Awˬ gʼuˇ suhˍ hpawˇ gʼa ponˬ ve—Gʼuiˬ sha leh Hkriꞈ htaꞈ awˬ bon uiˍ piˇ ve

Teˇ nyi leh teˇ nyi hkʼaw nawˬ aˬ htoꞈ ma gʼa hpuˇ ve le? Nawˬ yehˬ shehˍ hpaˇ hpehꞈ leh laiˉ ceuˬ gʼa te ve laˇ? Nawˬ mehˇ chawˇ paˍ mehˇ chawˇ ma hpehꞈ leh yehˬ kʼa awˬ pon kanˉ teˇ gʼaˇ tiˉ gʼa te ve laˇ? Maˇ heˆ leh nawˬ yaˇ nehˬ hpehꞈ leh liꞈ henˇ yehˬ ve awˬ chawˇ kʼoˆ guiˇ gʼuiˬ guiˇ laˇ ve laˇ? Nawˬ naˬ chehˇ ve maˇ heˆ leh a shaꞈ mawˇ ve laˇ? Teˇ gʼaˇ le le shoꞈ shaꞈ ve htaꞈ gʼa hpfuhˇ ve yoˬ. Hkriꞈ yaˇ laiˉ gʼaˇ shoꞈ shaꞈ ve laiˉ ceuˬ teˇ pawˆ tiˉ gʼa hpuˇ ve yoˬ. Yaꞈ hkʼaˇ, shoꞈ shaꞈ ve chi teˇ hpaˍ ponˬ laˇ tuˬ Yaˬhoˍvaˬ ga laˇ tuˬ yoˬ tehꞈ ngaˬ hui shiˍ ve yoˬ.—2 Kawˇ 4:16-18.

Chi teˇ hkui ngaˬ hui shoꞈ shaꞈ ve aˬ htoꞈ ma gʼa hpuˇ chehˇ ve Yaˬhoˉvaˬ shiˍ ve yoˬ. Ngaˬ hui chi hkʼe shiˍ htaˇ awˬ gʼaˇ gʼa jaˇ. Ngaˬ hui ka tiꞈ yeˬ leh yeunˇ hkanˍ ve yawˇ awˬ hpfuhˇ shiˍ ve yoˬ. Ngaˬ hui awˬ pon daꞈ ve laiˉ ceuˬ Yaˬhoˍvaˬ gu teh taˍ laˇ ve yoˬ. (Yrm 29:11, 12) Yeˍsuˆ htawˇ ngaˬ hui teˇ gʼaˇ le le htaꞈ a yeˇ yuˬ laˇ ve yoˬ. Ngaˬ hui Hkriꞈ yaˇ ve awˬ vuiˬ te htaˇ Yeˍsuˆ kʼoˆ ve “ngaˬ naw hui geh hkʼaˬ htaˆ kaꞈ chehˇ tuˬ yoˬ.” Ngaˬ hui yonˬ gʼa ve yoˬ. (Maꞈ 28:20) Awˬ guˇ suhˍ hpawˇ Gʼuiˬ sha ve mvuhˇ mi ngaˬ hui htaꞈ ponˬ laˇ ve htaꞈ dawˇ nyi ve kʼo, ngaˬ hui dawˇ law kuiˬ hkʼa tawˍ lehˆ mawˬ gʼa leh ngaˬ hui beˬ ve lawˇ ve gʼa hpuˇ htaˇ ngaˬ hui coˇ caˬ leh yeunˇ hkanˍ tuˬ yoˬ.—Roˉ 8:19-21.

Mvuhˇ haw lonˉ gaˬ la paˇ neˇ htaˇ Yeˍsuˆ htaꞈ ceh tiˉ nyi taˍ sheˍ!—Awˬ gʼuˇ suhˍ hpawˇ Gʼuiˬ sha ve mvuhˇ miˬ hkʼaw nawˬ hui gʼa tuˬ ve daꞈ ve awˬ ceuˬ VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:

• Aˬ htoꞈ ma te chaw yaˇ ve a shaꞈ Gʼuiˬ sha dawˇ teh taˍ ve hkʼe maˇ hpehꞈ ve le? Yaꞈ hkʼaˇ hkʼaˬ hkʼe hpehꞈ ve le?

• Yaˬhoˉvaˬ geh ka tiꞈ yeˬ ve chaw awˬ gʼuˇ suhˍ hpawˇ yawˇ hui ve a shaꞈ hkʼaˬ hkʼe hpehꞈ tuˬ le?

• Awˬ lawn chi hkʼaˬ hkʼe hpehꞈ la gʼa tuˬ le?

• Gʼuiˬ sha ka tiꞈ te taˍ ve hkʼaˬ ve teˇ lawn nawˬ dawˇ law taˍ chehˇ ve le?