Mubeere Bavumu ng’Enkomerero Egenda Esembera

LWAKI KIKULU?: Waliwo ebintu ebinaatera okubaawo ebijja okutwetaagisa okuba abavumu n’okulaga obanga twesiga Yakuwa. Ekibonyoobonyo ekinene kijja kutandika n’okuzikirizibwa kw’amadiini ag’obulimba. (Mat 24:21; Kub 17:16, 17) Mu kiseera ekyo, kiyinza okutwetaagisa okulangirira obubaka obw’omusango. (Kub 16:21) Googi ow’e Magoogi ajja kutulumba. (Ezk 38:10-12, 14-16) Naye Yakuwa ajja kulwanirira abantu be ku ‘lutalo olujja okubaawo ku lunaku olukulu olwa Katonda Omuyinza w’Ebintu Byonna.’ (Kub 16:14, 16) Okusobola okuba abavumu mu kiseera ekyo ekijja okuba ekizibu ennyo, kitwetaagisa okwoleka obuvumu nga twolekaganye n’ebizibu bye tufuna mu kiseera kino.

ENGERI Y’OKUKIKOLAMU:

• Nywerera ku mitindo gya Yakuwa egy’empisa.​—Is 5:20

• Weeyongere okusinziza awamu ne bakkiriza banno.​—Beb 10:24, 25

• Goberera obulagirizi obutuweebwa ekibiina kya Yakuwa.​—Beb 13:17

• Fumiitiriza ku ngeri Yakuwa gye yanunulamu abantu be mu biseera eby’edda.​—2Pe 2:9

• Sabanga Yakuwa, era mwesige.​—Zb 112:7, 8

MULABE EKITUNDU EKYAGGIBWA MU VIDIYO ERINA OMUTWE, EBINAABAAWO MU MAASO EBIJJA OKUTWETAAGISA OKUBA ABAVUMU, OLUVANNYUMA MUDDEMU EBIBUUZO BINO:

• 

  Obuwulize bw’ab’oluganda bwagezesebwa butya ekibiina kyabwe bwe kyagattibwa ku birala?

• 

  Kakwate ki akaliwo wakati w’obuvumu n’okuba abawulize?

• 

  Lwaki kijja kutwetaagisa okuba abavumu ku lutalo Amagedoni?

• 

  Byakulabirako ki ebiri mu Bayibuli ebiyinza okutuyamba okweyongera okuba abakakafu nti Yakuwa ajja kutulokola?​—2By 20:1-24