Ngaˬ hui Gʼuiˬ sha ve kanˉ te cheuˬ la ve awˬ hkʼaˇ—Yehˬ shehˍ hpaˇ yehˬ miˉ maˇ hpaw laˇ ve geh yaw daꞈ ve

Aˬ htoꞈ ma pa taw a yeˇ uiˍ ve le?: Chi beuꞈ teˇ co˗e, awˬ hkeun awˬ suhˉ cawˬ maˇ la leh laiˉ gʼaˇ maˇ shiˍ daꞈ ve chaw geh tawˇ yaw daꞈ ve kaꞈ kawˆ ve yoˬ. Chi htaꞈ pa taw, laiˉ gʼaˇ awˬ han htawnˬ tuˬ yehˇ leh yehˬ miˉ hpeꞈ lo tawˇ yaw daꞈ tuˬ ve awˬ hkeun cawˬ ve yoˬ. (Intercom) Chi lehˬ, yehˬ shehˍ hpaˇ yehˬ miˉ maˇ hpaw laˇ ve htawˇ, ca guiˇ la ve chaw geh tawˇ yaw daꞈ gʼa ve yoˬ. Ngaˬ hui a ciˉ ciˉ dawˇ haˍ ve yoˬ hehˉ. Awˬ lawn kʼo, ngaˬ hui yehˬ shehˍ hpaˇ htaꞈ maˇ mawˬ gʼa. Yaꞈ hkʼaˇ, yehˬ shehˍ hpaˇ ngaˬ hui htaꞈ mawˬ gʼa ve yoˬ. Ngaˬ hui awˬ hkʼeun yehˇ leh yehˬ miˉ hpeꞈ lo shu geh tawˇ yaw daꞈ htaˇ haꞈ hanˉ ve hkʼaw te gʼa tuˬ, awˬ hkʼaˇ chi teˇ hpaˍ ga laˇ tuˬ yoˬ.

Te tuˬ awˬ hkʼaˇ:

• Daꞈ ve hpawˇ dawˇ nyi sheˍ. Yehˬ shehˍ hpaˇ laiˉ gʼaˇ awˬ han htawnˬ tuˬ maˇ heˆ leh yehˬ miˉ hpeꞈ lo tawˇ yaw daꞈ tuˬ awˬ hkʼeun cawˬ ve htawˇ, yawˇ hui ngaˬ hui geh hkʼa dehꞈ yaw daꞈ laˇ tuˬ yoˬ hehˉ.

• Tawˇ taˍ sheˍ awˬ han htawnˬ tuˬ teˇ hpaˍ hpaˍ kʼo, awˬ hkawˇ kuˬ tuˬ maˇ nyiˉ sheˍ htaˇ, ngaˬ hui ve awˬ han leh awˬ hkawˇ hpaˇ keu˗oˬ ve yoˬ. Yehˬ shehˍ hpaˇ nawˬ htaꞈ mawˬ leh nawˬ hkawˇ gʼa kaˇ˗oˬ.

• Yehˬ shehˍ hpaˇ hkʼawꞈ laˇ htaˇ, nawˬ yawˇ ve mehˆ hpfuhˇ mawˬ daꞈ ve hkʼe yaw sheˍ. Kʼehˉ˗ehꞈ te leh nawˬ gu taˍ ve hkʼe kʼoˆ piˇ sheˍ. Awˬ han htawnˬ tuˬ awˬ paˇ lo taˇ ca nyi. Yehˬ shehˍ hpaˇ maˇ hkʼawꞈ laˇ ve kʼo, awˬ hkawˇ taˇ hpaˇ keu˗aˉ piˇ.

• Tawˇ yaw daꞈ peuˬ hkʼawꞈ nawˉ, yehˬ shehˍ hpaˇ nawˬ htaꞈ nyi chehˇ sheˍ leh na chehˇ sheˍ ve tehꞈ tawnˇ taˍ sheˍ.