Maꞈhtehˍ

5 Yeˍsuˆ chaw awˬ moˍ lonˉ htaꞈ g’a mawˬ htaˇ, yawˇ hk’aw hk’oˆ lo taˆ-e leh yawˇ mui-aˬ htaˇ, awˬ laꞈ g’awˇ hui yawˇ geh laˬ ve yoˬ. 2 Yeˍsuˆ yawˇ hui htaꞈ maˍ leh k’oˆ piˇ ve, 3 Gʼuiˬ sha htaꞈ g’aˇ va cawˇ ve tehꞈ shiˍ ve chaw lehˬ g’a ha lehˬ tuˬ yoˬ. Awˬ lawn k’o, mvuhˇ naw ma mvuhˇ miˬ lehˬ yawˇ hui g’a tuˬ yoˬ. 4 Nyi ma luˬ ve chaw lehˬ g’a ha lehˬ tuˬ yoˬ. Awˬ lawn k’o, yawˇ htaꞈ shu beˬ piˇ tuˬ yoˬ. 5 Nyi ma nuˇ nehˬ ve chaw lehˬ g’a ha lehˬ tuˬ yoˬ. Awˬ lawn k’o, miˬ guiˬ lehˬ yawˇ g’a tuˬ ve laꞈ shawnˍ hpehꞈ ve yoˬ. 6 Hteˇ ve cawˇ ve htaꞈ mawˬ gaˇ ve chaw lehˬ g’a ha lehˬ tuˬ yoˬ. Awˬ lawn k’o, yawˇ hteˇ ve cawˇ ve htaꞈ g’a leh nyi ma sha tuˬ yoˬ. 7 Shu htaꞈ venˇ baˆ hpehˇ piˇ puiˉ ve chaw lehˬ g’a ha lehˬ tuˬ yoˬ. Awˬ lawn k’o, yawˇ htaꞈ Gʼuiˬ sha venˇ baˆ hpehˇ piˇ tuˬ yoˬ. 8 Nyi ma hk’aw hteˇ ve cawˇ ve chaw lehˬ g’a ha lehˬ tuˬ yoˬ. Awˬ lawn k’o, yawˇ Gʼuiˬ sha htaꞈ g’a mawˬ tuˬ yoˬ. 9 Shu geh cawˇ daꞈ hawˍ daꞈ tuˬ te ve chaw lehˬ g’a ha lehˬ tuˬ yoˬ. Awˬ lawn k’o, yawˇ htaꞈ Gʼuiˬ sha ve yaˇ tehꞈ shu k’oˆ tuˬ yoˬ. 10 Hteˇ ve cawˇ ve htaꞈ te ve pa taw, fawˉ ve mehˍ ve htaꞈ g’a hpuˇ ve chaw lehˬ g’a ha lehˬ tuˬ yoˬ. Awˬ lawn k’o, mvuhˇ naw ma mvuhˇ miˬ lehˬ yawˇ hui g’a tuˬ yoˬ. 11 Nawˬ ngaˬ te ve hk’e te ve pa taw, shu fawˉ mehˍ laˇ ve, deˇ laˇ ve, leh maˇ heˆ heˆ she pfuhˍ laˇ ve g’a hpuˇ ve htawˇ, nawˬ ha lehˬ tuˬ yoˬ. 12 Ha lehˬ chehˇ˗oˆ. Awˬ lawn k’o, mvuhˇ naw ma hk’oˆ lo nawˬ awˬ hpfuhˇ hk’aˆ jaˇ ve laꞈ shawnˍ g’a tuˬ yoˬ. Oˇ htaˇ teˇ co-e ve G’uiˬ sha ve tcuh kaˍ paˍ hui kaꞈ nawˬ hk’a shuˍ fawˉ mehˍ ve htaꞈ g’a hpuˇ ve yoˬ. 13 Nawˬ lehˬ miˬ guiˬ ve aˉ lehꞈ hk’e hpehꞈ ve yoˬ. Yaꞈ hkʼaˇ, aˉ lehꞈ awˬ cheh pehˆ k’ai htaˇ, k’awꞈ mehˬ la tuˬ te maˇ g’a. Chi hk’e hpehꞈ htaˇ, awˬ bon maˇ cawˬ leh shu g’awˆ baˬ leh naˆ toˇ tuˬ yoˬ. 14 Naˆ hoꞈ ve miˬ guiˬ chi hk’oˆ lo nawˬ lehˬ awˬ g’euˆ hk’e hpehꞈ ve yoˬ. Hk’aw pui hk’oˆ lo cawˬ ve venˇ lehˬ faˉ taˍ maˇ g’a. 15 Kawˆ faiˇ tuˉ leh hk’awˍ lawˇ tcuhˍ mvuhꞈ taˍ ve chaw teˇ g’aˇ kaꞈ maˇ te jaw. Yaꞈ hkʼaˇ, yehˬ k’a hk’aw ve chaw teˇ g’aˇ le le awˬ g’euˆ htaꞈ g’a mawˬ tuˬ mvuh kuiˬ lo teh taˍ ve yoˬ. 16 Chi ve hk’a shuˍ shuˍ nawˬ daꞈ ve htaꞈ te ve k’o, shu htaꞈ awˬ g’euˆ baˬ piˇ chehˇ ve hk’e hpehꞈ ve yoˬ. Nawˬ daꞈ ve htaꞈ te ve shu g’a mawˬ htaˇ, mvuhˇ naw ma hk’oˆ chehˇ ve nawˬ ve Awˬ pa Gʼuiˬ sha htaꞈ yawˇ hui chiˇ mvuh tuˬ yoˬ. 17 Moˉseˍ ve awˬ liˇ tawˇ hkawˇ, maˇ heˆ leh tcuh kaˍ paˍ ve tawˇ hkawˇ maˇ g’aꞈ te tuˬ ngaˬ laˬ ve tehꞈ taˇ dawˇ. Yaꞈ hkʼaˇ, te biˇ tuˬ ngaˬ laˬ ve yoˬ. 18 Ngaˬ nawˬ hui htaꞈ k’oˆ laˇ ve, mvuhˇ naw ma leh miˬ guiˬ mehˉ k’ai ve htawˇ, awˬ liˇ tawˇ hkawˇ hk’aw bvuhꞈ taˍ ve liꞈ mehˆ ehˉ leh mehˉ naˬ ehˉ teˇ mehˆ kaꞈ maˇ mehˉ k’ai g’a. Teˇ ceuˬ le le bvuhꞈ taˍ ve hk’e hpehꞈ la tuˬ yoˬ. 19 A shu teˇ g’aˇ awˬ liˇ tawˇ hkawˇ i jaˇ ve htaꞈ maˇ g’aꞈ te leh shu maˇ g’aꞈ te tuˬ maˍ piˇ ve k’o, yawˇ mvuhˇ naw ma mvuhˇ miˬ hk’aw maˇ chehˇ keunˍ. Yaꞈ hkʼaˇ, a shu teˇ g’aˇ g’aꞈ te leh shu g’aꞈ te tuˬ maˍ piˇ ve k’o, yawˇ mvuhˇ naw ma mvuhˇ miˬ hk’aw chehˇ keunˍ ve yoˬ. 20 Ngaˬ nawˬ hui htaꞈ k’oˆ laˇ ve, bon awˬ hoˉ leh Hpaˍriˍsehˇ hui aꞈ kehˉ nawˬ daꞈ ve htaꞈ maˇ te ve k’o, mvuhˇ naw ma mvuhˇ miˬ hk’aw nawˬ maˇ g’a loꞈ˗e taˬ. 21 “Chaw htaꞈ maˇ g’a tiˇ pehˍ. Chaw htaꞈ tiˇ pehˍ ve chaw htaꞈ shaˉ nanˉ lo suhˉ jehˬ laˇ tuˬ yoˬ” tehꞈ nawˬ g’a kaˇ jaw ve yoˬ. 22 Yaꞈ hkʼaˇ, ngaˬ nawˬ hui htaꞈ k’oˆ laˇ ve, shu htaꞈ hk’aˬ htaˆ kaꞈ beuꞈ chehˇ ve chaw hui lehˬ, suhˉ jehˬ tuˬ shaˉ nanˉ lo g’a shiˍ k’ai ve yoˬ. Yaꞈ hkʼaˇ, chaw oˇ ve teˇ g’aˇ shu htaꞈ maˇ shawˍ maˇ caˆ k’oˆ ve k’o, shaˉ nanˉ lonˉ hk’aw g’a shiˍ k’ai ve yoˬ. Yaꞈ hkʼaˇ, yawˇ shu htaꞈ chaw k’aˍ tehꞈ k’oˆ leh deˇ piˇ ve k’o, yawˇ htaꞈ te luˬ tuˬ suhˉ g’a jehˬ piˇ ve yoˬ. 23 Chi htaꞈ pa taw, nawˬ mawˇ yuˬ leh Gʼuiˬ sha htaꞈ tuˉ tanˇ piˇ tuˬ te chehˇ htaˇ, shu nawˬ htaꞈ beuꞈ chehˇ ve nawˬ tawnˇ g’a ve k’o, 24 nawˬ yuˬ laˬ ve mawˇ tuˉ tanˇ kuiˬ g’uˇ suhˍ lo teh taˉ leh yawˇ htaꞈ cawˇ daꞈ tuˬ ca k’awꞈ te sheˍ. Peuˬ hk’awꞈ nawˉ k’awꞈ laˬ leh mawˇ oˇ ve Gʼuiˬ sha htaꞈ tuˉ tanˇ piˇ g’a ve yoˬ. 25 Chaw teˇ g’aˇ nawˬ htaꞈ awˬ lawn te daꞈ gaˇ leh shaˉ nanˉ lo shiˍ k’ai laˇ ve k’o, maˇ gaˬ sheˍ htaˇ cawˇ daꞈ tuˬ haˆ te sheˍ. Maˇ heˆ k’o yawˇ nawˬ htaꞈ suhˉ jehˬ paˍ laꞈ hk’aw lo chiˇ aꞈ piˇ tuˬ yoˬ. Suhˉ jehˬ paˍ nawˬ htaꞈ htawnˍ awˬ hoˉ geh chiˇ aꞈ piˇ leh htawnˍ hk’aw lo yuˬ keu laˇ tuˬ yoˬ. 26 Nawˬ hpu maˇ shaiˍ peuˬ ve ceh ceh htawnˍ hk’aw lo g’a chehˇ tuˬ yoˬ. 27 “Haˉ chawˇ haˉ paˆ taˇ te” k’oˆ ve htaꞈ nawˬ g’a kaˇ jaw ve maˇ heˆ laˇ? 28 Yaꞈ hkʼaˇ, ngaˬ nawˬ hui htaꞈ k’oˆ laˇ ve, yaˇ miˇ htaꞈ hk’aˬ htaˆ kaꞈ nyi leh maˇ daꞈ ve hpawˇ dawˇ ve k’o, yaˇ miˇ oˇ ve htaꞈ nyi ma hk’aw haˉ chawˇ haˉ paˆ te peuˬ ve yoˬ. 29 Nawˬ ve mehˆ shiˍ laꞈ sha paˉ ve nawˬ htaꞈ te yaꞈ tcuh gaˇ ve k’o, k’ehˉ baˬ sheˍ. Awˬ to hk’a peu˗eˬ luˬ k’ai ve aꞈ kehˉ mehˆ shiˍ teˇ maˬ ceh luˬ k’ai ve lehˬ daꞈ ve yoˬ. 30 Nawˬ ve laꞈ sha paˉ ve laꞈ sheh nawˬ htaꞈ te yaꞈ tcuh gaˇ ve k’o, tawˆ baˬ sheˍ. Awˬ to hk’a peu˗eˬ luˬ k’ai ve aꞈ kehˉ laꞈ sheh teˇ paˉ luˬ k’ai ve lehˬ daꞈ ve yoˬ. 31 “A shu teˇ g’aˇ awˬ miˇ ma htaꞈ baˬ ve k’o, baˬ ve liꞈ teˇ k’oˆ g’a te ve” tehꞈ oˇ htaˇ k’oˆ jaw ve maˇ heˆ laˇ? 32 Yaꞈ hkʼaˇ, ngaˬ nawˬ hui htaꞈ k’oˆ laˇ ve, awˬ miˇ ma haˉ chawˇ haˉ paˆ maˇ te yaꞈ ve k’o, awˬ hpawˇ yawˇ htaꞈ baˬ piˇ maˇ hpehꞈ. Awˬ hpawˇ yawˇ htaꞈ baˬ piˇ ve k’o, haˉ chawˇ haˉ paˆ te tcuh ve yoˬ. Leh a shu teˇ g’aˇ yawˇ htaꞈ heuˆ ve k’o, haˉ chawˇ haˉ paˆ te ve yoˬ. 33 “Ka tiꞈ te˗oˬ ve k’o maˇ g’aꞈ te ve taˇ te. Yaˬhoˉvaˬ geh ka tiꞈ te˗oˬ ve k’o, nawˬ g’a g’aꞈ te cawˇ ve yoˬ” tehꞈ oˇ htaˇ teˇ co˗e k’oˆ jaw ve htaꞈ nawˬ g’a kaˇ jaw ve maˇ heˆ laˇ? 34 Yaꞈ hkʼaˇ, ngaˬ nawˬ hui htaꞈ k’oˆ laˇ ve, teˇ ceuˬ htaꞈ kaꞈ cuˇ leh taˇ hkanˍ. Mvuhˇ naw ma htaꞈ cuˇ leh taˇ hkanˍ. Awˬ lawn k’o, mvuhˇ naw ma lehˬ Gʼuiˬ sha ve k’aw jaw hpehꞈ ve yoˬ. 35 Miˬ guiˬ htaꞈ cuˇ leh taˇ hkanˍ. Awˬ lawn k’o, miˬ guiˬ lehˬ Gʼuiˬ sha ve hkui sheh teh kuiˬ hpehꞈ ve yoˬ. Yeˍruˆsaˍlehnˍ venˇ htaꞈ cuˇ leh taˇ hkanˍ. Awˬ lawn k’o, venˇ chi lehˬ Jawˇ mawˇ lonˉ ve venˇ hpehꞈ ve yoˬ. 36 A shu yawˇ ve oˉ k’oˍ htaꞈ cuˇ leh taˇ hkanˍ. Awˬ lawn k’o, nawˬ lehˬ oˉ k’oˍ mvuh teˇ mvuh htaꞈ hpu la tuˬ leh naˆ la tuˬ kaꞈ te maˇ g’a. 37 Nawˬ aˬ htoꞈ ma teˇ ceuˬ te tuˬ k’oˆ ve k’o te loˬ. Maˇ te tuˬ tehꞈ k’oˆ ve k’o taˇ te. Nawˬ k’oˆ ve hk’e maˇ te ve k’o, Neˇhaiˬ Saˍtanˍ htaꞈ henˇ yuˬ chehˇ ve yoˬ. 38 “Nawˬ shu ve mehˆ shiˍ teˇ paˉ naˬ tuˬ te piˇ ve k’o, yawˇ nawˬ ve mehˆ shiˍ teˇ paˉ naˬ tuˬ g’a te laˇ cawˇ ve yoˬ. Nawˬ shu ve ciˬ teˇ ciˬ te hk’ehꞈ piˇ ve k’o, yawˇ nawˬ ve ciˬ teˇ ciˬ g’a te hk’ehꞈ laˇ tcuh ve yoˬ” tehꞈ oˇ htaˇ k’oˆ jaw ve maˇ heˆ laˇ? 39 Yaꞈ hkʼaˇ, ngaˬ nawˬ hui htaꞈ k’oˆ laˇ ve, nawˬ htaꞈ maˇ daꞈ ve te laˇ ve chaw htaꞈ taˇ te hk’awꞈ. Shu nawˬ ve mehˆ hpfuhˇ teˇ paˉ hta laˇ ve k’o, teˇ paˉ k’awꞈ hpfuhˆ piˇ sheˍ. 40 A shu teˇ g’aˇ nawˬ geh awˬ lawn te daꞈ leh nawˬ ve aˉ poꞈ awˬ hk’aw hpawˇ ve yuˬ tuˬ shaˉ nanˉ lo shiˍ k’ai laˇ ve k’o, awˬ htaꞈ hpawˇ ve aˉ poꞈ kaꞈ yawˇ htaꞈ piˇ sheˍ. 41 Kanˇ paˆ cawˬ ve chaw nawˬ htaꞈ 1 kiˇ loˇ k’ai tcuh laˇ ve k’o, yawˇ geh 2 kiˇ loˇ k’ai˗o. 42 A shu teˇ g’aˇ nawˬ geh teˇ ceuˬ ceuˬ lawˬ ve k’o, yawˇ htaꞈ piˇ˗oˆ. Yawˇ nawˬ geh teˇ ceuˬ ceuˬ ngaˍ gaˇ ve k’o, yawˇ htaꞈ ngaˍ piˇ˗oˆ. 43 “Awˬ chawˇ awˬ paˆ htaꞈ haꞈ leh canˇ paˍ htaꞈ nyi bawˬ˗oꞈ” tehꞈ nawˬ ve saˍ laꞈ chi hk’e k’oˆ ve maˇ heˆ laˇ? 44 Yaꞈ hkʼaˇ, ngaˬ nawˬ hui htaꞈ k’oˆ laˇ ve, nawˬ ve canˇ paˍ htaꞈ haꞈ leh nawˬ htaꞈ fawˉ mehˍ laˇ ve chaw awˬ pon bon lawˬ piˇ˗oˆ. 45 Nawˬ chi hk’e te ve k’o, mvuhˇ naw ma hk’oˆ ve Awˬ pa Gʼuiˬ sha htaꞈ nawˬ henˇ yuˬ chehˇ ve yoˬ. Awˬ lawn k’o, yawˇ lehˬ chaw daꞈ leh chaw haiˬ htaꞈ kaꞈ mvuhˇ nyi awˬ g’euˆ ba piˇ chehˇ ve yoˬ. Leh yawˇ lehˬ daꞈ ve chaw leh haiˬ ve chaw awˬ hk’oˆ htaꞈ kaꞈ mvuhˇ yeˬ laˬ tcuh piˇ ve yoˬ. 46 Nawˬ htaꞈ haꞈ ve chaw htaꞈ ceh tiˉ nawˬ haꞈ ve k’o, Gʼuiˬ sha nawˬ htaꞈ laꞈ shawnˍ peꞈ laˇ tuˬ ve laˇ? Awˬ hkawnˍ shaw paˍ hui kaꞈ chi hk’a shuˍ te chehˇ ve yoˬ. 47 Nawˬ ve awˬ chawˇ geh ceh tiˉ nawˬ tawˇ yaw daꞈ ve k’o, nawˬ kaꞈ shu aꞈ kehˉ daꞈ leuˉ ve maˇ heˆ. Gʼuiˬ sha htaꞈ oˉ k’oˍ maˇ pui ve chaw kaꞈ chi hk’e te chehˇ ve yoˬ. 48 Mvuhˇ naw ma hk’oˆ ve Awˬ pa Gʼuiˬ sha chaw teˇ g’aˇ le le htaꞈ haꞈ ve hk’a shuˍ, nawˬ kaꞈ teˇ g’aˇ le le htaꞈ g’a haꞈ cawˇ ve yoˬ.