HKRIꞈ YAˇ VE A SHAꞈ TEꞈ HKʼAˇ
Teˇ hkʼawꞈ le le ve hpawnˬ daꞈ lonˉ 3 nyi—Haꞈ pehnˇ ve hpeuꞈ maw piˇ gʼa ve awˬ yanˇ
Teˇ hkʼawꞈ le le ve hpawnˬ daꞈ lonˉ 3 nyi ve kʼai htaˇ aˬ htoꞈ ma te ngaˬ hui ha lehˬ jaˇ ve le? Oˇ htaˇ teˇ co˗e ve Iˉsaˍreˍlaˆ chaw hkʼa shuˍ, ngaˬ hui ve teˇ co˗e ve hpawnˬ daꞈ lonˍ 3 nyi kaꞈ, awˬ viˉ awˬ nyi laiˉ hinˉ gʼaˇ geh Yaˬhoˉvaˬ htaꞈ teˇ geh oˉ kʼoˍ gʼa pui ve yoˬ. Ngaˬ hui co ha hpawˇ ve caˇ tuˬ gʼa ve ha lehˬ jaˇ. Ngaˬ hui yehˬ kʼa leh awˬ chawˇ geh teˇ geh gʼa chehˇ ve kaꞈ ha lehˬ jaˇ. Awˬ yanˇ chi htaꞈ ngaˬ hui awˬ hpfuhˇ shiˍ jaˇ ve yoˬ. Chi lehˬ ngaˬ hui hpawnˬ daꞈ lonˉ 3 nyi kʼai gaˇ tuˬ te laˇ ve yoˬ.
Ngaˬ hui hpawnˬ daꞈ˗e htaˇ shu htaꞈ haꞈ pehnˇ ve hkʼaˬ hkʼe te hpeuꞈ maw piˇ tuˬ gʼa dawˇ nyi ve yoˬ. Ngaˬ hui awˬ pon ceh tiˉ maˇ gʼa dawˇ nyi. (Gaˍ 6:10; Heˍ 10:24, 25) Ngaˬ hui awˬ viˉ awˬ nyi htaꞈ yehˬ miˉ hpaw piˇ leh ngaˬ hui mui kuiˬ loˍ ve hkʼe ca ve kʼo, ngaˬ hui shu awˬ pon dawˇ nyi piˇ chehˇ ve yoˬ. (Hpi 2:3, 4) Hpawnˬ daꞈ lonˉ hkʼaw ngaˬ hui awˬ chawˇ awˬ suhˉ awˬ suhˉ ca gʼa ve yoˬ. Hpawnˬ daꞈ ve maˇ tanˬ sheˍ htaˇ, hpawnˬ daꞈ ve hpehˇ˗oˬ htaˇ, sha gʼuˇ awˬ caˇ htaˇ ngaˬ hui maˇ shiˍ daꞈ sheˍ ve chaw geh tawˇ yaw daꞈ cawˇ ve yoˬ. (2 Kawˇ 6:13) Ngaˬ hui gʼa yaw daꞈ ve chaw lehˬ ngaˬ hui ve co co taiˍ taiˍ ve awˬ chawˇ hpehꞈ la tuˬ yoˬ hehˉ. A yeˇ uiˍ jaˇ ve lehˬ ngaˬ hui teˇ gʼaˇ leh teˇ gʼaˇ haꞈ daꞈ ve htaꞈ shu gʼa mawˬ htaˇ, yawˇ hui kaꞈ ngaˬ hui geh teˇ geh Yaˬhoˉvaˬ htaꞈ oˉ kʼoˍ pui la gaˇ ve yoˬ hehˉ.—Yoˇ 13:35.
“Haꞈ pehnˇ ve lehˬ maˇ luˬ puiˉ”! Laiˉ mvuhˇ miˬ lo laˬ ve hpawnˬ daꞈ lonˉ VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:
2019 hkʼawꞈ htaˇ, laiˉ mvuhˇ miˬ lo laˬ ve hpawnˬ daꞈ lonˉ hkʼaw, awˬ nu ve mvuhˇ miˬ lo laˬ ve awˬ viˉ awˬ nyi htaꞈ haꞈ pehnˇ ve hkʼaˬ hkʼe te hpeuꞈ maw piˇ ve le?
Yaˬhoˉvaˬ ve chaw teˇ moˍ teˇ shiˍ tiˉ hpehꞈ gʼa tuˬ aˬ htoꞈ ma te piˇ ve le?
Hkriꞈ yaˇ hkʼe haꞈ pehnˇ ve htaꞈ Uˉ peunˍ ve Kawˍmiˍtiˍ hkʼaˬ hkʼe kʼoˆ maˍ laˇ ve le?
Hpawnˬ daꞈ lonˉ hkʼaw haꞈ pehnˇ ve nawˬ hkʼaˬ hkʼe te hpeuꞈ maw gʼa tuˬ le?
Jaˬmaˬniˬ mvuhˇ miˬ leh Koˇriˇ˗aˇ Awˬ hawˉ hpawˇ ve mvuhˇ miˬ hkʼaw ve awˬ viˉ awˬ nyi tawˍ ve tsuhˇ ve gʼa hpuˇ ve htawˇ yawˇ hui haꞈ pehnˇ ve htaꞈ tawˍ piˇ maˇ gʼa tehꞈ hkʼaˬ hkʼe te hpeuꞈ maw laˇ ve le?
Ngaˬ hui aˬ htoꞈ ma te tuˬ dawˇ teh taˍ ve le?