Maꞈhtehˍ

7 Gʼuiˬ sha nawˬ htaꞈ maˇ g’a dawˇ cheˆ laˇ tuˬ nawˬ shu htaꞈ taˇ dawˇ cheˆ piˇ. 2 Nawˬ shu htaꞈ hkʼaˬ hkʼe dawˇ cheˆ piˇ ve k’o, Gʼuiˬ sha kaꞈ nawˬ htaꞈ oˇ hk’e dawˇ cheˆ laˇ tuˬ yoˬ. Leh nawˬ shu htaꞈ hk’aˬ hk’e te piˇ ve k’o, shu kaꞈ nawˬ htaꞈ oˇ hk’e te laˇ tuˬ yoˬ. 3 Nawˬ ve mehˆ shiˍ hkʼaw toˉ laꞈ lonˉ cawˬ taˍ ve kaꞈ aˬ htoꞈ ma te shu ve mehˆ shiˍ hk’aw mehˆ puˉ htaꞈ ca nyi ve le? 4 Nawˬ ve mehˆ shiˍ hkʼaw toˉ laꞈ lonˉ cawˬ taˍ ve kaꞈ aˬ htoꞈ ma te nawˬ shu ve mehˆ shiˍ hk’aw mehˆ puˉ beˆ laˇ˗a tehꞈ ca k’oˆ piˇ ve le? 5 Heˍ puiˉ ve chaw˗oˬ, nawˬ ve mehˆ shiˍ hkʼaw toˉ laꞈ lonˉ htaꞈ awˉ lawˉ yuˬ tawˆ sheˍ. Nawˬ chi hk’e te˗oˬ htaˇ, hk’a tawˍ lehˆ mawˬ g’a leh nawˬ shu ve mehˆ shiˍ hk’aw ve mehˆ puˉ htaꞈ yuˬ tawˆ piˇ g’a tuˬ yoˬ. 6 G’uiˬ sha htaꞈ tanˇ piˇ cawˇ ve awˬ ceuˬ hpuiˇ htaꞈ taˇ piˇ. Leh awˬ hpfuhˇ hk’aˆ ve shehnˉ shiˍ vaꞈ htaꞈ taˇ piˇ. Awˬ lawn k’o, yawˇ hui naˆ nehˆ leh nawˬ htaꞈ k’awꞈ hpfuhˆ cheꞈ tuˬ yoˬ. 7 Lawˬ loˬ. Lawˬ kʼo gʼa tuˬ yoˬ. Ca loˬ. Ca kʼo mawˬ tuˬ yoˬ. Yehˬ miˉ htaꞈ htawˆ loˬ. Htawˆ kʼo hpaw laˇ tuˬ yoˬ. 8 Awˬ lawn kʼo, lawˬ ve chaw gʼa tuˬ yoˬ. Ca ve chaw mawˬ tuˬ yoˬ. Leh yehˬ miˉ htaꞈ htawˆ ve chaw htawˇ, hpaw laˇ tuˬ yoˬ. 9 Yaˇ caˇ tuˬ lawˬ ve k’o, awˬ pa haˉ pui shiˍ yuˬ piˇ tuˬ ve maˇ heˆ. 10 Leh yaˇ ngaˇ lawˬ ve kʼo, vuiˬ awˬ tawꞈ ma cawˬ ve yuˬ piˇ tuˬ ve maˇ heˆ. 11 Nawˬ venˇ baˆ yaˇ hpehꞈ ve htawˇ, yaˇ htaꞈ daꞈ ve mawˇ piˇ hkawˇ shiˍ ve k’o, mvuhˇ naw ma hkʼoˆ chehˇ ve Awˬ pa Gʼuiˬ sha geh hkʼa lawˬ ve chaw htaꞈ yawˇ leuˉ leh daꞈ ve awˬ ceuˬ piˇ tuˬ ve maˇ heˆ laˇ? 12 Chi htaꞈ pa taw, shu nawˬ htaꞈ hk’aˬ hk’e te laˇ tcuh gaˇ ve k’o, nawˬ shu htaꞈ oˇ hk’e te piˇ˗oˆ. Moˉseˍ ve awˬ liˇ tawˇ hkawˇ leh tcuh kaˍ paˍ ve tawˇ hkawˇ hk’aw chi lehˬ awˬ hk’aˇ lonˉ hpehꞈ ve yoˬ. 13 Maˇ kʼoˍ ve yehˬ miˉ htaꞈ nawˬ loꞈ˗e loˬ. Awˬ lawn kʼo, yehˬ miˉ k’oˍ ve leh yaꞈ kʼaw kʼehˬ jaˇ ve lehˬ luˬ kuiˬ sheˆ kuiˬ lo kʼai ve yoˬ. Choˬ kaˬ lo k’ai ve chaw maˇ jaˇ. 14 Yaꞈ hk’aˇ, maˇ k’oˍ ve yehˬ miˉ leh maˇ k’ehˬ ve yaꞈ k’aw lehˬ a shaꞈ teꞈ kuiˬ lo shiˍ k’ai laˇ tuˬ yoˬ. Yaꞈ k’aw chi htaꞈ ca mawˬ ve chaw a ciˉ ceh tiˉ cawˬ ve yoˬ. 15 Maˇ heˆ heˆ ve tcuh kaˍ paˍ htaꞈ shaˍ tiꞈ te˗o. Yawˇ hui yawˬ awˬ guiˬ kʼuˉ veuꞈ leh nawˬ geh laˬ tuˬ yoˬ. Yaꞈ hk’aˇ, yawˇ hui lehˬ heh hpuiˇ htaꞈ shuˍ leh nawˬ htaꞈ cheꞈ caˇ gaˇ ve yoˬ. 16 Iˉ shiˍ htaꞈ mawˬ k’o, awˬ cehˬ hk’aˬ hk’e hpehꞈ ve htaꞈ nawˬ shiˍ g’a ve yoˬ. Chi ve hk’a shuˍ shuˍ, chaw teˇ g’aˇ teˇ ceuˬ ceuˬ te ve htaꞈ nawˬ mawˬ ve k’o, yawˇ hk’aˬ hk’e hpehꞈ ve htaꞈ nawˬ shiˍ tuˬ yoˬ. Aˉ chuˇ cehˬ lo a pehˉ meuˇ shiˍ maˇ heˆ leh maˉ nawˆ shiˍ htaꞈ nawˬ g’a shaˉ jaw-aw laˇ? 17 Suhˆ cehˬ daꞈ ve k’o, daꞈ ve awˬ shiˍ nawꞈ tuˬ yoˬ. Yaꞈ hk’aˇ, suhˆ cehˬ maˇ daꞈ ve k’o maˇ daꞈ ve awˬ shiˍ nawꞈ tuˬ yoˬ. 18 Suhˆ cehˬ daꞈ ve k’o, maˇ daꞈ ve awˬ shiˍ nawꞈ maˇ g’a. Leh suhˆ cehˬ maˇ daꞈ ve k’o, daꞈ ve awˬ shiˍ kaꞈ nawꞈ maˇ g’a. 19 Awˬ shiˍ maˇ nawꞈ ve suhˆ cehˬ teˇ cehˬ le le htaꞈ tu baˬ leh aˬ miˍ tuˉ baˬ tuˬ yoˬ. 20 Chi htaꞈ pa taw, chaw teˇ g’aˇ maˇ heˆ heˆ ve tcuh kaˍ paˍ hpehꞈ ve htaꞈ nawˬ shiˍ gaˇ ve k’o, yawˇ te ve awˬ ceuˬ htaꞈ hk’a dehꞈ nyi sheˍ. 21 Ngaˬ htaꞈ “Jawˇ mawˇ˗oˬ” hkʼa kʼoˆ ve chaw teˇ gʼaˇ le le mvuhˇ naw ma ve mvuhˇ miˬ yaˇ g’a hpehꞈ tuˬ ve maˇ heˆ. Yaꞈ hk’aˇ, mvuhˇ naw ma hk’oˆ ngaˬ ve Awˬ pa ve a loˍ htaꞈ te ve chaw ceh tiˉ mvuhˇ miˬ yaˇ g’a hpehꞈ tuˬ yoˬ. 22 Oˇ ve teˇ nyi gaˬ k’o chaw maˇ maˇ ngaˬ htaꞈ k’oˆ laˇ ve, “Jawˇ mawˇ˗oˬ, ngaˬ hui awˬ nu ve chaw htaꞈ nawˬ ve awˬ lawn k’oˆ maˍ piˇ leh nawˬ ve awˬ meh htaꞈ cuˇ leh neˇ haiˬ teˇ hpaˍ htaꞈ gʼaꞈ kʼoˬ ve maˇ heˆ laˇ? Ngaˬ hui nawˬ ve kanˇ paˆ htaꞈ cuˇ leh anˇ tuˬ laiˉ ceuˬ kaꞈ te ve maˇ heˆ laˇ?” 23 Yaꞈ hk’aˇ, ngaˬ yawˇ hui htaꞈ k’oˆ piˇ ve, “chaw haiˬ teˇ hpaˍ-oˬ, tawˆ k’ai˗o. Ngaˬ nawˬ hui htaꞈ a ciˉ kaꞈ maˇ shiˍ.” 24 Ngaˬ ve hkawˇ htaꞈ na leh g’aꞈ te ve chaw lehˬ, haˉ pui hkʼoˆ lo yehˬ te ve cuˇ yiˍ cawˬ ve chaw htaꞈ shuˍ ve yoˬ. 25 Haˉ pui hkʼoˆ lo yehˬ te ve yeˬ jaˇ ve pa taw, mvuhˇ yeˬ laˬ hehnˇ jaˇ leh iˉ kaˆ htonˍ leh mvuhˇ yeˬ mvuhˇ haw lonˉ laˬ ve htawˇ maˇ luˬ k’ai. 26 Yaꞈ hk’aˇ, ngaˬ maˍ piˇ ve hkawˇ na leh maˇ g’aꞈ te ve chaw lehˬ, shehˇ shiˍ hkʼoˆ yehˬ te ve chaw k’aˍ htaꞈ shuˍ ve yoˬ. 27 Mvuhˇ yeˬ mvuhˇ haw lonˉ laˬ leh iˉ kaˆ htonˍ htaˇ, yehˬ luˬ k’ai ve yoˬ. 28 Yeˍsuˆ maˍ peuˬ hk’awꞈ nawˉ yawˇ maˍ ve htaꞈ g’a kaˇ ve chaw anˇ jaˇ ve yoˬ. 29 Awˬ lawn kʼo, yawˇ maˍ ve lehˬ bon awˬ hoˉ teˇ hpaˍ maˍ ve htaꞈ maˇ shuˍ. Yawˇ G’uiˬ sha geh kanˇ paˆ g’a leh yawˇ hui htaꞈ maˍ piˇ ve yoˬ.