CIIYO 48

Amusale Kabotu Beshicibusa

Printed Edition

Beshicibusa balatucafwa kuba alusangalalo alimwi balatuyuminisha muciindi camapensho. Nacibi boobo, Baibo ilatucenjesha ayi teshi muntu uli woonse weenga waba shicibusa uli kabotu. Aboobo ino nshiinshi sheenga shamucafwa kusala beshicibusa bali kabotu? Amuyeeye pamiipusho itokonkelaawo.

1. Ino beshicibusa mbomusala inga bamukuma buyani?

Liinji tulakonkela sheesho shicita bantu mbotucanikaabo. Cimwi ciindi ici inga catucafwa na sobwe—alimwi inga caba ayi tulacanikaabo na kubandikaabo pa intaneti. Bweenka Baibo mboyaamba ayi, “muntu weenda abasongo alakwe ulaba musongo, sombi shimweenda aumineme [abo batasebenseli Yehova] alakwe ulaminama.” (Tushimpi 13:20) Beshicibusa basuni Yehova alimwi bamusebensela inga bamucafwa kutolelela kuyumya bushicibusa bwanu anguwe alimwi akusala kabotu shintu. Ano kunyumfwana bunene abantu batapaili Yehova inga kwatutalamusha kuli nguwe. Aboobo Baibo ilatuyuminisha ayi tulyeelete kusala kabotu beshicibusa! Kuba abeshicibusa basuni Lesa, kulaakutucafwa alimwi aswebo inga twabacafwa. Kulatupa kwaamba ayi tucikoonshe ‘kutolelela kuyuminishanya alimwi akucafwana.’—1 Bene Tesalonika 5:11.

2. Ino beshicibusa mbomusala balapa Yehova kulinyumfwa buyani?

Yehova alasala beshicibusa bakwe cakubikila maano. “Baluleme ulanyumfwanaabo.” (Tushimpi 3:32) Ino Yehova inga walinyumfwa buyani na twasala kuba bushicibusa abantu batamusuniiwo? Inga walinyumfwa cibiibi abuumbi! (Amubelenge Jemusi 4:4.) Nacibi boobo, Yehova alaakukondwa alimwi akuba shicibusa wesu na twaleya kunyumfwana abantu batabete kabotu akusena pafwiifwi kuli nguwe akubaabo bamusuni.—Kulumbaisha 15:1-4.

AMWIIYILEWO ASHIMWI

Amwiiye kusala beshicibusa bali kabotu ncokuyandikila alimwi akubona nsheenga mwaciita kwaamba ayi mucane beshicibusa beenga bamucafwa.

3. Amucenjele ndyemutosala beshicibusa

Bantu batasuni Lesa alimwi batakonkeli njiisho shakwe teshi beshicibusa bali kabotu. Amweebele VIDYO, lyalo akubandika mwiipusho utokonkelaawo.

VIDYO: Amuleye Kusekana Abantu Batabete Kabotu (6:17)

Ino inga twatalika buyani kunyumfwana abantu batabete kabotu cakuteengashila?

Amubelenge 1 Bene Kolinto 15:33, akubandika miipusho iyi:

Ino mbantu bali buyani mbomubona ayi teshi beshicibusa bali kabotu? Ino nceebonshi?

Amubelenge Kulumbaisha 119:63, akubandika mwiipusho uyu:

Ino nshiinshi sheenga shamucafwa kushiba na muntu ngushicibusa uli kabotu?

Mbale muli maapo. Li apo lyomwi libolete litooleta baloonshi akupa kwaamba ayi maapo amwi anyonyooke. — Cisepo comwi cibolete inga canyonyoola shisepo shoonse. Ino shicibusa womwi utabete kabotu inga wamukuma buyani?

4. Inga twaba bushicibusa abantu mbotupuseneabo ciimo

Baibo ilaamba pali Defedi a Jonasani basankwa bobilo bamuciindi ca bene Isilaeli bakale kale. Nabi kwaamba ayi bakalinga kupusene shiimo alimwi abukaalo; bakalinga kucite bushicibusa bulibetele. Amubelenge 1 Samwelo 18:1, akubandika mwiipusho uyu:

Ino nceebonshi tatweelete kubabo abeshicibusa mbotweelenaabo ciimo na bukaalo?

Amubelenge Bene Loma 1:11, 12, akubandika mwiipusho uyu:

Ino beshicibusa basuni Yehova inga bayuminishanya buyani?

Muvidyo iyi, amubone mukwesu umwi wacanike mbwakacana beshicibusa bashiimo shipusenepusene. Amweebele VIDYO, lyalo akubandika miipusho itokonkelaawo.

VIDYO: Inga Mwaba Bushicibusa Abantu Bashiimo Shipusenepusene (5:06)

Kweelana anshomweebela muvidyo, ino nceebonshi bashali bakwe Akil bakalisukama pa beshicibusa mbwaakalinga kucite kucikolo?
Ino nshiinshi pakutaanguna shakapa kwaamba ayi Akil atalike kunyumfwana abeshicibusa bakucikolo?
Ino wakacita buyani kwaamba ayi akome kuumuninwa?

5. Mbweenga mwaba abeshicibusa bali kabotu

Amubone nsheenga mwaciita kwaamba ayi mucane beshicibusa bancinencine—alimwi ambweenga amwebo mwaba shicibusa wancinencine. Amweebele VIDYO.

VIDYO: Ino Shicibusa Wancine Inga Mwamushiba Buyani? (4:14)

Cikope kuswa muvidyo ya ‘Ino Shicibusa Wancine Inga Mwamushiba Buyani?’ Wacanike alishingulukitwe abeshicibusa bashiimo, mishobo, alimwi alushibo lupusenepusene.

Amubelenge Tushimpi 18:24 alimwi a 27:17, akubandika miipusho iyi:

Ino beshicibusa bancinencine balacafwana buyani?
Sa muliciteko beshicibusa ba mushobo uyo? Na tamucitewo, ino inga mwacita buyani kwaamba ayi mube abo?

Amubelenge Bene Filipi 2:4, akubandika mwiipusho uyu:

Kwaamba ayi mube abeshicibusa bali kabotu, amwebo mulyeelete kuba shicibusa uli kabotu. Ino inga mwacita buyani ubo?

Shikope: Mwanakashi wacanike abeshicibusa bakwe botatwe batofwakasha. 1. Atobandika awomwi wa beshicibusa bakwe pafooni. 2. Atobandika ashicibusa wacinene ku Ŋanda ya Bwaami. 3. Wafwakashila womwi ucite buumba. — Kwaamba ayi mube abeshicibusa bali kabotu, mulyeelete *kuba* shicibusa uli kabotu

BANTU BAMWI BALAAMBA AYI: “Cili kabotu kuba shicibusa amuntu uli woonse kwiinda kubula shicibusa.”

Ino mwebo mulabona buyani?

CITEENTE CINENE

Na twasala kabotu beshicibusa, tulasangalasha Yehova alimwi shintu shilatweendela kabotu.

Kwiindulukaamo

Ino nceebonshi makani akusala beshicibusa besu alayandika kuli Yehova?
Ino mbantu ba mushobo nshi mbotuteelete kubaabo bushicibusa?
Ino inga mwacita buyani kwaamba ayi mube abushicibusa buyumu abantu bali kabotu?

Bushiku ndyemwakamanisha ciiyo:

Nsheenga Mwaciita

Amweeleshe kubashiba kabotu ba mulibungano lyanu.

Shimwi:

Your other goal

AMULANGWETEEWO ASHIMWI

Amubone beshicibusa bali kabotu mbweenga batucafwa paciindi ndyetutokwiinda mumapensho.

“Amuyumye Bushicibusa Bwanu Mamanino Kaatana Kushika” (Njashi Yamulindilishi, November 2019)

Amubone nsheenga mwaciita kwaamba ayi mucane beshicibusa bali kabotu.

“Ino Inga Ndacita Buyani Kwaamba ayi Ncane Beshicibusa Bali Kabotu?” (Questions Young People Ask—Answers That Work, Volume 1, chapter 8)

Ino nshiinshi nshomweelete kushiba pamakani akuba abeshicibusa pa intaneti?

Amusebenseshe Intaneti Munshila Yeelete (4:12)

Amubelenge makani acite mutwi utokwaamba ayi, “Ndakalinga Kuyeeya Kuba Abata,” akubona musankwa umwi nshaakacita kwaamba ayi asale kabotu beshicibusa.

“Baibo Ilaalula Buumi bwa Muntu” (Njashi Yamulindilishi, April 1, 2012)