EBBALUWA YA PAWULO ERI ABAKKOLOSAAYI

1 Nze Pawulo omutume wa Kristo Yesu nga Katonda bwe yayagala, ne Timoseewo+ muganda waffe, 2 mpandiikira abatukuvu era ab’oluganda abeesigwa mu Kristo abali e Kkolosaayi:

Ekisa eky’ensusso n’emirembe ebiva eri Katonda Kitaffe bibeere nammwe.

3 Bulijjo twebaza Katonda, Kitaawe wa Mukama waffe Yesu Kristo, nga tubasabira, 4 okuva lwe twawulira ku kukkiriza kwammwe mu Kristo Yesu n’okwagala kwe mulina eri abatukuvu bonna, 5 olw’essuubi eribaterekeddwa mu ggulu.+ Essuubi lino mwaliwulirako dda okuyitira mu bubaka obw’amazima, nga gano ge mawulire amalungi 6 agazze gye muli. Ng’amawulire amalungi bwe gabala ebibala ne geeyongerayongera mu nsi yonna,+ era bwe gakoze mu mmwe, okuva ku lunaku lwe mwawulira era ne mutegeerera ddala ekisa kya Katonda eky’ensusso mu mazima. 7 Ekyo kye mwayigira ku Epafula+ muddu munnaffe omwagalwa, omuweereza wa Kristo omwesigwa ku lwaffe. 8 Era ye yatutegeeza ku kwagala kwammwe okuli obumu n’omwoyo gwa Katonda.*

9 Eyo ye nsonga lwaki okuva ku lunaku lwe twawulira ebyo, tetulekangayo kubasabira+ n’okwegayirira Katonda ku lwammwe musobole okujjuzibwa okumanya okutuufu+ okw’ebyo by’ayagala mu magezi gonna ne mu kutegeera eby’omwoyo,+ 10 mulyoke musobole okutambula nga bwe kisaanira mu maaso ga Yakuwa* okusobola okumusanyusiza ddala nga mweyongera okubala ebibala mu buli mulimu omulungi era nga mweyongera okufuna okumanya okutuufu okukwata ku Katonda;+ 11 era okuyitira mu maanyi ge, ajja kubawa amaanyi gonna ge mwetaaga,+ musobole okugumira byonna n’okugumiikiriza n’essanyu, 12 nga mwebaza Kitaffe eyabasobozesa okuba n’omugabo mu busika bw’abatukuvu+ abali mu kitangaala.

13 Yatuggya mu buyinza bw’ekizikiza+ n’atutwala mu bwakabaka bw’Omwana we omwagalwa, 14 mu oyo twasumululwa okuyitira mu kinunulo, ekitegeeza nti ebibi byaffe byasonyiyibwa.+ 15 Oyo kye kifaananyi kya Katonda atalabika,+ omubereberye w’ebitonde byonna;+ 16 era okuyitira mu ye ebintu ebirala byonna byatondebwa mu ggulu ne ku nsi, ebirabika n’ebitalabika,+ ka zibe ntebe za bwakabaka oba bwami oba bufuzi oba buyinza. Ebintu ebirala byonna byatondebwa okuyitira mu ye+ era ku lulwe. 17 Ate era, ye yasooka ebintu byonna,+ era okuyitira mu ye ebintu ebirala byonna byatondebwa, 18 era ye gwe mutwe gw’omubiri, nga kino kye kibiina.+ Oyo ye mubereberye, era eyasooka okuva mu bafu,+ alyoke afuuke omubereberye mu bintu byonna; 19 kubanga Katonda yalaba nga kirungi okuleka ebintu byonna okubeera mu ye mu bujjuvu,+ 20 era okuyitira mu ye addemu okutabaganya ebintu byonna gy’ali+ ng’aleetawo emirembe okuyitira mu musaayi+ gwe yayiwa ku muti ogw’okubonaabona,* ka bibe bintu eby’oku nsi oba eby’omu ggulu.

21 Mazima ddala, edda mwali mweyawudde era nga muli balabe kubanga ebirowoozo byammwe byali ku bikolwa ebibi, 22 naye kaakano azzeemu okutabagana nammwe okuyitira mu mubiri gw’oyo eyeewaayo n’afa, asobole okubanjulayo nga muli batukuvu, nga temuliiko kamogo wadde eky’okunenyezebwa mu maaso ge+— 23 kasita musigala mu kukkiriza,+ nga munyweredde ku musingi,+ nga temusagaasagana,+ era nga temutwalirizibwa kuva ku ssuubi ery’amawulire amalungi ge mwawulira era agaabuulirwa mu bitonde byonna ebiri wansi w’eggulu.+ Olw’amawulire gano amalungi, nze Pawulo nnafuuka omuweereza.+

24 Kaakano nsanyuka olw’okubonaabona ku lwammwe,+ era mpulira nga sinnabonaabona mu bujjuvu mu mubiri gwange ku lw’omubiri gwa Kristo,+ nga kye kibiina.+ 25 Nnafuuka omuweereza w’ekibiina kino ng’obuweereza+ bwe buli Katonda bwe yampa ku lwammwe, okubuulira ekigambo kye mu bujjuvu, 26 ekyama ekitukuvu+ ekyakwekebwa okuva ku nteekateeka z’ebintu* ez’edda+ n’okuva mu mirembe egy’edda. Naye kati kimanyisiddwa eri abatukuvu be,+ 27 abo Katonda b’ayagadde okumanyisa mu mawanga eby’obugagga eby’ekitiibwa eby’ekyama ekitukuvu.+ Ekyama ekyo ye Kristo ali obumu nammwe, ekitegeeza nti musuubira okugulumizibwa awamu naye.+ 28 Oyo gwe tubuulira nga tulabula era nga tuyigiriza buli muntu mu magezi gonna, tulyoke tuleete eri Katonda buli muntu nga taliiko ky’abulako mu Kristo.+ 29 N’olw’ensonga eyo, nkola nnyo era nfuba olw’amaanyi ge agakolera mu nze.+

2 Kubanga njagala mmwe okutegeera nga bwe nfuba ennyo ku lwammwe ne ku lw’ab’omu Lawodikiya+ ne ku lw’abo bonna abatandabangako. 2 Ekyo nkikola emitima gyabwe gisobole okubudaabudibwa,+ basobole okubeera obumu mu kwagala,+ era bafune obugagga bwonna obw’okutegeerera ddala era n’okumanyira ddala ekyama kya Katonda ekitukuvu, ng’ono ye Kristo.+ 3 Mu ye eby’obugagga byonna eby’amagezi n’okumanya mwe byakwekebwa.+ 4 Kino nkibabuulira waleme kubaawo muntu yenna abalimba ng’akozesa ebigambo ebisendasenda. 5 Wadde nga siri nammwe mu mubiri, ndi nammwe mu mwoyo, nga nsanyuka okulaba enteekateeka yammwe ennungi+ n’okukkiriza okunywevu kwe mulina mu Kristo.+

6 N’olwekyo, nga bwe mukkirizza Mukama waffe Kristo Yesu, mweyongere okutambulira wamu naye, 7 nga muli banywevu, nga muzimbibwa mu ye,+ nga temusagaasagana mu kukkiriza+ nga bwe mwayigirizibwa, era nga musukkirira mu kwebaza.+

8 Mwegendereze waleme kubaawo abafuula abaddu* ng’akozesa obufirosoofo n’eby’obulimba ebitaliimu+ ebyesigamiziddwa ku bulombolombo bw’abantu n’ebintu eby’omu nsi ebisookerwako so si ku Kristo; 9 kubanga amaanyi ga Katonda gali mu ye.+ 10 N’olwekyo mulina buli kimu okuyitira mu ye, ng’oyo gwe mutwe gw’obufuzi bwonna n’obuyinza.+ 11 Olw’enkolagana gye mulina naye, nammwe mwakomolebwa, naye si na mikono nga muggibwako omubiri ogw’ennyama,+ wabula mwakomolebwa n’okukomolebwa kwa Kristo.+ 12 Kubanga mwaziikibwa wamu naye mu kubatizibwa kwe,+ era olw’enkolagana gye mulina naye, nammwe mwazuukizibwa+ wamu naye okuyitira mu kukkiriza kwe mulina mu maanyi ga Katonda eyamuzuukiza mu bafu.+

13 Ate era, wadde nga mwali mufiiridde mu bibi byammwe ne mu butakomolebwa bw’emibiri gyammwe, Katonda yabafuula balamu wamu naye.+ Yatusonyiwa ebibi byaffe byonna,+ 14 era n’aggyawo* endagaano eyawandiikibwa,+ omwali amateeka+ era eyali omulabe waffe.+ Yagiggyawo ng’agikomerera ku muti ogw’okubonaabona.*+ 15 Ku muti ogwo, yawangula obufuzi n’obuyinza n’abyanika mu lujjudde ng’ebiwanguddwa,+ n’abikulembera mu kibinja ky’abawanguzi abayisa ekivvulu.

16 N’olwekyo, omuntu yenna tabasaliranga musango olw’eby’okulya n’eby’okunywa+ oba olw’embaga oba okukuza okuboneka kw’omwezi+ oba ssabbiiti.+ 17 Ebintu ebyo kye kisiikirize ky’ebyo ebigenda okujja,+ naye ebya ddala biri mu Kristo.+ 18 Omuntu yenna asanyukira obwetoowaze obw’obulimba n’okusinza bamalayika* tabalemesanga kufuna mpeera.+ Abantu ng’abo “bagugubira” ku bintu bye balabye. Beegulumiza awatali nsonga ntuufu olw’endowooza yaabwe ey’omubiri, 19 kyokka nga tebanywerera ku mutwe,+ ku oyo omubiri gwonna mwe gufunira bye gwetaaga, era ne gugattibwa wamu ennyingo n’ebinywa, ne gweyongera okukula nga Katonda y’agukuza.+

20 Bwe muba nga mwafiira wamu ne Kristo ku bikwata ku bintu eby’omu nsi ebisookerwako,+ lwaki ate muli ng’abakyali mu nsi, nga mugoberera amateeka agagamba nti:+ 21 “Temutwala, wadde okuloza, oba okukwata”? 22 Kubanga ebintu ebyo bya kuzikirira oluvannyuma lw’okubikozesa, era amateeka ago njigiriza za bantu.+ 23 Ebintu ebyo birabika ng’eby’amagezi mu kusinza abantu kwe beegunjizaawo ne mu kwetoowaza okw’obulimba, ne mu kubonyaabonya omubiri,+ naye tebirina mugaso mu kulwanyisa okwegomba kw’omubiri.

3 Naye bwe muba nga mwazuukirira wamu ne Kristo,+ mweyongere okunoonya ebintu eby’omu ggulu, eyo Kristo gy’atudde ku mukono gwa Katonda ogwa ddyo.+ 2 Ebirowoozo byammwe mubikuumire ku bintu eby’omu ggulu+ so si eby’oku nsi.+ 3 Kubanga mwafa, era obulamu bwammwe bukwekeddwa wamu ne Kristo mu Katonda. 4 Kristo, obulamu bwaffe,+ bw’anaalabisibwa, nammwe mujja kulabisibwa wamu naye mu kitiibwa.+

5 N’olwekyo, mufiise ebitundu byammwe eby’omubiri+ ebiri ku nsi ku bikwata ku bugwenyufu,* ku butali bulongoofu, obuteefuga ku bikwata ku kwegatta,+ okuyaayaanira ebintu ebibi, n’omululu, nga kwe kusinza ebifaananyi. 6 Ku lw’ebintu ebyo, obusungu bwa Katonda bujja. 7 Bwe mutyo nammwe bwe mweyisanga* edda.+ 8 Naye kati byonna mubyeggireko ddala: obusungu, ekiruyi, ebikolwa ebibi,+ okuvuma,+ n’eby’obuwemu,+ tebiyitanga mu kamwa kammwe. 9 Temulimbagananga.+ Mweyambuleko omuntu ow’edda+ n’ebikolwa bye, 10 mwambale omuntu omuggya,+ oyo afuulibwa omuggya okuyitira mu kumanya okutuufu, mu kifaananyi ky’Oyo eyamutonda.+ 11 Olwo waba tewakyaliwo Muyonaani wadde Omuyudaaya, okukomolebwa oba obutakomolebwa, omugwira, Omusukusi,* omuddu, oba ow’eddembe; naye Kristo ye byonna mu byonna.+

12 Kale, ng’abalonde ba Katonda+  abatukuvu era abaagalwa, mwambale obusaasizi,+ ekisa, obwetoowaze,+ obukkakkamu+ n’obugumiikiriza.+ 13 Mweyongere okugumiikirizigananga n’okusonyiwagananga+ omuntu yenna ne bw’aba n’ensonga ku munne.+ Era nga Yakuwa* bwe yabasonyiyira ddala, nammwe mukole bwe mutyo.+ 14 Naye okugatta ku ebyo byonna, mwambale okwagala+ kubanga kunywereza ddala obumu.+

15 Ate era, emirembe gya Kristo gifugenga emitima gyammwe,+ kubanga egyo gye mwayitirwa mu mubiri ogumu. Era, mulage nti musiima. 16 Ekigambo kya Kristo ka kikolere mu mmwe mu bujjuvu kibaleetere amagezi gonna. Muyigirizaganenga era muzziŋŋanemu amaanyi* nga mukozesa zabbuli,+ ennyimba ezitendereza Katonda, n’ennyimba ez’eby’omwoyo eziyimbibwa n’essanyu, nga muyimbira Yakuwa* mu mitima gyammwe.+ 17 Buli kimu kye mukola mu bigambo oba mu bikolwa, mukikolenga mu linnya lya Mukama waffe Yesu, nga mwebaza Katonda Kitaffe okuyitira mu ye.+

18 Mmwe abakyala, mugonderenga abaami bammwe+ nga bwe kigwanira mu Mukama waffe. 19 Mmwe abaami, mwagalenga bakyala bammwe+ era temubasunguwaliranga.*+ 20 Mmwe abaana, mugonderenga bazadde bammwe mu buli kimu,+ kubanga kino kisanyusa Mukama waffe. 21 Mmwe bataata, temunyiizanga baana bammwe,+ baleme okuggwaamu amaanyi. 22 Mmwe abaddu, mugonderenga bakama bammwe ab’oku nsi*+ mu buli kimu, si mu biseera ebyo byokka nga babalaba, olw’okwagala okusanyusa obusanyusa abantu, naye nga mukola n’omutima omwesimbu nga mutya Yakuwa.* 23 Buli kye mukola, mukikolenga n’omutima gwammwe gwonna, ng’abakolera Yakuwa*+ so si abantu, 24 kubanga mumanyi nti Yakuwa* y’ajja okubawa obusika ng’empeera.+ Muweereze Mukama waffe, Kristo. 25 Awatali kubuusabuusa, oyo akola ekikyamu ajja kufuna empeera okusinziira ku ekyo kye yakola,+ kubanga Katonda tasaliriza.+

4 Mmwe abalina abaddu, muyisenga abaddu bammwe mu ngeri ey’obutuukirivu era ey’obwenkanya nga mumanyi nti nammwe mulina Mukama wammwe mu ggulu.+

2 Munyiikirenga okusaba awatali kuddirira+ era mwebazenga.+ 3 Mu kiseera kye kimu, naffe mutusabire,+ Katonda asobole okutuggulirawo oluggi tusobole okubuulira ekigambo n’okwogera ku kyama ekitukuvu ekikwata ku Kristo, ekyanviirako okusibibwa mu kkomera,+ 4 era nsobole okukibuulira obulungi nga bwe ŋŋwanidde.

5 Mweyisenga mu ngeri ey’amagezi nga mukolagana n’ab’ebweru, nga mukozesa bulungi ebiseera byammwe.*+ 6 Ebigambo byammwe bulijjo bibeerenga bya kisa, era nga binoze omunnyo,+ musobole okumanya engeri gye musaanidde okuddamu buli muntu.+  

7 Byonna ebinkwatako, Tukiko+ muganda wange omwagalwa, omuweereza omwesigwa era muddu munnange mu Mukama waffe, ajja kubibategeeza. 8 Mmutuma gye muli musobole okumanya ebitukwatako era asobole okubudaabuda emitima gyammwe. 9 Ajja ne Onesimo+ muganda wange omwesigwa era omwagalwa ow’ewammwe; bajja kubabuulira byonna ebifa eno.

10 Alisutaluuko+ musibe munnange abalamusizza, era ne Makko+ alina oluganda ku Balunabba abalamusizza, (oyo gwe mwalagirwa okwaniriza+ ng’azze gye muli), 11 ne Yesu ayitibwa Yusito, nga bano be b’omu bakomole. Bano bokka be bakola nange omulimu gw’Obwakabaka bwa Katonda era banzizaamu nnyo amaanyi. 12 Epafula+ ow’ewammwe, omuddu wa Kristo Yesu, abalamusizza, nga bulijjo afuba nnyo okubasabira, mu nkomerero ya byonna musobole okuba abatuukiridde* nga mukakasiza ddala byonna Katonda by’ayagala. 13 Mu butuufu, mmujulira nti afuba nnyo ku lwammwe ne ku lw’ab’omu Lawodikiya n’ab’e Kiyerapoli.

14 Lukka,+ omusawo omwagalwa abalamusizza, era ne Dema+ bw’atyo. 15 Munnamusize ab’oluganda ab’e Lawodikiya, era munnamusize ne Nunfa, n’ab’omu kibiina ekikuŋŋaanira mu nnyumba ye.+ 16 Era ebbaluwa eno bw’emala okusomebwa mu mmwe, muteeketeeke esomebwe+ ne mu kibiina ky’e Lawodikiya era nammwe musome eyo eva e Lawodikiya. 17 Ate era, mugambe Alukipo+ nti: “Ssaayo omwoyo ku buweereza bwe wakkiriza mu Mukama waffe, osobole okubutuukiriza.”

18 Nze Pawulo, mpandiise okulamusa kuno n’omukono gwange.+ Mweyongere okulowooza ku kusibibwa kwange.+ Ekisa eky’ensusso kibeerenga nammwe.