Maꞈhtehˍ

6 Shu mehˆ g’uˇ suhˍ daꞈ ve chaw hk’e taˇ te. Chi hk’e te ve k’o, mvuhˇ naw ma hk’oˆ ve Awˬ pa G’uiˬ sha nawˬ htaꞈ laꞈ shawnˍ maˇ peꞈ laˇ taˬ. 2 Nawˬ shu htaꞈ ga piˇ ve teˇ yanˇ behˬ heh ma meuˆ leh chaw awˬ moˍ lonˉ g’a kaˇ tcuh gaˇ ve hk’e taˇ te. Daꞈ ve hk’e te ve chaw lehˬ, bon yehˬ hk’aw leh yaꞈ k’aw hpuiˇ lo oˇ hk’e te chehˇ ve yoˬ. Yawˇ hui chi hk’e te ve lehˬ, shu mawˬ leh chiˇ mvuh laˇ ve htaꞈ heuˆ gaˇ ve pa taw yoˬ. Yaꞈ hk’aˇ, ngaˬ nawˬ hui htaꞈ k’oˆ laˇ ve, yawˇ hui g’a tuˬ ve laꞈ shawnˍ lehˬ chi hk’e ceh tiˉ g’a ve yoˬ. 3 Nawˬ shu htaꞈ ga piˇ ve teˇ yanˇ awˬ nu ve chaw htaꞈ taˇ shiˍ tcuh. 4 Nawˬ daꞈ ve awˬ ceuˬ te ve shu htaꞈ taˇ mawˬ tcuh. Chi hk’e te ve k’o, hk’a peu˗eˬ htaꞈ mawˬ shehˍ hpaˇ Awˬ pa Gʼuiˬ sha nawˬ htaꞈ laꞈ shawnˍ peꞈ laˇ tuˬ yoˬ. 5 Nawˬ bon lawˬ ve teˇ yanˇ heˍ puiˉ ve chaw hui hk’e taˇ te. Yawˇ hui shu mawˬ tuˬ bon yehˬ hk’aw leh yaꞈ kʼaw ceh daꞈ kuiˬ lo huˉ taˍ leh bon lawˬ ve yoˬ. Yawˇ hui lehˬ laꞈ shawnˍ chi hk’e ceh tiˉ g’a ve yoˬ. 6 Yaꞈ hk’aˇ, nawˬ bon lawˬ ve teˇ yanˇ nawˬ ve bawehˇ hk’aw teˇ g’aˇ tiˉ loꞈ˗e leh yehˬ miˉ hoˆ peuˬ hk’awꞈ nawˉ, nawˬ ve Awˬ pa G’uiˬ sha geh bon lawˬ sheˍ. Chaw teˇ g’aˇ kaꞈ maˇ mawˬ g’a ve G’uiˬ sha lehˬ, awˬ ceuˬ hk’a peu˗eˬ htaꞈ mawˬ leh nawˬ htaꞈ laꞈ shawnˍ peꞈ laˇ tuˬ yoˬ. 7 Nawˬ bon lawˬ ve teˇ yanˇ teˇ hkawˇ ceh tiˉ ve htaꞈ laiˉ pawˆ taˇ k’oˆ. G’uiˬ sha htaꞈ oˉ k’oˍ maˇ pui ve chaw chi hk’e te ve yoˬ. Yawˇ hui bon maw chaweh lawˬ ve pa taw, G’uiˬ sha na laˇ tuˬ yoˬ tehꞈ dawˇ ve yoˬ. 8 Yawˇ hui hk’e taˇ te. Awˬ lawn k’o, nawˬ ve Awˬ pa G’uiˬ sha lehˬ nawˬ loˍ ve awˬ ceuˬ maˇ lawˬ sheˍ htaˇ kaꞈ yawˇ awˉ lawˉ shiˍ ve yoˬ. 9 “Mvuhˇ naw ma hk’oˆ chehˇ ve ngaˬ hui ve Awˬ pa˗oˬ, nawˬ ve awˬ meh htaꞈ yawˆ yan te piˇ lawˬ˗oꞈ. 10 Nawˬ ve mvuhˇ miˬ miˬ guiˬ hk’oˆ uˉ peunˍ la˗o. Mvuhˇ naw ma hk’oˆ lo nawˬ ve a loˍ biˇ ve hk’e miˬ guiˬ hk’oˆ htaꞈ htawˇ, biˇ la tcuh˗o. 11 Yaꞈ nyi ngaˬ hui htaꞈ caˇ tuˬ peꞈ laˇ˗oˆ. 12 Shu ngaˬ hui htaꞈ te yaꞈ laˇ ve venˇ baˆ htaꞈ ngaˬ hui hpehˇ piˇ ve hk’e, ngaˬ hui htaꞈ kaꞈ venˇ baˆ hpehˇ laˇ˗oˆ. 13 Ngaˬ hui maˇ te yaꞈ tuˬ ga laˇ leh haiˬ ve awˬ shehˍ hpaˇ htaꞈ ponˬ laˇ˗oˆ.” 14 Nawˬ htaꞈ te yaꞈ laˇ ve chaw htaꞈ venˇ baˆ hpehˇ piˇ ve k’o, mvuhˇ naw ma hk’oˆ chehˇ ve Awˬ pa G’uiˬ sha kaꞈ nawˬ htaꞈ venˇ baˆ hpehˇ laˇ tuˬ yoˬ. 15 Yaꞈ hk’aˇ, nawˬ shu htaꞈ venˇ baˆ maˇ hpehˇ piˇ ve k’o, G’uiˬ sha kaꞈ nawˬ htaꞈ venˇ baˆ maˇ hpehˇ laˇ taˬ. 16 Nawˬ caˇ tuˬ ce ve teˇ yanˇ mehˆ hpfuhˇ nawˍ lehˍ te leh chaw heˍ paˍ hk’e taˇ te. Awˬ lawn k’o, yawˇ hui mehˆ hpfuhˇ nawˍ lehˍ te ve leh caˇ tuˬ ce ve tehꞈ shu mawˬ tuˬ te chehˇ ve yoˬ. Yawˇ hui lehˬ laꞈ shawnˍ chi hk’e ceh tiˉ g’a keunˍ ve yoˬ. 17 Yaꞈ hk’aˇ, caˇ tuˬ ce ve teˇ yanˇ mehˆ hpfuhˇ tsuhˇ leh oˉ k’oˍ mvuh nyi sha tuˬ te ve yoˬ. 18 Nawˬ chi hk’e te ve k’o, nawˬ caˇ tuˬ ce ve htaꞈ chaw teˇ g’aˇ kaꞈ maˇ shiˍ g’a. Awˬ pa G’uiˬ sha ceh tiˉ shiˍ g’a ve yoˬ. Leh yawˇ nawˬ htaꞈ laꞈ shawnˍ peꞈ laˇ tuˬ yoˬ. 19 Miˬ guiˬ hk’oˆ lo mawˇ jeˬ taˇ shaw hpoˆ. Awˬ lawn k’o, mawˇ chi teˇ hpaˍ htaꞈ yawˇ taˆ puiˉ ve, pfuhˇ caˇ puiˉ ve, leh chaw hkʼawˇ hkʼawˇ yuˬ gʼa ve yoˬ. 20 Yaꞈ hk’aˇ, mvuhˇ naw ma hk’oˆ lo mawˇ jeˬ shaw hpoˆ taˍ˗oꞈ. Awˬ lawn k’o, oˇ kaˬ lo yawˇ maˇ taˆ puiˉ, pfuhˇ maˇ caˇ puiˉ, leh chaw hkʼawˇ hkʼawˇ yuˬ maˇ gʼa. 21 Nawˬ awˬ pon aˬ htoꞈ ma teˇ ceuˬ awˬ hpfuhˇ hk’aˆ ve htawˇ maˇ k’oˆ, nawˬ oˇ ve htaꞈ ceh tiˉ dawˇ nyi chehˇ ve yoˬ. 22 Mehˆ shiˍ lehˬ, kawˆ faiˇ awˬ g’euˆ hk’e hpehꞈ ve yoˬ. Nawˬ daꞈ ve awˬ ceuˬ htaꞈ ceh tiˉ nyi ve k’o, awˬ g’euˆ nawˬ htaꞈ ba laˇ tuˬ yoˬ. 23 Yaꞈ hk’aˇ, maˇ daꞈ ve hpawˇ ceh tiˉ nyi ve k’o, nawˬ naˆ hoꞈ ve hk’aw chehˇ taˍ ve htaꞈ shuˍ ve yoˬ. Nawˬ ve awˬ g’euˆ naˆ hoꞈ k’ai ve k’o, kawˆ tuˬ uiˍ jaˇ ve yoˬ. 24 Jawˇ mawˇ 2 gʼaˇ ve awˬ ceˬ chaw teˇ g’aˇ kaꞈ te maˇ gʼa. Awˬ lawn kʼo, yawˇ teˇ gʼaˇ htaꞈ haꞈ kʼo, teˇ gʼaˇ htaꞈ maˇ haꞈ tuˬ yoˬ. Maˇ heˆ leh teˇ gʼaˇ htaꞈ yawˆ yan ve kʼo, teˇ gʼaˇ htaꞈ maˇ yawˆ maˇ yan te tuˬ yoˬ. Nawˬ G’uiˬ sha ve awˬ ceˬ leh hpu shi mawˇ jeˬ ve awˬ ceˬ teˇ pawˆ tiˉ teˇ geh te maˇ g’a. 25 Chi htaꞈ pa taw, ngaˬ nawˬ hui htaꞈ k’oˆ laˇ ve, nawˬ a shaꞈ teꞈ kuiˬ hk’aw aˬ htoꞈ ma caˇ tuˬ dawˬ tuˬ taˇ dawˇ hkiˉ. Maˇ heˆ leh aˉ poꞈ veuꞈ k’aˇ maˇ g’a veuꞈ tuˬ taˇ dawˇ hkiˉ. Awˬ lawn k’o, nawˬ ve a shaꞈ teꞈ ve lehˬ caˇ tuˬ aꞈ kehˉ awˬ hpfuhˇ hk’aˆ leh nawˬ ve awˬ to htawˇ aˉ poꞈ veuꞈ k’aˇ aꞈ kehˉ awˬ hpfuhˇ hk’aˆ ve yoˬ. 26 Ngaˆ htaꞈ nyi sheˍ. Yawˇ hui lehˬ caˬ maˇ ti, caˬ maˇ gʼeuꞈ leh caˬ ciˇ yehˬ awˬ hkʼaw lo caˬ shiˍ maˇ pfuhˇ keu. Yaꞈ hkʼaˇ, mvuhˇ naw ma hk’oˆ chehˇ ve Awˬ pa Gʼuiˬ sha yawˇ hui htaꞈ caˇ tuˬ caˍ piˇ ve yoˬ. Nawˬ ngaˆ teˇ hpaˍ aꞈ kehˉ awˬ hpfuhˇ hk’aˆ ve maˇ heˆ laˇ? 27 Nawˬ dawˇ haˍ jaˇ leh nawˬ ve a shaꞈ teˇ naˍ riˍ k’awꞈ chehˇ k’ai g’a˗aw laˇ? 28 Aˬ htoꞈ ma te nawˬ aˉ poꞈ veuꞈ k’aˇ maˇ g’a veuꞈ tuˬ dawˇ haˍ ve le? Heh puiˉ hk’aw lo cawˬ ve suhˉ veˆ htaꞈ nyi sheˍ. Yawˇ hui kanˉ maˇ te leh aˉ poꞈ veuꞈ k’aˇ kaꞈ maˇ tawˉ. 29 Yaꞈ hkʼaˇ, ngaˬ nawˬ hui htaꞈ k’oˆ laˇ ve, jawˇ mawˇ Sawˉlaꞈmonˍ ve veuꞈ k’aˇ suhˉ veˆ chi teˇ hpaˍ hk’e taw maˇ daꞈ. 30 Suhˉ veˆ chi teˇ hpaˍ lehˬ teˇ nyi ceh tiˉ chehˇ g’a leh shawˉ pawˍ nawˍ k’ai leh chaw yaˇ tuˉ baˬ ve htawˇ, suhˉ veˆ chi teˇ hpaˍ htaꞈ G’uiˬ sha daꞈ tuˬ te piˇ ve yoˬ. Chi htaꞈ pa taw, nawˬ ve yonˍ hk’aˇ maˇ yonˍ yeˬ ve htawˇ, suhˉ veˆ aꞈ kehˉ G’uiˬ sha nawˬ htaꞈ daꞈ tuˬ k’awꞈ te laˇ tuˬ yoˬ. 31 Chi htaꞈ pa taw, aˬ htoꞈ ma g’a caˇ g’a dawˬ tuˬ leh g’a veuꞈ tuˬ htaꞈ taˇ dawˇ hkiˉ. 32 G’uiˬ sha htaꞈ oˉ k’oˍ maˇ pui ve chaw chi hk’e dawˇ haˍ chehˇ ve yoˬ. Yaꞈ hk’aˇ, nawˬ awˬ ceuˬ chi ve teˇ hpaˍ htaꞈ loˍ ve tehꞈ mvuhˇ naw ma hk’oˆ chehˇ ve Awˬ pa Gʼuiˬ sha awˉ lawˉ htaˇ kaꞈ shiˍ˗oˬ ve yoˬ. 33 Chi htaꞈ pa taw, G’uiˬ sha ve mvuhˇ miˬ uˉ peunˍ ve leh yawˇ ve hkawˇ na yuˬ ve htaꞈ nawˬ a shaꞈ teꞈ kuiˬ hk’aw a yeˇ uiˍ jaˇ ve tehꞈ shawˍ-oꞈ. Nawˬ chi hk’e te ve k’o, nawˬ loˍ ve awˬ ceuˬ hk’a peu˗eˬ yawˇ peꞈ laˇ tuˬ yoˬ. 34 Shawˉ pawˍ awˬ pon taˇ dawˇ hkiˉ. Awˬ lawn k’o, shawˉ pawˍ awˬ nu ve awˬ ceuˬ htaꞈ g’a dawˇ haˍ sheˍ ve yoˬ. Teˇ nyi leh teˇ nyi awˬ pon htawˇ, dawˇ hkiˉ tuˬ cawˬ maˇ jaˇ ve yoˬ.