Hkriꞈ yaˇ ve a shaꞈ teꞈ hkʼaˇ
Beˆ maˍ laˇ ve lehˬ Yaˬhoˉvaˬ ngaˬ hui htaꞈ haꞈ ve tehꞈ hpeuꞈ maw laˇ ve
Beˆ maˍ laˇ ve kʼoˆ gaˇ ve lehˬ cuˇ yiˍ peꞈ laˇ ve yoˬ. Chi hkʼoˆ kaꞈ, jawꞈ maˍ ve leh ciˍ yanˍ ve htaꞈ kaꞈ kʼoˆ gaˇ ve yoˬ. Yaˬhoˉvaˬ haꞈ yuˬ ve hkʼaw ngaˬ hui oˉ kʼoˍ pui gʼa tuˬ, yawˇ ngaˬ hui htaꞈ beˆ maˍ laˇ ve yoˬ. (Roˉ 12:1; Heˍ 12:10, 11) Teˇ pawˆ pawˆ kʼo, beˆ maˍ laˇ ve lehˬ ngaˬ hui naˬ tuˬ te laˇ ve yoˬ. Yaꞈ hkʼaˇ, ngaˬ hui na yuˬ ve kʼo, ngaˬ hui cawˇ ve awˬ ceuˬ te gʼa leh Gʼuiˬ sha ngaˬ hui htaꞈ awˬ bon naꞈ laˇ tuˬ yoˬ. (Tawˇ 10:7) Beˆ maˍ piˇ ve chaw leh beˆ maˍ laˇ ve htaꞈ haꞈ yuˬ ve chaw lehˬ aˬ htoꞈ ma htaꞈ tawnˇ taˍ cawˇ ve le?
Beˆ maˍ piˇ ve chaw. Nyi haꞈ shaˉ paˍ, awˬ pa awˬ e, leh awˬ nu ve chaw Yaˬhoˉvaˬ htaꞈ henˇ yuˬ gʼa ve yoˬ. Shu htaꞈ beˆ maˍ piˇ htaˇ haꞈ pehnˇ ve leh nuˇ nehˬ ve hkʼaw gʼa maˍ piˇ ve yoˬ. (Yrm 46:28) Beˆ maˍ piˇ ve lehˬ hehnˇ jaˇ ve htawˇ kuiˬ lawꞈ cawˇ lawꞈ ve leh haꞈ pehnˇ ve hkʼaw gʼa te ve yoˬ.—Tiˇ 1:13.
Beˆ maˍ laˇ ve htaꞈ haꞈ yuˬ ve chaw. Beˆ maˍ laˇ ve hkʼaˬ hkʼe hpawˇ gʼa ve maˇ kʼoˆ, ngaˬ hui haꞈ yuˬ leh laꞈ haˉ gʼaꞈ te cawˇ ve yoˬ. (Tawˇ 3:11, 12) Ngaˬ hui maˇ biˇ ve chaw hpehꞈ ve pa taw beˆ maˍ laˇ ve htaꞈ gʼa keunˍ ve yoˬ. Teˇ pawˆ pawˆ kʼo, beˆ maˍ laˇ ve laiˉ hkʼaˇ hpawˇ lo laˬ ve yoˬ. Liꞈ hpu hkʼaw leh Hkriꞈ yaˇ awˬ moˍ hpawnˬ daꞈ ve hkʼaw laˬ ve yoˬ hehˉ. Maˇ heˆ leh teˇ hpaˍ hpaˍ kʼo, suhˉ jehˬ piˇ ve awˬ moˍ geh gʼa ve yoˬ. Ngaˬ hui beˆ maˍ laˇ ve htaꞈ haꞈ yuˬ leh gʼaꞈ te ve kʼo, ngaˬ hui ve a shaꞈ daꞈ la leh co co taiˍ taiˍ ve a shaꞈ kaꞈ gʼa tuˬ yoˬ.—Tawˇ 10:17.
‘Yaˬhoˉvaˬ lehˬ yawˇ haꞈ ve chaw htaꞈ maˍ piˇ ve’ VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:
Awˉ lawˉ htaˇ Hkeh˗nawn ve a shaꞈ hkʼaˬ hkʼe hpehꞈ ve le? Leh awˬ hkʼawꞈ nawˉ htaˇ hkʼaˬ hkʼe hpehꞈ la ve le?
Yaˬhoˉvaˬ haꞈ pehnˇ ve hkʼaw beˆ maˍ piˇ ve yawˇ hkʼaˬ hkʼe gʼa ve le?
Yaˬhoˉvaˬ beˆ maˍ laˇ ve htaꞈ haꞈ yuˬ tuˬ henˇ sheˍ
Yawˇ ve hpehꞈ laˬ jaw ve awˬ lawn ngaˬ hui htaꞈ aˬ htoꞈ ma maˍ laˇ ve le?