Nsheenga Tweeya Kuswa ku Bushinshimi Jakobo Mbwakaamba—Lubasu 2

1. Ino tutokwiiya nshi mumutwi uyu?

BANA bakwe Jakobo basankwa bakabungana kushinguluka ishiwabo akukutika cakubikila maano ku maswi ngaakalinga kubalwiita. Kweelana ambotwakeeya mumutwi wamana, Jakobo wakalwiita Lubeni, Simyoni, Lefi a Juda maswi mpashi ngobatakalinga kulangila kunyumfwa. Aboobo cilyeelete bakalinga kusunishishi kunyumfwa Jakobo nshaakalinga kusuni kulwiita bana basankwa bamwi bali 8. Amuleke tubone nsheenga tweeya kumaswi ngaakalwiita Sebuluni, Isaka, Dani, Gadi, Asha, Nafutali, Josefu alimwi a Benjameni.a

SEBULUNI

2. Ino nshiinshi Jakobo nshaakalwiita Sebuluni, alimwi ino maswi ngakaamba akakumanishikwa buyani? (Matalikilo 49:13) (Amubone akabokosi.)

² Amubelenge Matalikilo 49:13. Jakobo wakaamba ayi bamumukowa wakwe Sebuluni balaakukala kufwiifwi alweenge, kumatwa a Cishi Cakashomeshekwa. Ndyepakeenda myaaka iindilila 200, bamumukowa wakwe Sebuluni bakapekwa musena kwakukala. Musena uyo wakalinga pakati ka Lweenge lwa Galili a Mediterranean. Mose wakashinshima ayi: “Sangalala Sebuluni mulweendo lwako lwa makwebo.” (Duto. 33:​18, NWT) Mpashi ici cakalinga kusansulula ayi cilaakuba cuubu ku bamumukowa wakwe Sebuluni kunooya kwitala lya Lweenge lwa Galili alwa Mediterranean mukuula alimwi akuulisha shintu kubantu bakalinga kuswa mumisena ipusenepusene. Muli moonse mweenga cabeta, bamumukowa wakwe Sebuluni bakalinga kweelete kunoosangalala.

3. Ino nciinshi ceenga catucafwa kukwana anshotucite?

³ Ino nshiinshi nsheenga tweeyaako? Lyoonse kulaba sheenga shatupa kunoosangalala, tacicite mulandu amusena nkotukala na bukaalo mbotubeteemo. Alimwi inga twatolelela kuba alusangalalo na katukwana anshotucite. (Kulu. 16:6; 24:5) Ncuubu kunoyeeya bunene pashintu nshotutacite muciindi cakubikila maano kushintu shibotu nshotucite. Aboobo amweeleshe kunoobikila maano kushintu shibotu nshomucite akunoosangalala mubuumi.—Gala. 6:4.

ISAKA

4. Ino nshiinshi Jakobo nshaakalwiita Isaka, alimwi ino maswi ngakaamba akakumanishikwa buyani? (Matalikilo 49:​14, 15) (Amubone akabokosi.)

⁴ Amubelenge Matalikilo 49:​14, 15. Jakobo wakalumba Isaka ceebo cakunosebensa cankusu. Wakaamba ayi Isaka wakalinga muyumu anga ncinyama cinyamuna shintu shilemu. Alimwi Jakobo wakaamba ayi Isaka alaakupekwa musena ubotu kwakukala. Maswi Jakobo ngaakaamba akakumanishikwa mukwiinga bamumukowa wakwe Isaka bakapekwa musena wakalinga kucite bulongo bubotu uyo wakalinga kufwiifwi a Mulonga wa Joodani. (Joshu. 19:22) Bamumukowa wakwe Isaka bakalinga kusebensa cankusu kwaamba ayi banoolama kabotu musena ngobakapekwa akunoocafwako bamwi. (1 Baam. 4:​7, 17) Kucakubonenaako, Moomboloshi Balaki a Debola mushinshimi mwanakashi ndyebakasenga bene Isilaeli kubacafwaako kulwana Sisela, bamumukowa wakwe Isaka abalo bakalyaaba kucafwilisha. Alimwi bakalinga kulyaaba kulwana apashiindi shimwi.—Boombo. 5:15

5. Ino cakubonenaako ca bamumukowa wakwe Isaka inga twacikonkela buyani, alimwi ino nceebonshi?

⁵ Ino nshiinshi nsheenga tweeyaako? Yehova alalumba pakusebensa cankusu kwesu muncito yakwe, bweenka mbwakalinga kulumba bamumukowa wakwe Isaka pakusebensa cankusu kwabo. (Shiku. 2:24) Kucakubonenaako, amuyeeye pabamanene mbobasebensa cankusu kulama libungano. (1 Timo. 3:1) Bamakwesu aba tabalwani inkoondo iine, sombi balyeelete kusebensa cankusu kwaamba ayi bashitilishe bamakwesu abenankashi kushintu sheenga shanyonyoola bushicibusa bwabo a Yehova. (1 Koli. 5:​1, 5; Judi 17-23) Alimwi balasebensa cankusu kulibambila makani kwaamba ayi bayuminishe libungano.—1 Timo. 5:17.

DANI

6. Ino nincito nshi bamumukowa wakwe Dani njobakapekwa? (Matalikilo 49:​17, 18) (Amubone akabokosi.)

⁶ Amubelenge Matalikilo 49:​17, 18. Jakobo wakaamba ayi Dani wakalinga anga ninsoka iluma shinyama shinene, mbuli mahosi asebenseshekwa munkondo. Bamumukowa wakwe Dani bakalinga mbantu bataloondi alimwi bakalinga kulibambite kulwana balwani ba bene Isilaeli. Bene Isilaeli ndyebakalinga kuya ku Cishi Cakashomeshekwa, bamumukowa wakwe Dani bakalinga kweendela kwisule kwaamba ayi ‘banoshitilisha makoto amwi oonse.’ (Shakube. 10:25) Iyi yakalinga ncito iyandika abuumbi, nabi kwaamba ayi teshi bene Isilaeli boonse bakalinga kubona ncito bamumukowa wakwe Dani njobakalinga kusebensa.

7. Ino nshiinshi nshotweelete kunokwiibaluka pancito ili yoonse njeenga twasebensa mulibunga lyakwe Yehova?

⁷ Ino nshiinshi nsheenga tweeyaako? Mpashi inga mwasebensa ncito bamwi njeenga tabashibi ayi ndimwe mwaisebensa. Na mpashi mwakacafwilisha kubotesha akubaamba Ŋanda ya Bwaami, kulyaaba kucafwilisha pakubungana kwalubasu na kunene, na kusebensa ncito imwi. Na ubo mbocibete, twalumba pakulyaaba kwanu! Lyoonse munokwiibaluka ayi Yehova alabona alimwi alalumba pashintu shoonse nshomumucitila. Alimwi alasangalala abuumbi na kamumusebensela ceebo ca kusuna kutondesha ayi mulimusuni abuumbi kuteshi ceebo cakusuna kulumbaishikwa kubamwi.—Mate. 6:​1-4.

GADI

8. Ino nceebonshi cakalinga cuubu balwani ba bene Isilaeli kulwana mukowa wakwe Gadi? (Matalikilo 49:19) (Amubone akabokosi.)

⁸ Amubelenge Matalikilo 49:19. Jakobo wakaamba ayi Gadi alaakulwanwa ku bapambi na bakapondo. Ndyepakeenda pafwiifwi amyaaka 200, bamumukowa wakwe Gadi bakapekwa musena wakalinga kwicwe lya Mulonga wa Joodani uyo wakalinga kushingulukitwe abalwani. Aboobo cakalinga cuubu kubalwana ku balwani babo. Nacibi boobo, bamumukowa wakwe Gadi bakalinga kusuni kukala kumusena uyo mukwiinga kwakalinga kubotu kweembelelako shifubwa shabo. (Shakube. 32:​1, 5) Bamumukowa wakwe Gadi balyeelete bakalinga mbantu bataloondi. Alimwi ciyandika abuumbi, bakacinka manungo muli Yehova ayi alaakubacafwa kulwana balwani babo kwaamba ayi babwese cishi ncaakabapa. Kwiilikaawo, bakatuma bamasoja babo kuya mukucafwa mikowa imwi yakalinga kumbo lya Joodani kwaamba ayi bakome balwani babo akubwesa misena njobakapekwa. Bamasoja abo bakekalaako myaaka iinji kumbo lya Joodani. (Shakube. 32:​16-19) Bakalinga kushomete ayi Yehova alaakushitilisha bamakaabo abana babo paciindi ndyebatakalingaawo. Yehova wakabapa shoolwe ceebo cakutaloonda kwabo akulyaaba kucafwako bamwi nabi kwaamba ayi tacakalinga cuubu.—Joshu. 22:​1-4.

9. Ino kucinka manungo muli Yehova inga kwatucafwa kusalawo kucita nshi?

⁹ Ino nshiinshi nsheenga tweeyaako? Kwaamba ayi tutolelele kusebensela Yehova ndyetutokwiinda mubukaalo buyumu, tulyeelete kunoocinka manungo muli nguwe. (Kulu. 37:3) Baanji munshiku shino balatondesha ayi balacinka manungo muli Yehova kwiinda mukulyaaba kucafwilisha muncito shakuyaka sha Bwaami, kuya mukusebensela kumusena ubulishite na kucafwa libunga lyakwe Yehova munshila shimwi. Balacita boobo mukwiinga balashoma cakutatoonsha ayi lyoonse Yehova ananobalama.—Kulu. 23:1.

ASHA

10. Ino nshiinshi bamumukowa wakwe Asha nshebatakwe kucita? (Matalikilo 49:20) (Amubone akabokosi.)

¹⁰ Amubelenge Matalikilo 49:20. Jakobo wakaamba ayi bamumukowa wakwe Asha balaakuba abuboni alimwi ishi nshoshakacitika. Bamumukowa wakwe Asha bakapekwa musena wakalinga kucite bulongo bubotu abuumbi. (Duto. 33:24) Musena wabo wakalinga kufwiifwi a Lweenge lwa Mediterranean alimwi wakalinga kwiilikaawo aciito ca Sidoni, apo pakalinga kupolela shintu shiinji shibotu kuswa mumisena ipusenepusene. Nacibi boobo, bamumukowa wakwe Asha tabakwe kubatandaamo bene Kenani mumusena ngobakapekwa. (Boombo. 1:​31, 32) Ceebo cakwaamba ayi bakalinga kucite buboni buunji akuyungwa kucita shintu shitabete kabotu ku bene Kenani, citoboneka ayi bamumukowa wakwe Asha bakacileka kubikila maano kukucita kuyanda kwakwe Yehova. Kucakubonenaako, Moomboloshi Balaki ndyaakasenga bene Isilaeli kwaamba ayi bamucaafwe kulwana bamasoja bene Kenani, bamumukowa wakwe Asha tabakwe kuyaako. Aboobo tabakwe kubonaako shintu shikankamika Yehova nshaakacita kwaamba ayi acafwe bene Isilaeli kukoma nkoondo “kufwaafwi akantupu ka Megido.” (Boombo. 5:​19-21) Bamumukowa wakwe Asha balyeelete bakanyumfwa nsoni ndyebakanyumfwa Balaki a Debola kabeemba ayi: ‘Bene Asha bakekala kweela lweenge kabaliibitebo.’—Boombo. 5:17.

11. Ino nceebonshi tulyeelete kunoobona maali munshila yeelete?

¹¹ Ino nshiinshi nsheenga tweeyaako? Tulisuni kunoosebensela Yehova peela nkusu shesu. Kwaamba ayi tucikonshe kucita boobo, tulyeelete kuleya kuba mbuli bantu bamucishi abo babona ayi kuba amaali ashintu shakumubili nshoshintu shiyandika abuumbi mubuumi. (Tus. 18:11) Tulatolelela kweelesha kunoobona maali munshila yeelete. (Shiku. 7:12; Ebu. 13:5) Tatunyonyooli ciindi ankusu shesu ceebo cakweelesha kuba ashintu shitayandiki bunene. Muciindi cakucita boobo, tulacita nsheenga twacikoonsha kwaamba ayi tusebensele Yehova. Tulicishi ayi na twatolelela kushomeka kuli Yehova, alaakutupa buumi bubotu abuumbi mucishi cipya.—Kulu. 4:8.

NAFUTALI

12. Ino bushinshimi Jakobo mbwakaamba pali Nafutali bwakakumanishikwa buyani? (Matalikilo 49:21) (Amubone akabokosi.)

¹² Amubelenge Matalikilo 49:​21, NWT. Jakobo wakaamba ayi Nafutali alaakunokwaamba “maswi abotu.” Mpashi bushinshimi ubu bulasansulula Yesu mbwaakalinga kwaamba ndyaakalinga kushimikila pacishi. Yesu wakekala ciindi cilaamfu mu Kapenaumu iyo yakalinga mumusena wakapekwa bamumukowa wakwe Nafutali. Ncoceeco Kapenaumu yakalinga kwiitwa ayi “kumushi kumishaabo.” (Mate. 4:13; 9:1; Joni 7:46) Alimwi Isaya wakashinshima pali Yesu ayi alaakuba “mumuni unene” kubantu bamumukowa wakwe Sebuluni awakwe Nafutali. (Isa. 9:​1, 2) Ceebo ca makani Yesu ngaakalinga kwiisha bantu, wakaba “mumuni wancinencine wakesa mucishi capanshi mukumunikila bantu boonse.”—Joni 1:9.

13. Ino inga twacita buyani kwaamba ayi maswi ngotwaamba anoosangalasha Yehova?

¹³ Ino nshiinshi nsheenga tweeyaako? Yehova alabikila maano kushintu nshotwaamba ambotwaamba. Ino inga twacita buyani kwaamba ayi tunokwaamba “maswi abotu” asangalasha Yehova? Cakutaanguna, tulyeelete kunokwaamba lushinisho. (Kulu. 15:​1, 2) Lyalo tulyeelete kunokwaamba maswi eenga ayuminisha bamwi mbuli kubalumba na kuli ncobacita kabotu. Alimwi tulyeelete kuleya kunokwaamba pashilubo bamwi nshobacita na kunobatongooka. (Efe. 4:29) Kwiilikaawo, inga tweelesha kucishiba kabotu bwakutalika mibandi abantu kwaamba ayi cinotubeta cuubu kubashimikila makani abotu.

JOSEFU

14. Ino bushinshimi bwaamba pali Josefu bwakakumanishikwa buyani? (Matalikilo 49:​22, 26) (Amubone akabokosi.)

¹⁴ Amubelenge Matalikilo 49:​22, 26. Josefu ngowakalinga mwaana wakwiiya muli Lakelo, mwanakashi Jakobo ngwaakalinga kusuni abuumbi. Jakobo wakamwaamba ayi “ngumunyansa ucata shisepo abuumbi.” Jakobo ngowakalinga cisamu, lyalo Josefu mwanaakwe wakalinga anga ngumusampi wa cisamu ico. Jakobo wakalinga kumusuni abuumbi Josefu. Yehova ‘wakamupatula kuswa kubamakwabo’ kwaamba ayi asebense ncito ilibetele. Jakobo wakaamba ayi Josefu alaakubwesa buboni bwa mwaana wakwiiya, muciindi cakwe Lubeni uyo wakalinga mwanaakwe Leya wakwiiya. (Mata. 48:​5, 6; 1 Maka. 5:​1, 2) Bushinshimi ubu bwakakumanishikwa ciindi Efuleemu a Manase bana bakwe Josefu bobilo, ndyebakaba mikowa yobilo ya bene Isilaeli akupekwa misena ibaluleme.—Mata. 49:25; Joshu. 14:4.

15. Ino nshiinshi Josefu nshaakacita ndyaakacitilwa shintu shitabete kabotu?

¹⁵ Kwiilikaawo, Jakobo wakaamba pali Josefu ayi “balwani bakwe bakamulwana ciyoosha akumutandaanya kabacite mata amifwi.” (Mata. 49:23) Maswi aya alasansulula bamakwabo Josefu abo bakalinga kumunyumfwila munyono, kumucitila shintu shitabete kabotu akupa kwaamba ayi apenge abuumbi mubuumi bwakwe. Nacibi boobo, Josefu taakwe kupata bamakwabo nabi kupa mulandu Yehova pashintu shakamucitikila. Kweelana a Jakobo mbwaakaamba: ‘Buta bwakwe [Josefu] tabukwe kuteenkaanawo, alimwi maansa akwe akayuma.’ (Mata. 49:24) Josefu wakacinka manungo muli Yehova ndyaakalinga kwiinda mumapensho alimwi wakalekelela bamakwabo akubatondesha lusuno. (Mata. 47:​11, 12) Mapensho Josefu ngaakendaamo akamupa kuba muntu uli kabotu. (Kulu. 105:​17-19) Aboobo Yehova wakamusebensesha kucita shintu shiinji shikankamika.

16. Ino cakubonenaako cakwe Josefu inga catucafwa buyani ndyetutokwiinda mubukaalo buyumu?

¹⁶ Ino nshiinshi nsheenga tweeyaako? Ndyemutokwiinda mumapensho, amutolelele kusuna Yehova abashominyinaanu. Munokwiibaluka ayi Yehova inga wasebensesha bukaalo buyumu mbotutokwiindaamo kwaamba ayi atwiishe. (Ebu. 12:7) Inga watwiisha kuba amibo njaacite mbuli nkuumbu akulekelela bamwi. (Ebu. 12:11) Bweenka Yehova mbwaakapa shoolwe Josefu, aswebo alaakutupa shoolwe na twatolelela kuliyumya.

BENJAMENI

17. Ino bushinshimi bwaamba pali Benjameni bwakakumanishikwa buyani? (Matalikilo 49:27) (Amubone akabokosi.)

¹⁷ Amubelenge Matalikilo 49:27. Jakobo wakaamba ayi bamumukowa wakwe Benjameni balakuba anga mbaumpe alimwi bacishi kabotu kulwana. (Boombo. 20:​15, 16; 1 Maka. 12:2) Saulo Mwaami wakutaanguna wabene Isilaeli wakaswa mumukowa wakwe Benjameni. Wakalwana bene Filisiti cakutaloonda. (1 Samwe. 9:​15-17, 21) Ndyepakeenda myaaka iinji, Esita muka Mwaami alimwi a Modekayi abo bakalinga bamumukowa wakwe Benjameni, bakapulusha bene Isilaeli kwaamba ayi batacaikwi.—Esita 2:​5-7; 8:3; 10:3.

18. Ino cakubonenaako ca bene Benjameni inga twacikonkela buyani?

¹⁸ Ino nshiinshi nsheenga tweeyaako? Bamumukowa wakwe Benjameni balyeelete bakasangalala abuumbi Saulo wa mumukowa wabo ndyakaaba mwaami. Sombi mukuya kwaciindi, Yehova wakasala Defedi wa mumukowa wakwe Juda kwaamba ayi abe mwaami. Ndyepakeenda ciindi, bamumukowa wakwe Benjameni bakatalika kucafwa Defedi. (2 Samwe. 3:​17-19) Ndyepakeenda myaaka iinji, mikowa ili 10 yakapondokela mukowa wakwe Juda, sombi bene Benjameni bakatolelela kushomeka kumukowa wakwe Juda aku mwaami wamumukwashi wakwe Defedi. (1 Baam. 11:​31, 32; 12:​19, 21) Bweenka bene Benjameni mbokacita, atutolelele kushomeka kubaabo Yehova mbwakasala kunootanjilila bantu bakwe munshiku shino.—1 Tesa. 5:12.

19. Ino bushinshimi Jakobo mbwakaamba ndyaakalinga pafwiifwi kufwa, inga bwatucafwa buyani?

¹⁹ Bushinshimi Jakobo mbwakaamba ndyaakalinga pafwiifwi kufwa, inga bwatucafwa. Kwiiya pa bushinshimi Jakobo mbwakaamba akubona mbobwakakumanishikwa, kulatucafwa kushoma cakutatonsha ayi bushinshimi bumwi bulembetwe mu Baibo abwalo bulaakukumanishikwa. Alimwi bushinshimi ubu bulatucafwa akushiba kabotu nsheenga twaciita kwaamba ayi tunoosangalasha Yehova.