Nawˬ Gʼuiˬ sha ve awˬ hoꞈ awˬ han htaꞈ gʼa mawˬ˗aw laˇ?

Suhˉ viˆ awˬ sheuˉ laiˉ ceuˬ, mvuhˇ naw ma meuꞈ keu shiˍ hkʼa biˇ, daꞈ jaˇ ve gʼuiˬ ce koˍ nawˬ awˬ ceuˬ chi teˇ hpaˍ nyi htaˇ, Gʼuiˬ sha ve laꞈ shaˉ maˉ htaꞈ nawˬ mawˬ˗aw laˇ? Ngaˬ hui awˬ paˇ awˬ kui lo Yaˬhoˉvaˬ hpanˍ taˍ ve awˬ ceuˬ htaꞈ nyi htaˇ, yawˇ ve awˬ hoꞈ awˬ han hkʼa tawˍ lehˆ gʼa mawˬ ve yoˬ. (Roˉ 1:20) Ngaˬ hui mawˬ ve awˬ ceuˬ htaꞈ hkʼa dehꞈ dehꞈ dawˇ nyi htaˇ, Gʼuiˬ sha ve kanˇ paˆ, haꞈ pehnˇ ve, cuˇ yiˍ, hteˇ ve cawˇ ve gʼa mawˬ tuˬ yoˬ.—Chiˇ 104:24

Teˇ nyi le le Yaˬhoˉvaˬ hpanˍ taˍ ve awˬ ceuˬ nawˬ aˬ htoꞈ ma gʼa mawˬ ve le? Nawˬ venˇ hkʼaw chehˇ ve htawˇ, suhˆ cehˬ hawˆ cehˬ leh ngaˆ teˇ hpaˍ mawˬ gʼa ve yoˬ. Yaˬhoˉvaˬ hpanˍ taˍ ve awˬ ceuˬ htaꞈ hkʼa dehꞈ nyi ve kʼo, ngaˬ hui hkʼe taw maˇ dawˇ haˍ, a shu yawˇ ve shoꞈ shaꞈ ve awˬ lawn htaꞈ hkʼe taw maˇ yuˬ teˍ, Yaˬhoˉvaˬ ngaˬ hui htaꞈ hkʼaˬ htaˆ kaꞈ nyi haꞈ shaˉ laˇ gʼa ve tehꞈ yonˍ maˇ la ve yoˬ. (Maꞈ 6:25-32) Nawˬ yaˇ cawˬ ve kʼo, yawˇ hui Yaˬhoˉvaˬ ve awˬ hoꞈ awˬ han awˬ hpfuhˇ shiˍ tuˬ ga piˇ cawˇ ve yoˬ. Ngaˬ hui awˬ paˇ awˬ kui cawˬ ve Gʼuiˬ sha hpanˍ taˍ ve awˬ ceuˬ awˬ hpfuhˇ shiˍ ve kʼo, ngaˬ hui lehˬ yawˇ htaꞈ kʼawꞈ meuˇ daꞈ maˇ la tuˬ yoˬ.—Chiˇ 8:3, 4

Daꞈ jaˇ ve hpanˍ taˍ ve awˬ ceuˬ Gʼuiˬ sha ve awˬ meꞈ awˬ hponˇ hpeuꞈ maw laˇ ve—Awˬ gʼeuˆ leh awˬ sheuˉ VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:

• Aˬ htoꞈ ma pa taw ngaˬ hui awˬ sheuˉ mawˬ gʼa ve le?

• Aˬ htoꞈ ma pa taw awˬ sheuˉ teˇ hpawˇ nyi kʼo teˇ ceuˬ hpehꞈ gʼa ve le?

• Aˬ htoꞈ ma pa taw mvuhˇ naw ma hkʼoˆ nyi kʼo awˬ sheuˉ maˇ shuˍ daꞈ ve le?

• Nawˬ ve yehˬ paˇ lo suhˉ cehˬ suhˆ veˆ daꞈ jaˇ ve aˬ htoꞈ ma cawˬ ve le?

• Aˬ htoꞈ ma pa taw ngaˬ hui awˬ yanˇ yehˇ leh awˬ paˇ lo cawˬ ve hpanˍ taˍ ve awˬ ceuˬ htaꞈ chaˬ nyi cawˇ ve le?