Awˬ viˉ awˬ nyi Gʼuiˬ sha ve kanˉ te laˬ maw˗oˬ ve htaꞈ nawˬ aˬ htoꞈ ma henˇ yuˬ gʼa ve le?

Hkriꞈ yaˇ awˬ moˍ laiˉ kaˬ lo, Yaˬhoˉvaˬ ve kanˉ te laˬ maw˗oˬ ve chaw laiˉ gʼaˇ cawˬ ve yoˬ. Yawˇ hui Yaˬhoˉvaˬ htaꞈ hkʼaˬ htaˆ kaꞈ gʼaˇ va ve ngaˬ hui henˇ yuˬ gʼa ve yoˬ. Gʼuiˬ sha ve kanˉ hkʼaˇ hpehꞈ laˬ jaw ve awˬ lawn leh shoꞈ shaꞈ ve awˬ lawn gʼa hpuˇ htaˇ, Yaˬhoˉvaˬ yawˇ hui htaꞈ hkʼaˬ hkʼe ga piˇ ve awˬ lawn chi teˇ hpaˍ yawˇ hui htaꞈ na nyi gʼa ve yoˬ. Ngaˬ hui yehˬ kʼa hkʼaw oˉ kʼoˍ pui htaˇ, yawˇ hui htaꞈ jehˬ laˬ leh yawˇ hui hpehꞈ laˬ jaw ve awˬ lawn kʼoˆ maˍ laˇ tcuh gʼa ve yoˬ.

Nawˬ Yaˬhoˉvaˬ ve kanˉ te laˬ maw˗oˬ ve kʼo, a shaꞈ nehˬ ve awˬ viˉ awˬ nyi htaꞈ nawˬ hpehꞈ la jaw ve awˬ lawn kʼoˆ maˍ piˇ sheˍ. Yaˍkoˆ leh Yoˇsehꞈ yawˇ hui ve awˬ lawn awˬ yaˇ awˬ duˬ htaꞈ kʼoˆ maˍ piˇ ve yoˬ. (Awˬ 48:21, 22; 50:24, 25) Peuˬ hkʼawꞈ nawˉ, Yaˬhoˉvaˬ anˇ tuˬ te ve kanˉ yehˬ shehˍ hpaˇ teˇ hpaˍ htaꞈ yawˇ ve yehˬ kʼa hkʼaw ve chaw htaꞈ kʼoˆ maˍ piˇ tcuh gaˇ ve yoˬ. (Bon 4:9, 10; Chiˇ 78:4-7) Ngaˬ hui ve teˇ co˗e htawˇ, Yaˬhoˉvaˬ yawˇ ve kanˉ hkʼaˇ awˬ hkʼaw lo anˇ tuˬ te ve kanˉ teˇ hpaˍ ve awˬ lawn awˬ pa awˬ e leh Hkriꞈ yaˇ awˬ moˍ hkʼaw awˬ nu ve chaw yaˇ nehˬ teˇ hpaˍ htaꞈ kʼoˆ maˍ piˇ gʼa ve yoˬ.

Tawˍ ve tsuhˇ ve gʼa hpuˇ htaˇ teˇ moˍ tiˉ hpehꞈ sheˍ VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:

• Ngaˬ hui ve kanˉ htaꞈ tawˍ laˇ ve mvuhˇ miˬ teˇ hpaˍ hkʼaw chehˇ ve awˬ viˉ awˬ nyi teˇ hpaˍ htaꞈ Awˆsuh˗teˇriˇaˇ mvuhˇ miˬ lo ve awˬ tcuhˆ puiˍ hkʼaˬ hkʼe te ga piˇ ve le?

• Ngaˬ hui ve kanˉ htaꞈ tawˍ laˇ ve mvuhˇ miˬ hkʼaw chehˇ ve awˬ viˉ awˬ nyi, yawˇ hui yonˍ yeˬ gʼa tuˬ hkʼaˬ hkʼe te ve le?

• Roˬmaˇniˇ˗aˇ mvuhˇ miˬ hkʼaw chehˇ ve awˬ viˉ awˬ nyi laiˉ gʼaˇ aˬ htoꞈ ma pa taw yawˇ hui Yaˬhoˉvaˬ ve kanˉ hkʼaˇ hkʼaw tawˆ˗e ve le? Leh yawˇ hui hkʼaˬ hkʼe te leh kʼawꞈ kʼoꞈ la ve le?

• Nawˬ yonˍ ve cawˬ maˇ la tuˬ hpehꞈ laˬ jaw ve awˬ lawn chi hkʼaˬ hkʼe ga laˇ ve le?