CIIYO 41
Ino Baibo Ilaamba Nshi Pamakani Akoonana?
Bantu baanji balanyumfwa nsoni kubandika pamakani akoonana. Nacibi boobo, na Baibo yaamba pamakani akoonana, ilaamba cakuteenda mweela alimwi munshila ya bulemu. Nshoyaamba shilatucafwa. Ubu mboceelete kuba mukwiinga Yehova ngo Mulengi wesu. Aboobo ngoocishi kabotu sheenga shatucafwa. Alatulwiita nshotweelete kucita kwaamba ayi tumulengeshe kukondwa alimwi asheenga shatucafwa kwaamba ayi tusangalale abuumi kwamuyayaya.
1. Ino Yehova alaabona buyani makani akoonana?
Koonana ncipo kuswa kuli Yehova. Alisuni kwaamba ayi musankwa amwanakashi beebene banoosangalala. Cipo ici cilapa beebene coolwe cakuba abaana alimwi akutondeshanya lusuno ndobacite munshila yakashalilo alimwi ibapa kusangalala. Aboobo Maswi akwe Lesa alaamba ayi: “Koosangalalila mumwanakashi ngowakeeba koocili mwanike.” (Tushimpi 5:18, 19) Yehova alisuni kwaamba ayi Beneklistu bali mucikwati banoshomeka kuwooyo ngobeebenaakwe, aboobo tabeelete kucita bulale.—Amubelenge Bene Ebulu 13:4.
2. Ino bufuule cilaamba nshi?
Baibo ilaamba ayi ‘bafuule boonse . . . teshi bakenjile mu Bwaami bwakwe Lesa.’ (1 Bene Kolinto 6:9, 10) Beshikulemba Baibo muci Giliki bakasebensesha liswi lyakwaamba ayi por·neiʹa kusansulula liswi lyakwaamba ayi bufuule. Liswi lyakwaamba ayi por·neiʹa lileelikaawo (1) koonanaa kwa musankwa amwanakashi batabete mucikwati, (2) koonana kwa basankwa na banakashi beenka beenka, alimwi a (3) bantu koonana ashinyama. Inga twakala buumi buli kabotu akulengesha Yehova kukondwa na ‘katusoonoka kubufuule.’—1 Bene Tesalonika 4:3.
AMWIIYILEWO ASHIMWI
Amwiiye mbweenga mwaleya bufuule alimwi ashibotu nsheenga mwacaana ceebo cakukala buumi bwa kutacita shibiibi.
3. Amusoonoke kubufuule
Josefu musankwa ushomeka wakacikonsha kukaka, mwanakashi ndyaakamulwiita ayi oonane anguwe. Amubelenge Matalikilo 39:1-12, akubandika miipusho iyi:
Ino nciinshi cakapa kwaamba ayi Josefu acice?—Amubone vesi 9.
Sa mutoobona ayi Josefu wakasala kabotu? Ino nceebonshi ncemwaambila boobo?
Ino bacanike inga bacita buyani kwaamba ayi bakonkele cakubonenaako cakwe Josefu akusoonoka kubufuule? Amweebele VIDYO.
Yehova alisuni ayi soonse tunoosonoka kubufuule. Amubelenge 1 Bene Kolinto 6:18, akubandika miipusho itokonkelaawo:
Ino mbukaalo nshi bweenga bwapa kwaamba ayi muntu acite bufuule?
Ino inga mwacita buyani kwaamba ayi musoonoke kubufuule?
4. Inga mwacikonsha kuleya bweelesho
Ino nciinshi ceenga capa kwaamba ayi cibe ciyumu kusoonoka kubufuule? Amweebele VIDYO, lyalo akubandika mwiipusho utokonkelaawo.
Kweelana anshomweebela muvidyo, ino mukwesu wakacita buyani ndyaakabona kwaamba ayi nshaakalinga kuyeeya akucita inga shamulengesha kutashomeka kumukaakwe?
Beneklistu bashomeka abalo cimwi ciindi balalwana miyeeyo itabete kabotu. Ino inga mwacita buyani kwaamba ayi muleye kutolelela kuyeeya pashintu shibiibi? Amubelenge Bene Filipi 4:8, akubandika miipusho iyi:
Ino nshintu nshi nshotweelete kuyeeyawo?
Ino kubelenga Baibo alimwi akutolelela kuba ashakucita shiinji muncito yakwe Yehova inga kwatucafwa buyani kuleya kucita cibiibi?
5. Njiisho shakwe Yehova shilatucafwa
Yehova ngoocishi kabotu sheenga shatucafwa. Alatulwiita nshotweelete kucita kwaamba ayi tutolelele kuba basalalite alimwi abubotu bwakucita boobo. Amubelenge Tushimpi 7:7-27 na kweebela VIDYO, lyalo akubandika miipusho itokonkelaawo.
Ino musankwa cikula bwangu wakalinjisha buyani mubweelesho?—Amubone Tushimpi 7:8, 9.
Kweelana a Tushimpi 7:23, 26, bufuule inga bwaletela muntu mapensho anene. Ino ngamapensho nshi ngeenga twaleya na twasoonoka kubufuule?
Ino kuba basalalite inga kwatucafwa buyani kusangalala abuumi kwamuyayaya?
Bantu bamwi balayeeya ayi Baibo nshoyaamba pamakani akoonana kwa basankwa na banakashi beenka beenka shilatondesha kubula lusuno. Sombi Yehova ngu Lesa shilusuno alimwi alisuni kwaamba ayi muntu uli woonse akasangalale abuumi bwamuyayaya. Kwaamba ayi tukeelele kutambula buumi ubu, tulyeelete kukonkela njiisho shakwe. Amubelenge 1 Bene Kolinto 6:9-11, akubandika mwiipusho uyu:
Kweelana a Lesa mbwaabona shintu, sa kuba amiyeeyo yakoonana abasankwa na banakashi beenka beenka nkokutabetebo kabotu?
Soonse tulyeelete kwaaluka kwaamba ayi tusangalashe Lesa. Sa kucita boobo kulacafwa? Amubelenge Kulumbaisha 19:8, 11, akubandika miipusho iyi:
Sa mutoobona ayi inga twacikonsha kukonkela njiisho shakwe Yehova pamakani akulilemeka? Ino nceebonshi ncemwaambila boobo?
Yehova wacafwa bantu baanji kwaalula buumi bwabo akutalika kukonkela njiisho shakwe. Amwebo inga wamucafwa
BANTU BAMWI BALAAMBA AYI: “Cilibo kabotu koonana amuntu uli woonse, kulilabo na mulisunene.”
Ino mwebo mulabona buyani?
CITEENTE CINENE
Koonana ncipo Yehova ncaakapa musankwa amwanakashi bali mucikwati kwaamba ayi banoosangalala.
Kwiindulukaamo
Ino bufuule buleelikawo nshi?
Ino nshiinshi sheenga shatucafwa kuleya bufuule?
Ino kukonkela njiisho shakwe Yehova kulatucafwa buyani?
AMULANGWETEEWO ASHIMWI
Amwiiye akubona Yehova ncaasunini ayi musankwa amwanakashi basuni kukala pomwi balyeelete kweebana kweelana amulawo.
Amwiiye nceenga twaambila ayi Baibo nshoyaamba ayi koonana kwa basankwa na banakashi beenka beenka takubete kabotu. Nacibi boobo, ici tacaambi ayi tulyeelete kubapata bantu abo.
“Sa Koonana kwa Basankwa na Banakashi Beenka Beenka Takubete Kabotu?” (Makani acanika pa jw.org)
Amwiiye akubona milawo yakwe Lesa pamakani akoonana kwa mushobo uli woonse mboitushitilisha.
“Sa Koonana kwa Mukanwa Akwalo Nkoonana?” (Makani acanika pa jw.org)
Ndyemutobelenga mutwi utokwaamba ayi “Bakantondesha Bulemu,” amubone cakapa kwaamba ayi muntu wakalinga kukala buumi bwa koonana kwa basankwa beenka beenka aalule buumi bwakwe kwaamba ayi asangalashe Lesa.
“Baibo Ilaalula Buumi bwa Muntu” (Njashi Yamulindilishi, April 1, 2011)
a Mishobo iyi yakoonana kutabete kabotu ileelikaawo koonana kwa musankwa amwanakashi, koonana kwa mukanwa, kumatako, alimwi akucata cata muntu umwi kubusankwa na kubwanakashi aluyaando lwakoonana.