Ba Hulda Bakacikonsha Kukumanisha Nshobakalinga Kusuni Kucita
MYAAKA iniini yainda, kwakalinga benankashi botatwe bakalinga kukala pa nsumbu iniini iitwa ayi Sangir Besar mucishi ca Indonesia. Benankashi aba bakalinga kusebensela pomwi pa nsumbu iyi. Bakalinga kushibikitwe abuumbi pa nsumbu iyi ceebo ca ncito yabo yakucafwa bantu kwiiya cancine camu Baibo. Sombi kwakalinga ciindi cimwi ndyebakalinga kusebensa ncito imwi ipuseneeko.
Insumbu ya Sangir Besar kumatwa lya cishi ca Indonesia
Citaanshi bakalinga kunjila mulweenge mukubwesa mabwe anene. Mabwe amwi akalinga anene mbuli boola. Cabili, benankashi aba bakalinga kukala panshi patuuna tuniini akutalika kupwaya mabwe kusebensesha nsando. Lyalo bakalinga kubwesa tumabwe tuniini ntobapwaya akutubika mu tumabaketi akutantaato muŋanda yapeculu mobakalinga kukala. Pesule bakalinga kubika tumabwe uto mumasaka anene ayo akalinga kutolwa amyotoka inene kuya mukusebenseshekwa muncito yakupanga maloodi.
Ba Hulda batobwesa mabwe mweela lweenge
Nankashi womwi pabenankashi aba ngu Hulda. Lakwe wakalinga kucikonsha kusebensako ciindi cilaamfu muncito iyi kwiinda bamwi. Liinji maali oonse ngaakalinga kucana muncito iyi akalinga kusebenseshekwa kuula shiyandika sha mukwashi wakwe. Nacibi boobo, paciindi ici kwakalinga cimwi ncaakalinga kusuni kuula. Wakalinga kusuni kuula tabuleti kwaamba ayi anoocikonsha kusebensesha JW Library® appu. Ba Hulda bakalinga kucishi ayi kusebensesha mavidyo alimwi ambasu shimwi shamu JW Library appu kulaakubacafwa abuumbi muncito yakushimikila alimwi akunyumfwishisha kabotu Baibo.
Mu mweenshi umwi ba Hulda bakasalawo kunosebensa mawoola obilo a haafu lyoonse macuunsa, kupwaya mabwe akalinga kusula motoka iniini inyamuna shintu. Aboobo bakacikonsha kucana maali akwene kuula tabuleti.
Ba Hulda a tabuleti yabo
Ba Hulda bakaamba ayi: “Nabi kwaamba ayi ndakalema abuumbi akuba ashilonda ceebo cakupwaya mabwe, ndyendakoolabo tabuleti akutalika kwiisebensesha muncito yakushimikila akulibambila mabungano, mapensho oonse ngondakeendaamo kwaamba ayi njuule, ndakaalubaako.” Alimwi bakaamba ayi tabuleti yakabacafwa abuumbi paciindi bulwashi bwa COVID-19 ndyebwakatalikabo, mukwiinga mabungano oonse akalinga kubeta pa Zoom. Tulisangalete abuumbi kwaamba ayi nankashi Hulda wakacikonsha kukumanisha nshaakalinga kusuni kucita.