Amwikale Kamulibambite Ndyemutolindila Bushiku Bwakwe Yehova

1. Ino nciinshi ncotweelete kucita kwaamba ayi tukapuluke bushiku bwakwe Yehova?

NA BAIBO yaamba pa “bushiku bwakwe Yehova,” ilaamba paciindi Yehova ndyeshi akanyonyoole balwani bakwe akupulusha bantu bakwe. Kale kale, Yehova wakaanishawo bantu bamwi. (Isa. 13:1, 6; Esek. 13:5; Sefa. 1:8) Munshiku shino, “bushiku bwakwe Yehova” bulaakutalika paciindi mfulumeende ndyeshi shikalwane Babiloni munene alimwi bulaakutolelela kushikila apa nkoondo ya Amagedoni. Cino ncociindi ndyetweelete kulibambila kwaamba ayi tukapuluke “bushiku” ubu. Alimwi Yesu wakaamba ayi tulyeelete ‘kwikala katulibambite’ ndyetutolindila “mapensho anene.”​—Mate. 24:21; Luka 12:40.

2. Ino nceebonshi lilembo lya 1 Bene Tesalonika inga lyatucafwa?

² Munkalata yakutaanguna mutumwi Paulo njaakalembela Beneklistu baku Tesalonika, wakasebensesha shikoshanyo shipusenepusene kwaamba ayi abacaafwe kwikala kabalibambite ndyebakalinga kulindila kusa kwa bushiku bunene bwa boomboloshi bwakwe Yehova. Paulo wakalinga kucishi kwaamba ayi bushiku bwakwe Yehova teshi bukese paciindi ndyaakabalembela nkalata. (2 Tesa. 2:1-3) Nacibi boobo, wakayuminisha bashominyina kulibambila kusa kwa bushiku ubu anga bulaakusa ciilo. Alimwi makani ngaakabalembela inga atucafwa aswebo. Amuleke tubandike nshaakaamba pamakani atokonkelaawo: (1) bushiku bwakwe Yehova mbweshi bukese, (2) beshi bakabule kupuluka bushiku ubu, alimwi (3) nsheenga twaciita kwaamba ayi tulibambile kupuluka bushiku ubu.

INO BUSHIKU BWAKWE YEHOVA BULAAKUSA BUYANI?

3. Ino bushiku bwakwe Yehova bulaakusa buyani anga ngu mwiipi mashiku? (Amubone acikope.)

³ “Bweenka mwiipi mbweesa mashiku.” (1 Tesa. 5:2) Ici ncikoshanyo cakutaanguna pashikoshanyo shotatwe Paulo nshaakaamba kusansulula kusa kwa bushiku bwakwe Yehova. Liinji mwiipi alesa mashiku bantu ndyebatatomulangila, alimwi alacita shintu cakufwambaana. Abwalo bushiku bwakwe Yehova bulaakusa cakuteengashila alimwi bantu baanji balaakukankamana. Nabibo Beneklistu bancine mpashi balaakukankamana shintu mbweshi shikanoocitika cakufwambaana. Sombi swebo tulaakupuluka mubupusano abamucita shibiibi abo beshi bakanyonyoolwe.

4. Ino bushiku bwakwe Yehova buli buyani anga ngu mwanakashi mbwaanyumfwa kucisa na mumala mwabuka?

⁴ “Bweenka mbuli mwanakashi mbwaanyumfwa kucisa na mumala mwabuka.” (1 Tesa. 5:3) Mwanakashi uli pakati taashibi ciindi ciine ndyeshi akatumbuke. Nacibi boobo, alashoma cakutatoonsha ayi cilaakushika. Na ciindi ico cashika, cakuteengashila mumala mulatalika kucisa abuumbi kushikila watumbuka. Aswebo tatucishiwo bushiku nabi ciindi bushiku bwakwe Yehova ndyeshi bukatalike. Nacibi boobo, tulishomete ayi bulaakusa alimwi Lesa alaakoombolosha bamucita shibiibi cakufwambaana alimwi taaku mucita shibiibi weshi akapuluke.

5. Ino nceebonshi mapensho anene ali anga nkumuyamaca?

⁵ Bweenka mbuli kumuyamaca. Mucikoshanyo catatu Paulo ncakaamba, alimwi wakaamba pa beepi abo besa mukwiipa mashiku. Sombi citooboneka ayi paciindi ici Paulo wakakoshanisha bushiku bwakwe Yehova kumuyamaca. (1 Tesa. 5:4) Bantu beepa mashiku, cimwi ciindi balabikila maano abuumbi ku kwiipa cakwaamba ayi balalubaako aciindi mbocitokweenda. Na babula kucenjela inga bwaca cakwaamba ayi bantu inga babacanikisha kabeepa. Aalo mapensho anene alaakubacanikisha abo bali anga mbeepi, nkokwaamba ayi abo batolelela kucita shintu Lesa nshaapatite. Mubupusano ambabo, inga twalibambila kusa kwa bushiku bwakwe Yehova kwiinda mukuleya kucita shintu Yehova nshaapatite akutolelela kucita ‘shintu shoonse shibotu, shiluleme alimwi shalushinisho.’ (Efe. 5:8-12) Lyalo Paulo wakaamba shikoshanyo shobilo shikoshenye kusansulula bantu abo beshi bakabule kupuluka.

INO MBAANI BESHI BAKABULE KUPULUKA BUSHIKU BWAKWE YEHOVA?

6. Ino nceebonshi bantu baanji bali anga balilete? (1 Bene Tesalonika 5:6, 7)

⁶ “Abo boona.” (Amubelenge 1 Bene Tesalonika 5:6, 7.) Paulo wakakoshanisha bantu beshi bakabule kupuluka bushiku bwakwe Yehova kubantu abo balete. Tabashibiwo shicitika na ciindi mbocitokweenda. Aboobo tabashibiwo shintu shiyandika ndyeshitoocitika na kucitaawo comwi pesule lyakwaamba ayi shintu isho shacitika. Bantu baanji munshiku shino bali anga balilete. (Loma. 11:8) Balakaka kushoma bumboni butondesha ayi tutookala “munshiku shakweelaako” alimwi ayi mapensho anene alaakutalika conoono. Na shintu shimwi shaaluka abuumbi mucishi, bantu bamwi balasuna kukutika kumakani a Bwaami. Nacibi boobo, baanji balasalawo kucita boobo kwaciindi ciniinibo lyalo akutolelela kuba anga mbantu balete. Nabibo bantu bamwi bashoma ayi bushiku bwaboomboloshi bulaakusa, balayeeya ayi bucili kulaale abuumbi. (2 Pit. 3:3, 4) Nacibi boobo, cilayandika abuumbi kwaamba ayi bushiku abushiku, twatolelela kuba balibambite.

7. Ino nceebonshi bantu abo Lesa mbweshi akanyonyoole bali anga mbantu abo bakolwa?

⁷ “Abo bakolwa.” Mutumwi Paulo wakakoshanisha bantu abo Lesa mbweshi akanyonyoole, ku bacakolwa. Bantu bakoletwe balacelwa kucitawo comwi pashintu shitoocitika pamusena apo mpobabete, alimwi balaalilwa kusalawo kabotu shakucita. Abalo bamucita shibiibi tabacitiiwo comwi na banyumfwa kucenjesha kwakwe Lesa. Balasalawo kucita shintu sheshi shikape kwaamba ayi bakanyonyoolwe. Sombi Beneklistu balayuminishikwa kutolelela kuba bacenjete. (1 Tesa. 5:6) Muntu umwi wakeeya makani amu Baibo wakaamba ayi, “muntu ucenjete ngu muntu utolelela kukalikana alimwi utalisukami. Alimwi alayeeya kabotu kwaamba ayi asaleewo kabotu shakucita.” Ino nceebonshi tulyeelete kutolelela kuba bacenjete akukalikana? Kwaamba ayi tutanokwaabanamo lubasu mushamapolitiki amushintu shimwi shitoocitika mucishi. Bushiku bwakwe Yehova ndyebutooya cisena pafwiifwi, tunanokakatishikwa abuumbi kwaabanamo lubasu mushintu ishi. Nacibi boobo, tatweelete kulisukama ansheshi tukacite. Mushimu wakwe Lesa inga watucafwa kuba bacenjete, kukalikana mumiyeeyo akusala kabotu shakucita.​—Luka 12:11, 12.

INO INGA TWACITA BUYANI KWAAMBA AYI TULIBAMBILE KUSA KWA BUSHIKU BWAKWE YEHOVA?

8. Ino njimibo nshi yaambwa pa 1 Bene Tesalonika 5:8 yeenga yatucafwa kutolelela kuba balibambite akuba bacenjete? (Amubone acikope.)

⁸ Amufwale ‘cakulishitilisha ca ceela ca pacaamba a cimpoompo.’ Paulo wakatukoshanisha ku bashilumamba abo balibambite alimwi bafwete shakufwala sha nkoondo. (Amubelenge 1 Bene Tesalonika 5:8.) Bantu balalangila shilumamba kuba ulibambite kulwana paciindi cili coonse na kuli nkoondo. Ubu mbocibete akulindiswe. Tulatolelela kuba balibambite kusa kwa bushiku bwakwe Yehova kwiinda mukufwala cakulishitilisha ca pacaamba ca lushomo alusuno, alimwi a cimpoompo cakulangila. Mibo iyi inga yatucafwa abuumbi.

9. Ino kuba alushomo kulatushitilisha buyani?

⁹ Cakulishitilisha ca ceela ca pacaamba, cakalinga kushitilisha moyo wakwe shilumamba. Kuba alushomo alimwi alusuno kulatucafwa kushitilisha moyo wesu wacikoshanyo. Alimwi mibo iyi ilaakutucafwa kutolelela kusebensela Yehova akukonkela cakubonenaako cakwe Yesu. Kuba alushomo kulatucafwa kushoma ayi Yehova alaakutupa cilambu ceebo cakumuyandoola amoyo wesu woonse. (Ebu. 11:6) Alimwi kuba alushomo kulaakutucafwa kutolelela kushomeka kuli Yesu mutanjilili wesu nabi ndyetutokwiinda mumapensho. Inga twayumya lushomo lwesu kwaamba ayi tucikoonshe kuliyumya ndyetutokwiinda mumapensho, kwiinda mukwiiya kushakubonenaako sha munshiku shino shabaabo bakatolelela kushomeka nabi ndyebakalinga kupenshekwa na kwiinda mulipenshi lya kubula maali. Alimwi inga twaleya koose kakusunishisha shintu shakumubili kwiinda mukukonkela cakubonenaako ca baabo bakasalawo kukala buumi bwakutalila shiinji kwaamba ayi babike sha Bwaami panembo.b

10. Ino kusuna Lesa abantu kulatucafwa buyani kutolelela kushimikila?

¹⁰ Alimwi tulayandika kuba alusuno kwaamba ayi tutolelele kuba balibambite akuba bacenjete. (Mate. 22:37-39) Kusuna Lesa kulatucafwa kutolelela kushimikila nabi ndyetutokwiinda mumapensho. (2 Timo. 1:7, 8) Tulatolelela kushimikila bantu bakumusena nkotukala mukwiinga tulibasuni. Alimwi cimwi ciindi tulabashimikila kwiinda mukubalembela makalata na kubatumina fooni. Alimwi tulatolelela kulangila ayi bantu abo inga baaluka akutalika kucita shintu shiluleme.​—Esek. 18:27, 28.

11. Ino kusuna bamakwesu abenankashi kulatucafwa buyani? (1 Bene Tesalonika 5:11)

¹¹ Kwiilikaawo, tulibasuni bamakwesu abenankashi. Tulatondesha ayi tulisunene kwiinda “mukuyuminishanya akuyakana.” (Amubelenge 1 Bene Tesalonika 5:11, NWT.) Aswebo tulayuminishanya bweenka bashilumamba bali kulubasu lomwi mbobacafwana munkoondo. Ncakwiila, shilumamba umwi inga wacisa mubye ndyebali munkoondo, sombi inga taaciti boobo cakashanga. Aswebo inga tatukalashi bamakwesu abenankashi cakashanga na kuboosha cibiibi pacibiibi. (1 Tesa. 5:13, 15) Alimwi tulatondesha lusuno kwiinda mukulemeka bamakwesu batanjilila mulibungano. (1 Tesa. 5:12) Paulo ndyaakalemba nkalata iyi, kapatana kwiinda amwaaka kuswa ciindi libungano lyaku Tesalonika ndyelyakatalika. Cilyeelete kwaamba ayi bamakwesu bakalinga kutanjilila tabakalinga kucishi shiinji alimwi mpashi kuli shimwi nshobatakalinga kucita kabotu. Nacibi boobo, bakalinga kuyandika kunoolemekwa kubashominyinaabo. Mapensho anene ndyatooya cisena pafwiifwi, mpashi tulaakunootambula butanjilishi kuswa kubamanene kwiinda ambocibete pacecino ciindi. Mpashi teshi tukanootambula butanjilishi kuswa ku bamakwesu baku maofesi anene alimwi abaku musampi; aboobo cilayandika abuumbi kwiiya kusuna akulemeka bamanene pacecino ciindi. Tacicite mulandu asheenga shacitika, atutolelele kuba bacenjete akutabikila maano kushilubo shabo, mukwiinga Yehova atosebensesha Yesu kutanjilila basankwa aba bashomeka.

12. Ino kulangila kwesu kulashitilisha buyani miyeeyo yesu?

¹² Bweenka cimpoompo mbocakalinga kushitilisha mutwi wakwe shilumamba, kulangila kwesu kwa kwaamba ayi tulaakupuluka kulashitilisha miyeeyo yesu. Kulangila kwesu kulatucafwa kushiba ayi shintu shamucishi cino taakuwo mboshibete. (Filip. 3:8) Kulangila kwesu kulatucafwa kutolelela kukalikana akuba balibambite. Ubo mbocakalinga kuli ba Wallace aba Laurinda, abo basebensela mu Africa. Munsondo shotatwebo, ba Wallace bakafwitwa baishiwabo lyalo ba Laurinda bakafwitwa banyinawabo. Ceebo ca bulwashi bwa COVID-19, bakaalilwa kuya kumishaabo kwaamba ayi baye babe pomwi amikwashi yabo. Ba Wallace bakalemba ayi: “Kulangila kubushikwa kwa bafu kulancafwa kuyeeya mbweshi bakanooboneka na bakabushikwe mucishi cipya, kuteshi mbobakalinga kuboneka kabatana kufwa. Kulangila uku kulancafwa kukalikana mumiyeeyo na ndalinyumfwa buumba nabi kusowekelwa.”

13. Ino inga twacita buyani kwaamba ayi tutambule mushimu usalashi?

¹³ “Mutakashi ncito ya mushimu usalashi.” (1 Tesa. 5:19) Paulo wakaamba ayi mushimu usalashi ulatucafwa. Na twabula kukasha ncito ya mushimu usalashi, tulaakusunishisha kunoocita shintu shiluleme alimwi akuba ankusu shakusebensela Yehova. (Loma. 12:11) Ino inga twacita buyani kwaamba ayi tutambule mushimu usalashi? Inga twapaila kuli Lesa kwaamba ayi atupe mushimu wakwe usalashi, kubelenga Maswi akwe alimwi akuba lubasu lwa libunga lyakwe. Kucita boobo kulaakutucafwa kuba a “shisepo sha mushimu usalashi.”​—Gala. 5:22, 23.

14. Ino nshiinshi nshotweelete kuleya kwaamba ayi tutolelele kutambula mushimu usalashi wakwe Lesa? (Amubone acikope.)

¹⁴ Na Lesa watupa mushimu usalashi tulyeelete kucenjela kwaamba ayi ‘tutakashi ncito ya mushimu usalashi.’ Lesa alapabo mushimu wakwe usalashi kubaabo batolelela kuyeeya pashintu shili kabotu alimwi bacita shintu shibotu. Inga taatoleleliiwo kutupa mushimu wakwe usalashi na katuyeeya pashintu shitabete kabotu, akunoocita shintu isho. (1 Tesa. 4:7, 8) Alimwi kwaamba ayi tutolelele kutambula mushimu usalashi ‘tatweelete kusebanya makani abushinshimi.’ (1 Tesa. 5:20) Muvesi iyi liswi lyakwaamba ayi “bushinshimi,” lilasansulula makani Yehova ngaatulwiita kwiinda mumushimu wakwe usalashi, kwiilikaawo amakani aamba pa bushiku bwakwe Yehova alimwi anshiiku shino shakweelaako nshetutokalaamo. Tatuyeeyi ayi bushiku bwakwe Yehova buli kulaale alimwi ayi Amagedoni ilaakusa katuli twafwa kale. Muciindi cakucita boobo, tulatondesha ayi bushiku bwakwe Yehova bulaakusa conoono kwiinda mukunoocita shintu shibotu akutolelela ‘kusebensela Lesa cakulyaaba.’​—2 Pit. 3:11, 12.

“AMUSHINISHE SHINTU SHOONSE”

15. Ino nshiinshi nsheenga twaciita kwaamba ayi tuleye kucenjeekwa kumakani akubeca bantu ngobaamba alimwi amakani atanjililwa ashibanda? (1 Bene Tesalonika 5:21)

¹⁵ Conoonobo abo bapikisha Lesa mpashi balaakwaambilisha ayi: “Luumuno akuliiba!” (1 Tesa. 5:3, NWT) Bantu baanji balaakucenjeekwa kumakani atanjililwa ashibanda ayo eshi akasulebo cishi coonse. (Ciyu. 16:13, 14) Sa aswebo tulaakucenjeekwa? Teshi tukacenjeekwe na ‘twashinisha shintu shoonse.’ (Amubelenge 1 Bene Tesalonika 5:21, NWT.) Liswi lya mu ciGiliki lyakasansululwa ayi “amushinishe,” lyakalinga kusebenseshekwa kusansulula mbobakalinga kweelesha mabwe mbuli golodi na silifa kwaamba ayi bashibe na ngancinencine. Aboobo tulayandika kweelesha kwaamba ayi tushinishe na nshetunyumfwa anshotubelenga nshancine. Kucita boobo kwakalinga kuyandika ku bene Tesalonika alimwi kulaakuyandika abuumbi kuli ndiswe bunene bunene mapensho anene ndyaatoya cisena pafwiifwi. Muciindi cakushomabo makani ali woonse ngotwanyumfwa, tulyeelete kubona na makani ayo ngotwabelenga na kunyumfwa atokweendelana a Baibo nshoyaamba alimwi a libunga lyakwe Yehova nsholyaamba. Kucita boobo kulaakutucafwa kutacenjeekwa amakani akubeca ayo atanjililwa ashibanda.​—Tus. 14:15; 1 Timo. 4:1.

16. Ino nkulangila nshi nkotucite, alimwi ino nciinshi ncotushinishite kucita?

¹⁶ Tulicishi kwaamba ayi bantu bakwe Yehova balaakupuluka mapensho anene. Nacibi boobo, womwi awomwi wandiswe taacishiiwo sheenga shacitika ciilo. (Jemu. 4:14) Sombi tulaakutambula buumi butamaani na twatolelela kushomeka, inga caba ayi mapensho anene alaakucana twafwa kale nabi katucili boomi. Bananikitwe balaakuba pomwi a Klistu kwiculu. Bambelele shimwi balaakuba mu paladaiso pacishi. Aboobo soonse atutolelele kubikila maano kukulangila kubotu nkotucite akwikala katulibambite ndyetutolindila bushiku bwakwe Yehova!