Sa Mulilibambite Kunjila Mucishi Cipya?

SOONSE tutolangila kukumanishikwa kwa cishomesho cakwe Yesu ncaakaamba ayi: ‘Balisangalete abo balibombya, mukwiinga Lesa alaakubapa cishi ncaakabashomesha.’ (Mate. 5:5) Bananikitwe balaakupekwa cishi capanshi kwiinda mukweendelesha mbuli bamaami kwiculu pomwi a Yesu. (Ciyu. 5:10; 20:6) Beneklistu bancine baanji batolangila kukala buumi bwamuyayaya pacishi capanshi. Balaakuba bamaninite, basangalete, akukala muluumuno. Kwaamba ayi ici cikakonsheke, Balaakuba anciito iyandika. Kucakubonenaako, balaakucafwilisha kwaalula cishi capanshi kuba paladaiso, balaakucafwa beshi bakabushikwe kuba ashiyandika, alimwi akubaiisha. Amuyeeye nsheenga mwaciita pacecino ciindi kwaamba ayi mutondeshe ayi mulisuni kucita shintu ishi mucishi cipya.

SA MULILIBAMBITE KWAALULA CISHI KUBA PALADAISO?

Yehova ndyaakapa muntu mulawo wakwaamba ayi “amushalane akususha cishi capanshi,” wakatondesha kwaamba ayi cishi coonse cilaakuba paladaiso mukuya kwaciindi. (Mata. 1:28) Abo beshi bakekale kwamuyayaya balaakuyandika kukonkela mulawo uyu. Cishi teshi cikashikilebo kuba paladaiso mukwiinga taakuwo muunda wa Edeni. Amagedoni yaakumanabo kulaakuba ncito yakubotesha misena yacishi capanshi yakanyonyoolwa. Iyi ilaakuba ncito inene abuumbi!

Ici cilatwiibalusha ncito bene Isilaeli njobakalinga kucite ndyebakaboolela kucishi cinemishaabo kuswa ku Babiloni. Cishi cinemishaabo cakalinga matongo kwa myaaka 70. Sombi Isaya wakaamba ayi kwiinda mulucafwo lwakwe Yehova, cishi cilaakuboteshekwa alimwi. Maswi abushinshimi ubu akaamba ayi: ‘Ndaakucilengesha kuba anga mu Edeni, ncakwiila cilaakusandulwa kuba anga ngumuunda wakwe Yehova.’ (Isa. 51:3) Yehova wakacafwa bene Isilaeli kubotesha cishi cinemishaabo. Aboobo kwiinda mulucafwo lwakwe Yehova, abo beshi bakenjile mucishi cipya balaakucikonsha kucaalula kuba paladaiso. Alimwi kuli shintu nsheenga mwaciita pacecino ciindi kwaamba ayi mutondeshe ayi mulisuni kwaabanamo lubasu muncito yakubotesha cishi kunembo.

Nshila yomwi nkwiinda mukusebensa cankusu kulama kabotu abuumbi pamusena mpomukala. Inga mwacita boobo nabi kwaamba ayi abo mbomubambeneabo mbayamba. Alimwi inga mwalyaaba kucafwilisha kubotesha akubamba Ŋanda ya Bwaami na musena nkomucitila kubungana kunene. Na bukaalo bwanu kabusuminisha inga mwalyaaba kucafwilisha muncito yakupa lucafwo paciindi ndyekwacitika mapensho anene. Kucita boobo kulatondesha ayi mulilibambite kucafwa bamakwesu abenankashi na kwayandika lucafwo. Mpashi inga mweeyako lushibo lumwi ndweenga mwasebensesha na Yehova akamusuminishe kukala kwamuyayaya pacishi capanshi.

Bamakwesu abenankashi batobotesha Ŋanda ya Bwaami.

SA MULILIBAMBITE KUCAFWA BAABO BESHIBAKABUSHIKWE?

Yesu ndyaakabushabo mwanaakwe Jailosi mwanakashi, wakaamba ayi mwanike bamupe cakulya. (Maako 5:42, 43) Mpashi cakalinga cuubu kulama mwanike mwanakashi uyu wakalinga kucitebo myaaka 12. Nacibi boobo, amuyeeye kukomena kwa ncito njeshi tukayandike kucita Yesu ndyeshi akabushe bafu boonse. (Joni 5:28, 29) Nabi kwaamba ayi Baibo tayaambi makani oonse, ncakutatoonsha kwaamba ayi abo beshibakabushikwe balaakuyandika kubacafwa kucana shakulya, kwakukala, alimwi ashakufwala. Kuli shintu shiniini nsheenga mwaciita pacecino ciindi kwaamba ayi mutondeshe ayi mulisuni kuba balibambite kucafwa bamwi.

Ino nshiinshi nsheenga mwaciita pacecino ciindi kwaamba ayi mutondeshe ayi mulilibambite kunjila mucishi cipya?

Bamakwesu abenankashi basangalete batolindila kutambula beensu batoosa kukubungana kunene kwa baabo bakaswa mushishi ku Paris.

Na boolobesha kulibungano ayi mulaakuba akufwakasha kwa mutanjilili walubasu, sa mulalyaaba kumwiitako kucakulya? Na abo bakalinga muncito yaciindi coonse baswa pa Bethel akulongela kumusena kumishaanu nabi na abo bakalinga kusebensa muncito yalubasu baswa muncito iyo, sa inga mwalyaaba kubacafwa kucana kwakukala? Na kumusena nkomukala nkweshi kukabete kubungana kunene na kulibetele, sa inga mwalyaaba kucafwilisha muncito shicitwa kubungana kunene kakutana kutalika na pesule lyakubungana? Na sa inga mwalyaaba kuya mukutambula beensu batoosa kukubungana?

AMUBE BALIBAMBITE KWIISHA BESHIBAKABUSHIKWE

Ceebo ca makani aambwa palilembo lya Milimo 24:15, inga twalangila ayi bantu baanji abuumbi balaakubushikwa. Baanji balaakuba baabo batana kubawo acoolwe cakwiiya pali Yehova kabatana kufwa. Bulaakuba acoolwe ici na bakabushikwe.a Basebenshi bakwe Lesa bashomeka alimwi bacite lushibo balaakucafwilisha muncito yakwiisha. (Isa. 11:9) Ishi nshaatolangila nankashi waliina lya Charlotte uyo washimikila ku Europe, South America, alimwi amu Africa. Cakukondwa wakaamba ayi: “Ntolangila kwiisha baabo beshibakabushikwe. Na ndabelenga makani aamba sha muntu umwi wakalingaako kale kale, lyoonse ndayeeya ayi: ‘Uyu muntu naakwiinga wakeeya pali Yehova, naakwiinga buumi bwakwe bwakaaluka.’ Ntolangila kulwiita beshibakabushikwe pali Yehova alimwi ambweenga kusebensela Yehova kwabacafwa mubuumi bwabo.”

Basebenshi bashomeka bakwe Yehova bakekalaako paciindi Yesu kaatana kusa pacishi capanshi abalo balaakuyandika kwiiya shiinji. Amuyeeyebo mbweshi cikabe coolwe cinene alimwi cisangalasha kusansulwita Danyelo bushinshimi mbwaakalemba kwakubula kubunyumfwishisha mbobwakakumanishikwa. (Danye. 12:8) Alimwi amuyeeyebo mbweshi cikabe kucafwa Lute a Naomi kushiba kwaamba ayi Mesiya wakashalilwa mulunyungu lwabo. Cilaakuba cintu cisangalasha abuumbi kwaabanamo lubasu muncito yakwiisha nsengwe yoonse, kwakubula kupikishikwa alimwi akupilinganishikwa acishi cibiibi!

Nankashi atokwaabila mwanakashi ka tilakiti.

Ino nshiinshi nsheenga mwaciita pacecino ciindi kwaamba ayi mube balibambite kucafwa beshi bakabushikwe? Nshila yomwi nkweelesha cankusu kuya panembo mukwiisha kwanu akwaabanamo lubasu muncito yakushimikila lyoonse. (Mate. 24:14) Nabi kwaamba ayi pacecino ciindi tamutoocikonsha kusebensa kweelana ambweenga mwasuuna ceebo ca kukula na bukaalo bumwi, inga mwatondesha kwaamba ayi mulisunishishi kwiisha baabo beshibakabushikwe kwiinda mukucita shoonse nsheenga mwacikonsha muncito yakushimikila.

Cili kabotu kuyeeya pamiipusho iyi iyandika: Sa ncakwiila mutoolangila kukala buumi bwamuyayaya pacishi capanshi? Sa mulikondetwe kulangila kukala mucishi cipya, kutambula alimwi akwiisha baabo beshibakabushikwe? Inga mwacita shitondesha kwaamba ayi mwalibambila kukala kwamuyayaya pacishi capanshi kwiinda mukusebensako ncito sheelene asheesho nsheshi mukasebense na mukenjile mucishi cipya!

a Amubone Njashi Yamulindilishi ya September 2022 pamutwi utokwaamba ayi ‘Kutanjilila Bantu Baanji Kubululami.’