Amusale Shakulikondelesha Shisangalasha Yehova

Yehova ngu “Lesa usangalete.” (1 Timoti 1:11, NWT) Alisuni kwaamba ayi aswebo tunooba basangalete mubuumi. Alakondwa na katucanako ciindi cakookesha akusangalala. Muciiyo ici, tutokwiiya mbweenga twasebensesha ciindi cesu cakookesha munshila ibotu alimwi isangalasha Yehova.

1. Ino nciinshi ncotweelete kwiibaluka ndyetutosala shakulikondelesha?

Ino nciinshi ncomusuna kucita ndyemutokookesha? Bamwi balanyumfwa kabotu kukalabo paŋanda. Bamwi balasuna kubelenga mabuku, kukutika kunyimbo, kweebela mafilimu, na kubelenga makani pa intaneti. Bamwi balasuna kuya mukusekana abeshicibusa, kucofwa maciinga, kusamba njabwe, na kusekana mageemu. Shakulikondelesha shili shoonse nsheenga twasala tulyeelete kushinisha kwaamba ayi nshintu “shikondelesha Mwaami.” (Bene Efeso 5:10) Ici nciteente comwi ciyandika kunyumfwishisha mukwiinga bantu baanji munshiku shino balisuni shakulikondelesha shitondesha shintu Yehova nshaapatite mbuli nkondo, bufuule, na shamishimu. (Amubelenge Kulumbaisha 11:5.) Ino nciinshi ceenga catucafwa kusala kabotu shakulikondelesha?

Kunyumfwana abantu basuni Yehova kulaakutucafwa kusala kabotu shakulikondelesha. Bweenka mbotwakeeya muciiyo camana, “muntu weenda abasongo alakwe ulaba musongo.” Ano na katusekana abantu batakonkeli milawo yakwe Lesa, ‘tulaakucana mapensho.’—Tushimpi 13:20.

2. Ino nceebonshi tatweelete kusowa ciindi cilaamfu kucita shakulikondelesha?

Nabi kwaamba ayi shakulikondelesha nshetwasala shilibo kabotu, tatweelete kusowa ciindi cilaamfu kucita shakulikondelesha. Mukwiinga kucita boobo inga kwapa kwaamba ayi twaalilwe kucana ciindi cikwene kabotu cakucita shintu shiyandika abuumbi. Baibo ilatulwiita ayi tulyeelete “kusebensesha kabotu ciindi.”—Amubelenge Bene Kolose 4:5.

AMWIIYILEWO ASHIMWI

Amwiiye sheenga shamucafwa kusala kabotu pamakani ashakulikondelesha.

3. Amuleye shakulikondelesha shitabete kabotu

Ino nceebonshi tulyeelete kucenjela ndyetutosala shakulikondelesha? Amweebele VIDYO, lyalo akubandika miipusho itokonkelaawo.

VIDYO: Ino Ndyeelete Kusala Shakulikondelesha sha Buyani? (4:39)

• Ino shisekano sha bene Loma sha kale kale shilikoshenye buyani ashakulikondelesha sha munshiku shino?

• Kweelana anshomweebela muvidyo, ino Danny wakeeya nshi pamakani ashakulikondelesha?

Amubelenge Bene Loma 12:9, akubandika mwiipusho uyu:

• Ino vesi iyi inga yamucafwa buyani ndyemutosala shakulikondelesha?

Ino nshintu nshi shimwi Yehova nshaapatite? Amubelenge Tushimpi 6:16, 17 a Bene Galatiya 5:19-21. Pesule lyakubelenga lilembo lyomwi alyomwi, amubandike mwiipusho uyu:

• Ino nshintu nshi shaambwa mumavesi aya shitondeshekwa mu shakulikondelesha sha munshiku shino?

Sheenga shamucafwa kusala kabotu shakulikondelesha

Amuliipushe ayi:

• Sa shakulikondelesha ishi shilatondesha shintu Yehova nshaapatite?

• Sa shakulikondelesha ishi shilantolela ciindi cakucita shintu shiyandika abuumbi?

• Sa shakulikondelesha ishi shilapa kwaamba ayi noocanika a bantu batasuni Yehova?

Cili kabotu kuba kulaale abuumbi acili coonse ceenga catuletela mapensho. Aboobo tulyeelete kuleya shakulikondelesha shili shoonse nsheenga twaboona ayi tashibete kabotu

4. Amusebenseshe kabotu ciindi

VIDYO: Ino Ciindi Mulacisebensesha Buyani? (2:45)

• Nabi kwaamba ayi mukwesu watondeshekwa muvidyo wakalinga kweebela shakulikondelesha shilibo kabotu, ino ndipenshi nshi ndyaakalinga kucite?

Amubelenge Bene Filipi 1:10, akubandika mwiipusho uyu:

• Ino vesi iyi inga yatucafwa buyani kusala ciindi ncotweelete kusebensesha pa shakulikondelesha?

5. Amusale shakulikondelesha shili kabotu

Nabi kwaamba ayi shakulikondelesha shimwi tashisangalashi Yehova, kuli shimwi shiinji shibotu sheenga shatusangalasha. Amubelenge Shikushimikila 8:15 a Bene Filipi 4:8, akubandika mwiipusho uyu:

• Ino nshakulikondelesha sha buyani shili kabotu nshomusuni?

CITEENTE CINENE

Yehova alisuni kwaamba ayi tunoosangalala ashakulikondelesha shili kabotu.

Kwiindulukaamo

• Ino nshakulikondelesha sha buyani Beneklistu nshobeelete kuleya?

• Ino nceebonshi tatweelete kusowa ciindi cilaamfu kucita shakulikondelesha?

• Ino nceebonshi mulisuni kusala shakulikondelesha shisangalasha Yehova?

AMULANGWETEEWO ASHIMWI

Amwiiye weelete kutusalila shakulikondelesha.

“Sa Bakamboni Bakwe Yehova Balakasha Kweebela Mafilimu, Kukutika Kunyimbo, na Kubelenga Mabuku Amwi?” (Makani acanika pa jw.org)

Amubone mbweenga mwasala kabotu pamakani ashakulikondelesha.

“Sa Shakulikondelesha Nshemusala Shilamucafwa?” (Njashi Yamulindilishi, October 15, 2011)

Amubelenge mutwi utokwaamba ayi “Ndakacileka Kusalulula,” akubona cakapa kwaamba ayi musankwa umwi aalule shakulikondelesha nshaakalinga kusuni.

“Baibo Ilaalula Buumi bwa Muntu” (Njashi Yamulindilishi, February 1, 2010)

Amubone mushali mwanakashi mbwaakasala ca busongo pamakani ashakulikondelesha shitondesha shamishimu.

Amuleye Shakulikondelesha Shitondesha Shamishimu (2:02)