Okutuukiriza Obulungi Obuweereza Bwaffe—Okufuna Omuntu ow’Okuwa Magazini Buli Mwezi

Lwaki Kikulu: Abantu bangi banyumirwa nnyo okusoma magazini zaffe naye tebaagala kubayigiriza Bayibuli. Bayinza okuba nga tebaagala kukyusa ddiini yaabwe, oba nga tebalina biseera bya kuyiga Bayibuli. Kyokka, bwe basoma magazini zaffe buli mwezi bayinza okutandika okwagala Ekigambo kya Katonda. (1 Peet. 2:2) Bayinza okusoma ekitundu ne kibakwatako, oba embeera zaabwe ziyinza okukyuka. Bwe tubakyalira obutayosa ne tukubaganya nabo ebirowoozo okumala akaseera katono, bafuuka mikwano gyaffe era tweyongera okumanya bye baagala n’ebibeeraliikiriza. Oluvannyuma lw’ekiseera bayinza okufuuka abayizi ba Bayibuli.

Engeri y’Okukikolamu:

Buli mwezi twalira omuntu magazini empya ey’Omunaala gw’Omukuumi n’eya Awake! Oyinza okumukyalira emirundi emirala mu mwezi ogwo n’omulaga engeri gy’ayinza okuganyulwa mu kimu ku bitundu ebiri mu magazini ze wamulekera oba n’omuwa ekitabo ekigabibwa omwezi ogwo. Buli lw’oba omukyalidde baako by’owandiika.—Laba Obuweereza Bwaffe obw’Obwakabaka aka Jjanwali 2014, olupapula 3.
Buli lw’oba ogenda okumukyalira weeteeketeeke bulungi. Mu kifo ky’okumutwalira obutwalizi magazini, gezaako okukubaganya naye ebirowoozo n’okumufuula mukwano gwo kikusobozese okumuyamba okwagala ebyo by’asoma.
Kozesa buli kakisa k’ofuna okutandika okumuyigiriza Bayibuli. Omu ku abo b’otwalira magazini bw’akubuuza ekyo Bayibuli ky’eyigiriza ku nsonga emu, mutwalire ekimu ku bitabo bye tukozesa okuyigiriza abantu Bayibuli mukubaganye ebirowoozo ku nsonga eyo. Nga tonnavaawo, lekawo ekibuuzo ekikwatagana n’ensonga eyo kye munaayogerako omulundi omulala. Bwe kiba nti okubaganya ebirowoozo n’omuntu obutayosa ng’okozesa Bayibuli oba ekimu ku bitabo byaffe, ne bwe muba nga mumala akaseera katono, oyinza okumubala ng’omuyizi wa Bayibuli. Wali otwalidde omuntu brocuwa Amawulire Amalungi era mu ngeri ennyangu n’omulaga engeri gye tuyigirizaamu abantu Bayibuli? Wali omulaze vidiyo Lwaki Kikulu Okuyiga Bayibuli? ne Omuntu Ayigirizibwa Atya Bayibuli? Omuntu ne bw’aba nga yali tayagala kumuyigiriza Bayibuli, embeera zikyuka. Bw’oddamu okugezaako ayinza okukkiriza.

Mu Mwezi Guno Gezaako Kino:

Kola olukalala lw’abo b’oyinza okutwalira magazini buli mwezi. Bawe magazini empya, era obagambe nti ojja kubaleetera n’ezinaddako.