‘Balisangalete Abo Batacite Kampenda’ Kuli Yehova

1-2. (a) Ino mfulumeende shimwi shilabapikisha buyani basebenshi bakwe Yehova, ano ino bantu bakwe balacita buyani? (b) Ino nceebonshi inga twaba alusangalalo nabi ndyetutopenshekwa? (Amwaambe apa cikope cili papeeji yakutaanguna.)

PACECINO ciindi incito yesu yakakashikwa mushishi shiindilila 30 nsengwe yoonse. Mushishi shimwi pasheeshi, bamakwesu abenankashi bakaangwa. Ino bakacita mulandu nshi? Yehova alishi ayi taakuwo mulandu ngobakacita. Ncebacitabo nkubelenga akwiiya Baibo, kushimikila, alimwi akucanika kumabungano pomwi abashominyinaabo. Alimwi balakaka kwaabanamo lubasu mushacishi. Basebenshi bakwe Yehova bashomeka aba, batolelela kushomeka, nkokwaamba ayi batondesha ayi bakalyaaba kuli Yehova cakumaninina nabi ndyebatopikishikwa. Alimwi kucita boobo kulabapa kuba alusangalalo!

² Na mwalangilisha shikope sha Bakamboni aba bataloondi, inga mwaboona ayi batomweta mweta. Balisangalete mukwiinga balicishi kwaamba ayi Yehova alikondetwe ceebo cakushomeka kwabo. (1 Maka. 29:17a) Yesu wakaamba ayi: ‘Balisangalete abo bapenshekwa ceebo ca bululami . . . Amusangalale akukondwa mukwiinga cilambu canu ncinene.’​—Mate. 5:10-12.

CAKUBONENAAKO NCEENGA TWAKONKELA

3. Kweelana a Milimo 4:19, 20, ino batumwi bakwe Yesu bakacita buyani ndyebakapenshekwa, alimwi ino nceebonshi ncebakacitila boobo?

³ Bamakwesu abenankashi batokwiinda mumapensho mbuli akeendaamo batumwi bakwe Yesu ndyebakalinga kupenshekwa ceebo cakushimikila pali Yesu. Liinji boomboloshi bamukooti inene yaba Juda bakalinga ‘kubakasha kwiisha makani muliina lyakwe Yesu.’ (Milimo 4:18; 5:27, 28, 40) Ino batumwi bakacita buyani? (Amubelenge Milimo 4:19, 20.) Bakalinga kucishi kwaamba ayi kuli umwi ucite nkusu shiinditewo wakapa mulawo wakushimikila bantu alimwi akwaamba bumboni cakumaninina pali Klistu. (Milimo 10:42) Aboobo Pita a Joni abo bakalinga kubeemikaninaako, cakutaloonda bakaamba ayi tulyeelete kunyumfwila Lesa kuteshi boomboloshi, alimwi bakaambilisha ayi teshi bakacileeke kwaamba pali Yesu. Munshila imwi cakalingabo anga batokwiipusha boomboloshi ayi, ‘Sa mutoyeeya ayi bantu balyeelete kunyumfwila ndimwe muciindi ca kunyumfwila Lesa?’

4. Kweelana a Milimo 5:27-29, ino batumwi bakatondesha cakubonenaako ca buyani ku Beneklistu boonse bancine, alimwi ino cakubonenaako cabo inga twacikonkela buyani?

⁴ Batumwi bakatondesha cakubonenaako cibotu, Beneklistu boonse bancine ncobakonkela kuswabo kale kale. Bakalinga kushinishite “kunyumfwila Lesa, kuteshi bantu.” (Amubelenge Milimo 5:27-29.) Pesule lyakuumwa ceebo cakutolelela kushomeka, batumwi bakaswa mu kooti inene yaba Juda, ‘kabakondetwe abuumbi ceebo Lesa wakabona kwaamba ayi balyeelete kupenshekwa ceebo ca liina lyakwe Yesu,’ alimwi bakatolelela kushimikila!​—Milimo 5:40-42.

5. Ino njimiipusho nshi njotweelete kucana shikumbulo?

⁵ Cakubonenaako cakatondesha batumwi inga catupa kuliipusha miipusho. Kucakubonenaako, ino batumwi bakacikonsha buyani kunyumfwila Lesa akukonkela mulawo wamu Malembo wa “kunyumfwila beendeleshi bacishi”? (Loma. 13:1) Kweelana a mutumwi Paulo mbwakaamba, ino inga twatondesha buyani ayi tulanyumfwila mfulumeende akutolelela kushomeka kuli Lesa, Mweendeleshi wesu wiinditeewo?​—Taitasi 3:1.

“BEENDELESHI BACISHI”

6. (a) Ino “beendeleshi bacishi” baambwa pa Bene Loma 13:1 mbaani, alimwi ino ngumukuli nshi ngotucite kuli mbabo? (b) Ino nciinshi ncotushi pankusu sha beendeleshi boonse?

⁶ Amubelenge Bene Loma 13:1. Muvesi iyi, maswi akwaamba ayi “beendeleshi bacishi” atosansulula beendeleshi ba bantu abo bacite nkusu shakweendelesha bamwi. Beneklistu balyeelete kunyumfwila beendeleshi aba. Balashinisha ayi bantu batoocita shintu kweelana amulawo, kwaanisha baabo bapwaya milawo, alimwi cimwi ciindi akushitilisha bantu bakwe Yehova. (Ciyu. 12:16) Aboobo tulyeelete kulipila misonko, kubalemeka akutondesha bulemu mbobayandika. (Loma. 13:7) Nacibi boobo, mfulumeende shilicite nkusu sha kweendelesha ceebo cakwaamba ayi Yehova wakashisuminisha. Yesu wakaamba cancine ici ndyebakalinga kumwiipusha ku Mweendeleshi wa Bene Loma Pontyasi Pilato. Pilato ndyaakaamba ayi alicite nkusu sha kupulusha Yesu na kumucaya, Yesu wakamulwiita ayi: “Nootakwe kupekwa nkusu kuswa kuli baTa, naakwiinga toocite nkusu pali ndime.” (Joni 19:11) Bweenka mbocakalinga kuli Pilato, nkusu sha beendeleshi boonse abeshimapolitiki shilicite mposheela.

7. Ino mbukaalo buli buyani ndyetuteelete kunyumfwila beendeleshi, alimwi ino nciinshi ncobeelete kushiba?

⁷ Beneklistu balyeelete kunyumfwila milawo ya mfulumeende itatupi kupwaya milawo yakwe Lesa. Sombi tatweelete kunyumfwila beendeleshi na batulwiita kucita cintu cimwi Lesa ncaakasha na kusumina kucileka kucita cintu cimwi Lesa ncaakatulwiita kucita. Kucakubonenaako, mpashi inga bapa mulawo wakwaamba ayi basankwa bacanike balyeelete kwaabanamo lubasu munkondo.b Na mpashi inga bakasha Baibo, mabuku esu aamba shamu Baibo, kutukasha kushimikila, alimwi akubungana. Na beendeleshi basebensesha nkusu munshila itabete kabotu kwiinda mukupensha bashikwiiya bakwe Klistu, Lesa alaakubapa mulandu. Yehova alabona shitoocitika!​—Shiku. 5:8.

8. Ino nkusu shicite mfulumeende shilipusene buyani ankusu shicite Yehova, alimwi ino nceebonshi kushiba makani aya kulayandika?

⁸ Mfulumeende shilicite nkusu, nacibi boobo, Yehova ngoocite nkusu shiindaawo. Mankanda 4 mu Baibo, Yehova Lesa aleetwa aliswi lya bulemu lya kwaamba ayi “Wiindaawo.”​—Danye. 7:18, 22, 25, 27.

“WIINDAAWO”

9. Ino mushinshimi Danyelo wakabona nshi mu shili anga nshiloto?

⁹ Kwiinda mu shili anga nshiloto Danyelo wakabona Yehova mbwaacite nkusu kwiinda beendeleshi boonse. Cakutaanguna Danyelo wakabona banyama banene bali 4 bakalinga kwiimikaninako beendeleshi bacite nkusu abuumbi bamuciindi cakale kale mbuli buleelo bwa Babiloni, Mediya a Pesha, Gilisi, alimwi a Loma alimwi a buleelo bwa Anglo-America butokweendelesha pacecino ciindi. (Danye. 7:1-3, 17) Lyalo Danyelo wakabona Yehova kaashiite pacuuna ca boomboloshi kwiculu. (Danye. 7:9, 10) Cakakonkelawo ncaakabona mushinshimi ushomeka uyu, cilyeelete kucenjesha beendeleshi pacecino ciindi.

10. Kweelana a Danyelo 7:13, 14, 27, ino Yehova wakapa baani nkusu shakweendelesha cishi capanshi, alimwi ino ici cilatondesha nshi pali Nguwe?

¹⁰ Amubelenge Danyelo 7:13, 14, 27. Lesa wakanyaya beendeleshi nkusu akushipa kubamwi beelela alimwi bacite nkusu shiindaawo. Ino mbaani? Ku wooyo uli “anga ngumwanaamuntu,” Yesu Klistu, a “basalalite bakwe Lesa wa kwiculu Wiindaawo,” ba 144,000 abo beshi bakeendeleshe “kwalyoonse alyoonse.” (Danye. 7:18) Aboobo ici cilatondesha patuba kwaamba ayi Yehova ngo “Wiindaawo,” mukwiinga lakwe eenkabo ngoocite nkusu shakucita sheeshi.

11. Ino nciinshi cimwi Danyelo ncaakalemba citondesha ayi Yehova aliindite beendeleshi bashishi?

¹¹ Nshaakabona Danyelo mucili anga nciloto shilatondesha ayi nshaakaamba pakutaanguna ayi “Lesa wakwiculu ulabika bantu pa bwaami alimwi akubakushaawo,” nshancine. Alimwi wakalemba ayi: ‘Shinkusu shoonse ngoocite nkusu pamaleelo a bantu alimwi gooapa kubantu bali boonse mbwaasuni.’ (Danye. 2:19-21; 4:17) Sa kwakalingawo ciindi Yehova ndyaakakusha beendeleshi akubikaawo bamwi? Ncakutatoonsha!

12. Amwaambe cakubonenaako citondesha Yehova mbwaakakusha bamaami pashuuna shabo kale kale. (Amubone cikope.)

¹² Yehova watondesha patuba kwaamba ayi ngoocite nkusu kwiinda “beendeleshi bacishi.” Amuleke tubandike shakubonenaako shotatwe. Falawo Mwaami wa cishi ca Ijipiti wakalinga wabika bantu bakwe Yehova mubusha akukaka kubaangulula. Sombi Yehova wakabaangulula akupisha Falawo mulweenge Lusalala. (Kulo. 14:26-28; Kulu. 136:15) Muciindi cakulumbaisha Yehova, mwaami Beloshasa wakucishi ca Babiloni ndyaakalinga kucite kusekelela “wakalisumpula akulwana Mwaami Lesa wakwiculu” alimwi “akulumbaisha balesa ba silifa alimwi aba golodi.” (Danye. 5:22, 23) Sombi Lesa wakalensha nsoni musankwa ulisumpula uyu. “Mashiku eenka ayo,” Beloshasa wakacaikwa alimwi bwaami bwakwe bwakapekwa kubene Mediya a Pesha. (Danye. 5:28, 30, 31) Mwaami Elodi Agilipa I wakucishi ca Palestine wakalengesha mutumwi Jemusi kucaikwa alimwi akubika mutumwi Pita mujeele, kwaamba ayi alakwe akacaikwe. Sombi Yehova wakapa kwaamba ayi Elodi nshaakalinga kusuni kucita shitacitiki. “Munjelo wakwe Yehova wakamuuma,” aboobo wakafwa.​—Milimo 12:1-5, 21-23, NWT.

13. Amwaambe cakubonenaako citondesha Yehova mbwaakakoma makoto abeendeleshi.

¹³ Yehova wakacitawo kale shitondesha ayi alicite nkusu pamakoto abeendeleshi boonse. Wakacafwa bene Isilaeli akupa kwaamba ayi bacikoonshe kukoma shishi 31 sha bamaami ba bene Kenani akunyaya misena inene yamu Cishi Cakashomeshekwa. (Joshu. 11:4-6, 20; 12:1, 7, 24) Alimwi Yehova wakacafwa bene Isilaeli kukoma Mwaami Ben-hadadi alimwi abamaami bamwi ba bene Silya bali 32.​—1 Baam. 20:1, 26-29.

14-15. (a) Ino Mwaami Nebukadinesa a Dalyasi bakaamba nshi pa bweendeleshi bwakwe Yehova? (b) Ino shikulumbaisha wakaamba nshi pali Yehova a bantu Bakwe?

¹⁴ Yehova lyoonsebo alacita shintu shitondesha kwaamba ayi ngu Lesa Wiindawo! Muciindi cakuliceesha akusuminisha ayi Yehova ngoweelela kulumbaishikwa, Mwaami Nebukadinesa waku Babiloni wakalinga kulisumpula pankusu nshaakalinga kucite alimwi abulemu mbwaakalinga kupekwa. Aboobo Lesa wakamucinkusha. Ndyaakaba kabotu, Nebukadinesa “wakalumbaisha Lesa wa kwiculu Wiindaawo” alimwi akusumina ayi ‘buleelo bwakwe [Yehova], mbuleelo bwamuyayaya.’ Wakatolelela akwaamba ayi: “Taaku muntu weenga wamukasha kucita cintu.” (Danye. 4:30, 33-35) Pesule lyakwaamba ayi kushomeka kwakwe Danyelo kweeleshekwa alimwi Yehova wamupulusha kuswa mucilindi ca nkalamu, Mwaami Dalyasi wakaambilisha ayi: “Muntu womwi awomwi ulyeelete kuloonda akulemeka Lesa wakwe Danyelo. Lakwe ngoLesa muumi weshi akabeeko kwalyoonse alyoonse. Bwaami bwakwe teshi bukanyonyoolweewo alimwi bulelo bwakwe teshi bukamaneewo.”​—Danye. 6:7-10, 19-22, 26, 27.

¹⁵ Shikulumbaisha wakaamba ayi: ‘Yehova ulanyonyonganya miyeeyo ya bantu bakunsengwe; ee, ulalengesha bantu abo kubula kucita miyeeyo njebaamba.’ Alimwi wakaamba ayi: ‘Ulicite coolwe mushobo ucite Yehova ayi ngo Lesa wabo, ncakwiila mushobo wa bantu abo mbwaakasala ayi mbaakwe.’ (Kulu. 33:10, 12) Ici nceebo cibotu ceelete kutupa kutolelela kushomeka kuli Yehova!

INKONDO YAKWEELAAKO

16. Ino nciinshi nceenga twashoma cakutatoonsha pamakani a “mapensho anene,” alimwi ino nceebonshi? (Amubone cikope.)

¹⁶ Twabelenga Yehova nshaakacita kale kale. Ino nshiinshi nshetutolangila kucitika kunembo? Inga twashoma cakutatoonsha kwaamba ayi alaakupulusha basebenshi bakwe bashomeka paciindi ca “mapensho anene.” (Mate. 24:21, NWT; Danye. 12:1) Alaakucita boobo paciindi ndyeshi Gogi wa mucishi ca Magogu na kubungana pomwi kwashishi nsengwe yoonse kwaamba ayi shilwane baabo bashomeka kuli Yehova. Nabi kwaamba ayi likoto ili likabe lya shishi 193 shibete lubasu lwa libunga lya United Nations, teshi likacikoonshe kulwana Wiindaawo alimwi alikoto lya kwiculu lya bashilumamba bakwe! Yehova washomesha ayi: ‘Ndaakutondesha mishobo yoonse ayi ndalemekwa alimwi ayi ndisalalite pameenso abo. Lyalo ndyeshi bakeshibe ayi nebo ndime Yehova.’​—Esek. 38:14-16, 23; Kulu. 46:10.

17. Ino Baibo ilaamba ayi nciinshi ceshi cikacitikile bamaami ba mucishi ca panshi alimwi abaabo batolelela kushomeka kuli Yehova?

¹⁷ Kulwana bantu bakwe Lesa kwakwe Gogi kulaakusonkomona nkondo ya Amagedoni, Yehova ndyeshi akanyonyoole “bamaami boonse ba mucishi ca panshi.” (Ciyu. 16:14, 16; 19:19-21) Lyalo ‘baluleme beenkabo mbweshi bakekale mucishi, abatacite tumpenda mbweshi bakanookalaamo.’​—Tus. 2:21.

TULYEELETE KUTOLELELA KUSHOMEKA

18. Ino Beneklistu baanji bancine balalyaaba kucita nshi, alimwi ino nceebonshi? (Danyelo 3:28)

¹⁸ Kuswabo kale kale, Beneklistu baanji bancine balabika buumi bwabo mumapensho ceebo ca lusuno lwabo pali Yehova mbuli Mweendeleshi wabo. Mbantu bashinishite kutolelela kushomeka kuli Yehova. Bali mbuli bene Ebulu botatwe bakalinga kushinishite kutolelela kushomeka kuli Lesa Wiindaawo, uyo wakesa mukubapulusha kuswa mumulilo ubilima.​—Amubelenge Danyelo 3:28.

19. Ino Yehova alaakuboombolosha buyani bantu bakwe, alimwi ino nciinshi ncotweelete kucita?

¹⁹ Shikulumbaisha Defedi wakaamba kutolelela kushomeka kuli Lesa mbokuyandika ndyaakalemba ayi: ‘Mwebo muloombolosha mishobo yoonse. Amuŋomboloshe kweelana akululama kwangu no Yehova, ee, kweelana akubula kampenda kwangu mwebo noMwiindaawo.’ (Kulu. 7:8) Alimwi Defedi wakalemba ayi: “Kushomeka kwangu abululami bwangu shimfuune.” (Kulu. 25:21) Kutolelela kushomeka kuli Yehova nabi twiinde mubukaalo buli buyani njenshila ibotu ya buumi! Lyalo tulaakulinyumfwa mbuli shikulumbaisha wakalemba ayi: ‘Balisangalete abo batacite kampenda, abo bacita kweelana amilawo yakwe Yehova.’​—Kulu. 119:1.