HKRIꞈ YAˇ VE A SHAꞈ TEꞈ HKʼAˇ
“Pawˇluꞈ . . . Gʼuiˬ sha ve bon htaꞈ chiˇ mvuh leh nyi ma awˬ gʼaˇ cawˬ la ve”
Roˉmaꞈ mvuhˇ miˬ hkʼaw ve Hkriꞈ yaˇ awˬ moˍ Pawˇluꞈ gaˬ la ve gʼa kaˇ htaˇ, Pawˇluꞈ htaꞈ ca haꞈ yuˬ la tuˬ yawˇ hui ve awˬ tan teˇ hpaˍ 64 kiˇ loˇ gʼa kʼai ve yoˬ. Yawˇ hui chi hkʼe te ve pa taw, Pawˇluꞈ htaꞈ hkʼaˬ hkʼe heuˆ la piˇ ve le? “Pawˇluꞈ yawˇ hui htaꞈ gʼa mawˬ htaˇ, Gʼuiˬ sha ve bon htaꞈ chiˇ mvuh leh nyi ma awˬ gʼaˇ cawˬ la ve yoˬ.” (Tcuh 28:15) Pawˇluꞈ Hkriꞈ yaˇ awˬ moˍ geh ca guiˇ˗e htaˇ, yawˇ awˬ viˉ awˬ nyi htaꞈ hkʼaˬ htaˆ kaꞈ awˬ gʼaˇ piˇ ve yoˬ. Yaꞈ hkʼaˇ, chi teˇ hkui yawˇ htawnˍ yaˇ hpehꞈ ve pa taw, yawˇ awˬ viˉ awˬ nyi geh awˬ gʼaˇ loˍ ve yoˬ.—2 Kawˇ 13:10
Chi beuꞈ teˇ co˗e, toˇ nyi shehˍ hpaˇ lehˬ Hkriꞈ yaˇ awˬ moˍ geh kʼai leh awˬ viˉ awˬ nyi htaꞈ awˬ gʼaˇ piˇ ve yoˬ. Yawˇ kaꞈ awˬ nu ve Gʼuiˬ sha ve kanˉ te ve chaw hkʼa shuˍ yoˬ. Teˇ pawˆ pawˆ kʼo, yawˇ hui heuˬ ve, dawˇ haˍ ve, awˬ gʼaˇ nuˇ ve yoˬ. Toˇ nyi shehˍ hpaˇ leh yawˇ ve awˬ miˇ ma nawˬ hui ve Hkriꞈ yaˇ awˬ moˍ hkʼaw ca guiˇ la htaˇ, yawˇ hui htaꞈ awˬ gʼaˇ piˇ tuˬ nawˬ hkʼaˬ hkʼe te gʼa ve le? Chi hkʼe te ve kʼo “teˇ gʼaˇ htaꞈ teˇ gʼaˇ awˬ gʼaˇ piˇ daꞈ” gʼa tuˬ yoˬ.—Roˉ 1:11, 12
Hto toˇ tuˬ awˬ pon hpawnˬ daꞈ ve. Toˇ nyi shehˍ hpaˇ ca guiˇ la ve teˇ shinˉ htaˇ, awˬ viˉ awˬ nyi coˇ caˇ leh teˇ geh hpawnˬ daꞈ la ve kʼo, toˇ nyi shehˍ gʼa mawˬ htaˇ awˬ gʼaˇ gʼa ve yoˬ. (1 Hteˇ 1:2, 3; 2:20) Toˇ nyi shehˍ hpaˇ ca guiˇ la ve teˇ ha pa hkʼaw nawˬ teˇ tcuhˉ teˇ yanˇ ve gʼuˇ suhˍ peuˍ ve chaw te gʼa ve yoˬ. Nawˬ toˇ nyi shehˍ hpaˇ leh yawˇ ve awˬ miˇ ma geh teˇ geh hto toˇ gʼa˗aw laˇ? Maˇ heˆ leh, yawˇ hui htaꞈ shiˍ veuˬ leh nawˬ ve Liꞈ hpu henˇ ve chaw geh teˇ geh kʼai gʼa˗aw laˇ? Awˬ viˉ awˬ nyi awˬ suhˉ maˇ kʼoˆ, hkʼa dehꞈ hto toˇ maˇ puiˉ ve chaw geh maˇ kʼoˆ, teˇ gʼaˇ le le geh Gʼuiˬ sha ve kanˉ gʼa te ve yawˇ hui ha lehˬ jaˇ.
Ha lehˬ ha kʼa haꞈ yuˬ piˇ ve. Haˉ kuiˬ leh awˍ teˇ poˍ poˍ toˇ nyi shehˍ hpaˇ htaꞈ gu taˍ piˇ gʼa˗aw laˇ? Chi hkʼe te ve kʼo, nawˬ yawˇ hui htaꞈ haꞈ ve tehꞈ hpeuꞈ maw piˇ ve yoˬ. Awˬ tehˬkʼo, yawˇ hui hkʼaˬ hkʼe kaꞈ hpehꞈ ve chi hkʼe tawn tawn maˇ loˍ.—Luˉ 10:38-42
Yawˇ beˆ maˍ laˇ hkawˇ na yuˬ leh gʼaꞈ te ve. Yaˬhoˉvaˬ ve kanˉ te puiˉ la tuˬ, toˇ nyi shehˍ hpaˇ haꞈ pehnˇ ve hkʼaw ngaˬ hui htaꞈ ga laˇ ve yoˬ. Teˇ pawˆ pawˆ kʼo, yawˇ nawˬ hui htaꞈ hteˇ leh beˆ maˍ laˇ tuˬ yoˬ. (1 Kawˇ 5:1-5) Ngaˬ hui toˇ nyi shehˍ hpaˇ ve hkawˇ htaꞈ na yuˬ leh haꞈ yuˬ ve kʼo, yawˇ ha lehˬ tuˬ yoˬ.—Heˍ 13:17
Ha lehˬ ve hkʼaw awˬ bon uiˍ hkawˇ kʼoˆ piˇ ve. Toˇ nyi shehˍ hpaˇ leh yawˇ ve awˬ miˇ ma ca guiˇ la ve nawˬ awˬ gaˇ gʼa jaˇ tehꞈ kʼoˆ piˇ sheˍ. Chi hkʼe te gʼa tuˬ, nawˬ kʼoˆ piˇ ve maˇ heˆ leh liꞈ bvuhꞈ piˇ kaꞈ gʼa ve yoˬ.—Kawˇ 3:15