga atucafwa.
1. Ino Baibo ilaamba nshi pamakani ancito?
Lesa alisuni ayi tunoosangalala muncito yesu. Baibo ilaamba ayi: ‘Cintubo ciindaawo kubota muntu nceenga wacita . . . nkusangalala musheesho nshaakayuwila.’ (Shikushimikila 2:24) Yehova alasebensa cankusu. Na katukonkela cakubonenaako cakwe kwiinda mukusebensa cankusu alimwi cakubikila maano, tulalengesha kwaamba ayi asangalale alimwi tulalinyumfwa kabotu.
Incito ilayandika. Sombi tayeelete kuba cintu ciyandika abuumbi kwiinda kulambila Yehova. (Joni 6:27) Yehova wakatushomesha ayi na twabika panembo shintu shakumushimu, alaakutupa shintu nshetuyandika lwakumubili.
2. Ino maali tulyeelete kwaabona buyani?
Nabi kwaamba ayi Baibo ilaamba ayi ‘maali alafuna,’ ilatucenjesha ayi maali eenkabo inga taatupi kuba alusangalalo. (Shikushimikila 7:12) Aboobo Baibo ilatuyuminisha ayi tatweelete kusunisha maali sombi tulyeelete “kukwana ashintu nshetucite.” (Amubelenge Bene Ebulu 13:5, NWT.) Na twatolelela kuba bakwene anshetucite, teshi tukalinyumfewo cibiibi ceebo cakuyeeya ayi teshi tukabewo amaali aanji. Tulaakuleya kulinjisha munkongole. (Tushimpi 22:7) Alimwi tulaakuleya kulinjisha mutoose twakusuna kubila cakufwambaana kwiinda mukusebensesha nshila shitabete kabotu.
3. Ino maali inga mwaasebensesha buyani?
Yehova ngu Lesa ushikwaaba. Inga twakonkela cakubonenaako cakwe na ‘katupa camaansa obilo.’ (1 Timoti 6:18) Inga twasebensesha kabotu maali esu na katucafwilisha libungano alimwi abamwi babulishite shiyandika, bunene bunene bashominyineesu. Yehova alabikila bunene maano kuluyaando ndotutoopeta kuteshi kukufula kwa maali ngeenga twapa. Na katupa camoyo woonse, tulaakuba basangalete alimwi tulaakusangalasha Yehova.—Amubelenge Milimo 20:35.
AMWIIYILEWO ASHIMWI
Amubone bubotu bwakubona ncito munshila yeelete akukwana ashintu nshetucite.
4. Amusebense munshila yeenga yaleta bulemu kuli Yehova
Bushicibusa bwesu a Yehova bulyeelete kutucafwa kubona ncito munshila yeelete. Amweebele VIDYO, lyalo akubandika miipusho itokonkelaawo.
Kweelana anshomweebela muvidyo, ino nshiinshi shamunyumfwisha kabotu pali ba Jason mbobakalinga kubona ncito alimwi anshobakalinga kucita kuncito?
Ino bakacita buyani kwaamba ayi banoobona ncito munshila yeelete?
Amubelenge Bene Kolose 3:23, 24, akubandika mwiipusho uyu:
Ino nceebonshi makani ambotubona ncito alayandika?
Incito ilayandika. Sombi tatweelete kubona ncito mbuli cintu ciyandika abuumbi kwiinda kusebensela Yehova
5. Kuba bakwene anshetucite kulatucafwa
Bantu baanji baleelesha cankusu kwaamba ayi babe amaali aanji abuumbi. Ano Baibo ilatuyuminisha kubona shintu munshila ipuseneeko. Amubelenge 1 Timoti 6:6-8, akubandika mwiipusho uyu:
Ino Baibo ilatuyuminisha kucita nshi?
Inga twaba basangalete nabi katutacite shiinji lwakumubili. Amweebele VIDYO, lyalo akubandika mwiipusho utokonkelaawo.
Ino nciinshi cipa kwaamba ayi bamu mikwashi iyi babe basangalete nabi ndyebatacite maali aanji?
Ino mbuyani na tulicite kale shintu shiinji sombi tucilangwetaawo ashimwi? Yesu wakaamba cikoshanyo citucafwa kushiba kucita boobo ncokutabetele kabotu. Amubelenge Luka 12:15-21, akubandika mwiipusho uyu:
Ino nciinshi ncomweeya kuswa kucikoshanyo Yesu ncaakaamba?—Amubone vesi 15.
Amubelenge akweelanya Tushimpi 10:22 ku lilembo lya 1 Timoti 6:10. Lyalo amubandike miipusho iyi:
Ino nciinshi ncemubona ayi cilayandika abuumbi, kuba abushicibusa a Yehova na kuba amaali aanji? Ino nceebonshi?
Ino ngamapensho nshi ngeenga muntu wacana na kasuni bunene maali?
6. Yehova alaakutupa nshetuyandika
Kutacana ncito na kubula maali inga kwatondesha patuba na ncakwiila tulashoma muli Yehova. Amweebele VIDYO kwaamba ayi mubone nsheenga twaciita na katucite mapensho aya, akubandika miipusho itokonkelaawo.
Kweelana anshomweebela muvidyo, ino ngamapensho nshi mukwesu ngaakacana?
Ino wakacita buyani kwaamba ayi acikoonshe kukoma mapensho?
Amubelenge Mateyo 6:25-34, akubandika mwiipusho uyu:
Ino Yehova washomesha ayi alaakubacitila nshi abo bamubika panembo?
BANTU BAMWI BALAAMBA AYI: “Inga nshicikoonshi kunoocanika kumabungano nsondo ansondo, mukwiinga ndyeelete kusebensa cankusu kwaamba ayi ncafwe mukwashi wangu.”
Ino ndilembo nshi limucafwa kushoma ayi kubika panembo kulambila Yehova ncecintu cibotu kwiindaawo?
CITEENTE CINENE
Incito yakumubili alimwi amaali shilayandika, sombi tasheelete kutupa kwaalilwa kusebensela Yehova.
Kwiindulukaamo
Ino nciinshi ceenga camucafwa kubona ncito munshila yeelete?
Ino kukwana ashintu nshemucite inga kwamucafwa buyani?
Ino inga mwatondesha buyani ayi mulashoma mucishomesho cakwe Yehova cakwaamba ayi alaakulama bantu bakwe?
AMULANGWETEEWO ASHIMWI
Amwiiye akubona na Baibo ilaamba ayi maali ngabiibi.
“Sa Maali Ngaaleta Mapensho Oonse?” (Makani acanika pa jw.org)
Amwiiye mbweenga twapa maali kuli Lesa munshila imusangalasha.
“Ino Baibo Ilaamba Nshi Pamakani Abwaabi?” (Makani acanika pa jw.org)
Sa kuuma njuka kulibo kabotu?
“Baibo Nshoyaamba Pamakani Akuuma Njuka” (Sinsimuka!, March 2015)
Amubone cakacafwa musankwa umwi kucileka kuuma njuka akwiipa.
“Ndakalinga Kusunishi Bunene Shisekano sha Maaki” (Njashi Yamulindilishi, November 1, 2011)