Beneklistu Mbobeelete Kubona Makani Akunwa Bwalwa

Bantu nsengwe yoonse balaamba shipusenepusene pamakani abwalwa. Bamwi balasala kunwaako cimwi ciindi ndyebatobandika abeshicibusa. Bamwi balasalawo kutanwa. Bamwi balanwa abuumbi kushika apakukolwa. Ino Baibo ilaamba nshi pamakani abwalwa?

1. Sa kunwa bwalwa ncibiibi?

Baibo tayaambi ayi kunwa bwalwa ncibiibi. Alimwi kwaamba pashipo Lesa nshaakatupa, Baibo ileelikaawo ‘awaini usangalasha moyo wa muntu.’ (Kulumbaisha 104:14, 15) Basankwa abanakashi bamwi bashomeka baambwa mu Baibo bakalinga kunwako bwalwa.—1 Timoti 5:23.

2. Ino Baibo ilaamba nshi kubaabo basalawo kunwa?

Yehova alaamba ayi kunwa cakwiindilila alimwi abucakolwa tashibete kabotu. (Bene Galatiya 5:21) Maswi akwe alaamba ayi: “Utapaankani abeshikunwa bunene waini.” (Tushimpi 23:20) Aboobo na twasalawo kunwa ndyetuli sweenka na ndyetuli abamwi, tatweelete kunwa cakwiindilila cakwaamba ayi twacileka akuyeeya kabotu, kwaalilwa kulama nshetwaamba akucita, na kunwa cakunyonyoola buumi bwesu. Na inga tatucikoonshi kunwa bweelete, inga cabota kucilekelabo limwi kunwa.

3. Ino inga twatondesha buyani ayi tulalemeka bamwi nshobasala pamakani abwalwa?

Muntu uli woonse alyeelete kulisalila mwine pamakani akunwa bwalwa. Tatweelete kwaamba shitabete kabotu pabaabo basalawo kunwa cakweelanya kabotu, alimwi tatweelete kukakatisha baabo batasuniiwo kunwa. (Bene Loma 14:10) Tulasalawo kutanwa na kunwa kwesu inga kwaletela bamwi mapensho. (Amubelenge Bene Loma 14:21.) Tuleelesha kucita sheenga ‘shakondelesha bamwi kuteshibo sheenga shatukondelesha.’—Amubelenge 1 Bene Kolinto 10:23, 24.

AMWIIYILEWO ASHIMWI

4. Mulyeelete kulisalila nobeene pamakani akunwa na kutanwa

Ino Yesu wakalinga kwaabona buyani makani akunwa bwalwa? Kwaamba ayi tucane cikumbulo kumwiipusho uyu, amuleke tubandike pa caankamiko cakutaanguna Yesu ncaakacita. Amubelenge Joni 2:1-11, akubandika miipusho iyi:

• Kweelana acaankamiko ici, ino nshiinshi nsheenga tweeya kuswa kuli Yesu pamakani ambwaakalinga kubona bwalwa alimwi abaabo bakalinga kunwa?

• Mukwiinga Yesu taakwe kwaamba ayi ncibiibi kunwa, ino Mwineklistu alyeelete kubabona buyani abo basalawo kunwa?

Nacibi boobo, ici tacaambi ayi mukwiinga Mwineklistu alyaangulukite kusalawo kunwa nkokwaamba ayi lyoonse ncintu ca busongo kucita boobo. Amubelenge Tushimpi 22:3, akubandika mbweenga shitokonkelaawo shamucafwa kusalawo kunwa nabi sobwe:

• Mutooya mukweensha motoka na kusebensesha mashini.

• Muli pakati.

• Ba dokota bamulwiita ayi tamweelete kunwa bwalwa.

• Mulaalilwa kunwa cakweelanya kabotu.

• Tamweeleli kunwa bwalwa kweelana amulawo.

• Muli amuntu umwi wakasalawo kucileka kunwa ceebo cakwaamba ayi wakalinga kucitewo lipenshi lyakunwa cakwiindilila.

Kwaamba ayi mubone sheenga shamucafwa kusalawo kuba abwalwa kubwiinga na kukubungana kumwi, amweebele VIDYO.

VIDYO: Sa Inga Ndapako Bamwi Bwalwa na Sobwe? (2:41)

Amubelenge Bene Loma 13:13 alimwi a 1 Bene Kolinto 10:31, 32. Pesule lyakubelenga lilembo lyomwi alyomwi, amubandike mwiipusho uyu:

• Ino kukonkela njiisho iyi inga kwamucafwa buyani kucita ceenga calengesha Yehova kukondwa?

5. Amusalile limwi mbomweelete kunwa

Na mwasalawo kunwa bwalwa, amwiibaluke ceeci: Nabi kwaamba ayi Yehova taakashi kunwa bwalwa, alaamba ayi tacibete kabotu kunwa cakwiindilila na kukolwa. Ino nceebonshi? Amubelenge Osiya 4:11, 18, akubandika mwiipusho uyu:

• Ino nciinshi ceenga cacitika na muntu kaanwa bwalwa cakwiindilila?

Ino inga twacita buyani kwaamba ayi tuleye kunwa cakwiindilila? Tulyeelete kuliceesha, na kushiba mpotweelete kweela. Amubelenge Tushimpi 11:2, akubandika mwiipusho uyu:

• Ino nceebonshi cili kabotu kulibikila cipimo mpomweelete kweela kunwa?

6. Ino nciinshi ceenga cacafwa muntu kuleya kunwa cakwiindilila?

VIDYO: ‘Buumi Bwangu Bwakandemya’ (6:32)

• Kweelana anshomweebela muvidyo, ino ba Dmitry bakalinga kucita buyani na bakolwa?

• Sa bakacikonsha kucileka kunwa peenkapo?

• Ino bakacikonsha buyani kucilekela limwi kunwa cakwiindilila?

Amubelenge 1 Bene Kolinto 6:10, 11, akubandika miipusho iyi:

• Ino bucakolwa ndipenshi linene buyani?

• Ino nciinshi citondesha kwaamba ayi muntu unwa bwalwa cakwiindilila inga waaluka?

Amubelenge Mateyo 5:30, akubandika mwiipusho uyu:

• Yesu ndyaakaamba cikoshanyo ca kutimbula lyaansa wakalinga kusansulula ayi inga twayandika kucilekela limwi shintu shimwi kwaamba ayi tucite sheenga shalengesha Yehova kukondwa. Ino inga mwacita buyani na mulicite lipenshi lyakunwa cakwiindilila?a

Amubelenge 1 Bene Kolinto 15:33, akubandika mwiipusho uyu:

• Ino beshicibusa banu inga bamuyunga buyani pamakani ambomunwa?

CITEENTE CINENE

Yehova wakatupa bwalwa kwaamba ayi tunoosangalala, sombi alaamba ayi tacibete kabotu kunwa cakwiindilila alimwi akukolwa.

Kwiindulukaamo

• Ino Baibo ilaamba nshi pamakani abwalwa?

• Ino kunwa cakwiindilila kulaleta mapensho nshi?

• Ino inga twatondesha buyani ayi tulalemeka bamwi nshobasala pamakani akunwa?

AMULANGWETEEWO ASHIMWI

Ino bacanike inga bacita buyani kwaamba ayi basale kabotu pamakani abwalwa?

Amusale Cabusongo Pamakani Abwalwa (2:31)

Amwiiye nsheenga mwaciita kwaamba ayi mukome lipenshi lyakunwa cakwiindilila.

“Kubona Makani Akunwa Bwalwa Munshila Yeelete” (Njashi Yamulindilishi, January 1, 2010)

Sa Mwineklistu alyeelete kwaabanamo lubasu mukutambika mwiculu makaapu uko kucita bantu batoonwa?

“Miipusho Kuswa Kubeshikubelenga” (Njashi Yamulindilishi, February 15, 2007)

Mumutwi utokwaamba ayi “Ndakalinga Kunwa Citaambiki,” amubone musankwa umwi mbwakacikonsha kucileka kunwa cakwiindilila.

“Baibo Ilaalula Buumi bwa Muntu” (Njashi Yamulindilishi, May 1, 2012)