Inga Mwaba Alusangalalo Lwancinencine

1. Ino nceebonshi tulayandika shintu shakumushimu kwaamba ayi tube alusangalalo?

LUSANGALALO lwancinencine teshi kulinyumfwabo kabotu kwapa keendi kaniinibo. Sombi ndusangalalo ndweenga muntu wabaalo kwaciindi coonse. Munshila nshi? Yesu mu Likani Lyakwe Lyapa Kalundu wakaamba ayi: “Balisangalete abo bacishi kwaamba ayi balayandika kutanjililwa a Lesa.” (Mate. 5:3, NWT) Yesu wakalinga kucishi ayi bantu bakalengwa alusuno lwakushiba akulambila Mulengi wabo, Yehova Lesa. Ici ncetuyandika lwakumushimu. Alimwi mukwiinga Yehova ngu “Lesa usangalete,” abo bamulambila abalo inga baba basangalete.​—1 Timo. 1:11, NWT.

2-3. (a) Kweelana a Yesu nshaakaamba, ino mbaani bamwi beenga baba alusangalalo? (b) Ino nshiinshi nsheshi tubandike mumutwi uyu, alimwi ino nceebonshi nceshiyandikila?

² Sa inga twababo alusangalalo na katutacite mapensho mubuumi bwesu? Sobwe. Mu Likani Lyakwe Lyapa Kalundu, Yesu wakaamba cintu cimwi cikankamika. Wakaamba ayi: “Abo balila” mpashi ceebo cakupenshekwa mumoyo pashibiibi shabo na ceebo camapensho anene ngobatokwiindaamo, inga baba alusangalalo. Alimwi ishi Yesu nshaakaamba apabaabo “bapenshekwa ceebo cabululami” na abo ‘bacobolwa’ ceebo cakuba bashikwiiya bakwe Klistu. (Mate. 5:4, 10, 11) Ano ino inga cakonsheka buyani kuba alusangalalo lwancinencine mubukaalo ubu?

³ Yesu wakalinga kutwiisha ayi ceenga catupa kuba alusangalalo lwancinencine teshi bukaalo butacite mapensho, sombi nkulangoola nshetuyandika lwakumushimu akuyumya bushicibusa bwesu a Lesa. (Jemu. 4:8) Ino nshiinshi nshotweelete kucita? Mumutwi uyu, tutobandika shintu shotatwe nshetuyandika kwaamba ayi tube alusangalalo lwancinencine.

AMUBELENGE AKWIIYA BAIBO

4. Ino nciinshi cakutaanguna ncotweelete kucita kwaamba ayi tube alusangalalo lwancinencine? (Kulumbaisha 1:1-3)

⁴ CAKUTAANGUNA: Kwaamba ayi tube alusangalalo lwancinencine tulyeelete kubelenga akwiiya Baibo. Yesu wakakoshanisha Maswi akwe Lesa ku shakulya. Bantu balayandika shakulya kwaamba ayi batolelele kuba abuumi, ashalo shinyama shilayandika shakulya. Nacibi boobo, bantu mbeenga bacikonshabo kubelenga Maswi akwe Lesa, alimwi balayandika kucita boobo. Aboobo Yesu wakaamba ayi: “Muntu taabi abuumi mukulyabo kweenka, sombi ulaba abuumi amaswi oonse aswa kuli Yehova.” (Mate. 4:4, NWT) Aboobo bushiku tabweelete kwiindabo kwakubula kubelenga Maswi akwe Lesa ayandika, Baibo. Shikulumbaisha wakalemba ayi: ‘Ulisangalete uyo ucana lusangalalo mumilawo yakwe Lesa alimwi alaibelenga akukutumana kuyeeyawo mashiku amalumwi.’​—Amubelenge Kulumbaisha 1:1-3.

5-6. (a) Ino nshiinshi nsheenga tweeya mu Baibo? (b) Ino kubelenga Baibo inga kwatucafwa buyani?

⁵ Mukwiinga Yehova alitusuni, kwiinda mu Baibo wakatutondesha nshotweelete kucita kwaamba ayi tube alusangalalo mubuumi. Tuleeya nshaasuni ayi tucite mubuumi bwesu. Tuleeya nsheenga twaciita kwaamba ayi tuyumye bushicibusa bwesu anguwe alimwi akwaamba ayi tulekelelwe pashibiibi shesu. Tuleeya ashishomesho shibotu nsheshi akakumanishe kunembo. (Jele. 29:11) Makani aya ancine ngotwiiya kuswa mu Baibo alatupa kuba alusangalalo!

⁶ Tulishi kwaamba ayi Baibo ilaamba makani acafwa mubuumi. Aboobo na twakonkela nshoyaamba inga twaba alusangalalo. Na mwalinyumfwa kulefuka ceebo cakufula kwa mapensho, amutole ciindi kubelenga Maswi akwe Yehova akukutumana kuyeeyawo. Yesu wakaamba ayi: ‘Basangalete mbaabo banyumfwa maswi akwe Lesa akucita mbwaamba!’​—Luka 11:28.

7. Ino nshiinshi nsheenga mwaciita kwaamba ayi munoosangalala ndyemutobelenga Baibo?

⁷ Ndyemutobelenga Maswi akwe Lesa amutole ciindi kwaamba ayi musangalale anshemutobelenga. Kucakubonenaako, sa amwebo cakamucitikilawo kale cakwaamba ayi muntu umwi wateleka shakulya nshomusuni, sombi mwaalilwa kulya camoyo nteeka ceebo cakwaamba ayi mwapilinganishikwa ashintu shimwi. Lyalo pesule lyakumanisha kulya mwatalika kuyeeya ayi naakwiinga ndakalika moyo kwaamba ayi nyumfwe kubota kwa shakulya. Ubu mbweenga caba andyetutobelenga Baibo. Cimwi ciindi tulabelenga cakufwambaana cakwaamba ayi twaalilwa kusangalala pamakani ngotwalinga kubelenga. Amutole ciindi ndyemutobelenga Maswi akwe Lesa kwaamba ayi musangalale anshemutobelenga; amuyeeye shintu nshemutobelenga mboshakalinga kucitika akukutumana kuyeeya nshomwabelenga. Kucita boobo kulaakumupa kuba alusangalalo.

8. Ino “musebenshi ushomeka alimwi ucite maano” atookumanisha buyani mukuli ngwaakapekwa? (Amubone a futunoti.)

⁸ Yesu wakasala “musebenshi ushomeka alimwi ucite maano” kwaabila shakulya shakumushimu paciindi ceelete, alimwi alatulama kabotu lwakumushimu.b (Mate. 24:45) Makani musebenshi ushomeka ngatwiisha alaswa mu Malembo. (1 Tesa. 2:13) Shakulya shakumushimu ishi shilatucafwa kushiba Yehova mbwaabona shintu kweelana a Baibo nshoiisha. Ici ncecitupa kubelenga Njashi Yamulindilishi alimwi a Sinsimuka! amakani ngotucana pa jw.org. Tulalibambila mabungano amukati kansondo alimwi a apasondo. Alimwi na kacikonsheka tuleebela a pulogilamu ya JW Broadcasting^®. Kushinisha kwiiya akubelenga Baibo kulaakutucafwa kucita cintu cabili ncotweelete kucita kwaamba ayi tube alusangalalo lwancinencine.

AMUKONKELE NJIISHO SHAKWE YEHOVA

9. Ino nciinshi cabili ncotweelete kucita kwaamba ayi tube alusangalalo lwancinencine?

⁹ CABILI: Kwaamba ayi tube alusangalalo lwancinencine tulyeelete kukonkela njiisho shakwe Yehova. Shikulumbaisha wakalemba ayi: “Balisangalete abo baloonda Yehova, ncakwiila abo beenda munshila Shakwe.” (Kulu. 128:1, NWT) Kuloonda Yehova cilaamba kumulemeka abuumbi cakwaamba ayi katuleya kucita cintu cili coonse ceenga camukalasha. (Tus. 16:6) Aboobo tuleelesha kucita shoonse nsheenga twacikonsha kwaamba ayi tutolelele kukonkela njiisho shakwe Yehova pamakani ashiluleme ashitaluleme, nshetucana mu Baibo. (2 Koli. 7:1) Tulaakusangalala na katucita shintu Yehova nshaasuni akukaka sheesho nshaapatite.​—Kulu. 37:27; 97:10; Loma. 12:9.

10. Kweelana a Bene Loma 12:2, ino ngumukuli nshi ngotucite?

¹⁰ Amubelenge Bene Loma 12:2. Muntu inga washiba ayi Yehova ngoocite nkusu shakutulwiita ciluleme acitaluleme, nacibi boobo, alyeelete kusumina kukonkela njiisho shakwe Yehova. Kucakubonenaako, muntu inga washiba ayi mfulumeende njoicite nkusu shakubika milawo ya muntu mpaeelete kweela kucicisha motoka. Sombi mpashi inga wakaka kukonkela milawo iyo. Aboobo inga kacicisha motoka cakwiindilisha. Tulyeelete kucita shintu shitondesha ayi tulashoma ayi kukonkela njiisho shakwe Yehova nkweenga kwatucafwa kuba abuumi bubotu. (Tus. 12:28) Ubu Defedi mbwaakalinga kulinyumfwa. Aboobo wakaamba pali Yehova ayi: ‘Mwebo mwakanshibisha nshila itola kubuumi, alimwi ceebo mwebo muli anebo, ndasangalala abuumbi, ncakwiila kusangalala kutamaani muliimfwa lyanu.’​—Kulu. 16:11.

11-12. (a) Ino nciinshi ncotweelete kuleya kucita na twalinyumfwa cibiibi na kulefuka? (b) Ino maswi ngotucana palilembo lya Bene Filipi 4:8 inga atucafwa buyani kusala kabotu shakulikondelesha?

¹¹ Na twalinyumfwa cibiibi na kulefuka, inga twayandika kucita ceenga catucafwa kucileka kulisukama pamapensho esu. Nacibi boobo, tulyeelete kucenjela kwaamba ayi tutaciti cintu cimwi Yehova ncaapatite.​—Efe. 5:10-12, 15-17.

¹² Munkalata njaakalembela Beneklistu baku Filipi, mutumwi Paulo wakabayuminisha kutolelela kunoyeeya pashintu “shiluleme, . . . shitacite kampenda, . . . shisunikwi, [a] shili kabotu.” (Amubelenge Bene Filipi 4:8.) Nabi kwaamba ayi Paulo taakalinga kwaamba pamakani ashakulikondelesha, nshaakaamba shilyeelete kutucafwa kusala kabotu shakulikondelesha. Amweeleshe kucita sheeshi: paliswi lya kwaamba ayi “shintu” muvesi, amubikeewo liswi lya kwaamba ayi “nyiimbo,” “mafilimu,” “mabuku,” na “mageemu apakompyuta.” Kucita sheeshi inga kwamucafwa kushiba Lesa nshaabona ayi shili kabotu ashitabete kabotu. Tulisuni kukonkela njiisho shakwe Yehova shiluleme. (Kulu. 119:1-3) Lyalo kwakubula kupenshekwa anjeelacaamba inga twacita citokonkelaawo ceenga catucafwa kuba alusangalalo lwancinencine.​—Milimo 23:1.

AMUBIKE KULAMBILA YEHOVA PANEMBO

13. Ino nciinshi catatu ncotweelete kucita kwaamba ayi tube alusangalalo lwancinencine? (Joni 4:23, 24)

¹³ CATATU: Amushinishe kubika kulambila Yehova panembo mubuumi bwanu. Yehova ngowakatulenga, aboobo tulyeelete kumulambila. (Ciyu. 4:11; 14:6, 7) Aboobo cintu ciyandika abuumbi mubuumi bwesu cilyeelete kuba kulambila Yehova munshila njaasuni, nkokwaamba ayi “mumushimu alimwi amulushinisho.” (Amubelenge Joni 4:23, 24.) Tulisuni kwaamba ayi mushimu usalashi wakwe Lesa unootanjilila kulambila kwesu kwaamba ayi kweendelane acancine ncetucana mu Maswi akwe. Tulyeelete kubika kulambila kwesu panembo mubuumi bwesu nabi ndyetutokala mucishi incito yesu moyakakashikwa. Pacecino ciindi bamakwesu abenankashi beendilila 100 bali mujeele ceebo cakuba Bakamboni Bakwe Yehova.c Nacibi boobo, calusangalalo balacita nsheenga bacikonsha kwaamba ayi bacikoonshe kupaila, kwiiya, akulwiitako bamwi pali Lesa wesu apa Bwaami bwakwe. Tulasangalala kwaamba ayi Yehova alatucafwa kuliyumya bantu ndyebatokwaamba shibiibi pali ndiswe na kutupensha alimwi alaakutupa cilambu.​—Jemu. 1:12; 1 Pit. 4:14.

CAKUBONENAAKO

14. Ino nciinshi cakacitikila mukwesu wacanike wakucishi ca Tajikistan, alimwi ino nceebonshi?

¹⁴ Bamakwesu abenankashi bamwi bakeenda mubukaalo buyumu abuumbi, sombi bakatolelela kuba alusangalalo lwancinencine ceebo cakukonkela shintu shotatwe nshetwabandikaawo. Amuyeeye shakacitikila mukwesu waliina lya Jovidon Bobojonov ucite myaaka 19 wakucishi ca Tajikistan wakakaka kunjila busoja. Pa 4 October, 2019, bakesa mukumunyamuna cakumukakatisha, akumutola mujeele kwa myeenshi iinji, akunoomupensha anga ngu kapondo. Makani aya akulyatililwa akashibikwa amushishi shiinji. Kwakaswa lipooti lya kwaamba ayi bakamuuma kwaamba ayi asumine kulumbila kuba musoja akufwala yunifoomu. Lyalo pesule ba kooti bakaamba ayi bakamucana amulandu aboobo bakamutola kumusumba wakupenshesha kushikila ba pulesidenti ndyebakamulekelela akumwaangulula. Paciindi ici mukwesu Jovidon ndyaakalinga kupenshekwa wakatolelela kushomeka akuba alusangalalo. Munshila nshi? Kwiinda mukutolelela kubikila maano kushintu shakumushimu.

15. Ino mukwesu Jovidon wakatolelela buyani kwiiya pali Yehova ndyaakalinga mujeele?

¹⁵ Ndyaakalinga mujeele, mukwesu Jovidon wakatolelela kwiiya pali Yehova, nabi kwaamba ayi taakalinga kucite Baibo na mabuku esu. Ano ino wakacikonsha buyani? Bamakwesu abenankashi bakalinga kumutolela shakulya akulemba lilembo lya bushiku patucoola ntobakalinga kumutolelamo shakulya. Aboobo wakalinga kucikonsha kubelenga Baibo akukutumana kuyeeyawo bushiku abushiku. Ndyaakaswa mujeele, wakayuminisha baabo batana kwiindaawo kale mumapensho anene ayi: “Cilayandika abuumbi kusebensesha kabotu lwaanguluko ndomucite kwiinda mukubelenga Maswi akwe Yehova alimwi amabuku esu kwaamba mushibe shiinji pali nguwe.”

16. Ino nciinshi mukwesu Jovidon ncaakatolelela kubikilako maano?

¹⁶ Mukwesu Jovidon wakatolelela kukonkela njiisho shakwe Yehova. Muciindi ca kunooyeeya pa lunkumbwa lutabete kabotu akukonkela mibo ibiibi, wakatolelela kubikila maano kuli Yehova apashintu Nshaabona ayi shilayandika. Wakalinga kukankamana na wabona shintu Lesa nshaakalenga mboshiboneka kabotu. Lyoonse macuunsa na wabuka wakalinga kukutika kulila kwa tuyuni. Mashiku wakalinga kulangilisha mweenshi anyenyeenshi. Wakaamba ayi: “Shipo ishi shakaswa kuli Yehova shakampa kuyuminishikwa akuba alusangalalo.” Kulumba Yehova pashintu shakumushimu alimwi ashakumubili nshaatupa, kulaakutupa kusangalala alimwi lusangalalo ulo lulaakutucafwa kuliyumya.

17. Ino maswi ngotucana palilembo lya 1 Pita 1:6, 7 inga amucafwa buyani muntu weenga walicana mubukaalo bwakeendamo mukwesu Jovidon?

¹⁷ Mukwesu Jovidon wakalinga kubika kulambila Yehova panembo. Wakalinga kucishi ayi kushomeka kuli Lesa wancine kulayandika. Yesu wakaamba ayi: ‘Ulyeelete kulambila Yehova Lesa wako alimwi akusebenselabo nguwe.’ (Luka 4:8) Bacinenenene ba bamasoja alimwi abamasoja bakalinga kusuni ayi acileeke kuba Kamboni Wakwe Yehova. Muciindi cakucita boobo, wakalinga kupaila abuumbi mashiku amalumwi kwaamba ayi Yehova amucaafwe kutolelela kushomeka. Nabi kwaamba ayi wakapenshekwa abuumbi, mukwesu Jovidon wakatolelela kushomeka. Aboobo, alicite lusangalalo mukwiinga wakaba acintu ncaatakalinga kucite kabatana kumutola cakumukakatisha, kumuuma, alimwi akumwaanga. Pacecino ciindi alicite lushomo luyumu mukwiinga lushomo lwakwe lwakeeleshekwa.​—Amubelenge 1 Pita 1:6, 7.

18. Ino nshiinshi nsheenga twaciita kwaamba ayi tutolelele kuba alusangalalo?

¹⁸ Yehova alishi nshetuyandika kwaamba ayi tube alusangalalo lwancinencine. Na mwakonkela shintu shotatwe sheenga shamupa kuba alusangalalo lwancinencine, mulaakutolelela kuba alusangalalo nabi mukalicane mubukaalo buyumu buyani. Lyalo amwebo mulaakucikonsha kwaamba maswi akaamba shikulumbaisha ayi: ‘Balisangalete baamba ayi Yehova ngo Lesa wabo!’​—Kulu. 144:15.