Nsheenga Tweeya Kuswa ku Bushinshimi Jakobo Mbwakaamba—Lubasu 1

1-2. Ino nciinshi Jakobo ncaakacita kaatana kufwa, alimwi ino nceebonshi? (Amubone acikope cili papeeji yakutaanguna.)

JAKOBO ndyaakacembela abuumbi, wakalonga kuswa ku Kenani akuya ku Ijipiti pomwi amukwashi wakwe woonse. Ndyaakashika, wakatolelela kusebensela Yehova cakushomeka kwamyaaka 17. (Mata. 47:28) Jakobo wakasangalala abuumbi kubonana a Josefu mwanaakwe, mukwiinga wakalinga kuyeeya ayi wakafwa. Jakobo wakaba pomwi abana bakwe boonse alimwi. Sombi wakalinga kucishi ayi alaakufwa conoonobo. Aboobo wakeeta bana bakwe basankwa boonse kwaamba ayi abalaashe.—Mata. 49:28.

² Paciindi cilya, liinji mushali musankwa wakalinga kwiita bamumukwashi wakwe boonse kwaamba ayi abalaashe kaatana kufwa. (Isa. 38:1) Alimwi na babungana, mushali musankwa wakalinga kusala aweshi akanootanjilila mukwashi na lakwe akafwe.

3. Ino nceebonshi inga twaamba ayi maswi ngotucana pa Matalikilo 49:​1, 2 mbushinshimi?

³ Amubelenge Matalikilo 49:​1, 2. Kubungana uku kwakalinga kulibetele mukwiinga Jakobo wakaamba shakalinga kusa mukucitika kunembo. Kwiinda mulucafwo lwakwe Yehova, Jakobo wakalwiita bana bakwe basankwa shintu shiyandika shakalinga kusa mukubacitikila pomwi amikwashi yabo. Aboobo maswi Jakobo ngaakaamba bwakalinga mbushinshimi.

4. Ino nshiinshi Jakobo nshakaambila limwi, alimwi ino nshiinshi nsheenga tweeya kuswa ku maswi ngakaamba? (Amubone akabokosi kacite mutwi utokwaamba ayi “Mukwashi Wakwe Jakobo.”)

⁴ Mumutwi uyu, tutobandika pa maswi Jakobo ngaakalwiita bana bakwe basankwa bali 4, nkokwaamba ayi Lubeni, Simyoni, Lefi a Juda. Mumutwi utokonkelaawo, tulaakubandika pamaswi Jakobo ngaakalwiita bana bakwe basankwa bamwi bali 8. Jakobo wakaamba shakalinga kusa mukucitikila bana bakwe pomwi amikwashi yabo. Mukuya kwaciindi, mikwashi iyo njoyakesa mukutalika kwiitwa ayi bene Isilaeli. Kwiiya shakacitikila bene Isilaeli, kutootucafwa kushiba bushinshimi Jakobo mbwakaamba mbobwakakumanishikwa. Alimwi kwiiya bushinshimi ubu kutootucafwa kushiba nsheenga twaciita kwaamba ayi tunoosangalasha Yehova, Ishiwesu wakwiculu.

LUBENI

5. Ino nshiinshi Lubeni nshaakalinga kulangila kutambula kuswa kuli baishi?

⁵ Jakobo wakataanguna kwaamba pali Lubeni ayi: ‘Omwanaangu wakwiiya.’ (Mata. 49:3) Ceebo cakwaamba ayi Lubeni ngowakalinga mwaana wakwiiya, wakalinga kulangila ayi baishi batoomupa shipansha shobilo sha buboni bwabo. Mpashi wakalinga kulangila ayi ngweshi akanootanjilila mukwashi na baishi bakafwe alimwi ayi mubamulunyungu lwakwe mweshi mukanooswa bakutanjilila mukwashi.

6. Ino nceebonshi Lubeni taakwe kupekwa shoolwe shakalinga kupekwa mwaana wakwiiya? (Matalikilo 49:​3, 4)

⁶ Nacibi boobo, Lubeni taakwe kupekwa shoolwe shakalinga kupekwa mwaana wakwiiya. (1 Maka. 5:1) Ino nceebonshi? Mukwiinga ndipakeenda ciindi pesule lyakwaamba ayi Lakelo wafwa, Lubeni wakakumana a Biluya kasuwa wa baishi. Alimwi Biluya wakalinga musebenshi wakwe Lakelo mukaakwe Jakobo. Jakobo wakalinga kumusuni abuumbi Lakelo. (Mata. 35:​19, 22) Lubeni wakalinga mwanaakwe Leya, mwanakashi aumwi wakalinga kweebetwe kuli Jakobo. Leya wakalinga munenewakwe Lakelo. Ino nceebonshi Lubeni wakakumana a Biluya? Mpashi wakacita boobo kwaamba ayi Jakobo amusuule lyalo asune banyina abuumbi. Na mpashi Lubeni wakalinga kumukumbwa Biluya, aboobo wakaalilwa kulikasha ndyaakaba alusuno lwakoonana. Sombi teshi mulandu acakalengesha, nshaakacita tashikwe kusangalasha Yehova abaishi.—Amubelenge Matalikilo 49:​3, 4.

7.Ino nshiinshi shakacitika kuli Lubeni aku bamulunyungu lwakwe? (Amubone akabokosi kacite mutwi utokwaamba ayi “ Bushinshimi Jakobo Mbwakaamba Ndyaakalinga Pafwiifwi Kufwa.”)

⁷ Jakobo wakalwiita Lubeni ayi: “Teshi ukabe muntu uyandika kwiinda bamwi boonse.” Maswi aya akakumanishikwa. Taakuwo Baibo mpoyaamba ayi wamulunyungu lwakwe Lubeni wakabawo kale mwaami, mupailishi nabi mushinshimi. Nacibi boobo, Jakobo wakapa Lubeni buboni alimwi bamumukwashi wakwe bakalinga ngumukowa womwi pa mikowa ya bene Isilaeli. (Joshu. 12:6) Pashiindi shimwi, Lubeni wakatondesha mibo ibotu alimwi citoboneka ayi taana kuboshawo kucita bulale.—Mata. 37:​20-22; 42:37.

8. Ino nshiinshi nsheenga tweeya kuswa kucakubonenaako cakwe Lubeni?

⁸ Ino nshiinshi nsheenga tweeyaako? Tulyeelete kusebensa cankusu kwaamba ayi tunoolikasha akuleya kucita bufuule. Na tweeleshekwa kucita cintu cibiibi, tulyeelete kuyeeya mbweenga kucita boobo kwakalasha Yehova, bamumukwashi wesu abamwi. Alimwi tulyeelete kunokwiibaluka ayi “muntu woonse ulatebula sheesho nshaakashanga.” (Gala. 6:7) Sombi shakacitikila Lubeni shilatwiibalusha a Yehova mbwaacite nkuumbu. Nabi kwaamba ayi Yehova inga taatushitilishi kumapensho ngeenga twacaana na twaciita cilubo, alaakutulekelela akutupa shoolwe na twaana akweelesha kunoocita shiluleme.

SIMYONI A LEFI

9. Ino nshiinshi Simyoni a Lefi nshobakacita shakapa kwaamba ayi Jakobo atakondwi? (Matalikilo 49:​5-7)

⁹ Amubelenge Matalikilo 49:​5-7. Bakakonkelaawo Jakobo mbakaambawo, ngu Simyoni a Lefi. Nacibi boobo, nshakaamba pali mbabo shakatondesha ayi taakwe kukondwa pa nshobakacita. Bushiku bumwi, Daina mwanaakwe Jakobo mwanakashi bakalinga bamoona cakumukakatisha kuli Shekemu uyo wakalinga kukala mu Kenani. Bana bakwe Jakobo basankwa boonse bakakalala ceebo ca shakacitikila nankashi yabo, mukwiinga tashikwe kubota. Sombi Simyoni a Lefi balo bakakalala cakwiindilisha. Bana bakwe Jakobo basankwa bakabeca Shekemu abantu bakwe ayi balaakuba muluumuno amukwashi wakwe Jakobo na basankwa boonse bapalulwa. Basankwa boonse bamu Shekemu bakasumina kupalulwa. Ndyepakeendabo nshiku shiniini shiloonda shakupalulwa kashicicisa, Simyoni a Lefi ‘bakabwesa mipeeni yabo akuya mutauni iyo cakutabonekaawo ayi kuli ncebatooya mukucita. Lyalo bakacaya basankwa boonse.’—Mata. 34:​25-29.

10. Ino bushinshimi Jakobo mbwaakaamba pali Simyoni a Lefi bwakakumanishikwa buyani? (Amubone akabokosi kacite mutwi utokwaamba ayi “Bushinshimi Jakobo Mbwakaamba Ndyaakalinga Pafwiifwi Kufwa.”)

¹⁰ Jakobo wakakalala abuumbi bana bakwe bobilo ndyebakacaya bantu baanji. Wakabalwiita ayi balaakupalanganina mucishi coonse ca bene Isilaeli. Bushinshimi ubu bwakakumanishikwa bene Isilaeli ndyebakenjila mu Cishi Cakashomeshekwa, pesule lyakwaamba ayi peenda myaaka iindilila 200 kuswa ciindi ndyebwakaambwa. Bamumukowa wakwe Simyoni bakapekwa misena mukati kamusena wakwe Juda. (Joshu. 19:1) Lyalo bamumukowa wakwe Lefi bakapekwa matauni ali 48 mumisena ipusenepusene mucishi ca Isilaeli coonse.—Joshu. 21:41.

11. Ino nshintu nshi shibotu bamumukowa wakwe Simyoni a Lefi nshobakacita?

¹¹ Bamulunyungu lwakwe Simyoni a Lefi tabakwe kucita shilubo bamashali babo nshobakacita. Alimwi bene Lefi baanji bakatolelela kulambila Yehova cakushomeka. Mose ndyakatanta pa Kalundu ka Sinayi kwaamba ayi apekwe Milawo kuswa kuli Yehova, bene Isilaeli baanji bakatalika kulambila koombe. Sombi bene Lefi balo bakakaka kulambila kabumbwabumbwa. Muciindi cakucita boobo, bakacafwa Mose kucaya baabo boonse bakalambila koombe. (Kulo. 32:​26-29) Yehova wakalinga kusala basankwa bamumukowa wakwe Lefi kwaamba ayi banooba bapailishi ba bene Isilaeli. (Kulo. 40:​12-15; Shakube. 3:​11, 12) Mukuya kwaciindi, bamumukowa wakwe Lefi bakacafwa bamumukowa wakwe Juda kulwana bene Kenani kwaamba ayi abalo babe amusena kwakukala mu Cishi Cakashomeshekwa.—Boombo. 1:​3, 17.

12. Ino nshiinshi nsheenga tweeya kuswa kucakubonenaako cakwe Simyoni a Lefi?

¹² Ino nshiinshi nsheenga tweeyaako? Tatweelete kukalala cakwiindilisha. Cilibo kabotu kukala na muntu umwi wamucitila shintu shitabete kabotu na kucitila shikamukowa wanu. (Kulu. 4:4) Nacibi boobo, tulyeelete kunokwiibaluka ayi Yehova teshi akasangalale pali ndiswe na twaamba nabi kucita cintu cimwi kwaamba ayi tubooshe cishole kuwooyo wakatukalasha. (Jemu. 1:20) Na muntu watucitila shintu shitabete kabotu, inga caba ayi alasebensela Yehova nabi sobwe, tulyeelete kucita sheenga shasangalasha Yehova. Kucita boobo kulaakutucafwa kuleya kwaamba na kucita shintu sheenga shakalasha bamwi. (Loma. 12:​17, 19; 1 Pit. 3:9) Alimwi na muli wacanike, munookwiibaluka ayi inga mwasalawo kucita shintu shisangalasha Yehova nabi kwaamba ayi bashali banu balacita shintu nshaatasuni. Mutanoyeeya ayi inga tacikonsheki kusangalasha Yehova. Alaakumucafwa kucita shiluleme alimwi alaakumupa shoolwe ceeco cakucita boobo.

JUDA

13. Ino nceebonshi Juda alyeelete wakalisukama ciindi ndyecakashika kwaamba ayi baishi baambe pali nguwe?

¹³ Mwaana wakakonkelaawo Jakobo ngwaakambaawo ngu Juda. Juda alyeelete wakalisukama ndyaakanyumfwa maswi baishi ngobakalwiita bamanene bakwe. Alakwe wakacita shilubo shinene. Simyoni a Lefi ndyebakacaya basankwa boonse bamu Shekemu, Juda wakaya abamakwabo mutauni iyi akubwesa shintu shoonse shakalingaamo. (Mata. 34:27) Ngwaakaleta muyeeyo wakwaamba ayi boolishe Josefu mubusha lyalo akubeca baishiwabo ayi wacaikwa. (Mata. 37:​27, 31-33) Ndyepakeenda ciindi, wakakumana a Tama mulokashi wakwe ceebo cakuyeeya ayi wakalinga mufuule.—Mata. 38:​15-18.

14. Ino nshintu nshi shibotu Juda nshaakacita? (Matalikilo 49:​8, 9)

¹⁴ Nacibi boobo, Jakobo wakaambabo shibotu pali Juda akumushomesha ayi lakwe abamumukwashi wakwe balaakupekwa shoolwe. (Amubelenge Matalikilo 49:​8, 9.) Juda wakatondesha ayi wakalinga kubabikilako maano abuumbi baishi abo bakalinga bacembele. Alimwi wakalinga kumusuni abuumbi Benjameni cakwaamba ayi wakalinga kulyaabite kuba musha muciindi cakwe Benjameni.—Mata. 44:​18, 30-34.

15. Ino nshoolwe nshi Juda nshaakapekwa?

¹⁵ Jakobo wakaamba ayi Juda alaakuba mutanjilili wa bamakwabo. Nacibi boobo, pakeenda myaaka iindilila 200 kwaamba ayi bushinshimi ubu butalike kukumanishikwa. Bene Isilaeli ndyebakaswa mubusha mu Ijipiti akunjila muluyanga kabaya ku Cishi Cakashomeshekwa, bamumukowa wakwe Juda mbobakatangila kunembo lyalo mikowa imwi yakalinga kusa mwisule lyabo. (Shakube. 10:14) Ndyepakeenda myaaka iinji, Yehova wakalwiita bamumukowa wakwe Juda kutaanguna kuya mukulwana bene Kenani kwaamba ayi babwese Cishi Cakashomeshekwa. (Boombo. 1:​1, 2) Lyalo Defedi ngowakaba mwaami wakutaanguna pa bamaami baanji bakaswa mumukowa wakwe Juda. Sombi kuli nshila ashimwi bushinshimi bwaamba pali Juda mbobwakakumanishikwa.

16. Ino bushinshimi mbotucana pa Matalikilo 49:10 bwakakumanishikwa buyani? (Amubone akabokosi kacite mutwi utokwaamba ayi “Bushinshimi Jakobo Mbwakaamba Ndyaakalinga Pafwiifwi Kufwa.”)

¹⁶ Jakobo wakaamba ayi Mweendeleshi weshi akeendeleshe bantu boonse alaakuswa mumukowa wakwe Juda alimwi alaakweendelesha kwamuyayaya. (Amubelenge Matalikilo 49:10.) Mweendeleshi uyo ngu Yesu Klistu. Munjelo wakaamba pali Yesu ayi: ‘Yehova Lesa ulaakumupa bwaami bweenka bwakalinga kucite Defedi ishi mukulukulu.’ (Luka 1:​32, 33) Alimwi Yesu aleetwa ayi “Inkalamu ya mumukowa wakwe Juda.”—Ciyu. 5:5.

17. Ino cakubonenaako cakwe Yehova inga twacikonkela buyani na Mwineklistunyineesu wapekwa mukuli ulibetele?

¹⁷ Ino nshiinshi nsheenga tweeyaako? Yehova wakamupa shoolwe Juda nabi kwaamba ayi wakacita shilubo shimwi shinene. Sombi mpashi bamakwabo bakatalika kuliipusha cakapa kwaamba ayi Juda apekwe shoolwe kuli Yehova. Nabi kwaamba ayi tatucishiiwo nshobakalinga kuyeeya, tulicishi ayi Yehova wakabona mibo ibotu Juda njaakalinga kucite alimwi wakamupa shoolwe ceebo cakutondesha mibo iyo. Ino cakubonenaako cakwe Yehova inga twacikonkela buyani? Na Mwineklistunyineesu wapekwa mukuli ulibetele, inga tatunyumfwishishi ncobakamupeta mukuli uyo na tulicishi ayi kuli shintu shimwi nshaataciti kabotu. Sombi tulyeelete kunokwiibaluka ayi kuli mibo ibotu Yehova njaakabona mumuntu uyo. Yehova alabikila maano kushintu shibotu basebenshi bakwe nshobacita. Aswebo atweeleshe kunoocita boobo.

18. Ino cakubonenaako ca bamumukowa wakwe Juda inga twacikonkela buyani?

¹⁸ Cimwi nceenga tweeya kuswa kucakubonenaako cakwe Juda, nkukalika moyo. Lyoonse Yehova alakumanisha nshaashomesha, sombi cimwi ciindi inga wacita boobo munshila mwiine njaasuni na paciindi ncetutatolangila. Bamumukowa wakwe tabakwe kushikilabo kutalika kutanjilila bantu bakwe Lesa. Sombi bakalinga kunyumfwila baabo Yehova mbwakalinga kusebensesha kutanjilila bantu bakwe, mbuli Mose mwine Lefi, Joshuwa wa mumukowa wakwe Efuleemu a Mwaami Saulo wa mumukowa wakwe Benjameni. Aswebo tulyeelete kunoonyumfwila baabo boonse Yehova mbweenga wasala kwaamba ayi banootutanjilila.—Ebu. 6:12.

19. Ino nshiinshi nshotweeya pali Yehova kuswa kubushinshimi Jakobo mbwakaamba ku bana bakwe?

¹⁹ Ino nshiinshi nshotweeya ku maswi akweelaako Jakobo ngaakalwiita bana bakwe basankwa bali 4? Cabonekela patuba ayi “muntu mbwaabona shintu, Lesa teshi mbwaashibona.” (1 Samwe. 16:​7, NWT) Yehova alakalika moyo abuumbi alimwi alatulekelela. Taasangalali na twaciita shintu shitabete kabotu, sombi taatulangili kucita shintu anga tulimaninite. Alimwi inga wabapa shoolwe bantu bakalinga bacita shilubo shinene kale kale na baana kuswa paanshi lya moyo akutalika kucita shintu shibotu. Mumutwi utokonkelaawo, tulaakubandika pa maswi Jakobo ngaakalwiita bana bakwe basankwa bali 8 bacaala.